Koloniko Diiŋ Ndɔɔ 24:1-27
24 Chɛhowasi wa wɔsilaŋ la ŋɔmmɛu mbo simnuŋ masaa, nduyɛ mbo chii wɔsilaŋ 40 o masaleŋ choo Chulusalɛm. Kala ndɔ ndoo nɔ diolaŋ ni aa Sibiya, fulaa Biaa-siɛba.
2 Mi Chɛhowasi hiau lachi a nyɛ bɛnda Chɛhowa o hɔl lo tosaa, o palɛi Chɛhoyada wana soliaa lasalaa ve niŋ kpou.
3 Mi Chɛhoyada yil ndu laanduaa a ŋiɔɔŋ, nduyɛ mbo vialu puaa a waŋ laanduaa.
4 Nduyɛ, Chɛhowasi wa a yeemɛi le mbo miŋgi chiɛi Chɛhowa wo toosiaa.
5 Le hei, mbo chuuŋgiaa wanaa soliaa lasalaa a Livaiya naapilɛ, mbo dimul nda aa: “La kɔ o chieeŋ bɛndoŋ o Chuda niŋ, mi la bii Isɔluɛiya kpou kanioŋ* o ba, le waa chiɛi Mɛlɛka nyaa bɛɛndiaa iwɔsi o iwɔsi. Nduyɛ, la kɔ tosa ndi chɔ chɔ.” Kɛ Livaiya tosa ndi chɔ chɔ le.
6 Okoŋ, mi masaa veelu Chɛhoyada, masa wanaa soliaa lasalaa, mbo nyuna ndu aa: “Vɛ a dimullɔ Livaiya le ma kuɛ Chuda a Chulusalɛm, ma kɔ huŋ a chuuŋgiaa diandaa Muuse, buɛi Chɛhowa wo dimi wo le? Chuuŋgiaa hoo Isɔluɛiya nɔ ni ma yɔŋgu le tɛndii Mɛlɛkaa.
7 Kanifuule, Atalaya wana lanɔ dɛnɛ wɔɔŋ koŋ, mi puaa nduaa kɔ luɛi o chiɛi Mɛlɛka tonyaa niŋ, ma soliŋ nyɛm diandaŋ wa o chiɛi Chɛhowa wo niŋndoŋ kpeku le Baal sooluuwo.”
8 A mɛɛ masaa dimi yɛ, ma toosiaa kɔfoo, okoŋ ma kɛsi ndu o dio le luɛiyɔɔ o chiɛi Chɛhowa wo.
9 Okoŋ kɔɔli, ma yɔŋ diomndeŋ o Chuda niŋ a o Chulusalɛm niŋ kpou, le mi waŋnda hiŋ a toolu diandaa Chɛhowa wo, o Muuse buɛi Mɛlɛka tonyaa dimul Isɔluɛiya o pollo niŋ le ma yɔŋgu wo.
10 Okoŋ, mi laŋgbaa kalla a waŋnda kpou duaunuŋ nyaale. A wa hunɔɔ a toolula ndalaŋ ma wou o kɔfoo niŋ. A lo tosaa lende haaa mbo pia cha.*
11 Teleŋ o teleŋ Livaiya ndaa chua pɛ kɔfoo ma yoo masaa, okoŋ ma saaluŋ maa kanioŋ cho leniŋ tau, wana poonyiaa le masaa a wana mala masa wanaa soliaa lasalaa wo hiŋ a pɛi kɔfoo. Okoŋ kɔɔli, a miŋgi ndu pila o fondaŋ ndɔɔ. Nuaa ndaa tosa lepaa o lepaa ni, nduyɛ ma sɔla kanioŋ tau tau.
12 Okoŋ, mi masaa nda Chɛhoyada chua kaniŋ muŋ, ma ke wanaa wa hɔlteŋ le wali wa tosaŋndo o chiɛi Chɛhowa wo wa. Okoŋ ma paawa* wanaa sial poutaŋ nda, a wanaa chaa nyɔɔŋ tuuliaa a laba wa, le chiɛi Chɛhowa wo miŋgioo toosiaa. Nduyɛ, ma paawa vɛlɛ wanaa tosa wallo a chiliŋndoŋ vɛlɛ a chiliŋuŋ siaŋaŋ nda,* le chiɛi Chɛhowa wo miŋgioo toosiaa.
13 Mi wanaa wa wallo chilaŋnda kandu wallo, nduyɛ wallo wa hiouwɔɔ lachi a tosaŋndo o nɛi chɔmaa ndaa bɛŋgu. Ma miŋgi chiɛi Mɛlɛka tonyaa toosiaa, mbo simnuŋ o kala poŋ maa paandu.
14 Dimioo nuaa ma chii wallo, ma huŋ a kaniŋ lo woŋ naa masaa nda Chɛhoyada chua. Ma soliŋ muŋ kpeku ma toosiaa nyɛm laandoŋ le chiɛi Chɛhowa wo, latulu a nyɛm laandoŋ le wallo, nyɛm laandoŋ le salalaŋ solioo, taalalaŋ, vɛlɛ a nyɛm laanduŋ nda toosiaa a kooliiye vɛlɛ a kanii humbuei yoŋ. Nduyɛ o palɛi Chɛhoyada ve niŋ kpou, mi ndaa soli salala luamaa laŋ lepaa o lepaa o chiɛi Chɛhowa wo.
