Masaa Diiŋ Nduaa 18:1-37
18 Wɔsi yaa ndɔ Hoosiya, po Ɛlaa wo simnuŋ masaa le Isɔluɛi yo, Hɛsikaya po Masaa Ehaasi wo simnuŋ masaa le Chuda ni.
2 O wa wɔsilaŋ 25 mbo simnuŋ masaa, nduyɛ mbo chii wɔsilaŋ 29 o masaleŋ choo Chulusalɛm. Kala ndɔ ndoo nɔ diolaŋ ni aa Abi,* chua Sɛkalaya wo.
3 Mbo hiau lachi a nyɛ bɛnda Chɛhowa o hɔl lo tosaa, mɛɛ Deeve finya ndɔ mama tosa yɛ.
4 Ndu faŋa fondaŋnda filioŋndaŋ ni, mbo pesi pesi suŋgbuma nda toosiaa a poutaŋ ndaŋ, nduyɛ mbo tɛɛmbuu suŋgbule nda toosiaa a yɔmndo leŋ.* Mbo pesi pesi vɛlɛ kɛu Muuse toosiaa a chiliŋii siaŋɛi yo.* Kanifuule haaa mbo huŋ bii a teleŋ koŋ, waŋnda wa wɔ salalaŋ ndu lomɔɔ lachi, nduyɛ mi ndaa veelu piɔm koŋ aa kɛu chiliŋii siaŋaa.*
5 Mbo duau tiindaŋndo o Chɛhowa, Mɛlɛka Isɔluɛiya niŋ. Masaa keeku ndu lachi Chuda wa ni, a hiŋ ndu kɔɔli wa ni, wana o wana ve maa ndu le.
6 Mbo holnuŋ Chɛhowa kpiŋ, o feŋaŋ ndu kɔɔli le. Nduyɛ, mbo hiau lachi a sawala Chɛhowa ke Muuse laŋ biyɔɔ.
7 Chɛhowa bɛɛ wa a ndu latulu. Nduyɛ ba o ba ndoo kuɛ pɛ, mi ndoo tosa sɔɔŋ a taasi. Mbo simul masaa le Asiiliaa, nduyɛ mbo kɛɛ le nyɛ o dimul ndu wo tosaa.
8 Mbo yam vɛlɛ Filitiaŋnda chɔŋ o bandu mɛŋgɛlaa mbo kɔ bii o chiee nda taŋgul a kpaki kala kalaa wo,* haaa Kaasa, a chieeŋ wa o tanda ndɔɔ niŋndoŋ kpou.
9 Wɔsi hiɔɔlu ndɔ Masaa Hɛsikaya wa o masaleŋ choo wo, koŋ cho ni, wɔsi ŋɔmmɛu ndɔ Hoosiya, po Ɛlaa wo wa o masaleŋ choo Isɔluɛi yo, Sialimanɛɛsa, masaa le Asiiliaa huŋ chiŋalaŋ Sameeliaa ni, mbo luei ndu o piŋndo niŋ.
10 O wɔsi yaa ndɔɔ mɛɛlulaŋ nda bii Sameeliaa ni. O wɔsi ŋɔmmɛu ndɔ Hɛsikaya wa o masaleŋ choo wo nda bii ndu ni. Koŋ cho ni, wɔsi ŋɔmahiɔɔlu ndɔ Hoosiya, masaa le Isɔluɛi wa o masaleŋ choo wo.
11 Okoŋ, mi masaa le Asiiliaa kua a waŋnda Isɔluɛi o chɛleŋ niŋ Asiiliaa, mbo kɔ kɛsi nda o chioo Hela a chioo Habɔɔ o wa o pioo Kosaŋ ikɛiyo, a o chieeŋ Midiaŋnda.
12 Le mɛɛ nda kɛɛ Chɛhowa Mɛlɛka ndaa nilaŋ yaŋɔɔ yɛ hei yɔŋnuŋ ni. Ma kɛɛ le loo o kpema o yii a nda wo choo, nduyɛ ma kɛɛ le tosaa nyɛ o nyɛ Muuse, buɛi Chɛhowa wo dimul nda le tosaa. A yeŋ lani le, nduyɛ a diikuŋ te.
13 Wɔsi 14 Masaa Hɛsikaya wa o masaleŋ choo wo, Sɛnachɛluibi, masaa le Asiiliaa huŋ chiŋalaŋ chieeŋ bɛnduŋ nda taŋgul a kpakila kala kalalaŋ o Chuda niŋndoŋ kpou a sɔŋgɔɔ ni, nduyɛ mbo bii muŋ.
