Koloniko Diiŋ Ndɔɔ 4:1-22
4 Okoŋ mbo toosiaa bandu luamaa lasalaa a chiliŋii siaŋɛi.* O wa bandei nɛiyo 30, toŋgei nɛiyo 30, a helɔɔ nɛiyo 15.
2 Mbo toosiaa vɛlɛ Hɛŋgɛiyo le Mɛŋndaŋ kɛsioo leniŋ a chiliŋii teeŋgiɛi. O wa o tiilaŋ tiu. Nduyɛ chɔŋ kpeŋgei i pilɛ mbo kuɛ kpeŋgei i pilɛi, o wa bandei nɛiyo 15, helɔɔ nɛiyo le ŋɔmmɛu a tɛndaa tɛɛŋ. Nduyɛ le Hɛŋgɛiyo hoo bɔŋaa, mbo chua yoole tuwaale cho bandei nɛiyo 45 leŋ.
3 Nyɛlaŋ la wa la tuuliaa lebɛŋgu maa lahem, nduyɛ la wa la balaa silɔ. Nyɛlaŋ ndaŋ tɔ la wa la balaa o Hɛŋgɛiyo hoo bɛŋgu ni, laa wa nɛiyo le pilɛ a tɛndaa tɛɛŋ. La wa pulaŋ ma miɔɔŋ, nduyɛ a laŋ latulu nda toosiaa Hɛŋgɛiyo ni.
4 Ma kɛsi ndu nauwa 12 o kɔɔ. Mi a yaa muli hɔlla ba luaŋ ndo, a yaa ba paaleŋ le del lo, a yaa ba tou wo, nduyɛ mi a yaa muli hɔlla ba paaleŋ le chaŋ ndo. Nda kpou, ma muli tumndaŋ tɛɛŋ.
5 Chelul ndɔɔ ndoo wa le toŋgii baa.* Nduyɛ, sondo ndɔɔ wa maa sondo taala ɔɔ mɛɛ bil lapeeŋgoo pɛɛŋga nuaa yɛ. Hɛŋgɛiyo hoo ndoo chua bafuiyo 3,000.*
6 Okoŋ kɔɔli, mbo toosiaa nyɛla kɛsiaa mamɛŋndaŋ tɔ le balaŋ a peloŋ pulɔɔ. Mbo kɛsi la ŋuɛɛnu o ba kɛndɔɔ choo, nduyɛ la ŋuɛɛnu o ba miallo choo. Loŋ ndaa tuei nyɛm ndaa soliŋ kpeku o salala luamaa laŋ ndoŋ ni. Kɛ le mi wanaa soliaa lasalaa wa balaŋ a peloŋ pulɔɔ kinɛi Hɛŋgɛi koŋ wa ni.
7 Mbo toosiaa nyɛla kɛsiaa la lambuila ikooliilaŋ tɔ a mɛɛ i wa i kɛɛsiaa yɛ, mbo kɛsi laŋ o chiɛi Mɛlɛkaa niŋ. Mbo kɛsi la ŋuɛɛnu o ba kɛndɔɔ choo, nduyɛ la ŋuɛɛnu o ba miallo choo.
8 Mbo toosiaa vɛlɛ tibiilaŋ* tɔ, mbo kɛsi laŋ o chiɛi Mɛlɛkaa niŋ. La ŋuɛɛnu o ba kɛndɔɔ choo, nduyɛ la ŋuɛɛnu o ba miallo choo. Mbo toosiaa vɛlɛ hɛŋgɛila ŋkooliilaŋ 100.
9 Mbo toosiaa luŋndo le wanaa soliaa lasalaa vɛlɛ a luŋ bɛndoo. Okoŋ mbo toosiaa diolaŋ le luŋndo, mbo kumbu laŋ a chiliŋii siaŋɛi.
10 Nduyɛ mbo kɛsi Hɛŋgɛiyo o ba kɛndɔɔ choo, ba tou wo a ba paaleŋ le chaŋ ndo tɛɛŋ.
11 Mi Hiluam toosiaa vɛlɛ baawalaŋ, siɔbuiilaŋ,* a hɛŋgɛilaŋ.
Okoŋ, mi Hiluam chii wali o wa tosaa o chiɛi Mɛlɛka tonyaa le Masaa Sɔlɔmɔŋ ndo tosa.
