Koloniko Diiŋ Ndɔɔ 35:1-27
35 Mi Choosaya bii Bɔŋaŋ Hiouwɔɔ Choo Wo le Chɛhowa o Chulusalɛm niŋ. Nduyɛ, ma dii chɔluaa le sala Bɔŋaŋ Hiouwɔɔ Choo Wo o paŋgii tasei niŋ malɔ 14.
2 Mbo ke wanaa soliaa lasalaa walta nda nɔ le tosaa o chiɛi Chɛhowa wo laŋ, nduyɛ mbo luei nda yoomuaŋ le laŋ tosaa.
3 Okoŋ mbo dimul Livaiya, wanaa pɛɛkaa o Isɔluɛi niŋ kpou, wanaa wa a diandaa le Chɛhowa wa aa: “La kɛsi Kɔfu diandaa o chiɛi Sɔlɔmɔŋ po Deeve wo, masaa le Isɔluɛi taŋgul lo niŋ. La nɔ lɛ mi la wa balɔɔ a ndu o lachoŋgu le. Lelaŋ, la tosa wallo le Chɛhowa Mɛlɛka nyaa a le waŋnda Isɔluɛi.
4 La sim a bolii nyɛi layuŋguei vɛlɛ a kundala nyalaŋ, a mɛɛ nyɛ Deeve masaa le Isɔluɛi nda Sɔlɔmɔŋ po ndɔ poonyiaa wo dimi yɛ.
5 La sim o fondaŋ diandaa a kundala nyalaŋ, nduyɛ mi kunda kɛ kɛ nɔ yuŋgu Livaiya le nda wallo tosallo.
6 La dii chɔluaa le sala Bɔŋaŋ Hiouwɔɔ Choo Wo, nduyɛ mi la dindi nyapila. Okoŋ, mi la bɛɛndiaŋ le tosaa nyɛ Chɛhowa dimul nya sanaa a Muuse wo le wanayaŋ nyaŋ.”
7 Mi Choosaya chua saa fɔŋnduaa piaanduaa, a chuiŋaa fɔŋnduaa piaanduaa, mbo yɔŋgu tooloo le salala Bɔŋaŋ Hiouwɔɔ Choo Wo le wanaa wa loŋ nda kpou. A wa kpou kpou 30,000, vɛlɛ a nauwa 3,000. Masaa pila soli chɔluaa haa o chɔluaa nduaa tɛɛŋ ni mbo yɔŋgu nda.
8 Mi laŋgbaa nduaa kalla bɛɛ yɔŋgu tooloo a kɔlta ndalaŋ kpou le wanaa wa loŋ nda, wanaa soliaa lasalaa, a le Livaiya. Mi Hilikaya, Sɛkalaya, a Chɛhayɛɛ, wanaa wa chilaŋ le chiɛi Mɛlɛka tonyaa wa yɔŋgu wanaa soliaa lasalaa chɔluaa 2,600 le salala Bɔŋaŋ Hiouwɔɔ Choo Wo a nauwa 300.
9 Mi Konanaya nda wanayaŋ ndɔŋ Siɛmaya nda Nɛtanɛɛ, latulu a Hasiabaya, Chɛyɛɛ, a Chosabadi, wanaa wa Livaiya chilaŋ nda yɔŋgu Livaiya tooloo chɔluaa 5,000 le salala Bɔŋaŋ Hiouwɔɔ Choo Wo a nauwa 500.
10 Ma bɛɛndiaŋ le Bɔŋaŋ Hiouwɔɔ Choo Wo. Mi wanaa soliaa lasalaa sim o fondaŋnda ndalaŋ, nduyɛ mi Livaiya sim a kundala ndalaŋ, a mɛɛ masaa dimi yɛ.
