Koloniko Diiŋ Ndɔɔ 34:1-33
34 Choosaya wa wɔsilaŋ la ŋɔmaa mbo simnuŋ masaa, nduyɛ mbo chii wɔsilaŋ 31 o masaleŋ choo Chulusalɛm.
2 Mbo tosa nyɛ bɛnda Chɛhowa hɔl lo, nduyɛ mbo kua o nɛila Deeve finya ndɔ mama laŋ choo. O sei o ba kɛndɔɔ choo ɔɔ o ba miallo choo le.
3 O wɔsi ŋɔmaa ndɔɔ o wa o masaleŋ choo wo, o wa wɔ feleŋgɔnɔ, mbo kandu Mɛlɛka Deeve finya ndɔ mama wo nuuviaa. Nduyɛ o wɔsi 12 niŋ, mbo kandu Chuda a Chulusalɛm dindioo. Mbo pesi fondaŋnda filioŋndaŋ, suŋgbuma iyɔm* nda simi le sooluuwo waŋ, piɔmaa sialaa, vɛlɛ a piɔmaa ŋchiliŋnda.
4 Okoŋ kɔɔli, bandula luamaa lasalala nda toosiaa le Baal sooluuwo laŋ, ma pesi pesi ndu laŋ o hɔl. Nduyɛ, mbo pesi pesi nyɛla ndaa luam nyɛm chuŋ kɛndɔŋ o bandula laŋ choo laŋ. Mbo pesi pesi vɛlɛ suŋgbuma iyɔm* nda simi le sooluuwo waŋ, piɔmaa sialaa, a piɔmaa ŋchiliŋnda. Mbo chuii nda mululu, mbo chua chundu koŋ, okoŋ mbo sɛŋi ndu o sɛila wanaa ndaa sooluu nda wa choo.
5 Mbo luam paala wanaa soliaa lasalaa o bandula luamaa lasalala laŋ choo. Mɛɛ nuaa Choosaya dindi Chuda a Chulusalɛm ni.
6 O chieeŋ bɛnduŋ Manaasɛ, Ifiluem, a Simiɔŋ ndoŋ niŋ, kɔ bii a chieeŋ bɛnduŋ Nafitalii yoŋ, vɛlɛ a fondaŋnda o tɛɛmbuu o chieeŋ muŋ balɔɔ kpou laŋ,
7 mbo pesi pesi bandula luamaa lasalalaŋ, suŋgbuma iyɔm* nda simi le maŋ sooluuwo waŋ, vɛlɛ a piɔmaa nda sɛl la, okoŋ mbo chuii nda mululu. Mbo tɛɛmbuu bandula nda luam nyɛm chuŋ kɛndɔŋ lechoo laŋ o Isɔluɛi niŋ kpou. Okoŋ kɔɔli, mbo miiŋguŋ Chulusalɛm.
8 O wɔsi 18 o wa o masaleŋ choo wo, mɛɛ o chii lɛŋndeŋ a chiɛi Mɛlɛkaa dindi, mbo viam Siafaŋ po Asalaya wo, Maasɛya masa chioo, a Chowaa po Chowahaasi wana poonyiaa, le ma bɛɛndiaa chiɛi Chɛhowa Mɛlɛka ndɔɔ.
9 Ma kua o Hilikaya masa wanaa soliaa lasalaa lo, ma ke ndu kaniŋ* nda saaluŋ o chiɛi Mɛlɛkaa niŋndoŋ, kaniŋ Livaiyaa wa diola kpakilaŋ mandaa wa bii waŋnda Manaasɛ, Ifiluem, a Isɔluɛiya kpou o ba woŋ. Nduyɛ ma bii vɛlɛ muŋ waŋnda Chuda, Bɛŋjamiŋ, a waŋnda Chulusalɛm o ba.
10 Okoŋ, ma chua muŋ ma ke wanaa nda yulu iso le wali cho tosaŋndo o chiɛi Chɛhowa wo niŋnda. Mi nda chua muŋ, ma soliŋ muŋ kpeku le chiɛi Chɛhowa wo miŋgioo toosiaa.