12 Suŋgbuaŋ ma miɔɔŋ a nyɛla o toosiaa la tiilaŋ mi la wa o suŋgbuma maŋ bolle laŋ, mbo kiŋi kiŋi nyɔɔ nyɛkɛndɛi maa yala o nyɛla tiɔɔŋnda wa laŋ o suŋgbuaŋ bolle laŋ choo.
13 Pɔmɛkilanetiiyaŋ 400 le nyɛla tiɔɔŋnda cho maa la yala laŋ. Nyɛlaŋ ndaŋ o kɛ kɛ, mbo baiyiaa pɔmɛkilanetiiyaŋ pulaŋ ma miɔɔŋ le nyɛla tiɔɔŋnda cho maa lahɛŋgɛi o suŋgbuaŋ bolleŋ ndaŋ kumbɔɔ.
14 Mbo toosiaa nyɛla viliaa mamɛŋndaŋ tɔ a hɛŋgɛila bɛndulaŋ tɔ le kɛsioo lechoo.
15 Mbo toosiaa Hɛŋgɛiyo le Mɛŋndaŋ kɛsioo leniŋ a nauwaa towaa 12, mbo kɛsi nda Hɛŋgɛiyo hoo o kɔɔ.
16 Nduyɛ baawalaŋ, siɔbuiilaŋ, chula saŋgilaŋ, a nyɛ o nyɛi laandu, mi Hiluam-abifi toosial Masaa Sɔlɔmɔŋ muŋ a chiliŋii siaŋɛi, le chiɛi Chɛhowa wo.
17 O tanda Chɔɔdaŋ ndo niŋ, Sukɔti tɛɛŋ nda Sɛluɛda nda teeŋgiaa chiliŋnde ni, ma hulu ndi o kowiila* puuloo niŋ le muŋ toosiaa.
18 Mi Sɔlɔmɔŋ toosiaa nyɛm laandoŋ muŋ tau tau. Nduyɛ chiliŋii siaŋɛi nda soliŋ kpeku le nyɔɔŋ muŋ toosiaa ve bɛɛ, ndaa sina mɛɛ kpeekpei lusul ndɔɔ wa yɛ le.
19 Mi Sɔlɔmɔŋ toosiaa nyɛm laandoŋ muŋ kpou le chiɛi Mɛlɛka tonyaa. Muŋ cho ni: bandu luamaa lasala ikooliiyo, tibiilaŋ le beedii cho o yɔŋgaŋ o Mɛlɛka lo wo kɛsioo lechoo,
20 nyɛla kɛsiaala lambuilaŋ a lambuila ndala nda toosiaa a koolii kɛndɛ kɛndɛi laŋ, le mi la wa biyɔɔ o fondaŋ hiou diondɔɔ wo niŋ,* a mɛɛ nɛila chɔmaalaŋ la cho yɛ.
21 Nyɛla cho maa lapeeŋge laŋ, lambuilaŋ, a kpanyalaŋ, laŋ kpou a koolii kɛndɛ kɛndɛi nda toosiaa laŋ ni.
22 Nyɛla nyumiaa leyiŋndaŋ, hɛŋgɛilaŋ, taalalaŋ, a nyɛla chuaa leyiŋndaŋ, laŋ kpou a koolii kɛndɛ kɛndɛi nda toosiaa laŋ ni. Diolaŋ le luɛiyɔɔ o chiɛi Mɛlɛkaa, diola cho leniŋ le luɛiyɔɔ o Fondaŋ Hiou Diondɔɔ Wo, a diola tɔlaŋ kpou, a kooliiye nda toosiaa laŋ ni.
Tɛɛsiaalaŋ
^ Ɔɔ “kapaa.”
^ Tofa Tɛɛsiaa B14.
^ Tofa Tɛɛsiaa B14.
^ Ɔɔ “tabalilaŋ.”
^ Ɔɔ “peelelaŋ.”
^ Ɔɔ “multa.”
^ Hibuluiye, “lumuiyo leniŋ di.”