14 Le hei, mi Hɛsikaya masaa le Chuda yɔŋ masaa le Asiiliaa yooŋgoo Lakisi. Mbo dimul ndu aa: “I tɛɛmbuu a num. Yandii, miiŋgu o numndo. Nduyɛ nyɛ o nyɛ ŋ nyuna ya pɛ, I cho num ke.” Mi masaa le Asiiliaa kilul Hɛsikaya, masaa le Chuda paawaa* kaniŋ humboŋ talɛŋndoŋ 300,* a kooliiyoŋ talɛŋndoŋ 30.
15 Okoŋ, kaniŋ humbuŋ wa o chiɛi Chɛhowa wo niŋ a o fondaŋ nda kɛsi nyɛm baa kalaŋ o chiɛi lemasaa niŋndoŋ, mi Hɛsikaya yɔŋgu muŋ kpou.
16 A teleŋ koŋ Hɛsikaya, masaa le Chuda soli diolaŋ o chiɛi Chɛhowa wo ni, a keedeŋ o kumbu a kooliiyoŋ ndoŋ, mbo ke masaa le Asiiliaa.
17 Okoŋ, mi masaa le Asiiliaa yɔŋ Tataŋ,* Luabisaluisi,* a Luabsiakɛ,* a puaa chɔuwa kunda bɛndoo, ma chaŋ Lakisi ma kua o Masaa Hɛsikaya lo Chulusalɛm. Mɛɛ nda fuuluu, ma kɔ sim o sooŋ nda tou le mi mɛŋndaŋ ma wa keilaŋ leniŋ ndo, mbo wa o nɛi kuɛ o fondaŋ nda toosiaa kolalaŋ ndo.
18 Mɛɛ nda yooŋgu masaa, mi Iliaakim po Hilikaya wo, o wa chiɛi lemasaa hɔlteŋ ndo, a Siɛbina wana poonyiaa, a Chowaa po Asafi wo, wana kɛsi konalaŋ ndo fula ma huŋ naa nda chua.
19 Mi Luabsiakɛ dimul nda aa: “Yandii, la dimul Hɛsikaya aa, ‘Nyɛ masa bɛndoo, masaa le Asiiliaa dimi wo cho hoo ni: “O yɛɛnɛ kpeekpei ŋ tiindaŋ yɛ?
20 A cho dimioo aa, ‘I chaa chɔuwo, nduyɛ I nɔ kpaayaa le chɔuwo.’ Kɛ diomnda fondo laŋ la cho laŋ ni. Nɛɛnɛ ŋ tiindaŋ yɛ le ma bii kɔllo ma simul la?
21 Baa Ichipi ŋ tiindaŋ ni, o cho koŋ maa tɛŋgɛle vesɛi yo? Te a tiindaŋ ndeŋ pɛ, le cho num luɛiyɔɔ o ba, mi le tɛnda num baa. Wana o wana tiindaŋ pɛ Felo masaa le Ichipi, lende o tosal ndu ni.
22 Nduyɛ te la dimullɛ ya pɛ aa, ‘O Chɛhowa Mɛlɛka naa niŋ naŋ tiindaŋ ni,’ o cho fondaŋnda ndɔla filioŋndaŋ a bandula luamaala salala ndɔlaŋ te Hɛsikaya tɛɛmbuu, mbo dimul waŋnda Chuda a haa Chulusalɛm aa, ‘Bandu luamaa lasalaa hoo Chulusalɛm kinɛi nya nɔ ni mi la baŋ wulaŋ’ te?”’
23 Num nya masanɔ nuu, masaa le Asiiliaa, ŋ tofawɔ miŋ che wana hiou wo. I cho num ke suaa 2,000 te a nɔla pɛ ma sɔla wanaa nyaanuŋ a nda wa.
24 A dɔu tiindaŋndo o Ichipi niŋ le nyɛm nyaanaŋ suaa naŋndoŋ a puaa kua o suaa choo wa. Kɛ, baa a nɔla pa ma yem masa ibuŋgaa, o taaniŋndo o buɛiyaa masanɔ nuu tɛɛŋ?
25 Yiyaŋ numndo cho ni maa o cho Chɛhowa le vem ya le fondaa hoo hunɔɔ tɛɛmbuuwo le? Chɛhowa pila dimul la ni aa, ‘Kɔ chiŋalaŋ lɛŋnde leŋ ma tɛɛmbuu leŋ.’”
26 Okoŋ, mi Iliaakim po Hilikaya wo, a Siɛbina, a Chowaa dimul Luabsiakɛ aa: “Yandii, soo o buɛiyaa numnda lo o Aluamakiiye* niŋ. Naa bɛɛ miŋ bii ndi bila. Suaa o naa lo o suɛi maŋgalɛi Chuuwa niŋ te, yɔŋii wanaa cho o kpakioo choo wa bɛɛ tuei.”