11 Ma diu chɔluaa le salala Bɔŋaŋ Hiouwɔɔ Choo Wo, nduyɛ mi wanaa soliaa lasalaa bii nda koowaŋ o laba, ma fasaŋiaa maŋ o bandu luamaa lasalaa. A teleŋ koŋ, Livaiya wa chɔluaa yaulaŋ sooluuwo.
12 Okoŋ kɔɔli, ma bɛɛndiaa salala luamaa laŋ le ma piɔu laŋ wanaa tuaa. Nduyɛ waŋnda haa wa a kundalaŋ a bolii ndɛi layuŋguei, le ma soli salaa o Chɛhowa lo a mɛɛ i cho i poonyiaa o yau Muuse wo niŋ yɛ. Nduyɛ, ma tosa nyɛ pilɛ koŋ kpe a nauwa.
13 Ma tuɛi chɔluaa sala Bɔŋaŋ Hiouwɔɔ Choo Wo a mɛɛ naamoo wa yɛ. Nduyɛ ma yau vɛlɛ salala diandaa laŋ o kpɛɛnɛŋ bɛndoŋ niŋ, kpɛɛnɛŋ pɔmbɔŋ, a kpɛɛnɛŋ tɛsɔŋ. Okoŋ kɔɔli, ma kua a muŋ chɔ chɔ o wanaa tuaa lo kpou.
14 Okoŋ, ma bɛɛndiaa nyɛdiaa Bɔŋaŋ Hiouwɔɔ Choo Wo le ndapila, vɛlɛ a wanaa soliaa lasalaa. Kanifuule, wanaa soliaa lasalaa fula o pulale Elɔŋ ndeŋ choo wa ndaa nɔ ma lo salala luamaa laŋ, a chuɛima salala laŋ lomɔɔ haaa mi nyumndaŋ ma tol. Le hei, mi Livaiya toosiaa nyɛdiaa le ndapila a le wanaa soliaa lasalaa fula o pulale Elɔŋ ndeŋ choo wa.
15 Wanaa soliaa ŋchonduaa fula o pulale Asafi leŋ choo wa wa isisi o fondaŋnda ndalaŋ, a mɛɛ Deeve, Asafi, Hamaŋ, a Chɛdutɔŋ wana cha yilaŋndoŋ le masaa wo yɔŋgu nɛi chɔmaa yɛ. Nduyɛ, wanaa manda diola kpakilaŋ nda wa isisi o diola kpakila yɛ yɛlaŋ. Sabu o sabu ve le mi ndaa faŋaŋ o fondaŋnda ndalaŋ te, kanifuule mi wanayaŋ ndaŋ Livaiya bɛɛndiaa nyɛdiaa Bɔŋaŋ Hiouwɔɔ Choo Wo le nda.
16 O paale leŋ choo, ma tosa nyɛ o nyɛ Chɛhowa dimul nda le Bɔŋaŋ Hiouwɔɔ Choo Wo biyɔɔ, a le salala luamaa laŋ solioo o bandu luamaa lasala Chɛhowa wo choo, a mɛɛ Masaa Choosaya yɔŋgu nɛi chɔmaa yɛ.
17 A teleŋ koŋ, mi Isɔluɛiyaa wa loŋ nda bii Bɔŋaŋ Hiouwɔɔ Choo Wo a Bɔŋaŋ Beedii Nɔ Yiisii* Leniŋ Te Wo le palɛi i ŋɔmmɛu.
18 Chɔŋ a teleŋ Saamiɛɛ wana suaa le Mɛlɛka wo, vɛlɛ a masaa keeku o Isɔluɛi niŋnda kpou, Bɔŋaŋ Hiouwɔɔ Choo kɛ kɛ tosaŋ ndɔ o Isɔluɛi niŋ mbo sulaŋ a Bɔŋaŋ Hiouwɔɔ Choo Choosaya tosa wo le. Nduyɛ wanaa soliaa lasalaa, Livaiya, waŋnda Chuda a Isɔluɛi kpou, vɛlɛ a waŋnda Chulusalɛm wa loŋ.
