Koloniko Diiŋ Ndɔɔ 30:1-27
-
Hɛsikaya bii Bɔŋaŋ Hiouwɔɔ Choo Wo (1-27)
30 Mi Hɛsikaya yɔŋ yooŋgoo o waŋnda Isɔluɛi a Chuda lo kpou. Nduyɛ, mbo poonyiaa pɛŋ yaulaŋ mbo yɔŋ o yuŋgu Ifiluem a Manaasɛ wo lo, le ma hiŋ o chiɛi Chɛhowa wo Chulusalɛm le Bɔŋaŋ Hiouwɔɔ Choo Wo biyɔɔ le Chɛhowa, Mɛlɛka Isɔluɛiya.
2 Kɛ mi masaa, waŋ banaa, a waŋnda kpou o Chulusalɛm niŋ kɛɛsiaa le Bɔŋaŋ Hiouwɔɔ Choo Wo biyɔɔ o paŋgii diiŋ nduɛi niŋ,
3 le mɛɛ ndaa nɔla ndu biyɔɔ a teleŋ ndaa bii ndu paandu wo le yɛ. Kanifuule, wanaa soliaa lasalaa ndaa dindiŋ nda ve a bɔɔ le, nduyɛ waŋnda ndaa chuuŋgiaŋ ndɔ Chulusalɛm te.
4 Mi masaa a waŋnda kpou hɛnaŋ a kɛɛsiaa hoo.
5 Ma kɛɛsiaa le ma yonda o Isɔluɛi niŋ kpou, chɔŋ Biaa-siɛba kɔ Daŋ, le mi waŋnda hiŋ Chulusalɛm ma bii Bɔŋaŋ Hiouwɔɔ Choo Wo le Chɛhowa, Mɛlɛka Isɔluɛiya. Kanifuule, ndaa chuuŋgiaŋ ndɔ naapilɛ le bɔŋaŋndo hoo biyɔɔ a mɛɛ i cho i poonyiaa yɛ le.
6 Okoŋ, mi wanaa nda viam nda kua a yaulaŋ Isɔluɛi a o Chuda niŋ kpou. Mi masaa poonyiaa o yaulaŋ ndaŋ niŋ aa: “Nya waŋnda Isɔluɛi, la miiŋgu Chɛhowa, Mɛlɛka Ebilaham, Aase, a Isɔluɛi yo o ibuŋ, le mi ndu bɛɛ miiŋgu wanaa masaa Asiiliaa mɛi haa yoomu wa o ibuŋ.
7 La wa maa finyaa nyaa mamaa a wanayaŋ nyaŋ kɛɛ Chɛhowa, Mɛlɛka finyaa nyaa mamaa lo lechoo wo chɔmndo wa le. Le hei, mbo tusi nda nyɛpalaa choo, wana o wana che nda pɛ siooŋnde bii ndu a mɛɛ nya cho chɔɔ yɛ.
8 La tosa bolle kalaleŋ maa finyaa nyaa mamaa le. La tusiŋ Chɛhowa o ba bɛŋgu, mi la hiŋ o chiɛi ndɔ o dindi lefafɛɛŋ ndo, mi la piɛi Chɛhowa Mɛlɛka nyaa, le halikpeŋ mi tumbe o dɔɔnuŋ a nya wo pɔlul.
9 Te la miiŋgu Chɛhowa o ibuŋ pɛ, wanaa kuɛ a nya o biyɔɔ niŋnda cho wanayaŋ nyaŋ a puaa nyaa nyiɛɛye tuiinɔŋ, nduyɛ ma mal nya mi la miiŋgu o lɛŋndeŋ ndeŋ niŋ, kanifuule Mɛlɛka inyiɛɛyo Chɛhowa Mɛlɛka nyaa cho ni. Nduyɛ te la miiŋgu ndu o ibuŋ pɛ, o cho nya kɛɛ le.”
10 Mi wanaa nda viam nda kɔ balu o chieeŋ bɛndoŋ o lɛŋnde Ifiluem ndeŋ a lɛŋnde Manaasɛ leŋ niŋ, nduyɛ ma kua pɛŋ o lɛŋnde Sɛbulɔŋ ndeŋ niŋ. Kɛ mi waŋnda chua nda chɔdɔ, nduyɛ ma wa nda mamɔɔ.
11 A koŋ kpou, mi waŋnda apum o yuŋgu Asia, Manaasɛ, a Sɛbulɔŋ ndo choo tusiŋ ma huŋ Chulusalɛm.
12 Ba Mɛlɛka tonyaa wa a waŋnda Chuda latulu, le ma tosa nyɛ Chɛhowa dimul nda sanaa a masaa vɛlɛ a waŋ banaa wo.
13 Mi waŋnda faŋga bɛndoo chuuŋgiaŋ Chulusalɛm le Bɔŋaŋ Beedii Nɔ Yiisii* Leniŋ Te Wo biyɔɔ o paŋgii diiŋ nduɛi niŋ.
14 Okoŋ ma faaŋiaa bandula luamaa lasalala wa Chulusalɛm ndaŋ, a bandula luamaala nyɛm chuŋ kɛndɔŋ kpou, ma viau laŋ o Kpoloŋndo Kidilɔŋ.
