Koloniko Diiŋ Ndɔɔ 32:1-33
32 Mɛɛ Hɛsikaya chii nyɛ o nyɛ Mɛlɛka dimul ndu tosa, mi Sɛnachɛluibi masaa le Asiiliaa huŋ le Chuda chiŋalaŋndo a sɔŋgɔɔ. Mbo luei chieeŋ wa ŋ taŋgulaa a kpakila kala kalalaŋ ndoŋ o piŋndo niŋ, le halikpeŋ mbo luɛi mbo kɔ bii muŋ.
2 Mɛɛ Hɛsikaya che maa Sɛnachɛluibi hiŋ le mbo del Chulusalɛm choo a sɔŋgɔɔ,
3 mbo suukaŋ a waŋ banaa vɛlɛ a puaa nduaa chɔuwa. Okoŋ, mbo kɛɛsiaa le mbo kiindiaa peela balu chioo laŋ, nduyɛ ma toolu ndu.
4 Mi waŋnda faŋga bɛndoo chuuŋgiaŋ naapilɛ, ma beŋul peela balu Chulusalɛm ndaŋ kpou. Ma dimi aa: “Ŋ yeema mi masaa o Asiiliaa niŋ hiŋ ma komal mɛŋndaŋ tau le.”
5 Okoŋ kɔɔli, mbo miŋgi kpaki wa o piɔlɛi yo taŋgul a dialuŋ fulaa, nduyɛ mbo taŋgul bandula mɛŋgɛlaa laŋ lechoo. Mbo taŋgul vɛlɛ kpaki cheleŋ o chioo kɔɔli. Mbo miŋgi vɛlɛ Bembe wa o Chiee Deeve Wo niŋndo toosiaa, nduyɛ mbo toosiaa vɛlɛ nyɛm chɔuwoŋ a boola chɔulaŋ tau tau.
6 Mbo yulu wanaa wa puaa chɔuwa bolleŋ nda iso le ma wa waŋnda chilaŋ, nduyɛ ma chuuŋgiaa nda o luŋ cho o dio kpaki chioo ikɛiyo, le mbo luei nda yoomuaŋ.* Okoŋ mbo dimul nda aa:
7 “La nɔ kɔlta simulaa laŋ, mi la kendu ŋdial. La yɔŋ isiooŋ ɔɔ mi la nyiiya le masaa Asiiliaa a faŋga bɛndu cho ndu kɔɔli wo le. Kanifuule, wanaa cho a naa latulu wa hiou a wanaa cho a ndu latulu wa.
8 Kpaaya iwana chieeyaa o tiindaŋ ni. Kɛ naa naa, Chɛhowa Mɛlɛka naa cho a naa latulu le naa malaa, nduyɛ mbo sɔŋga le naa.” Okoŋ mi diomnda Hɛsikaya, masaa le Chuda dimul waŋnda laŋ la luei nda yoomuaŋ.
9 Teleŋ Sɛnachɛluibi, masaa le Asiiliaa wa Lakisi a puaa nduaa chɔuwaa kpaayaa bɛnduaa kpou wo, mbo viam buɛiyaa nduaa Chulusalɛm o Hɛsikaya, masaa le Chuda lo, a wanaa wa o Chulusalɛm niŋnda kpou lo a yooŋgoo hoo aa:
10 “Nyɛ Sɛnachɛluibi, masaa le Asiiliaa dimi wo cho hoo ni, ‘O yɛɛnɛ nya tiindaŋ yɛ mi la wa wɔ Chulusalɛm mi che bɛɛ o cho o piŋndo niŋ?
11 Hɛsikaya cho dimioo aa: “Chɛhowa Mɛlɛka naa cho naa piŋi masaa le Asiiliaa o ba.” Baa o cho huiyo le o cho nya le nya malɔɔ mi la vi a yiaaŋ vɛlɛ a bolola vesɛilaŋ te?
12 O cho Hɛsikaya pilɔɔ hoo le faaŋiaa fondaŋnda filioŋndaŋ a bandula luamaa lasalala Mɛlɛka nyaa le? Nduyɛ mbo dimul waŋnda Chuda a Chulusalɛm aa: “Bandu luamaa lasalaa o pilɛ kpe nya nɔ ni mi la tunduŋ lachi, nduyɛ mi la soli salala luamaa laŋ lechoo.”
