Koloniko Diiŋ Ndɔɔ 31:1-21
31 Dimioo nuaa ma chii hei tosa, mi Isɔluɛiyaa wa loŋ nda kpou kua o chieeŋ bɛndoŋ o Chuda niŋ, ma pesi pesi suŋgbuma nda toosiaa a poutaŋ ndaŋ, vɛlɛ a suŋgbuma iyɔm nda simi le sooluuwo waŋ.* Nduyɛ, ma pesi fondaŋnda filioŋndaŋ vɛlɛ a bandula luamaa lasalalaŋ o Chuda niŋ, Bɛŋjamiŋ, Ifiluem, vɛlɛ a o Manaasɛ niŋ kpou. A lo tosaa lende haaa ma basu laŋ tɛɛ. Okoŋ, mi Isɔluɛiya kpou miiŋguŋ o chieeŋ bɛndoŋ niŋ, ma kɔ chalnuŋ o nyɛm kɛŋ ndaŋ choo.
2 Okoŋ kɔɔli, mi Hɛsikaya handu wanaa soliaa lasalaa a Livaiya o fondaŋnda ndalaŋ. Mbo ke kunda wanaa soliaa lasalaa a kunda Livaiya walta nda nɔ ma tosa laŋ. Nda ndaa nɔ le salala luamaa laŋ a salala kɔl nyulu laŋ solioo ni, wallo tosaa le Mɛlɛka, vɛlɛ a balikaa ndu mello o diola kpaki luŋnda* Chɛhowa laŋ.
3 Mi masaa yɔŋgu nyɛm ndɔŋ ŋ tiŋ le salala luamaa laŋ solioo. Laŋ la cho ni, la ndaa soli idii a ichɔl taŋ, salala luamaala ndaa soli o Palɛi Pɛŋgiɛi choo laŋ, la ndaa soli o bɔŋaŋnda paŋguŋ sɛnɛiyoŋ choo laŋ, a la ndaa soli o bɔŋaŋnda cheleŋ choo laŋ, a mɛɛ i cho i poonyiaa o Sawala Chɛhowa Laŋ niŋ yɛ.
4 Okoŋ kɔɔli, mi masaa dimul wanaa wa ichali Chulusalɛm nda le ma ke wanaa soliaa lasalaa a Livaiya nyɛ cho le nda wo, le halikpeŋ ma tosa wallo a mɛɛ sawala Chɛhowa laŋ la dimi yɛ.
5 Dimioo nuaa mi Isɔluɛiya tuɛi nyɛ masaa dimi wo, ma yɔŋgu nyɔɔŋ tau tau: komɔɔla taselaŋ, muɛima sɛnɛiyaŋ, chuɛiyaŋ, liaaŋ, vɛlɛ a nyɛ o nyɛ nda kou o chiɔɔŋ ndaŋ niŋ. Nyɛ o nyɛ nda nɔ, ma huŋ a o tɔ ndɔɔ, nduyɛ ŋ wa tau tau.
6 Mi waŋnda Isɔluɛi a Chuda, a wa ichali o chieeŋ bɛndoŋ Chuda niŋnda bɛɛ chua o tɔ ndɔɔ o nauwaa ndaa a o saa ndaa choo, ma huŋ a ndu. Nduyɛ, ma chua vɛlɛ o tɔ ndɔɔ o nyɛm diandaŋ wa ŋ yɔŋgaŋ o Chɛhowa Mɛlɛka ndaa lo woŋ choo ma huŋ a ndu. A lo hunɔɔ a muŋ tei ma diu muŋ bembelaŋ tau tau.
7 O paŋgii yaa nduɛi niŋ nda kandu hunɔɔ a kela ndalaŋ ni ma dii bembelaŋ, nduyɛ o paŋgii ŋɔmmɛu ve niŋ, ma chii wallo.
8 Mɛɛ Hɛsikaya a waŋ banaa hiŋ ma cha toolula waŋnda hiŋ ndaŋ, ma saŋgala Chɛhowa, nduyɛ ma duau wanaa nduaa sala, nda cho yɛ Isɔluɛiya ni.
9 Mi Hɛsikaya nyuna wanaa soliaa lasalaa a Livaiya a toolulaŋ okɔɔ.
10 Okoŋ mi Asaluaya masa wanaa soliaa lasalaa, fulaa o yuŋgu Sadɔki wo choo dimul ndu aa: “Chɔŋ a teleŋ waŋnda kandu hunɔɔ a toolulaŋ o chiɛi Chɛhowa wo niŋndo, waŋnda cho dioo ma pum, nduyɛ nyɛdiaa cho chuwɔɔ le. Kanifuule, Chɛhowa dɔu wanaa nduaa sala, lelaŋ nyɛdiaa lo o hɔbɛi nuaa ni.”