27 Kɛ mi Luabsiakɛ dimul nda aa: “Baa o masanɔ nyaa lo a o nya lo koni masanɔ nuu vem ya le sɔɔŋ muŋ dimioo ni? Yooŋgoo hoo cho vɛlɛ le wanaa chal kaŋ o kpakioo choo wa. Nya ndaa kpou, la cho hunɔɔ poola nyalaŋ dio, nduyɛ mi la kol tuiilima nyaŋ.”
28 Okoŋ, mi Luabsiakɛ sim nyɛkɛndɛi, mbo dimi choo choo kpeleŋ o suɛi maŋgalɛi Chuuwa niŋ aa: “La tueiyɔ nyɛ masa bɛndoo, masaa le Asiiliaa dimi wo.
29 Nyɛ masaa dimi wo cho hoo ni, ‘La chɛl mi Hɛsikaya hui nya le, kanifuule o nɔla mbo piŋi nya ya o ba le.
30 La chɛl mi Hɛsikaya tosa mi la dɔu tiindaŋndo o Chɛhowa niŋ te. O cho dimioo aa: “Chɛhowa cho naa piŋi, nduyɛ o cho chioo hoo malɔɔ masaa le Asiiliaa o ba le.”
31 La yaŋ Hɛsikaya lani le. Nyɛ masaa le Asiiliaa dimi wo cho hoo ni: “La tosa chɛlaŋ kɔl nyuloo a ya, mi la yɔŋguŋ ya o ba bɛŋgu, le halikpeŋ mi wana o wana de yɔm ndɔ makilepiiyo a yɔm ndɔ mafikiiyo tɔnɔ, nduyɛ mi wana o wana kol mɛŋndaŋ o sooŋ ndɔɔ niŋ,
32 haaa mi huŋ chua nya, mi kuɛ a nya o lɛŋnde cho maa lɛŋnde nyaleŋ ndeŋ niŋ. Lɛŋnde nɔ witiiyoŋ, baliiyoŋ, muɛima sɛnɛiyaŋ, nyɛdiaa, kpelela makilepiilaŋ, yɔmii ɔlifiive, a liaaŋ ndeŋ. Okoŋ la cho wa yoomu, la vi le. La yaŋ Hɛsikaya lani le. Huiyo koni o cho nya ni, mbo dimi aa, ‘Chɛhowa cho naa piŋi.’
33 Baa mɛlɛkaa cho o lɛŋii yɛ yɛi niŋnda piŋi niŋ pa lɛŋii ndɛi masaa le Asiiliaa o ba?
34 Kuɛɛnɛ mɛlɛkaa le Hamaati a Apaadi cho yɛ? Kuɛɛnɛ mɛlɛkaa le Sɛfavem, Hena, a Ivaa cho yɛ? Baa mi ndaa piŋi pa Sameeliaa ya o ba?
35 Mɛlɛkaa o lɛŋnde niŋ kpou, mɛlɛka kuɛɛ piŋi yɛ lɛŋnde ndɔleŋ ya o ba, le mi la dimi maa Chɛhowa cho Chulusalɛm piŋi ya o ba?”’”
36 Kɛ mi waŋnda meinuŋ doŋ, a mulul ndu nyɛ o nyɛ le. Kanifuule, masaa ndoo dimul nda niŋ aa, “La mulul ndu le.”
37 Okoŋ, mi Iliaakim po Hilikaya wo, o wa chiɛi lemasaa hɔlteŋ ndo, a Siɛbina wana poonyiaa, a Chowaa po Asafi wo, wana kɛsi konalaŋ ndo sɛɛsiaŋ nyɛlaŋ lekɔɔ, ma miiŋgu o Hɛsikaya lo, ma dimul ndu nyɛ o nyɛ Luabsiakɛ dimi.
Tɛɛsiaalaŋ
^ Kiolɔɔ biŋgioo le Abaicha.
^ Tofa Tɛɛsiaa.
^ Ɔɔ “kapaa wo.”
^ Ɔɔ “Nɛhusitaŋ.”
^ Koŋ cho ni, o fondaŋ o fondaŋ. O wa o fondaŋ waŋnda cho tau wo ɔɔ fondaŋ nda cho a bɔɔ le wo.
^ Ɔɔ “muloo.”
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Ɔɔ “masa puaa chɔuwa.”
^ Ɔɔ “wana bɛndu wanaa tosa wallo o chiɛi lemasaa niŋnda.”
^ Ɔɔ “wana bɛndu wanaa talal masaa muɛiyaŋ nda.”
^ Ɔɔ “Siiliaŋnde.”
