Koloniko Diiŋ Ndɔɔ 33:1-25
33 Manaasɛ wa wɔsilaŋ 12 mbo simnuŋ masaa, nduyɛ mbo chii wɔsilaŋ 55 o masaleŋ choo Chulusalɛm.
2 Mbo tosa nyɛ bɛnda Chɛhowa o hɔl te wo. Nduyɛ kaala Chɛhowa tou waŋnda Isɔluɛi lachi laŋ, mbo tual sɔɔŋ nɔɔlɛi ndaa tosa woŋ kɔɔli.
3 Fondaŋnda filioŋnda Hɛsikaya finya ndɔ pesi pesi laŋ, mbo miŋgi laŋ taŋgul. Mbo toosiaa bandula luamaa lasalalaŋ le Baal, nduyɛ mbo toosiaa vɛlɛ suŋgbule yɔmndo* le leŋ sooluuwo. Okoŋ, mbo muliŋ nyɛm cho o choo choo niŋndoŋ kpou* wulaŋ beŋndo mbo sooluu muŋ.
4 Mbo taŋgul vɛlɛ bandula luamaa lasalalaŋ o chiɛi Chɛhowa wo niŋ. A chiɛiyo hoo okɔɔ Chɛhowa dimi ni aa: “Chulusalɛm diola nilaŋ la cho wa ni le fɛɛŋ a fɛɛŋ.”
5 Mbo taŋgul bandula luamaa lasalalaŋ le nyɛm cho o choo choo niŋndoŋ kpou, o luŋnda tiɔɔŋnda chiɛi Chɛhowa wo.
6 Mbo soli puaa nduaa sala o yiŋndeŋ niŋ o Kpoloŋ Po Hinɔm Ndo niŋ. Mbo luei balaŋ o maŋgaliaalaŋ niŋ, yawalaŋ viomɔɔ, mandeleŋ, nduyɛ mbo yulu waŋnda iso le suɛi o waŋ vilɛiya lo, vɛlɛ a wanaa dimi sɔɔŋ waa lachioŋ nda. Mbo tosa sɔɔŋ bɛnda Chɛhowa o hɔl te woŋ ŋ hɔbɛi, le ndu kɔllo tɛɛmbuuwo.
7 Mbo chua piɔm o sɛl lo, mbo luei ndu o chiɛi Mɛlɛka tonyaa niŋ. A chiɛiyo hoo okɔɔ Mɛlɛka ndoo dimul Deeve nda Sɔlɔmɔŋ po ndɔ ni aa: “Chiɛiyo hoo a Chulusalɛm ya hɛli o kaalaŋ Isɔluɛi tɛɛŋ kpou ni, le mi diola nilaŋ la wa loŋ le fɛɛŋ a fɛɛŋ.
8 Te Isɔluɛiya bii pɛ Sawala nilaŋ kpou vɛlɛ a nyɛ o nyɛ ya dimul nda le tosaa sanaa a Muuse, fɛɛŋ bɛɛ I tosa lɛ ma soli pelei o lɛŋnde ya ke finyaa ndaa mamaa leŋ niŋ te.”
9 Kɛ mi Manaasɛ hiau lachi a tosaa mi waŋnda Chuda a Chulusalɛm faŋaŋ o nɛi tonyaa choo, ma tosa sɔɔŋ wɔɔŋndoŋ mbo hiau kaala Chɛhowa ndoo tou nda lachi laŋ.
10 Mi Chɛhowa hiau lachi a suɛi o Manaasɛ lo vɛlɛ a wanaa nduaa, kɛ a yeŋ ndu lani le.
11 Mi Chɛhowa yɔŋ masaa puaa chɔuwa, a wa masaa Asiiliaa o ba bɛŋgu wa ma huŋ del Manaasɛ choo, ma bii ndu. Okoŋ ma wou ndu doluŋndoŋ, nduyɛ ma baa ndu yɔlɔŋ nda toosiaa a chiliŋii siaŋɛi yoŋ* ŋ muuŋ, ma kua a ndu Babilɔŋ.
12 Manaasɛ wa o nyɛpalaa koŋ niŋ mbo nyɔɔlu Chɛhowa Mɛlɛka ndɔɔ le malaa, nduyɛ mbo hiau lachi a tusiŋndo tau tau Mɛlɛka finyaa nduaa mamaa o hɔl.
13 Mbo hiau lachi a piɛileŋ o ndu lo, mi nyiɛɛye bii Mɛlɛka le ndu, mbo yaŋ nilaŋ o piɛile o wa ndu le malaa leŋ, mbo miŋgi ndu Chulusalɛm o masale ndɔleŋ choo. Okoŋ, mi Manaasɛ sina kɛsɛ maa Chɛhowa cho Mɛlɛka tonyaa ni.