11 Mi nda yɔŋgu wanaa chaa nyɔɔŋ tuuliaa a laba wa, a wanaa taŋgulaa le ma pendu pouta sialaa laŋ vɛlɛ a yɔmnde le suŋgbuaŋ toosiaa. Ma piandu vɛlɛ kpɔlɔŋndaŋ le chiɛila masaa Chuda, la nda lo tofaa mi la tambu laŋ miŋgioo toosiaa.
12 Nduyɛ, mi puaa haa tosa wali nda ke nda le tosaa wo nyɛkɛndɛi. Ma yulu Livaiya haa iso le ma wa nda chilaŋ. Nda cho ni: Chahati nda Obadaya, fulaa o yuŋgu Meluali wo choo. Sɛkalaya nda Mɛsiulam, fulaa o yuŋgu Kohati wo choo. Nduyɛ Livaiyaa cheleŋ a ndaa nɔ taasioo tau le chondoŋ solioo wa kpou,
13 nda wa wanaa wa walta yɔŋaalaŋ a walta suu o suu tosaa wa kpou chilaŋ ni. Ma yulu Livaiya apum iso le ma wa wanaa poonyiaa, waŋ banaa, a wanaa manda diola kpakilaŋ nda.
14 Mɛɛ nda wa kaniŋ nda hiŋ o chiɛi Chɛhowa wo niŋndoŋ chuaa, mi Hilikaya wana soliaa lasalaa saaluŋ yau Sawala Chɛhowa laŋ la wa la poonyiaa lechoo le Isɔluɛiya sanaa a Muuse wo.
15 Okoŋ, mi Hilikaya dimul Siafaŋ wana poonyiaa aa: “I saaluŋ yau laSawaa o chiɛi Chɛhowa wo niŋ.” Okoŋ, mbo ke Siafaŋ yau koŋ.
16 Mi Siafaŋ kua a ndu o masaa lo, mbo dimul ndu aa: “Buɛiyaa numnda cho tosaa nyɛ o nyɛ nda dimul nda le tosaa.
17 A chua kaniŋ nda saaluŋ o chiɛi Chɛhowa wo niŋndoŋ, ma ke muŋ wanaa cho wallo chilaŋ nda, mi nda yɔŋgu muŋ wanaa cho wallo wa.”
18 Mi Siafaŋ wana poonyiaa dimul vɛlɛ masaa aa: “Hilikaya wana soliaa lasalaa ke ya vɛlɛ yauwo.” Okoŋ, mi Siafaŋ kandu diomndaŋ veeloo leniŋ masaa lachi.
19 Dimioo nuaa mi masaa tuɛi diomnda cho o yau laSawaa niŋndaŋ, mbo sɛɛsiaŋ domaa lekɔɔ.
20 Okoŋ mi masaa dimul Hilikaya, Ahikam po Siafaŋ ndo, Abidɔŋ po Maika wo, Siafaŋ wana poonyiaa, a Aasaya buɛi masaa aa:
21 “La kɔ mi la nyuna Chɛhowa a ya okɔɔ vɛlɛ a wanaa lo haa yoomu Isɔluɛi a o Chuda niŋnda, le sinaa te diomnda cho o yau nda saaluŋ hoo niŋndaŋ la piiliaŋ naa. Tumbe Chɛhowa dɔɔnuŋ a naa wo cho bɔɔ, kanifuule finyaa naa mamaa tosa nyɛ Chɛhowa dimul nda le nyɛ cho o yauwo hoo niŋndo kpou diikɔŋndo le.”
22 Okoŋ mi Hilikaya nda wanaa masaa vem nda kua latulu o Hulidaa lo, wana lanɔ ndoo suaa le Mɛlɛka wo. Pɔnɔ ndɔ ndoo nɔ diolaŋ ni aa Sialum, po Tikivaa wo. Tikivaa yɛ, Hahaasi velu ndu ni. Sialum wa nyɛla chuɛɛnaŋndaŋ hɔlteŋ ni. Nduyɛ a boondii keŋ, Hulidaa wa ichali o Fondaŋ Sɛnɛiyo Chulusalɛm. Nduyɛ loŋ nda kɔ soo o ndu lo ni.