13 Baa la sina nyɛ ya a finyaa niaa mamaa tosal wanaa cho o lɛŋii cheleŋnde niŋnda le? Baa mi mɛlɛkaa cho o lɛŋii keŋ niŋnda nɔla pa lɛŋii ndɛi piŋi ya o ba?
14 Lɛŋii finyaa niaa mamaa tɛɛmbuu ve kpou, mɛlɛkaa ndaa o pilɛ bɛɛ nɔla nda piŋi ya o ba le. Baa la yiyaŋ pa maa Mɛlɛka nyaa nɔla mbo piŋi nya ya o ba?
15 Lelaŋ, la chɛl mi Hɛsikaya hui nya le. La duau laalaŋndo o ndu niŋ te. Kanifuule, mɛlɛka kɛ kɛ o lɛŋnde niŋ ɔɔ masɛi nɔla wanaa nduaa piŋi ya a finyaa niaa mamaa o ba le. Vɛɛ Mɛlɛka nyaa nɔla yɛ mbo piŋi nya ya o ba?’”
16 Mi buɛiyaa nduaa dimi vɛlɛ pɛŋ sɔɔŋ wɔɔŋuŋ cheleŋ a Chɛhowa, Mɛlɛka tonyaa okɔɔ, vɛlɛ a Hɛsikaya buɛi ndɔ.
17 Mbo poonyiaa yaulaŋ le Chɛhowa, Mɛlɛka Isɔluɛiya yioulaŋ, nduyɛ mbo dimi sɔɔŋ wɔɔŋndoŋ a ndu okɔɔ. Mbo dimi aa: “Mɛɛ mɛlɛkaa cho o lɛŋii cheleŋnde niŋnda nɔla wanaa ndaa piŋi ya o ba le yɛ, lende koni Mɛlɛka Hɛsikaya wo nɔla niŋ wanaa nduaa piŋi ya o ba le ni.”
18 A wa suɛi choo choo kpeleŋ o suɛi maŋgalɛi Chuuwa niŋ, le ma luei nda siooŋnde, ma nyiiya, le halikpeŋ ma bii chioo. Nduyɛ wanaa wa Chulusalɛm o kpakioo choo wa ndaa bii suɛi keŋ bila.
19 Ma suaa diomnda wɔɔŋndaŋ a Mɛlɛka waŋnda Chulusalɛm, mɛɛ nda suaa diomnda wɔɔŋndaŋ a mɛlɛkaa waŋnda o lɛŋndeŋ choo, a nda toosiaa a laba wa yɛ.
20 Kɛ mi Masaa Hɛsikaya nda Aisaya wana suaa le Mɛlɛka wo, po Amɔɔsi wo hiau lachi a piɛileŋ a hei okɔɔ. Nduyɛ, a wa chaŋndo choo choo kpeleŋ o Mɛlɛka lo le malaa.
21 Okoŋ mi Chɛhowa yɔŋ maalikɛinɔɔ, mbo huŋ basu kuubaa kpaayaa bɛnduaa a wana wa chilaŋ o dɔɔŋgɔ masaa le Asiiliaa wo niŋndo tɛɛ. Okoŋ kɔɔli, mi masaa le Asiiliaa miiŋgu o lɛŋnde ndɔleŋ niŋ a siɔmbulaŋ. Paale pilɛ mbo luɛi o chiɛi* mɛlɛka ndɔɔ niŋ. Nduyɛ, o lo loŋ mi puaa o velu wa apum huŋ dii ndu a muɛi faŋnde.
22 Le hei, mi Chɛhowa piŋi Hɛsikaya a waŋnda Chulusalɛm Sɛnachɛluibi masaa le Asiiliaa o ba. Nduyɛ mbo piŋi nda vɛlɛ wanaa tuaa o ba kpou, mbo tosa ma sɔla pɛŋgioo ba o ba fee.
23 Okoŋ kɔɔli, mi wanaa bɔɔbɔɔ chuu Chɛhowa kelaŋ Chulusalɛm, nduyɛ ma chuu Hɛsikaya masaa le Chuda nyɛm kɛndɛ kɛndɔŋ. Mi waŋnda o kaalaŋ niŋ kpou ke ndu bɛɛleŋ tau tau.