15 Mi Chɛhoyada yuuwa kudɛɛ, nduyɛ mbo hini kɔl. O wa wɔsilaŋ 130 mbo wu.
16 Okoŋ ma kumbu ndu o Chiee Deeve Wo naa nda kumbu masaa wa, kanifuule mbo tosa sɔɔŋ kɛndɔŋ o Isɔluɛi niŋ, nduyɛ ndoo nɔ bɛɛleŋ le Mɛlɛka tonyaa a chiɛi ndɔɔ.
17 Mɛɛ Chɛhoyada vi, mi laŋgbaa kalla o Chuda niŋ huŋ ma beŋ masaa wulaŋ, nduyɛ mi masaa yaŋ nda nilaŋ.
18 Okoŋ kɔɔli, ma mal chiɛi Chɛhowa, Mɛlɛka finyaa ndaa mamaa, ma kandu suŋgbuma iyɔm nda simi waŋ,* vɛlɛ a piɔmnda sooluuwo. Le hei, mi Mɛlɛka duaunuŋ tumbe o kala kala a Chuda vɛlɛ a Chulusalɛm le haki nda tosa wo.
19 Mi Chɛhowa hiau lachi a wanaa suaa le ndu wa yɔŋndo o nda lo, le ma mala nda ma muliŋ o ndu lo. Ma hiau lachi a nda silaa, kɛ a yeŋ nda lani le.
20 Mi nyina Mɛlɛkaa tual Sɛkalaya, po Chɛhoyada wana soliaa lasalaa choo, mbo sim waŋnda choo mbo dimul nda aa: “Nyɛ Mɛlɛka tonyaa dimi wo cho hoo ni, ‘Le yɛɛnɛ nya cho yɛ sawala Chɛhowa laŋ tɛɛmbuuwo? La cho batiuwaa sɔla le. Le mɛɛ nya mal Chɛhowa yɛ, ndu bɛɛ cho nya malɔɔ.’”
21 Kɛ ma yii ndu dumbu,* nduyɛ ma vii vii ndu a poutaŋ o luŋ chiɛi Chɛhowa wo, a mɛɛ masaa dimi yɛ.
22 Kɛ Masaa Chɛhowasi loonuŋ a kaala lo lechoo Chɛhoyada finya ndɔ* chɔm ndu wo le, mbo dii po ndɔɔ. Mɛɛ po ndɔ koŋ wa wuoo, mbo dimi aa: “Maa Chɛhowa chɔ nyɛ ŋ tosa wo mbo kilul num yamɛi.”
23 O wɔsioo kandɔŋndo, mi puaa chɔuwaa Siiliaŋnda kɔ chiŋalaŋ Chɛhowasi a sɔŋgɔɔ, ma del Chuda a Chulusalɛm choo. Okoŋ ma diu diu laŋgbaa ndaa kalla kpou, ma kuandu nyɛm ndaŋ kpou ma yoo masaa le Damasikɔɔ.
24 Mi che bɛɛ puaa chɔuwaa Siiliaŋnda ve a bɔɔ le, kɛ mi Chɛhowa mal puaa chɔuwaa wa kaŋ kunda bɛndoo wa nda o ba, le mɛɛ nda mal Chɛhowa Mɛlɛka finyaa ndaa mamaa yɛ. Le hei, ma* tusi Chɛhowasi nyɛpalaa bɛndoo choo.
25 Mɛɛ nda miiŋguŋ (kanifuule mi ndaa yɔŋul ndu tau tau*), mi buɛiyaa nduaa yii ndu dumbu le mɛɛ o diu diu puaa* Chɛhoyada wa yɛ, wana soliaa lasalaa. O wa o ndu lo kpele ma dii ndu. Mɛɛ o vi, ma kumbu ndu o Chiee Deeve Wo. Kɛ a kumbu ndu o fondaŋnda nda kumbu masaa waa laŋ te.
26 Wanaa yii ndu dumbu wa cho haa ni: Sabadi po Simiaati wo, chua Amɔnaitiinɔɔ, a Chɛhosabadi po Similuiti wo, chua Mowabaitiinɔɔ.
27 Sɔɔŋ cho a puaa nduaa okɔɔ woŋ, a sɔɔŋ bɔɔbɔɔ nda dimi a ndu okɔɔ woŋ, vɛlɛ a mɛɛ o miŋgi chiɛi Mɛlɛka tonyaa toosiaa yɛ, sɔɔŋ muŋ kpou cho ŋ poonyiaa o yau lakona masaa waa niŋ. Nduyɛ mi Amasaya po ndɔ miiŋgu o masaleŋ choo o foofo ndɔɔ.
Tɛɛsiaalaŋ
^ Ɔɔ “wolioŋ.”
^ Ɔɔ naapum, “haaa mi wana o wana yɔŋgu.”
^ Ɔɔ “sala.”
^ Ɔɔ “kapaa wa.”
^ Tofa Tɛɛsiaa.
^ Ɔɔ “ defoo”
^ Koŋ cho ni, finyaa Sɛkalaya.
^ Koŋ cho ni, Siiliaŋnda.
^ Ɔɔ “ma mɛi ndu a naala bɔɔbɔɔ.”
^ Ɔɔ “po.” Naapum kpɔnda koŋ nda sim le bɛɛleŋ.
