Masaa Diiŋ Nduaa 12:1-21
12 Wɔsi Chehu chii wɔsilaŋ la ŋɔmmɛu o masaleŋ choo wo, Chɛhowasi simnuŋ masaa ni. Nduyɛ mbo chii wɔsilaŋ 40 o masaleŋ choo Chulusalɛm. Kala ndɔ ndoo nɔ diolaŋ ni aa Sibiya, fulaa Biaa-siɛba.
2 Mi Chɛhowasi hiau lachi a nyɛ bɛnda Chɛhowa o hɔllo tosaa o palɛi Chɛhoyada, wana soliaa lasalaa wa ndu nɛi chɔmaa kioo wo niŋ kpou.
3 Kɛ nduyɛ, fondaŋnda filioŋndaŋ la feŋaŋ te. Waŋnda wa wɔ salalaŋ solioo a salalaŋ lomɔɔ o fondaŋnda filioŋnda laŋ.
4 Mi Chɛhowasi dimul wanaa soliaa lasalaa aa: “La bii kaniŋ* waŋnda huŋ o chiɛi Chɛhowa wo niŋ le salalaŋ solioo o ndu lo woŋ, kaniŋ waŋnda mal paawaa* woŋ, kaniŋ waŋnda paawa le buŋgaŋ nda chua woŋ, vɛlɛ a kaniŋ waŋndo pila kɛɛsiaa a kɔl ndɔɔ kpou le yɔŋgoo o chiɛi Chɛhowa wo niŋndoŋ.
5 Nya wanaa soliaa lasalaa pila nɔ ni mi la bii muŋ waŋnda* o laba, nduyɛ mi la soliŋ muŋ kpeku le chiɛi Mɛlɛkaa toosiaa, o fondaŋnda o tambu* laŋ kpou.”
6 Haaa mi Masaa Chɛhowasi chii wɔsilaŋ 23 o masaleŋ choo, wanaa soliaa lasalaa ndaa miŋgi wɔ fondaŋnda tambu o chiɛi Mɛlɛkaa laŋ toosiaa le.
7 Le hei, mi Masaa Chɛhowasi veelu Chɛhoyada wana soliaa lasalaa, a wanaa soliaa lasalaa apiliaa mbo dimul nda aa: “Le yɛɛnɛ la miŋgi wɔ fondaŋnda tambu o chiɛi Mɛlɛkaa laŋ toosiaa le? La bii lɛ waŋnda kanioŋ o ba le, mɛɛ dɔɔ mi la wa muŋ soliŋ kpeku le chiɛi Mɛlɛkaa miŋgioo toosiaa.”
8 Okoŋ, mi wanaa soliaa lasalaa chɛl maa a cho lɛ kanii biyɔɔ waŋnda o laba le, nduyɛ maa o cho lɛ nda le nɔ kalaŋndo le chiɛi Mɛlɛkaa miŋgioo toosiaa le.
9 Mi Chɛhoyada, wana soliaa lasalaa chua kɔfoo, mbo buli sooŋndo lechoo, mbo kɛsi ndu o bandu luamaa lasalaa ikɛi o ba kɛndɔɔ choo, le luɛiyɔɔ o chiɛi Chɛhowa wo niŋ. Wanaa soliaa lasalaa ndaa manda dioo wa, loŋ ndaa duau kaniŋ waŋnda ndaa huŋ o chiɛi Chɛhowa wo niŋndoŋ kpou ni.
10 Teleŋ o teleŋ ndaa che pɛ maa kanioŋ cho tau o kɔfoo hoo niŋ, wana poonyiaa le masaa a wana bɛndu wanaa soliaa lasalaa hiŋ, a huŋ soli kaniŋ nda hiŋ muŋ o chiɛi Chɛhowa wo niŋndoŋ, okoŋ a chɔm muŋ.