23 Mbo dimul nda aa: “Nyɛ Chɛhowa, Mɛlɛka Isɔluɛiya dimi wo cho hoo ni, ‘La dimul po vem nya o ya lo wo aa:
24 “Chɛhowa dimi aa, ‘I cho kpundɔɔ tusi fondaa hoo choo a wanaa cho loŋ nda kpou. Nduyɛ nyɛ o nyɛ masaa le Chuda veelu diomndaŋ o yauwo niŋ, o cho peelɔŋ.
25 Kanifuule a mal la, ma muliŋ salalaŋ lomɔɔ o mɛlɛkaa cheleŋnda lo, le ya kɔllo tɛɛmbuuwo a kaala ndala wɔɔŋndaŋ. Lelaŋ, I cho tumbe dɔɔnɔŋ a nda o kala kala mɛɛ yiŋndeŋ le bii nuaa wana nɔla leŋ nyumi le yɛ.’”
26 Kɛ nyɛ nya nɔ mi la dimul masaa le Chuda, o vem nya le mi la huŋ nyuna Chɛhowa wo cho hoo ni, “Nyɛ Chɛhowa, Mɛlɛka Isɔluɛiya dimi a nyɛ ŋ tuei hoo okɔɔ wo cho hoo ni:
27 ‘Mɛɛ ŋ tuei nyɛ ya dimi a fondaa hoo vɛlɛ a wanaa cho loŋ nda okɔɔ maa sendioo cho nda choo, nduyɛ maa a cho simnɔŋ nyɛ mamaa wo, ma tambu kɔl okoŋ ma tusiŋ ya Mɛlɛka o hɔl, ma sɛɛsiaŋ domaa lekɔɔ, ma chaŋ chaŋndo pila. Nduyɛ, mi tuɛi vɛlɛ nyɛ ŋ dimi wo. Ya Chɛhowa dimi lende ni.
28 Le hei, I cho tosa ma vi o kɔl nyulu niŋ, nduyɛ ma kumbu num o kɔl nyulu niŋ o sɛi numndo niŋ. Kpundɛ o kpundɛ ya dimi le fondaa hoo tusioo choo, a chi niŋ ndu o yɔŋnɔŋndo le.’”’”
Okoŋ ma miiŋgu, ma kɔ doonuŋ masaa kona.
29 Mi masaa veelu waŋ banaa Chuda a Chulusalɛm kpou naapilɛ.
30 Okoŋ kɔɔli, mi masaa, puaa Chuda a waŋnda Chulusalɛm kpou, wanaa soliaa lasalaa, Livaiya, a wana o wana, chuaambɔ ni, bɛndu ni, ma kua latulu o chiɛi Chɛhowa wo. Mbo veelu diomndaŋ o yau kpema nda saaluŋ o chiɛi Chɛhowa wo niŋndo, mi nda kpou tuɛi.
31 Mi masaa sim o fondaŋ ndɔɔ, mbo yii kpemaa Chɛhowa o hɔl. Mbo chua buŋgɛi maa nyɛ o nyɛ cho o poonyiaa o yau kpemaa hoo niŋ, o cho ndu tosa, mbo tol Chɛhowa kɔɔli, mbo tosa nyɛ o dimi wo, nduyɛ mbo bii sawala ndɔlaŋ a kɔl ndɔɔ kpou vɛlɛ a yoomu ndɔɔ kpou.
32 Okoŋ kɔɔli, mbo tosa mi waŋnda Chulusalɛm a Bɛŋjamiŋ kpou chɛl le tosaa nyɛ dimiŋ o yau koŋ niŋndo. Nduyɛ, mi waŋnda Chulusalɛm tosa mɛɛ kpema Mɛlɛka yii a finyaa ndaa mamaa wo dimi yɛ.
33 Okoŋ kɔɔli, mi Choosaya faaŋiaa nyɛ o nyɛ nɔɔlɛi* wa o lɛŋnde Isɔluɛi leŋ niŋ kpou. Nduyɛ, mbo tosa mi wana o wana o Isɔluɛi niŋ muliŋ Chɛhowa Mɛlɛka ndaa piɛiyo. O palɛi Choosaya ve niŋ kpou, Isɔluɛiya feŋaŋ Chɛhowa Mɛlɛka finyaa ndaa mamaa kɔɔli le.
