Koloniko Diiŋ Ndɔɔ 28:1-27
28 Ehaasi wa wɔsilaŋ 20 mbo simnuŋ masaa, nduyɛ mbo chii wɔsilaŋ 16 o masaleŋ choo Chulusalɛm. O tosa nyɛ bɛnda Chɛhowa o hɔl lo mɛɛ Deeve finya ndɔ mama tosa yɛ le.
2 Kɛ mbo tual nɛila masaa keeku o masaleŋ choo Isɔluɛi ya laŋ kɔɔli, nduyɛ mbo toosiaa pɛŋ piɔmaa ŋchiliŋnda le Baal sooluuwo.
3 Okoŋ kɔɔli, mbo soli salala luamaa laŋ o Kpoloŋ Po Hinɔm Ndo* niŋ, nduyɛ mbo soli puaa nduaa sala o yiŋndeŋ niŋ. Sɔɔŋ nɔɔlɛi kaala Chɛhowa tou Isɔluɛiya lachi laŋ laa tosa woŋ, mbo muliŋ muŋ tosaa.
4 Mbo hiau lachi a salalaŋ solioo vɛlɛ a salalaŋ lomɔɔ o fondaŋnda filioŋndaŋ, o pemboŋ choo, a o yɔm bɛndu kɛ kɛ bɛŋgu.
5 Okoŋ, mi Chɛhowa Mɛlɛka ndɔɔ mal ndu masaa le Siiliaa o ba mbo yam ndu. Nduyɛ mbo biu biu wanaa nduaa a hɔbɛi, mbo kua a nda o biyɔɔ niŋ Damasikɔɔ. Mi Mɛlɛka mal ndu vɛlɛ masaa le Isɔluɛi o ba, mbo diu wanaa nduaa diuwo pila.
6 O paaleŋ le pilɛ niŋ kpe, mi Pika, po Luɛmaliaa wo diu waŋnda 120,000 o Chuda niŋ, le mɛɛ nda kɛɛ Chɛhowa, Mɛlɛka finyaa ndaa mamaa yɛ. Nduyɛ nda kpou, puaa kɔl simulaa nda wa ni.
7 Mi Sikili, kuubanɔ chɔuwo o yuŋgu Ifiluem ndo choo dii Maasɛya po masaa a Asiluɛkam, wana wa chiɛi lemasaa hɔlteŋ ndo, vɛlɛ a Ɛlikana, wana wa masaa ikɛi yo.
8 Okoŋ kɔɔli, mi Isɔluɛiya biu biu wanayaŋ ndaŋ, waŋ laanduaa, puaa a chuaa laanduaa 200,000, ma kua a nda o biyɔɔ niŋ. Nduyɛ ma kuandu vɛlɛ nyɛm ndaŋ tau tau, ma kuaŋnuŋ a muŋ Sameeliaa.
9 Kɛ Odɛdi, wana suaa le Chɛhowa wo wa loŋ. Okoŋ, mbo kua puaa chɔuwaa wa kɔlaŋ Sameeliaa wa lachi, mbo dimul nda aa: “La yaŋ nilaŋ! Le mɛɛ Chɛhowa, Mɛlɛka finyaa naa mamaa dɔɔnuŋ tumbe a waŋnda Chuda yɛ o mal nya nda o ba ni. Nduyɛ mi la diu nda a kɔl tuu bɛndoo, mi Mɛlɛka pila sina a ndi okɔɔ.
10 Lelaŋ, la yeema mi la siiŋguu waŋnda Chuda a Chulusalɛm buɛiyaa nyaa piaanduaa a buɛiyaa nyaa laanduaa. Kɛ nya bɛɛ la sina nuaa maa hakioo le nya tosa a Chɛhowa Mɛlɛka nyaa le?
11 Lelaŋ la yaŋ ya nilaŋ! Wanayaŋ nyaŋ nya biu biu le kɔlaŋ a nda o chɛleŋ niŋnda, la miŋgi nda. Kanifuule, Chɛhowa dɔɔnuŋ tumbe o kala kala a nya.”
12 Le hei, mi masaa o Ifiluem niŋ kuel wanaa wa fulaa o chɔuwo wa. Masaa kaŋ cho yɛ haa ni, Asaluaya po Chɛhohanaŋ ndo, Bɛluakaya po Mɛsilɛmoti wo, Chɛhɛsikaya po Sialum ndo, a Amasa po Hadilai yo.
13 Ma dimul nda aa: “La huŋ a wanaa nya bii kaŋ nda nanuŋ te. Kanifuule, keŋ cho tosa miŋ tosa hakioo a Chɛhowa. Haki naŋ tosa wo cho niŋ tau, nduyɛ Mɛlɛka dɔɔnuŋ tumbe a Isɔluɛiya. Nyɛ nya kɛɛsiaa hoo le tosaa wo cho tosa mi haki naa chɔɔluŋ lechoo.”
