Masaa Diiŋ Nduaa 14:1-29
14 Wɔsi diiŋ ndɔ Chɛhowasi, po Chɛhowahasi wo simnuŋ masaa le Isɔluɛi yo, Amasaya po Masaa Chɛhowasi wo simnuŋ masaa le Chuda ni.
2 O wa wɔsilaŋ 25 mbo simnuŋ masaa, nduyɛ mbo chii wɔsilaŋ 29 o masaleŋ choo Chulusalɛm. Kala ndɔ ndoo nɔ diolaŋ ni aa Chɛhowadiŋ, fulaa Chulusalɛm.
3 Mi Amasaya hiau lachi a nyɛ bɛnda Chɛhowa o hɔl lo tosaa, kɛ o sulaŋ maa Deeve finya ndɔ mama le. Mbo tosa nyɛ o nyɛ mɛɛ Chɛhowasi finya ndɔ tosa yɛ.
4 Kɛ nduyɛ, fondaŋnda filioŋndaŋ la feŋaŋ te. Waŋnda wa wɔ salalaŋ solioo a salalaŋ lomɔɔ o fondaŋnda filioŋnda laŋ.
5 Dimioo nuaa mbo sɔla kpaayaa o masale ndɔleŋ niŋ, mbo diu diu buɛiyaa nduaa, a dii finya ndɔ wa.
6 Kɛ o diu diu puaa ndaa le. Nduyɛ mi hei chɛlaŋ a nyɛ wa o poonyiaa o yau laSawa Muuse wo niŋndo. Mi Chɛhowa dimi loŋ aa: “Finyaa nɔ ma sɔla piɔmndo le chuauwaa ndaa le, nduyɛ chuauwa nɔ ma sɔla piɔmndo le finyaa ndaa le. Kɛ wana o wana nɔ mbo sɔla piɔmndo le haki ndɔɔ.”
7 Mbo diu diu Idɔmaitiiya 10,000 o Kpoloŋ Ihɛllo. Nduyɛ mbo bii chioo Sila o chɔuwo, mbo ke ndu diolaŋ aa Chokitɛɛ haaa a paale hauleŋ ndeŋ.
8 Okoŋ kɔɔli, mi Amasaya viam waŋnda o Chɛhowasi, po Chɛhowahasi wo lo, po mama Chehu wo, masaa le Isɔluɛi. Mbo dimul ndu aa: “Huŋ miŋ sɔŋga naa ŋiɔɔŋ.”
9 Mi Chɛhowasi, masaa le Isɔluɛi yɔŋ Amasaya, masaa le Chuda yooŋgoo aa: “Mi bil ŋyɔɔ Lebanɔŋ yɔŋ yɔm sida wo Lebanɔŋ yooŋgoo aa, ‘Ke po nuu chua numndo le mbo wa laa ndɔ.’ Kɛ, visi biyaa Lebanɔŋ lo hiouwɔɔ, mbo kei bil ŋyɔɔ niɔu niɔu.
10 I cho tonya maa a yem waŋnda Idɔm. Lelaŋ ŋ cho yoŋgaa kiolɔɔ ni. Kuundiaŋ mɛɛ o mɛɛ ŋ yeema pɛ, kɛ mɛɛlu o numndo.* Le yɛɛnɛ ŋ cho yɛ kpundɔɔ veelɔŋndo choo le tambei sɔlaa a waŋnda Chuda latulu?”
11 Kɛ Amasaya yeŋ lani le.
Le hei, mi Chɛhowasi, masaa le Isɔluɛi kua ma kɔ sɔŋga nda Amasaya, masaa le Chuda, Bɛti-siɛmɛsi chiee o Chuda niŋ.
12 Mi Isɔluɛi yam Chuda o chɔuwo, okoŋ mi wana o wana nyaanuŋ o ndu lo.*
13 Mi Chɛhowasi, masaa le Isɔluɛi bii Amasaya masaa le Chuda, po Chɛhowasi wo, po mama Ahasaya wo Bɛti-siɛmɛsi. Mbo kua a ndu Chulusalɛm mbo kɔ piɔl kpakioo Chulusalɛm, chɔŋ o Dio Kpaki Ifiluem Ndo mbo kɔ bii o Dio Kpakioo o Sɔŋgioo, le nɛiyo 584.*
14 Mbo chua kooliiyoŋ a kaniŋ humboŋ kpou, nyɛm laanduŋ sɔvɛ sɔvɛŋ nda saaluŋ o chiɛi Chɛhowa wo niŋ, a o fondaŋ nda kɛsi nyɛm baa kalaŋ o chiɛi lemasaa niŋndoŋ kpou, mbo miiŋgu Sameeliaa. Nduyɛ, mbo kua a waŋnda apum o biyɔɔ niŋ.
15 Sɔɔŋ cheleŋ cho a Chɛhowasi okɔɔ woŋ, nyɛ o nyɛ o tosa, kpaaya ndɔɔ, a mɛɛ o chɔulaba Amasaya, masaa le Chuda yɛ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.