11 Le hei, mi Hɛsikaya dimul nda le ma bɛɛndiaa lumuila nda kɛsi wolɔɔlaŋ ndaŋ* o chiɛi Chɛhowa wo niŋ. Okoŋ, ma bɛɛndiaa laŋ.
12 Waŋnda wa hiouwɔɔ lachi a hunɔɔ a toolula ndalaŋ, o tɔ ndɔɔ, vɛlɛ a nyɛm diandaŋ. Nduyɛ Konanaya Livainɔɔ wa nyɔɔŋ muŋ kpou hɔlteŋ ni, nda Simɛi pɔmbɔ ndɔ.
13 Chɛhayɛɛ, Asasaya, Nahati, Asahɛɛ, Chɛluimɔti, Chosabadi, Iliɛɛ, Isimakaya, Mahati, a Bɛnaya wa laŋgbaa kalaa wa Konanaya nda Simɛi pɔmbɔ ndɔ malaa ni, a mɛɛ Masaa Hɛsikaya dimi yɛ. Nduyɛ Asaluaya wa chiɛi Mɛlɛka tonyaa hɔlteŋ ni.
14 Koluɛ po Iminaa wo, Livainɔɔ o wa ni. Ndu wa dio kpakioo ba paaleŋ le chaŋ ndo mandaa ni vɛlɛ a kela waŋnda yɔŋgu a kɔl ndaa kpou le Mɛlɛka tonyaa laŋ hɔlteŋ ni. Ndu ndoo piɔu kela waŋnda ndaa yɔŋgu o Chɛhowa lo laŋ ni, vɛlɛ a nyɛm hiou diondɔɔ woŋ.
15 Wanaa wa wallo Koluɛ o ba bɛŋgu o chieeŋ bɛnduŋ wanaa soliaa lasalaa niŋ o foofola ndalaŋ nda cho haa ni: Idɛŋ, Miniamiŋ, Chɛsuaa, Siɛmaya, Amaluiya, a Siɛkanaya. Nda ndaa piɔu toolula waŋnda yɔŋgu laŋ wanayaŋ ndaŋ tɛɛŋ kpeŋkpeŋ ni, wana pɔmbɔ ni, wana bɛndu ni.
16 O fulawɔ o haa kɔɔli, mi ndaa piɔu vɛlɛ nyɔɔŋ muŋ wanaa nda poonyiaa diolaŋ o lepula a yuŋgula ndalaŋ nda. Nda cho ni, puaa ndaa huŋ walta ndalaŋ tosaa lepaa o lepaa o chiɛi Chɛhowa wo niŋ a kundala ndalaŋ nda, vɛlɛ a puaa ndaa nɔ wɔsilaŋ chɔŋ la yaa haaa kɔ kɛ wa.
17 Ma poonyiaa wanaa soliaa lasalaa a Livaiyaa wa wɔsilaŋ chɔŋ 20 haaa kɔ kɛ wa diolaŋ o lepula a yuŋgula ndala leboltaŋ, vɛlɛ a walta ndalaŋ.
18 Ma poonyiaa Livaiya kpou diolaŋ o lepula a yuŋgula ndalaŋ, chuauwaa ndaa, laandaa ndaa, puaa ndaa, vɛlɛ a chuaa ndaa laanduaa. Kanifuule, ma kɛsi ndapila a diandaa le wali diandaa nda wa tosaa wo.
19 Wanaa fula o pulale Elɔŋ ndeŋ choo wa bɛɛ, koŋ cho ni, wanaa soliaa lasalaa wa ichali o fondaŋnda balu chieeŋ ndaŋ bɛndoŋ le chɔluaa diolaŋ nda, ma poonyiaa nda diolaŋ a yuŋgula ndalaŋ kpɛ kpɛ. O chieeŋ bɛndoŋ niŋ kpou, ma yulu puaa iso le ma piɔu puaa o yuŋgu wanaa soliaa lasalaa choo kpou nyɛdiaa, vɛlɛ a wana o wana nda poonyiaa diolaŋ o lepula o Livaiya tɛɛŋ.
20 Mi Hɛsikaya tosa hei o Chuda niŋ kpou. Mbo hiau lachi a tosaa nyɛ cho o kɛndɔɔ nduyɛ mbo wa sakpo Chɛhowa Mɛlɛka ndɔɔ o hɔllo. Mbo chɔm lo lechoo wo o ndu lo.
21 Wali o wali ndoo kɛɛsiaa le tosaa le Mɛlɛka ndɔɔ, o wa le wallo o chiɛi Mɛlɛka tonyaa ɔɔ a Sawala ndɔlaŋ okɔɔ, mbo tosa ndu a kɔl ndɔɔ kpou, nduyɛ mbo sɔla batiuwaa.
