Koloniko Diiŋ Ndɔɔ 36:1-23
36 Okoŋ, mi waŋnda chua Chɛhowahasi po Choosaya wo, ma siiŋguu ndu masaa Chulusalɛm o foofo finya ndɔ wo.
2 Chɛhowahasi wa wɔsilaŋ 23 mbo simnuŋ masaa, nduyɛ mbo chii paŋgoŋ ŋgaa o masaleŋ choo Chulusalɛm.
3 Kɛ mi masaa le Ichipi faŋa ndu o masaleŋ choo Chulusalɛm, nduyɛ mbo kilul lɛŋndeŋ kaniŋ humboŋ talɛŋndoŋ 100* vɛlɛ a kooliiyoŋ talɛŋnde i pilɛ, ma wa ndu paawaa* malɔɔ o ba.
4 Okoŋ kɔɔli, mi masaa le Ichipi siiŋguu Iliaakim wanayɛi Chɛhowahasi ve masaa le Chuda a le Chulusalɛm. Nduyɛ, mbo siŋga diola ndɔlaŋ aa Chɛhowakim. Kɛ mi Niko chua Chɛhowahasi wanayɛi nduɛi mbo kuaŋnuŋ a ndu Ichipi.
5 Chɛhowakim wa wɔsilaŋ 25 mbo simnuŋ masaa, nduyɛ mbo chii wɔsilaŋ 11 o masaleŋ choo Chulusalɛm. Mbo hiau lachi a nyɛ bɛnda Chɛhowa Mɛlɛka ndɔɔ o hɔl te wo tosaa.
6 Mi Nɛbukanɛɛsa, masaa le Babilɔŋ huŋ del ndu choo a sɔŋgɔɔ, mbo baa ndu yɔlɔŋ nda toosiaa a chiliŋii siaŋɛi yoŋ* ŋ muuŋ, mbo kua a ndu Babilɔŋ.
7 Mi Nɛbukanɛɛsa chua nyɛm laandoŋ ŋpum o chiɛi Chɛhowa wo niŋ mbo kuaŋnuŋ a muŋ Babilɔŋ, nduyɛ mbo kɔ wou muŋ o chiɛi ndɔ lemasaa niŋ.
8 Sɔɔŋ cheleŋ cho a Chɛhowakim okɔɔ woŋ, sɔɔŋ nɔɔlɛi o tosa woŋ, vɛlɛ a sɔɔŋ wɔɔŋ wa a ndu okɔɔ woŋ kpou, ŋ cho ŋ poonyiaa o Yau Masaa le Isɔluɛi a le Chuda Wo niŋ. Okoŋ, mi Chɛhowakiŋ po ndɔ miiŋgu o masaleŋ choo o foofo ndɔɔ.
9 Chɛhowakiŋ wa wɔsilaŋ 18 mbo simnuŋ masaa, nduyɛ mbo chii paŋgoŋ ŋgaa a palɛi tɔ o masaleŋ choo Chulusalɛm. Mbo hiau lachi a nyɛ bɛnda Chɛhowa o hɔl te wo tosaa.
10 O wɔsioo kandɔŋndo,* mi Masaa Nɛbukanɛɛsa yɔŋ puaa chɔuwa le ma kɔ bii ndu ma hiŋ a ndu Babilɔŋ, latulu a nyɛm sɔviɔŋ o chiɛi Chɛhowa wo niŋ. Okoŋ, mbo siiŋguu Sɛdikaya wanayɛi finya ndɔ ve masaa o Chuda niŋ vɛlɛ a Chulusalɛm.
11 Sɛdikaya wa wɔsilaŋ 21 mbo simnuŋ masaa, nduyɛ mbo chii wɔsilaŋ 11 o masaleŋ choo Chulusalɛm.
12 Mbo hiau lachi a nyɛ bɛnda Chɛhowa Mɛlɛka ndɔɔ o hɔl te wo tosaa. Mɛɛ Chɛhowa vem Chɛluimaya wana suaa le ndu wo naa ndu chua, o tusiŋ ndu o ba bɛŋgu le.
13 Nduyɛ mbo simul vɛlɛ Nɛbukanɛɛsa, masa tosa mbo chua buŋgɛi Mɛlɛka o hɔl lo. Mbo hiau lachi a nilakalulaŋ tosaa,* nduyɛ mbo kɛɛ le Chɛhowa, Mɛlɛka Isɔluɛiya diikɔŋndo.
