Koloniko Diiŋ Ndɔɔ 25:1-28
25 Amasaya wa wɔsilaŋ 25 mbo simnuŋ masaa, nduyɛ mbo chii wɔsilaŋ 29 o masaleŋ choo Chulusalɛm. Kala ndɔ ndoo nɔ diolaŋ ni aa Chɛhowadaŋ, wana waa Chulusalɛm.
2 Mbo hiau lachi a nyɛ bɛnda Chɛhowa o hɔl lo tosaa, kɛ o ve a kɔl ndɔɔ kpou le.
3 Dimioo nuaa Amasaya sɔla kpaayaa o masale ndɔleŋ niŋ, mbo diu diu buɛiyaa nduaa dii finya ndɔ wa.
4 Kɛ o diu puaa ndaa le, kanifuule lende Sawala Mɛlɛka ke Muuse laŋ la dimi ni. Mi Chɛhowa dimi aa: “Finyaa nɔ ma sɔla piɔmndo le nyɛ chuauwaa ndaa tosa wo le. Nduyɛ, chuauwa bɛɛ nɔ ma sɔla piɔmndo le nyɛ finyaa ndaa tosa wo le. Kɛ wana o wana nɔ mbo sɔla piɔmndo le haki ndɔɔ.”
5 Nduyɛ mi Amasaya chuuŋgiaa waŋnda Chuda naapilɛ, mbo simi nda a bolii ndɛi layuŋguei vɛlɛ a masaa ndaa. Masaa apum waŋnda waapilɛ wa nda o ba bɛŋgu ni, apum yɛ waŋnda kɛmɛ, le yuŋgu Chuda wo a yuŋgu Bɛŋjamiŋ ndo kpou. Puaa wa wɔsilaŋ chɔŋ 20 haaa kɔ kɛ wa, mbo poonyiaa nda diolaŋ. Puaa o chɔm kaŋ nda wa 300,000. A wa a bɛɛndiaŋ le chɔuwo, nduyɛ ndaa chaa baltaŋ vɛlɛ a boola puaa chɔuwa soliŋndo kpeku nyɛkɛndɛi.
6 Okoŋ kɔɔli, mbo piandu puaa chɔuwaa kpaayaa bɛnduaa o Isɔluɛi niŋ 100,000 a kaniŋ humboŋ talɛŋndoŋ 100.*
7 Kɛ mi buɛi Mɛlɛka tonyaa huŋ naa ndu chua mbo dimul ndu aa: “Oo fallo masaa, chɛl mi puaa chɔuwaa Isɔluɛiya kuɛ a nya latulu le, kanifuule Chɛhowa cho a Isɔluɛi latulu le, nduyɛ o cho latulu a wana o wana fula Ifiluem te.
8 Kɛ kɔ a ba num, ma nɔ kɔl simulaa le chɔuwo. Te o cho koŋ te, Mɛlɛka tonyaa cho tosa ma del yaamɔɔnɔ numndo o ba. Kanifuule, Mɛlɛka nɔ kpaayaa le mbo mala, nduyɛ mbo tosa mi wana del.”
9 Okoŋ, mi Amasaya nyuna buɛi Mɛlɛka tonyaa aa: “Kɛ I chii niŋ talɛŋndoŋ 100 yɔŋgu le puaa chɔuwa Isɔluɛi. Vɛɛ keŋ cho yɛ niko wa?” Mi buɛi Mɛlɛka tonyaa muli aa: “Chɛhowa nɔla mbo ke num tau mbo hiou bɛɛ keŋ.”
10 Le hei, mi Amasaya miŋgi puaa chɔuwaa fula Ifiluem nda o la nda lo. Okoŋ ma miiŋguŋ a kɔl tuu bɛndoo.
11 Mi Amasaya simul kɔl, mbo sim puaa nduaa chɔuwa lachi ma kua o Kpoloŋ Ihɛllo, nduyɛ mbo kɔ diu diu puaa chɔuwa Sɛyaa 10,000.
12 Mi puaa Chuda bii puaa chɔuwa 10,000 yoomu. Ma hel a nda o pouwo tullo, ma nyindu nda, mi nda kpou deli, okoŋ mi dialuŋ ndaŋ sɛŋiŋ.
13 Kɛ puaa chɔuwaa hiŋ Amasaya malaa le ma liilaa ndu o chɔuwo mbo miŋgi nda o nda lo wa, ma kei chieeŋ bɛndoŋ o Chuda niŋ delɔɔ choo, chɔŋ Sameeliaa haaa kɔ Bɛti-hɔlɔŋ. Nduyɛ, ma diu diu waŋnda 3,000, okoŋ ma kuaŋnuŋ a nyɛm ndaŋ tau.
14 Mɛɛ Amasaya kɔ chii Idɔmaitiiya yomɔɔ o chɔuwo, mbo chua mɛlɛkaa waŋnda Sɛyaa, mbo kɔ simi nda le ndupila. Okoŋ, mbo kandu mɛlɛkaa kaŋ sooluuwo, mbo soli salala luamaa laŋ o nda lo.
15 Le hei, mi Chɛhowa duaunuŋ tumbe o kala kala a Amasaya. Okoŋ mbo viam wana suaa le ndu wo, mbo kɔ nyuna ndu aa: “Le yɛɛnɛ ŋ cho yɛ mɛlɛkaa waŋnda haa tolɔɔ kɔɔli, mɛlɛkaa nɔla ma piŋi wanaa ndaa num o ba le wa?”