15 Ma dii chɔluaa le sala Bɔŋaŋ Hiouwɔɔ Choo Wo o paale 14 leŋ choo, o paŋgii diiŋ nduɛi niŋ. Mi siɔmbulaŋ la bii wanaa soliaa lasalaa a Livaiya. Le hei, ma dindi ndapila, nduyɛ ma huŋ a salala luamaa laŋ o chiɛi Chɛhowa wo.
16 Ma chua fondaŋnda ndalaŋ a mɛɛ Sawala Mɛlɛka ke Muuse, buɛi Mɛlɛka tonyaa laŋ la dimi yɛ. Okoŋ, mi wanaa soliaa lasalaa fasaŋiaa kooma nda bii Livaiya o ba waŋ o bandu luamaa lasalaa choo.
17 Wanaa bɔɔbɔɔ wa o faŋga koŋ tɛɛŋ a ndaa dindi wɔ ndapila le wa. Nduyɛ, Livaiya ndaa nɔ kalaŋndo ni le ma dii chɔluaa le salala Bɔŋaŋ Hiouwɔɔ Choo Wo, le wanaa ve a diandaa le wa kpou dindioo le Chɛhowa.
18 Wanaa bɔɔbɔɔ wa nda tɛɛŋ a ndaa dindi wɔ ndapila le wa, taama taama a fula o yuŋgu Ifiluem, Manaasɛ, Isaka, a Sɛbulɔŋ ndo choo wa. Kɛ a koŋ kpou, ma dia nyɛdiaa Bɔŋaŋ Hiouwɔɔ Choo Wo. Nduyɛ, hei ve i chɛlaŋ a nyɛ wa o poonyiaa wo le. Kɛ mi Hɛsikaya piɛi le nda. Mbo dimi aa: “Maa Chɛhowa, Mɛlɛka ikɛndɔɔ mal waŋnda haa haki.
19 Wana o wana bɛɛndiaa pɛ kɔl ndɔɔ le Chɛhowa Mɛlɛka tonyaa, Mɛlɛka finyaa nduaa mamaa nuuviaa, maa o mal ndu haki mi che bɛɛ o cho o diandaa a mɛɛ kɛɛsiaa cho a diondɔɔ okɔɔ yɛ le.”
20 Mi Chɛhowa yaŋ piɛile Hɛsikaya leŋ nilaŋ, mbo mal waŋnda haki.
21 Mi Isɔluɛiyaa wa Chulusalɛm nda bii Bɔŋaŋ Beedii Nɔ Yiisii Leniŋ Te Wo le palɛi i ŋɔmmɛu a kɔl kɛndɛ bɛndoo. Nduyɛ Livaiya a wanaa soliaa lasalaa wa Chɛhowa saŋgalaa lepaa o lepaa, ma wa nyɛm chaaŋ lɔɔ choo choo kpeleŋ le Chɛhowa.
22 Okoŋ, mi Hɛsikaya dɛɛniaa Livaiyaa wa Chɛhowa piɛiyo a taasi wa kpou kɔltaŋ. Le palɛi i ŋɔmmɛu, a wa nyɛdiaa dioo, ma soli salala kɔl nyulu laŋ, nduyɛ ma mel Chɛhowa, Mɛlɛka finyaa ndaa mamaa balikaa.
23 Okoŋ kɔɔli, mi waŋnda kpou kɛɛsiaa le ma hiou lachi a bɔŋaŋndo hoo biyɔɔ le palɛi i ŋɔmmɛu vɛlɛ. Nduyɛ, ma bii ndu le palɛi ŋɔmmɛu cheleŋ a kɔl kɛndɛ.
24 Mi Hɛsikaya masaa le Chuda yɔŋgu tooloo nauwaa towaa 1,000 a saa 7,000. Mi waŋ banaa bɛɛ yɔŋgu tooloo nauwaa towaa 1,000 a saa 10,000. Nduyɛ wanaa soliaa lasalaa wa hunɔɔ tau tau ma dindi ndapila.
25 Mi waŋnda Chuda, wanaa soliaa lasalaa, Livaiya, wanaa fula o Isɔluɛi niŋnda, latulu a mialaa fula o lɛŋnde Isɔluɛi leŋ niŋnda vɛlɛ a mialaa wa ichali Chuda wa kpou hiau lachi a nyaaloo dɔɔnɔŋndo.
26 Nyaale bɛndoo wa Chulusalɛm. Nduyɛ, chɔŋ a teleŋ Sɔlɔmɔŋ po Deeve wo, masaa le Isɔluɛi wa o masaleŋ choo wo, le pilɛ bɛɛ i waa lende ndii yɔŋnuŋ ndɔ Chulusalɛm te.
27 O mɛɛlulaŋ kpɔŋ, mi Livaiyaa wa wanaa soliaa lasalaa wa chaŋ ma duau waŋnda sala. Mi Mɛlɛka tuɛi nda diom, nduyɛ mi piɛile ndaleŋ le fuuluu o fondaŋ ndɔ diandaa o choo choo niŋ.
Tɛɛsiaalaŋ
^ Ɔɔ “Bulu Nɔ Lɛvɛŋ.”
