Koloniko Diiŋ Ndɔɔ 29:1-36
29 Hɛsikaya wa wɔsilaŋ 25 mbo simnuŋ masaa, nduyɛ mbo chii wɔsilaŋ 29 o masaleŋ choo Chulusalɛm. Kala ndɔ ndoo nɔ diolaŋ ni aa Abaicha, chua Sɛkalaya wo.
2 Mi Hɛsikaya hiau lachi a nyɛ bɛnda Chɛhowa o hɔl lo tosaa, mɛɛ Deeve finya ndɔ mama tosa yɛ.
3 Paŋgii tasei o wɔsi tase o simnuŋ masaa wo niŋ, mbo kuumbuu diola wa o chiɛi Chɛhowa wo laŋ, mbo miŋgi laŋ toosiaa.
4 Okoŋ, mbo chuuŋgiaa Livaiya a wanaa soliaa lasalaa naapilɛ o luŋndo ba paaleŋ le chaŋ ndo.
5 Mbo dimul nda aa: “Nya Livaiya, la yaŋ ya nilaŋ. La dindi nyapila, nduyɛ mi la dindi chiɛi Chɛhowa Mɛlɛka finyaa nyaa mamaa, okoŋ mi la soli nyɛ o nyɛ cho o nɔɔlɛi o fondaŋ diandaa.
6 Kanifuule, mi finyaa naa mamaa kɛɛ le lo lechoo wo chɔmndo o Chɛhowa Mɛlɛka naa lo, nduyɛ ma tosa nyɛ bɛnda ndu o hɔl te wo. Ma mal Chɛhowa, ma kɛɛ le chiɛi ndɔɔ bɛɛleŋ kioo, nduyɛ ma mulul ndu kɔɔ.
7 Ma kiindiaa vɛlɛ diolaŋ o toŋgoo le luɛiyɔɔ o chiɛi Mɛlɛkaa niŋ, nduyɛ ma nyuumuu lambuilaŋ. Ma pɛŋgi nyɛm chuŋ kɛndɔŋ a salala luamaa laŋ lomɔɔ o fondaŋ diandaa le Mɛlɛka Isɔluɛiya.
8 Le hei, mi Chɛhowa duaunuŋ tumbe tau a Chuda vɛlɛ a Chulusalɛm, nduyɛ mbo tusi nda nyɛpalaa choo. Wana o wana tuei a ndi okɔɔ, mi siooŋnde bii ndu nduyɛ mbo hɔŋ huiye, a mɛɛ nya cho ndi suŋ suŋ chɔɔ a hɔlta nyalaŋ pɛɛŋ yɛ.
9 Ma diu diu finyaa naa mamaa a muɛi faŋnde, nduyɛ mi puaa naa, chuauwaa naa laanduaa, vɛlɛ a laandaa naa kua o biyɔɔ niŋ le hei.
10 Lelaŋ, I kɛɛsiaŋ o kɔl le mi yii kpemaa a Chɛhowa, Mɛlɛka Isɔluɛiya, le halikpeŋ mi tumbe o dɔɔnuŋ a naa wo pɔlul.
11 Lelaŋ puaa niaa, o cho teleŋ pɛŋgiaa le cho hoo le. Kanifuule Chɛhowa hɛli nya le mi la sim ndu lachi, mi la wa wanaa nduaa walla, okoŋ mi la soli salala luamaa laŋ o ndu lo.”
12 Le hei, mi Livaiya haa chaŋ le wallo. Nda cho ni: Mahati po Amasai yo nda Chowɛɛ po Asaluaya wo, fulaa o pulale Kohati leŋ choo. Kisi po Abidi wo nda Asaluaya po Chɛhalɛlɛɛ wo, fulaa o pulale Meluali leŋ choo. Chowaa po Sima wo nda Idɛŋ po Chowaa wo, fulaa o pulale Kɛɛsiɔŋ ndeŋ choo.