19 O wɔsi 18 Choosaya wa o masaleŋ choo wo Bɔŋaŋ Hiouwɔɔ Choo Wo hoo biinuŋ ni.
20 Mɛɛ Choosaya chii sɔɔŋ muŋ kpou tosa vɛlɛ a chiɛi Mɛlɛkaa toosiaa, mi Niko masaa le Ichipi huŋ del Kakɛmisi choo a sɔŋgɔɔ o pioo Yufiluaati ikɛi. Okoŋ, mi Choosaya fula le kɔlaŋ ndu chiŋalaŋndo a sɔŋgɔɔ.
21 Nduyɛ, mi Niko yɔŋ waŋnda o Choosaya lo a yooŋgoo hoo aa: “Masaa le Chuda, le yɛɛnɛ ŋ cho yɛ ya hunɔɔ chiŋalaŋndo a sɔŋgɔɔ? O cho num te ya cho hau kuello le sɔŋgɔɔ le, kɛ wanaa cheleŋ pɔ. Nduyɛ, Mɛlɛka dimi maa I nɔ mi tosa ndi chɔ chɔ. Lelaŋ a yandii, faŋaŋ Mɛlɛka cho a ya latulu wo simullo, yɔŋii o tusi num nyɛpalaa choo.”
22 Kɛ mi Choosaya kɛɛ le ndu faŋaŋndo kɔɔli. Mbo soli nyɛla lemasala wa ndu lekɔɔ laŋ, le mbo kɔ chiŋalaŋ ndu a sɔŋgɔɔ. Diomnda Mɛlɛka dimul Choosaya sanaa a Niko laŋ, mbo kɛɛ le laŋ nilaŋ yaŋɔɔ. Le hei, mbo kua o Dɛŋgbɔɔ Mɛkidɔɔ le mbo sɔŋga a ndu.
23 Mi wanaa wuu chiŋuaŋ nda via Masaa Choosaya a chiŋɔleŋ. Okoŋ, mbo dimul buɛiyaa nduaa aa: “La faŋa ya nanuŋ, kanifuule a yɔŋul la tau tau.”
24 Okoŋ mi buɛiyaa nduaa faŋa ndu o nyɛ nyaanaŋ suaa naŋndo niŋ, ma wou ndu o nyɛ ndɔ nyaanaŋ diiŋ ndɔ suaa naŋndo niŋ ma kua a ndu Chulusalɛm. Okoŋ kɔɔli, mi masaa wu, ma kumbu ndu o sɛi nda kumbu finyaa nduaa mamaa wo niŋ. Nduyɛ, mi waŋnda Chuda a Chulusalɛm kpou chaŋ Choosaya.
25 Mi Chɛluimaya soli chondii biisiei le Choosaya. Nduyɛ, mi waŋ piaanduaa a waŋ laanduaa soli chondoŋ nda kpou hiau lachi a chonduŋ biisioŋ solioo le Choosaya haaa a paale hauleŋ ndeŋ. Okoŋ ma kɛɛsiaa le ma wa muŋ solioo o Isɔluɛi niŋ, nduyɛ ŋ cho ŋ poonyiaa o chonduŋ biisioŋ tɛɛŋ.
26 Sɔɔŋ cheleŋ cho a Masaa Choosaya okɔɔ woŋ, mɛɛ o chɔm kaala lo lechoo wo yɛ, mɛɛ o tosa nyɛ wa o poonyiaa o yau laSawa Chɛhowa wo niŋ yɛ,
27 vɛlɛ a nyɛ o tosa chɔŋ o kandɔŋndo haaa o mɛɛlulaŋ ndo, ŋ cho ŋ poonyiaa o Yau Masaa Keeku Isɔluɛi a Chuda Wo niŋ.
Tɛɛsiaalaŋ
^ Ɔɔ “Bulu Nɔ Lɛvɛŋ.”
