Koloniko Diiŋ Ndɔɔ 27:1-9
-
Chotam, masaa le Chuda (1-9)
27 Chotam wa wɔsilaŋ 25 mbo simnuŋ masaa, nduyɛ mbo chii wɔsilaŋ 16 o masaleŋ choo Chulusalɛm. Kala ndɔ ndoo nɔ diolaŋ ni aa Chɛlusia, chua Sadɔki wo.
2 Mbo hiau lachi a nyɛ bɛnda Chɛhowa o hɔl lo tosaa, mɛɛ Yusaya finya ndɔ tosa yɛ. Kɛ ndu luei o chiɛi Chɛhowa wo niŋ naa ndoo nɔ le luɛiyɔɔ le wa le. A koŋ kpou, waŋnda wa wɔ hiouwɔɔ lachi a sɔɔŋ wɔɔŋndoŋ tosaa.
3 Mbo toosiaa dio kpaki chiɛi Chɛhowa wo amaluaŋ, nduyɛ mbo taŋgul kpakioo Ofɛɛ.
4 Mbo taŋgul vɛlɛ chieeŋ bɛndoŋ o tanda ŋpemboo o Chuda niŋ, nduyɛ mbo taŋgul vɛlɛ fondaŋndaŋ a kpakila kala kalalaŋ, vɛlɛ a chiɛila choo choo laŋ o fondaŋnda iyɔm ndaŋ.
5 Mbo kɔ chiŋalaŋ masa Amɔnaitiiya a sɔŋgɔɔ, nduyɛ mbo yam nda. O wɔsi koŋ niŋ, mi Amɔnaitiiya ke ndu kaniŋ humboŋ talɛŋndoŋ 100,* witiiyoŋ kilolaŋ 1,700,* vɛlɛ a baliiyoŋ kilolaŋ 1,300.* Nduyɛ, ma ke ndu vɛlɛ nyɔɔŋ muŋ o wɔsi diiŋ ndɔɔ a o yaa ndɔɔ niŋ.
6 Mi Chotam hiau lachi a kpaayaa sɔlaa, kanifuule mbo kɛɛsiaŋ o kɔl le kɔlaŋ o nɛila Chɛhowa Mɛlɛka ndɔɔ laŋ choo.
7 Sɔɔŋ cheleŋ cho a Chotam okɔɔ woŋ, chɔula o sɔŋga laŋ vɛlɛ a sɔɔŋ o tosa woŋ kpou, ŋ cho ŋ poonyiaa o Yau Masaa le Chuda a le Isɔluɛi yo niŋ.
8 Chotam wa wɔsilaŋ 25 mbo simnuŋ masaa, nduyɛ mbo chii wɔsilaŋ 16 o masaleŋ choo Chulusalɛm.
9 Okoŋ mi Chotam wu,* ma kumbu ndu o Chiee Deeve Wo, naa nda kumba finyaa nduaa mamaa wa. Nduyɛ, mi Ehaasi po ndɔ miiŋgu o masaleŋ choo o foofo ndɔɔ.
Tɛɛsiaalaŋ
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Hibuluiye, “kɔɔ tuuwo 10,000.” Tofa Tɛɛsiaa B14.
^ Hibuluiye, “kɔɔ tuuwo 10,000.” Tofa Tɛɛsiaa B14.
^ Hibuluiye, “ma yambu Chotam nda finyaa nduaa mamaa.”