13 Similua nda Chɛyuɛɛ, fulaa o yuŋgu Ɛlisafaŋ ndo choo. Sɛkalaya nda Mataniya, fulaa o yuŋgu Asafi wo choo.
14 Chɛhayɛɛ nda Simɛi, fulaa o yuŋgu Hamaŋ ndo choo. Siɛmaya nda Yuusiɛɛ, fulaa o yuŋgu Chɛdutɔŋ ndo choo.
15 Okoŋ ma chuuŋgiaa wanayaŋ ndaŋ naapilɛ, ma dindi ndapila. Nduyɛ ma huŋ le chiɛi Chɛhowa wo dindioo, a mɛɛ masaa hivul nda yooŋgu Chɛhowa wo yɛ.
16 Okoŋ, mi wanaa soliaa lasalaa luɛi o chiɛi Chɛhowa wo niŋ le ndu dindioo. Nduyɛ, ma sooluu nyɛm nɔɔlɛi wa o chiɛi Chɛhowa wo niŋndoŋ o luŋ chiɛi Chɛhowa wo. Okoŋ kɔɔli, mi Livaiya chua muŋ ma kua a muŋ o Kpoloŋndo Kidilɔŋ.
17 O paŋgii tasei niŋ malɔ le pilɛ nda kandu chiɛi Mɛlɛkaa dindioo ni. O paale ŋɔmaa leŋ choo, ma fuuluu o toŋgo chiɛi Chɛhowa wo. Ma dindi chiɛi Chɛhowa wo le palɛi i ŋɔmaa. Nduyɛ ma chii ndu dindi o paale 16 choo o paŋgii tasei niŋ.
18 Okoŋ kɔɔli, ma kua naa Masaa Hɛsikaya chua, ma dimul ndu aa: “Ŋ chii chiɛi Chɛhowa wo kpou dindi, nduyɛ miŋ dindi bandu luamaa lasalaa a nyɛm ndɔŋ laandoŋ kpou, vɛlɛ a tibii* beedii* cho o yɔŋgaŋ o Mɛlɛka lo wo a nyɛm ndɔŋ laandoŋ kpou.
19 Nduyɛ, nyɛm laanduŋ Masaa Ehaasi soli o chiɛi Mɛlɛkaa niŋ teleŋ o wa o masaleŋ choo mbo kɛɛ le lo lechoo wo chɔmndo woŋ, ŋ chii muŋ bɛɛndiaa, nduyɛ miŋ dindi muŋ. Ŋ cho o bandu luamaa lasala Chɛhowa wo hɔlndɔ.”
20 Mi Masaa Hɛsikaya pena chɔnɔŋ puŋ, mbo chuuŋgiaa waŋ banaa o chioo niŋ naapilɛ, ma kua o chiɛi Chɛhowa wo.
21 Ma huŋ a nauwaa towaa a ŋɔmmɛu, saa konduaa a ŋɔmmɛu, saa piaanduaa fɔŋnduaa a ŋɔmmɛu, a chuiŋaa piaanduaa a ŋɔmmɛu le sala hakioo le chiɛi lemasaa, chiɛi Mɛlɛkaa, a le waŋnda Chuda. Okoŋ, mbo dimul wanaa soliaa lasalaa, a fula o yuŋgu Elɔŋ ndo choo wa, le ma soli nda salaa o bandu luamaa lasala Chɛhowa wo choo.
22 Ma dii nauwa, mi wanaa soliaa lasalaa chua kooma ndaŋ, ma fasaŋiaa maŋ o bandu luamaa lasalaa choo. Ma dii vɛlɛ saa konduaa, ma fasaŋiaa kooma ndaŋ o bandu luamaa lasalaa choo. Nduyɛ ma dii vɛlɛ saa fɔŋnduaa, ma fasaŋiaa kooma ndaŋ o bandu luamaa lasalaa choo.
23 Okoŋ kɔɔli, ma huŋ a chuiŋaa piaanduaa nda hiŋ le sala hakioo solioo wa masaa a waŋnda kpou lachi, ma handu nda balaŋ choo.
24 Mi wanaa soliaa lasalaa dii nda, ma soli sala hakioo a kooma ndaŋ o bandu luamaa lasalaa choo le mi Isɔluɛiya kpou sɔla malɔɔ lahakioo, kanifuule mi masaa dimi maa sala luamaa a sala hakioo nɔ mbo wa le Isɔluɛiya kpou.