16 Mɛɛ o wa suɛi o ndu lo, mi masaa nyuna ndu aa: “Baa naŋ yulu num iso ni le ma wa wana silaa le masaa? Pɛŋgi! Baa a yeema ma dii num?” Okoŋ, mi wana suaa le Mɛlɛka wo kuaŋnuŋ. Kɛ tuupa mbo kua, mbo dimi aa: “I sina maa Mɛlɛka chii kɛɛsiaa le mbo tɛɛmbuu num le nyɛ ŋ tosa hoo, nduyɛ ma kɛɛ le nilaŋ yaŋɔɔ o sila nuu wo.”
17 Mɛɛ Amasaya, masaa le Chuda suukaŋ a wanaa nduaa silaa, mbo yɔŋ yooŋgoo o Chɛhowasi lo, masaa le Isɔluɛi. Chɛhowasi yɛ, finya ndɔ wa Chɛhowahasi ni, po Chehu wo. Mbo dimul ndu aa: “Huŋ miŋ sɔŋga naa ŋiɔɔŋ!”*
18 Mi Chɛhowasi, masaa le Isɔluɛi yɔŋ Amasaya, masaa le Chuda yooŋgoo aa: “Mi bil ŋyɔɔ Lebanɔŋ yɔŋ yɔm sida wo Lebanɔŋ yooŋgoo aa, ‘Ke po nuu chua numndo le mbo wa laa ndɔ.’ Kɛ, visi biyaa Lebanɔŋ lo hiouwɔɔ, mbo kei bil ŋyɔɔ niɔu niɔu.
19 A dimi aa, ‘Ya* yem Idɔm ni.’ Lelaŋ ŋ cho yoŋgaa kiolɔɔ ni le mi waŋnda saŋgala num. Kɛ o bɛnda ma waŋnuŋ o chiɛi num lemasaa niŋ. Le yɛɛnɛ ŋ yeema yɛ ma tusi numpila a waŋnda Chuda nyɛpalaa choo?”
20 Kɛ Amasaya yeŋ ndu lani le, kanifuule Mɛlɛka tonyaa ndoo chii niŋ nda yamɛi kilul, mbo mal nda yaamɔɔwaa ndaa o ba, le mɛɛ nda tol mɛlɛkaa waŋnda Idɔm kɔɔli yɛ.
21 Okoŋ, mi Chɛhowasi masaa le Isɔluɛi kua Bɛti-siɛmɛsi o Chuda niŋ, mbo kɔ chiŋalaŋ Amasaya masaa le Chuda a sɔŋgɔɔ.
22 Kɛ mi waŋnda Isɔluɛi yam waŋnda Chuda. Le hei, mi wana o wana nyaanuŋ o ndu lo.*
23 Mi Chɛhowasi masaa le Isɔluɛi kɔ bii Amasaya masaa le Chuda, po Chɛhowasi wo Bɛti-siɛmɛsi. Chɛhowasi yɛ, finya ndɔ wa Chɛhowahasi* ni. Mbo pial kpakioo Chulusalɛm, chɔŋ o Dio Kpaki Ifiluem Ndo kɔ o Dio Kpakioo o Sɔŋgioo. Fondɛi o pɛl le wa bandei le nɛiyo 584.*
24 Mbo chua kooliiyoŋ, kaniŋ humboŋ, nyɛm laanduŋ wa o chiɛi Mɛlɛka tonyaa niŋndoŋ kpou, ŋ Obɛdi-idɔm wa hɔlteŋ ndoŋ, a ŋ wa o fondaŋ nda kɛsi nyɛm baa kalaŋ o chiɛi lemasaa niŋndoŋ mbo kuaŋnuŋ a muŋ. Mbo kua vɛlɛ a waŋnda o biyɔɔ niŋ. Okoŋ, mbo miiŋgu Sameeliaa.
25 Mi Amasaya po Chɛhowasi wo, masaa le Chuda chii vɛlɛ wɔsilaŋ 15 o piɔm Chɛhowasi po Chɛhowahasi wo kɔɔli, masaa le Isɔluɛi.
26 Sɔɔŋ cheleŋ cho a Masaa Amasaya okɔɔ chɔŋ o kandɔŋndo haaa o mɛɛlulaŋ ndoŋ, ŋ cho o Yau nda poonyiaa konaa a Masaa keeku Chuda a Isɔluɛiya okɔɔ wo niŋ.
27 Chɔŋ a teleŋ Amasaya mulul Chɛhowa kɔɔ wo, ma yii ndu dumbu* Chulusalɛm, nduyɛ mbo nyaanuŋ Lakisi. Kɛ ma viam ndu puaa kɔɔli Lakisi, ma kɔ dii ndu loŋ.
28 Ma heelu ndu o suaa choo ma miŋgi ndu pila, nduyɛ ma kɔ kumbu ndu naa nda kumbu finyaa nduaa mamaa o Chuda niŋnda.
Tɛɛsiaalaŋ
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Ɔɔ “miŋ chiikaŋ hɔlla a hɔlla.”
^ Hibuluiye, “Num.”
^ Hibuluiye, “o tɛndiila ndalaŋ niŋ.”
^ Ndu nda veelu vɛlɛ ni aa Ahasaya.
^ Tofa Tɛɛsiaa B14.
^ Ɔɔ “defoo.”