14 Okoŋ kɔɔli, mbo taŋgul kpakioo o Chiee Deeve Wo chɔŋ Kihɔŋ ba paaleŋ le del lo o kpoloŋndo haaa o Dio Kpaki Suuwa. Mbo hiau lachi a ndu taŋgullo mbo balu Ofɛɛ silɔ, nduyɛ mbo heelu ndu filioŋ. Mbo yulu vɛlɛ puaa iso le ma wa puaa chɔuwa bolleŋ o chieeŋ nɔ kpakila kala kalalaŋ o Chuda niŋndoŋ kpou.
15 Mbo faaŋiaa mɛlɛkaa cheleŋnda, vɛlɛ a piɔmaa wa o chiɛi Chɛhowa wo niŋnda. Nduyɛ maaŋnda o taŋgul o pembuŋ chiɛi Chɛhowa wo choo laŋ kpou, vɛlɛ a Chulusalɛm, mbo tosa ma puusiaa laŋ nduyɛ ma vii vii laŋ o chioo kɔɔli.
16 Mbo miŋgi bandu luamaa lasala Chɛhowa wo toosiaa, okoŋ mbo kandu salala kɔl nyulu laŋ a salala balika melaa laŋ solioo lechoo. Mbo dimul waŋnda Chuda le ma piɛi Chɛhowa, Mɛlɛka Isɔluɛiya.
17 Mi che bɛɛ o Chɛhowa Mɛlɛka ndaa lo kinɛi waŋnda wa niŋ salalaŋ solioo ni, kɛ a wa wɔ ndi tosaa kɛ o fondaŋnda filioŋndaŋ.
18 Sɔɔŋ cheleŋ cho a Manaasɛ okɔɔ woŋ, piɛile o piɛi o Mɛlɛka ndɔɔ lo leŋ, vɛlɛ a nyɛ wanaa cha yilaŋndoŋ nda dimul ndu o diola Chɛhowa, Mɛlɛka Isɔluɛiya niŋndo, ŋ cho ŋ poonyiaa o kona masaa le Isɔluɛi niŋ.
19 Piɛile ndɔleŋ vɛlɛ a mɛɛ Mɛlɛka muli piɛile ndɔleŋ yɛ, hakila ndɔlaŋ vɛlɛ a mɛɛ o kɛɛ le lo lechoo wo chɔmndo yɛ, naa o taŋgul fondaŋnda filioŋndaŋ nda vɛlɛ a suŋgbuma iyɔm* o simi le sooluuwo waŋ, a piɔmaa o sɛl tuupa mbo tusiŋ ndo, ŋ cho ŋ poonyiaa o nyɛ wanaa nduaa cha yilaŋndoŋ nda poonyiaa wo niŋ.
20 Okoŋ mi Manaasɛ wu,* ma kumbu ndu o chiɛi ndɔɔ. Nduyɛ, mi Amɔŋ po ndɔ miiŋgu o masaleŋ choo o foofo ndɔɔ.
21 Amɔŋ wa wɔsilaŋ 22 mbo simnuŋ masaa, nduyɛ mbo chii wɔsilaŋ la tiɔɔŋ o masaleŋ choo Chulusalɛm.
22 Mbo hiau lachi a tosaa nyɛ bɛnda Chɛhowa o hɔl te wo, mɛɛ Manaasɛ finya ndɔ tosa yɛ. Mbo soli salalaŋ o piɔmaa Manaasɛ finya ndɔ sɛl la lo, nduyɛ mbo hiau lachi a nda sooluuwo.
23 Kɛ nduyɛ, o tusiŋ Chɛhowa o hɔl, mɛɛ Manaasɛ finya ndɔ ndoo tusiŋ yɛ le. Kɛ, mbo hiau lachi a sɔɔŋ wɔɔŋndoŋ tosaa tau tau.
24 O mɛɛlulaŋ kpɔŋ, mi buɛiyaa nduaa yii ndu dumbu,* nduyɛ ma dii ndu o chiɛi ndɔɔ niŋ.
25 Kɛ wanaa yii Masaa Amɔŋ dumbu ma dii ndu wa, mi waŋnda o lɛŋndeŋ niŋ diu nda kpou. Okoŋ kɔɔli, ma siiŋguu Choosaya po ndɔ masaa o foofo ndɔɔ.
Tɛɛsiaalaŋ
^ Tofa Tɛɛsiaa.
^ Hibuluiye, “puaa chɔuwa o choo choo niŋ kpou.”
^ Ɔɔ “kapaa woŋ.”
^ Tofa Tɛɛsiaa.
^ Hibuluiye, “ma yambu Manaasɛ nda finyaa nduaa mamaa.”
^ Ɔɔ “defoo.”