25 Mɛɛ teleŋ tiŋ hiou, mbo simi Livaiya o chiɛi Chɛhowa wo a kumbula ŋchiliŋndaŋ o laba, nyɛm chaaŋ iyooŋ, vɛlɛ a towalaŋ. O tosa hei a mɛɛ Deeve nda Kaadi wana cha yilaŋndoŋ le masaa wo, vɛlɛ a Netaŋ wana suaa le Mɛlɛka wo dimi yɛ. Kanifuule, Chɛhowa o ba sawaa hoo fula ni sanaa a wanaa suaa le ndu wa.
26 Nduyɛ Livaiya wa isisi a nyɛm chaaŋ Deeve woŋ, mi wanaa soliaa lasalaa wa a bululaŋ.
27 Mi Hɛsikaya dimul nda le ma soli sala luamaa o bandu luamaa lasalaa choo. Mɛɛ nda kandu salaa solioo, ma kandu chondoŋ solioo le Chɛhowa, vɛlɛ a bululaŋ hɔŋndo. A wa nɛi chɔmaa Deeve, masaa le Isɔluɛi yɔŋgu a nyɛm chaaŋ ndɔŋ okɔɔ wo tolɔɔ kɔɔli.
28 Mi waŋnda kpou baŋ wulaŋ teleŋ nda wa chondoŋ solioo nduyɛ ma hɔŋ bululaŋ ndo. Ma hiau lachi a ndi tosaa haaa ma chii sala luamaa soli.
29 Dimioo nuaa ma chii salaa soli, mi masaa a wanaa wa a ndu latulu wa kpou baŋ wulaŋ ma fuuluu hɔlla lɛŋ.
30 Mi Masaa Hɛsikaya a waŋ banaa dimul Livaiya le ma saŋgala Chɛhowa a chonduŋ Deeve nda Asafi woŋ, wana cha yilaŋndoŋ ndo. Ma saŋgala ndu o chondoŋ niŋ a nyaale bɛndu bɛndoo, nduyɛ ma baŋ wulaŋ ma fuuluu hɔlla lɛŋ.
31 Okoŋ, mi Hɛsikaya dimul nda aa: “Mɛɛ nya chii nyapila dindi le Chɛhowa yɛ, la huŋ a salalaŋ vɛlɛ a salala balika melaa laŋ o chiɛi Chɛhowa wo.” Mi waŋnda kandu hunɔɔ a salalaŋ vɛlɛ a salala balika melaa laŋ. Mi wana o wana kɔl ndɔɔ nyindu ndu huŋ a salala luamaa laŋ.
32 Chɔluaa nda hiŋ le salala luamaa laŋ solioo wa cho haa ni: nauwa 70, saa konduaa 100, a saa piaanduaa fɔŋnduaa 200. Nda kpou ma yɔŋgu nda o Chɛhowa lo maa sala luamaa.
33 Nduyɛ ma huŋ a nauwa 600 a saa vɛlɛ a chuiŋnda 3,000, le salala diandaa laŋ solioo.
34 Kɛ wanaa soliaa lasalaa ve a bɔɔ le chɔluaa wa le salala luamaa laŋ nda kpou yaulaŋ solioo le. Le hei, mi wanayaŋ ndaŋ Livaiya mala nda haaa ma chii, nduyɛ haaa mi wanaa soliaa lasalaa tuaa dindi ndapila. Kanifuule, Livaiya ndaa hiou wa yekeŋ a dindiŋndo okɔɔ mbo hiau wanaa soliaa lasalaa.
35 Nduyɛ salala luamaa laŋ a chuɛima salala kɔl nyulu laŋ la waŋnuŋ tau tau, mɛɛ salala mamuɛi laŋ le salala luamaa laŋ solioo bɛɛ la wa yɛ. Mɛɛ nuaa nda miŋgi vɛlɛ kandɔɔ walta wa tosaŋndo paandu o chiɛi Chɛhowa wo niŋndaŋ tosaa ni.
36 Le hei, mi Hɛsikaya a waŋnda kpou duaunuŋ nyaale le nyɛ Mɛlɛka tonyaa tosal waŋnda wo, kanifuule mi sɔɔŋ muŋ kpou keleŋa yɔŋnɔŋ chɔ chɔ.