14 Le hei, mi puaa chɔuwa mal wanaa nda biu biu wa a nyɛm nda puŋga woŋ waŋ banaa a wanaa wa loŋ nda kpou o ba.
15 Okoŋ, mi puaa nda hɛli wa chaŋ ma mala wanaa nda biu biu kaŋ nda. Ma hɛli nyɛla chuɛɛnaŋndaŋ o nyɛm nda puŋga woŋ tɛɛŋ le wanaa wa fondo wa. Ma ke nda nyɛla chuɛɛnaŋndaŋ, kɔwɛilaŋ,* nyɛdiaa, mɛŋndaŋ, vɛlɛ a chuɛima suunaŋ ndaŋ. Okoŋ kɔɔli, ma heelu wanaa ndaa nɔla lɛ kɔlaŋ te wa o sofɛliaa choo, ma miŋgi nda o wanayaŋ ndaŋ lo Chɛluiko, o chiee mawauwo. Nduyɛ ma miiŋguŋ Sameeliaa.
16 A teleŋ koŋ, mi Masaa Ehaasi nyuna masaa wa Asiiliaa wa le malaa.
17 Mi Idɔmaitiiya kɔ del vɛlɛ waŋnda Chuda choo a sɔŋgɔɔ, nduyɛ ma kua a nda o biyɔɔ niŋ.
18 Mi Filitiaŋnda bɛɛ kɔ del chieeŋ bɛndoŋ Siɛfila vɛlɛ a Nɛkɛbi choo a sɔŋgɔɔ, ma bii Bɛti-siɛmɛsi, Aichalɔŋ, Kɛdɛlɔti, Sokɔ a chieeŋ balu ndu woŋ, Timina a chieeŋ balu ndu woŋ, vɛlɛ a Kimisɔ a chieeŋ balu ndu woŋ. Okoŋ, ma kila chaltaŋ loŋ.
19 Mi Chɛhowa tusi Chuda toolo le Ehaasi, masaa le Isɔluɛi, kanifuule ndu tosa ni mi waŋnda Chuda tosa hakioo, nduyɛ ma kɛɛ le lo lechoo wo chɔmndo o Chɛhowa lo.
20 Mi Tikilati-pilinɛsa, masaa le Asiiliaa huŋ chiŋalaŋ ndu, mbo tusi ndu nyɛpalaa choo, kɛ o mala ndu le.
21 Mi Masaa Ehaasi sooluu nyɛm wa o chiɛi Chɛhowa wo niŋndoŋ, a nyɛm wa o chiɛi lemasaa niŋ a o chiɛila waŋ banaa niŋndoŋ, mbo ke masaa le Asiiliaa. Kɛ a koŋ kpou, o mala ndu le.
22 A teleŋ Masaa Ehaasi wa bɛɛ o nyɛpalaa niŋndo, mbo hiau lachi a hakioo tosaa, nduyɛ mbo kɛɛ le lo lechoo wo chɔmndo o Chɛhowa lo.
23 Mbo kandu mɛlɛkaa waŋnda Damasikɔɔ sooluuwo, wanaa yem ndu o chɔuwo wa. Mbo wa dimioo aa: “Le mɛɛ mɛlɛkaa masaa le Siiliaa mala nda yɛ, I cho salaa soli o mɛlɛkaa ndaa lo, le halikpeŋ ma mala ya.” Kɛ mi mɛlɛkaa haa tosa mi ndu a waŋnda Isɔluɛi kpou del o kpundɔɔ niŋ.
24 Okoŋ kɔɔli, mi Ehaasi chuuŋgiaa nyɛm laanduŋ wa o chiɛi Mɛlɛka tonyaa niŋndoŋ naapilɛ, mbo pesi pesi muŋ kpou. Mbo kiindiaa diola chiɛi Chɛhowa wo, mbo toosiaa bandula luamaa lasalalaŋ le ndupila o sɔŋgi kɛ kɛ o Chulusalɛm niŋ.
25 Mbo toosiaa vɛlɛ fondaŋnda filioŋndaŋ o chieeŋ bɛndoŋ o Chuda niŋ kpou, le salala luamaa laŋ solioo o mɛlɛkaa cheleŋnda lo. Le hei, mbo tɛɛmbuu Chɛhowa, Mɛlɛka finyaa nduaa mamaa kɔllo.
26 Sɔɔŋ cheleŋ cho a Ehaasi okɔɔ woŋ, nyɛ o nyɛ o tosa chɔŋ o kandɔŋndo haaa o mɛɛlulaŋ, ŋ cho ŋ poonyiaa o Yau Masaa le Chuda a le Isɔluɛi yo niŋ.
27 Okoŋ mi Ehaasi wu,* ma kumbu ndu Chulusalɛm, kɛ o cho o fondaŋnda nda kumbu masaa le Isɔluɛi laŋ te. Nduyɛ, mi Hɛsikaya po ndɔ miiŋgu o masaleŋ choo o foofo ndɔɔ.
Tɛɛsiaalaŋ
^ Tofa Tɛɛsiaa, “Kɛhɛna.”
^ Ɔɔ “samtalaŋ.”
^ Hibuluiye, “ma yambu Ehaasi nda finyaa nduaa mamaa.”
