Masaa Diiŋ Nduaa 1:1-18
-
Ilaicha dimi huuluei a piɔm Ahasaya wo okɔɔ (1-18)
1 Mɛɛ Ehaabi vi, mi waŋnda Mowaabi simul Isɔluɛi.
2 A teleŋ koŋ, Ahasaya lo balɔɔ o chiɛi ndɔɔ choo Sameeliaa, mi chiɛiyo buli a ndu mbo del, mbo yɔŋuluŋ. Okoŋ mbo viam waŋnda, mbo dimul nda aa: “La kɔ mi la kɔ nyuna mɛlɛka Baal-sibɔɔ o cho Ɛkulɔŋ ndo, le sinaa te I cho sioŋgɔɔ a yɔŋulɔŋ ya yɔŋuluŋ hoo wo.”
3 Kɛ mi maalikɛinɔ Chɛhowa wo dimul Ilaicha,* Tisibaitiinɔɔ aa: “Chɔŋ ma kuɛ naa wanaa masaa Sameeliaa vem nda chua, ma nyuna nda aa, ‘Baa Mɛlɛka cho o Isɔluɛi niŋ te, mɛɛ ma kɔ nyuna Baal-sibɔɔ, mɛlɛka cho Ɛkulɔŋ ndo?
4 Lelaŋ, nyɛ Chɛhowa dimi wo cho hoo ni: “A cho chɔnɔŋ o kpele ŋ cho ihini wo choo le, kanifuule a cho wu.”’” Okoŋ, mi Ilaicha kuaŋnuŋ.
5 Mɛɛ wanaa o vem nda miiŋgu naa ndu chua, mbo nyuna nda o lepilɛ niŋ kpe aa: “La vɛ keleŋaa miiŋgoo hoo?”
6 Ma mulul ndu aa: “Poo pum komal naa ni, mbo dimul naa aa, ‘La miiŋgu naa masa vem nya wo chua, mi la dimul ndu aa, “Nyɛ Chɛhowa dimi wo cho hoo ni: ‘Baa Mɛlɛka cho o Isɔluɛi niŋ te, mɛɛ ma vem waŋnda le ma kɔ nyuna Baal-sibɔɔ, mɛlɛka cho Ɛkulɔŋ ndo? Lelaŋ, a cho chɔnɔŋ o kpele ŋ cho ihini wo choo le, kanifuule a cho wu.’”’”
7 Okoŋ mbo nyuna nda aa: “Po komal nya koŋ mbo dimul nya diomndaŋ ndaŋ ndo, vɛɛnɛ o cho yɛ?”
8 Ma dimul ndu aa: “Doma wa ndu lekɔɔ wo, a yiiŋii visioo nda toosiaa ndu ni. Nduyɛ yaule wa ndu o chaŋ ndeŋ, a yau visioo nda toosiaa leŋ ni.” Dimioo nuaa o tuei lende, mbo dimi aa: “Ilaicha ni, Tisibaitiinɔɔ.”
9 Okoŋ mi masaa viam wana wa puaa chɔuwa 50 bolleŋ ndo, a puaa nduaa 50 o ndu lo. Mɛɛ o kuɛ, o komal Ilaicha ichali o pembei choo. Mbo dimul ndu aa: “Wana Mɛlɛka tonyaa, masaa dimi aa, ‘Tol nanuŋ.’”
10 Kɛ mi Ilaicha dimul wana wa puaa chɔuwa 50 bolleŋ ndo aa: “Te wana Mɛlɛka tonyaa ya cho ni, mɛɛ yiŋndeŋ le fula choo choo mi le huŋ lom num a puaa num aa 50.” Okoŋ mi yiŋndeŋ le fula choo choo mi le huŋ lom ndu a puaa nduaa 50 chilikɔ.
11 Mi masaa yɔŋ vɛlɛ wana cheleŋ wa puaa chɔuwa 50 bolleŋ ndo, a puaa nduaa 50 o ndu lo. Mɛɛ o kuɛ, mbo dimul ndu aa: “Wana Mɛlɛka tonyaa, nyɛ masaa dimi wo cho hoo ni, ‘Tol nanuŋ chɔ chɔ.’”
12 Kɛ mi Ilaicha dimul nda aa: “Te wana Mɛlɛka tonyaa ya cho ni, mɛɛ yiŋndeŋ le fula choo choo mi le huŋ lom num a puaa num aa 50.” Okoŋ mi yiŋnde Mɛlɛka leŋ le fula choo choo mi le huŋ lom ndu a puaa nduaa 50 chilikɔ.
13 Okoŋ, mi masaa yɔŋ wana yaa ndɔ wa puaa chɔuwa 50 bolleŋ ndo, a puaa nduaa 50 o ndu lo. Kɛ mɛɛ wana yaa ndɔ wa puaa chɔuwa 50 bolleŋ ndo kuɛ, mbo tunduŋ mbo beŋ Ilaicha wulaŋ, mbo kandu ndu nyɔɔloo le mbo tuiinuŋ ndu inyiɛɛ. Mbo dimi aa: “Wana Mɛlɛka tonyaa, yandii, ya ni, a buɛiyaa num aa 50 haa, maa yoomula naalaŋ la wa la sɔvɛ num o hɔl.
14 Yiŋndeŋ le fula niŋ hau choo choo mi le huŋ lom wanaa cho puaa chɔuwa 50 bolleŋ nda a ŋiɔɔŋ, a kundala puaa ndaa 50. Kɛ a yandii, maa yoomu nuu wa o sɔvɛ num o hɔl.”
15 Okoŋ, mi maalikɛinɔ Chɛhowa wo dimul Ilaicha aa: “Tol mi la kuɛ nya ndu latulu. Yɔŋ isiooŋ le ndu le.” Mi Ilaicha chaŋ mbo kua a ndu latulu o masaa lo.
16 Mi Ilaicha dimul masaa aa, “Nyɛ Chɛhowa dimi wo cho hoo ni, ‘A vem waŋnda le ma kɔ nyuna Baal-sibɔɔ, mɛlɛka cho Ɛkulɔŋ ndo. Baa Mɛlɛka cho o Isɔluɛi niŋ te? Le yɛɛ a nyuna ndu diom te? Lelaŋ, a cho chɔnɔŋ o kpele ŋ cho ihini wo choo le, kanifuule a cho wu.’”
17 Okoŋ mbo wu, a mɛɛ Chɛhowa ndoo dimul Ilaicha yɛ. Nduyɛ le mɛɛ ndoo vilu po le yɛ, mi Chɛholuam* miiŋgu o masaleŋ choo o foofo ndɔɔ. Wɔsi diiŋ ndɔ Chɛholuam, po Chɛhosiafati wo, masaa le Chuda wa o masaleŋ choo wo hei yɔŋnuŋ ni.
18 Sɔɔŋ cheleŋ cho a Ahasaya okɔɔ woŋ, nyɛ o nyɛ o tosa, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.
Tɛɛsiaalaŋ
^ Diolaŋ ndaŋ la sim, “Chɛhowa Cho Mɛlɛka Nuu Ni.”
^ Koŋ cho ni, pɔmbɔɔ Ahasaya. Chɛholuam ndo hoo cho teŋgeŋ a Chɛholuam, po Chɛhosiafati wo.