24 A teleŋ koŋ, mi Hɛsikaya del a naa, nduyɛ ndoo lo niŋ chobe mbo vi. Okoŋ mbo piɛi o Chɛhowa lo. Mbo muli piɛile ndɔleŋ, nduyɛ mbo chɔm ndu tamaseliiyo.
25 Kɛ Hɛsikaya chɔm balika melaa le kɛndɛi Mɛlɛka tosal ndu hei ve le. Le hei, mbo luɛi yoŋgaa. Mbo tosa mi Mɛlɛka duaunuŋ tumbe a ndu vɛlɛ a waŋnda Chuda a Chulusalɛm.
26 Kɛ mi Hɛsikaya tusiŋ, nduyɛ mi waŋnda Chulusalɛm bɛɛ tusiŋ. Le hei, Chɛhowa tusi lɛ nda nyɛpalaa choo o palɛi Hɛsikaya ve niŋ te.
27 Mi Hɛsikaya sul sullo pila, nduyɛ mbo fula tɔɔ tau. Mbo toosiaa chiɛila nda kɛsi nyɔɔŋ ndaŋ le ndupila, le kaniŋ humboŋ, kooliiyoŋ, pouta baa kalalaŋ, chuɛima baasam ndaŋ, boola puaa chɔuwa, a le nyɛm sɔvɛŋ cheleŋ kpou kɛsioo leniŋ.
28 Mbo taŋgul vɛlɛ chiɛila cheleŋ le nyɛdiaa, muɛima sɛnɛiyaŋ, a chuɛiyaŋ kɛsioo leniŋ. Okoŋ kɔɔli, mbo toosiaa fondaŋndaŋ le chɔluaa suu o suu kɛsioo leniŋ, vɛlɛ a fondaŋndaŋ le saa a chuiŋnda kɛsioo leniŋ.
29 Mbo sɔla chieeŋ bɛndoŋ le ndupila. Mbo sɔla saa, chuiŋnda, vɛlɛ a nauwa tau tau, kanifuule mi Mɛlɛka ke ndu nyɛm kiɔɔŋ tau.
30 Mɛŋma maa fula Kihɔŋ ba luaŋ ndo waŋ, Hɛsikaya beŋul maŋ ni, nduyɛ mbo miŋgi maŋ hɔlla sakpo ba paaleŋ le del lo o Chiee Deeve Wo. Wali o wali Hɛsikaya wa tosaa, mbo sɔla batiuwaa leniŋ.
31 Ma viam wanaa suaa le waŋ banaa o Babilɔŋ niŋnda naa ndu chua le ma nyuna ndu a tamasi yɔŋnuŋ o lɛŋndeŋ niŋndo okɔɔ. Okoŋ, mi Mɛlɛka tonyaa mal ndu le mbo tosa kɛɛsiaa a ba ndɔ, kanifuule ndoo yeema mbo tofa ndu le sinaa nyɛ cho ndu o kɔllo.
32 Sɔɔŋ cheleŋ cho a Hɛsikaya okɔɔ woŋ, vɛlɛ a mɛɛ o chɔm kaala lo lechoo wo yɛ, ŋ cho ŋ poonyiaa o yilaŋii Aisaya wanaa suaa le Mɛlɛka wo, po Amɔɔsi wo poonyiaa ve niŋ, a o Yau Masaa le Chuda a le Isɔluɛi yo niŋ.
33 Okoŋ kɔɔli, mi Hɛsikaya wu,* ma kumbu ndu o fondaŋ feke feke wa le kɔlaŋ o fondaŋnda nda kumbu puaa Deeve wa wo. Mɛɛ o vi, mi waŋnda Chuda a Chulusalɛm kpou ke ndu bɛɛleŋ tau. Okoŋ kɔɔli, mi Manaasɛ po ndɔ miiŋgu o masaleŋ choo o foofo ndɔɔ.
Tɛɛsiaalaŋ
^ Hibuluiye, “le mbo soo nda o lakɔl.”
^ Ɔɔ “maaŋ.”
^ Hibuluiye, “ma yambu Hɛsikaya nda finyaa nduaa mamaa.”