16 Okoŋ mi Chɛhowasi wu,* ma kumbu ndu Sameeliaa nda masaa keeku Isɔluɛi ya latulu. Nduyɛ mi Chɛlobowam* po ndɔ miiŋgu o masaleŋ choo o foofo ndɔɔ.
17 Mi Amasaya po Chɛhowasi wo, masaa le Chuda chii vɛlɛ wɔsilaŋ 15 o piɔm Chɛhowasi po Chɛhowahasi wo kɔɔli, masaa le Isɔluɛi.
18 Sɔɔŋ cheleŋ cho a Amasaya okɔɔ woŋ, ŋ cho o yau nda poonyiaa konaa a masaa keeku Chuda wa okɔɔ wo niŋ.
19 Okoŋ kɔɔli, ma yii ndu dumbu* Chulusalɛm, mbo nyaanuŋ Lakisi. Kɛ ma viam ndu puaa kɔɔli Lakisi, ma kɔ dii ndu loŋ.
20 Okoŋ ma heelu ndu o suaa choo ma miiŋgu a ndu, ma kɔ kumbu ndu Chulusalɛm o Chiee Deeve Wo, naa nda kumbu finyaa nduaa mamaa wa.
21 Asaluaya* wa wɔsilaŋ 16 mi waŋnda Chuda kpou chua ndu, ma siiŋguu ndu masaa o foofo Amasaya finya ndɔ wo.
22 Mɛɛ masaa* vi,* mi Asaluaya miŋgi Ɛlati biyɔɔ, mbo miŋgi ndu taŋgul, mbo miŋgi ndu Chuda choo.
23 Wɔsi 15 Amasaya, po Chɛhowasi wo simnuŋ masaa le Chuda wo, Chɛlobowam, po Masaa Chɛhowasi wo simnuŋ masaa le Isɔluɛi ni. Sameeliaa o wa ichali ni, nduyɛ mbo chii wɔsilaŋ 41 o masaleŋ choo.
24 Mbo hiau lachi a nyɛ bɛnda Chɛhowa o hɔl te wo tosaa. Nduyɛ hakila Chɛlobowam, po Nebati wo tosa mi waŋnda Isɔluɛi luei balaŋ leniŋ ndaŋ, o mel taŋ te.
25 Mbo miŋgi tanda Isɔluɛiyo biyɔɔ chɔŋ Lɛbo-hamaati* haaa kɔ o Pee Mɛŋma Ihɛllo Aluaba.* Mi i yɔŋnuŋ a mɛɛ Chɛhowa, Mɛlɛka Isɔluɛiya dimul buɛi ndɔɔ Chona, po Amitai yo, wana suaa le Mɛlɛka wo, fulaa Kati-hɛfa yɛ.
26 Mi Chɛhowa cha saŋga Isɔluɛiya wa niŋndo. Wana o wana ve le nda mala le, hali wanaa bala fonduaa a wanaa nɔ kpaaya le wa bɛɛ.
27 Kɛ, Chɛhowa ndoo chua niŋ buŋgɛi maa o cho Isɔluɛiya wɔɔsuu o chieeŋndo choo le. Le hei, mbo soliŋ Chɛlobowam, po Chɛhowasi wo kpeku le nda piŋioo.
28 Sɔɔŋ cheleŋ cho a Chɛlobowam okɔɔ woŋ, nyɛ o nyɛ o tosa, kpaaya ndɔɔ, chɔula o yem ndaŋ, a mɛɛ o miŋgi Damasikɔɔ a Hamaati o Chuda niŋ Isɔluɛi yɛ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ.
29 Okoŋ mi Chɛlobowam wu,* ma kumbu ndu nda masaa keeku Isɔluɛi ya latulu. Nduyɛ, mi Sɛkalaya po ndɔ miiŋgu o masaleŋ choo o foofo ndɔɔ.
Tɛɛsiaalaŋ
^ Ɔɔ “chiɛi lemasaa.”
^ Hibuluiye, “o tɛndii ndɔɔ.”
^ Tofa Tɛɛsiaa B14.
^ Hibuluiye, “ma yambu ndu nda finyaa nduaa mamaa.”
^ Koŋ cho ni, Chɛlobowam diiŋ ndɔɔ.
^ Ɔɔ “defoo.”
^ Diolaŋ ndaŋ la sim, “Chɛhowa Yɔŋgu Malaa.” Ndu nda veelu vɛlɛ ni aa Yusaya o 2Ma 15:13; 2Ko 26:1-23; Ai 6:1; a Sɛk 14:5 niŋ.
^ Koŋ cho ni, Amasaya finya ndɔ.
^ Hibuluiye, “ma yambu ndu nda finyaa nduaa mamaa.”
^ Ɔɔ “o dioo Hamaati.”
^ Koŋ cho ni, Pee Nyɛ Yoomaa Cho Leniŋ Te Wo.
^ Hibuluiye, “ma yambu ndu nda finyaa nduaa mamaa.”