14 Mi masaa wanaa soliaa lasalaa vɛlɛ a waŋnda kpou hiau lachi a kiɔɔ lo lechoo wo chɔmndo. Nduyɛ, ma muliŋ sɔɔŋ nɔɔlɛi wanaa balu nda wa ndaa tosa woŋ tosaa. Chiɛi Chɛhowa pila dindi Chulusalɛm ndo, ma nɔɔliaa ndu.
15 Chɛhowa, Mɛlɛka finyaa ndaa mamaa wa hiouwɔɔ lachi a waŋnda yɔŋndo naa nda chua le nda silaa. O wa ndi tosaa teleŋ o teleŋ le mɛɛ ndoo nɔ nyiɛɛye le wanaa nduaa vɛlɛ a chiɛi ndɔɔ yɛ.
16 A wa hiouwɔɔ lachi a wanaa Mɛlɛka tonyaa wa yɔŋndo o nda lo wa chuaa chɔdɔ, ma pɛɛsa sɔɔŋ o wa nda dimullo woŋ, nduyɛ ma mam nda. A lo hei tosaa haaa mi Chɛhowa duaunuŋ tumbe o kala kala a wanaa nduaa, nduyɛ ndaa sɔla lɛ mala kɛ kɛ le.
17 Okoŋ, mi Mɛlɛka tosa mi masa Kaadiaŋnda kɔ chiŋalaŋ nda a sɔŋgɔɔ, mbo diu puaa ndaa feleŋguaa a muɛi faŋnde o chiɛi nda piɛi Mɛlɛka wo niŋ. Chua piaandu ni, yufuaanɔ ni, bɛndu yuu ni, namtanɔ ni, o pilɛ bɛɛ o tuiinuŋ inyiɛɛ le. Mi Mɛlɛka mal ndu nyɛ o nyɛ fee o ba.
18 Mbo chua nyɛm laanduŋ wa o chiɛi Mɛlɛka tonyaa niŋndoŋ kpou, latulu a nyɛsɔlaa wa o chiɛi Chɛhowa wo niŋndo, chiɛi lemasaa, vɛlɛ a chiɛila waŋ banaa, mbo kuaŋnuŋ a muŋ Babilɔŋ.
19 Mbo luam chiɛi Mɛlɛka tonyaa, mbo pial kpakioo Chulusalɛm, mbo luumuu bandula mɛŋgɛlaala kala kalala wa loŋ ndaŋ kpou, nduyɛ mbo tɛɛmbuu nyɛ o nyɛ sɔvɛ wa loŋ.
20 Okoŋ kɔɔli, mbo bii wanaa lo yoomu wa kpou, mbo kuaŋnuŋ a nda Babilɔŋ o chɛleŋ niŋ. Ma simnuŋ buɛiya le ndu vɛlɛ a puaa nduaa, haaa mi Paasiaa sɔla kpaayaa lɛŋnde leŋ choo.
21 Mi hei peelu nyɛ Chɛhowa dimi sanaa a Chɛluimaya wo. Lɛŋndeŋ le lo fondo lende haaa mi wɔsila lee nɔ le pɛŋgioo laŋ la hiau. Nduyɛ teleŋ le wa fondo wo, le lo pɛŋgioo haaa mi wɔsila 70 laŋ peeluŋ.
22 Wɔsi tase Sailɔɔ, masaa le Paasiaa wa o masaleŋ choo wo, mi Chɛhowa tosa mi Sailɔɔ, masaa le Paasiaa yonda o tanda masale ndɔleŋ niŋ kpou, le mi nyɛ Chɛhowa dimi sanaa a Chɛluimaya wo peeluŋ. Nduyɛ mbo poonyiaa vɛlɛ aa:
23 “Nyɛ Sailɔɔ, masaa le Paasiaa dimi wo cho hoo ni, ‘Chɛhowa, Mɛlɛka toosiaa choo choo wo ke ya masɛi kpou o lɛŋndeŋ choo. Nduyɛ, o dimul la le mi teŋgul ndu chiɛiyo Chulusalɛm o Chuda niŋ. Wana o wana cho wanaa nduaa tɛɛŋ kpou, maa Chɛhowa Mɛlɛka ndɔɔ wa a ndu latulu, nduyɛ mbo kuɛ Chulusalɛm.’”
Tɛɛsiaalaŋ
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Ɔɔ “muloo.”
^ Ɔɔ “kapaa woŋ.”
^ Naapum o sialte pɔmbɔleŋ niŋ. Koŋ cho ni, Fuoo ɔɔ Nyaakuɛiyo.
^ Hibuluiye, “mbo kindi kɛsii nduɛi.”