11 Nduyɛ, mi ndaa ke wanaa nda yulu iso le chilaŋ chuaa o wali wa tosaŋndo o chiɛi Chɛhowa wo niŋnda kaniŋ muŋ. Mi wanaa wa chilaŋ chuaa wa bɛɛ ndaa chua kaniŋ muŋ, ma paawa wanaa wa wallo a yɔmnde wa, wanaa taŋgulaa wa wallo o chiɛi Chɛhowa wo niŋnda,
12 mɛɛsinɛiya,* a wanaa kialu poutaŋ nda. Mi ndaa pendu vɛlɛ yɔmii bɛnduei a pouta sialaa laŋ, le fondaŋnda tambu o chiɛi Chɛhowa wo laŋ miŋgioo toosiaa. Nduyɛ mi ndaa soliŋ vɛlɛ kaniŋ muŋ kpeku le bɔnɔla kɛ kɛ cheleŋ wa le chiɛi Mɛlɛkaa miŋgioo toosiaa.
13 Kɛ nduyɛ, kaniŋ kɛ kɛ nda hiŋ o chiɛi Chɛhowa wo niŋ, a soliŋ muŋ kpeku le hɛŋgɛila nda toosiaa a kaniŋ humboŋ, nyɛla nyumiaa leyiŋndaŋ, hɛŋgɛila cheleŋ, bululaŋ, a nyɛ o nyɛ cheleŋ nda toosiaa a kooliiyoŋ ɔɔ a kaniŋ humboŋ o chiɛi Chɛhowa wo niŋ toosiaa le.
14 Wanaa wa wallo wa kinɛi nda wa paawaa a kanioŋ muŋ kpou ni, nduyɛ muŋ nda soliŋ kpeku ni le chiɛi Chɛhowa wo miŋgioo toosiaa.
15 Ndaa nyuna lɛ wanaa ndaa ke kanioŋ le ma paawa wanaa wa wallo wa le ma dɔɔnuŋ kona le. Kanifuule, a wa wanaa wana nɔla ma tiindaŋ.
16 Kɛ kaniŋ waŋnda ndaa yɔŋgu le salala yɔŋ wɔɔŋndaŋ a salala hakilaŋ ndoŋ, ndaa hiŋ a muŋ o chiɛi Chɛhowa wo niŋ te. Le wanaa soliaa lasalaa ŋ wa ni.
17 A teleŋ koŋ Hasayɛɛ, masaa le Siiliaa kɔ del Kaati choo ni a sɔŋgɔɔ, mbo bii ndu. Okoŋ kɔɔli, mbo kɛɛsiaa le kɔlaŋ Chulusalɛm delɔɔ choo a sɔŋgɔɔ.
18 Le hei mi Chɛhowasi, masaa le Chuda chua nyɛ o nyɛ finyaa nduaa mamaa, Chɛhosiafati, Chɛholuam, a Ahasaya, masaa keeku Chuda wa a yɔŋgu o Mɛlɛka lo wo, nyɛ o nyɛ ndupila yɔŋgu o Mɛlɛka lo, a nyɛ o nyɛ o saaluŋ o fondaŋ nda kɛsi nyɛm baa kalaŋ o chiɛi Chɛhowa wo niŋ a o chiɛi lemasaa niŋndoŋ, mbo yɔŋ Hasayɛɛ, masaa le Siiliaa. Okoŋ mbo miiŋguŋ, o del lɛ Chulusalɛm choo le.
19 Sɔɔŋ cheleŋ cho a Chɛhowasi okɔɔ woŋ, a nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ.
20 Kɛ mi laŋgbaa nduaa kalla yii ndu dumbu, ma dii ndu o chiɛi wa o Bemboo,* o nɛi kuɛ Siɛla wo.
21 Laŋgbaa nduaa kalla Chosaka po Simiaati wo, a Chɛhosabadi po Sioma wo dii ndu ni. Ma kumbu ndu nda finyaa nduaa mamaa o Chiee Deeve Wo. Okoŋ, mi Amasaya po ndɔ miiŋgu o masaleŋ choo o foofo ndɔɔ.
Tɛɛsiaalaŋ
^ Ɔɔ “woliŋ.”
^ Ɔɔ “muloo.”
^ Ɔɔ “wanaa nya sina wa.”
^ Ɔɔ “tɛɛndiaa.”
^ Ɔɔ “maasɔŋnda.”
^ Ɔɔ “Bɛti-milo.”
