Masaa Diiŋ Nduaa 2:1-25
2 Mɛɛ teleŋndo wa fuuluuwo le mi Chɛhowa chua Ilaicha choo choo* o hueiyii bɛnduei niŋ, mi Ilaicha nda Ilaasia faŋaŋ Kikaa.
2 Mi Ilaicha dimul Ilaasia aa: “Yandii, chum ya nanuŋ, kanifuule Chɛhowa vem ya Bɛtɛl.” Kɛ mi Ilaasia dimi aa: “I mɛnaŋ po o Chɛhowa, Mɛlɛka cho yoomu wo lo maa te a cho wɔ pɛ yoomu, I feŋaŋ num kɔɔli le.” Okoŋ ma kua Bɛtɛl.
3 Mi puaa wanaa suaa le Mɛlɛka wa,* a wa Bɛtɛl la huŋ o Ilaasia lo, ma nyuna ndu aa: “A sina pa maa Chɛhowa cho hau masanɔ numndo chua, o cho lɛ wa num masa choo le?” Mi Ilaasia mulul nda aa: “I sina. Kɛ la suaa a ndi okɔɔ le.”
4 Mi Ilaicha dimul ndu aa: “Ilaasia, yandii chum ya nanuŋ, kanifuule Chɛhowa vem ya Chɛluiko.” Kɛ mi Ilaasia dimi aa: “I mɛnaŋ po o Chɛhowa, Mɛlɛka cho yoomu wo lo maa te a cho wɔ pɛ yoomu, I feŋaŋ num kɔɔli le.” Okoŋ ma kua Chɛluiko.
5 Mi puaa wanaa suaa le Mɛlɛka wa, a wa Chɛluiko wa huŋ o Ilaasia lo, ma nyuna ndu aa: “A sina pa maa Chɛhowa cho hau masanɔ numndo chua, o cho lɛ wa num masa choo le?” Mi Ilaasia mulul nda aa: “I sina. Kɛ la suaa a ndi okɔɔ le.”
6 Mi Ilaicha dimul ndu aa: “Yandii, chum ya nanuŋ, kanifuule Chɛhowa vem ya Chɔɔdaŋ.” Kɛ mi Ilaasia dimi aa: “I mɛnaŋ po o Chɛhowa, Mɛlɛka cho yoomu wo lo maa te a cho wɔ pɛ yoomu, I feŋaŋ num kɔɔli le.” Okoŋ ma kua nda ndu.
7 Mi puaa wanaa suaa le Mɛlɛka wa ŋwaŋ 50 bɛɛ kua nda kɔɔli, ma kɔ sim tofaa kɔɔli kɔɔli. Nduyɛ nda ŋiɔɔŋ wa isisi o Chɔɔdaŋ ndaŋ kɔŋgɔ.
8 Okoŋ, mi Ilaicha chua doma ndɔɔ mbo simbul, mbo luaa mɛŋndaŋ a ndu. Mi mɛŋndaŋ ma piɔuwaŋ tɛɛŋ. Mi maŋ ma kua o ba miallo choo, mi maŋ ma kua o ba kɛndɔɔ choo. Mi nda ŋiɔɔŋ kpou keeku o lɛŋnde vesɛileŋ choo ma taŋ.
9 Dimioo nuaa a taŋ, mi Ilaicha dimul Ilaasia aa: “Dimul la nyɛ ŋ yeema mi tosal numndo, tuupa ma chua ya mi mɛi num.” Okoŋ mi Ilaasia nyuna ndu aa: “Yandii, a mala ya mi sɔla kpaaya numndo bɛmbɔɔ le diiŋ?”
10 Mbo mulul ndu aa: “Nyɛ ŋ nyuna le ndu wo kendu bɔɔ. Te a che ya pɛ teleŋ nda cho ya chua wo, mɛɛ a cho sɔla nyɛ ŋ nyuna le ndu wo. Kɛ te a chi ya le, mɛɛ a cho ndu sɔla le.”
11 Mɛɛ nda wa kɔlaŋ a baltaŋ, o lepilɛ niŋ kpe, mi nyɛ nyaanaŋ leyiŋ suaa naŋndo a suaa leyiŋ nda huŋ piɔu nda tɛɛŋ. Okoŋ, mi Ilaicha helnuŋ choo choo* o hueiyii bɛnduei niŋ.
12 Ilaasia wa nuaa, mbo wa chaŋndo choo choo kpeleŋ aa: “Kɛkɛ nuu, kɛkɛ nuu! Nyɛ nyaanaŋ suaa naŋndo le Isɔluɛi, a puaa nduaa sɔŋga o suaa choo wa!” Mɛɛ Ilaicha lo ndu o hɔl, mbo saa nyɛla wa ndu lekɔɔ laŋ mbo sɛɛsa.
13 Okoŋ kɔɔli, mbo chua doma fula Ilaicha lekɔɔ mbo del lo. Nduyɛ mbo miiŋgu, mbo kɔ sim o pioo Chɔɔdaŋ kɔŋgɔ.
14 Okoŋ, mbo luaa mɛŋndaŋ a doma Ilaacha wo. Mbo dimi aa: “Kuɛɛnɛ ŋ cho yɛ Chɛhowa, Mɛlɛka Ilaicha wo?” Mɛɛ o lɔɔ mɛŋndaŋ, mi ma piɔuwaŋ tɛɛŋ. Mi maŋ ma kua o ba miallo choo, mi maŋ ma kua o ba kɛndɔɔ choo, mi Ilaasia taŋ.
15 Mɛɛ puaa wanaa suaa le Mɛlɛka wa, a cho Chɛluiko wa lo kɔɔli kɔɔli ma cha ndu, ma dimi aa: “Nyina Mɛlɛka wa Ilaicha choo wo, o miiŋgu Ilaasia choo.” Okoŋ ma kua naa ndu chua ma kɔ beŋ ndu wulaŋ, ma fuuluu hɔlla lɛŋ.
16 Ma dimul ndu aa: “Ŋ nɔ puaa dialuŋ kalaa nanuŋ ŋwaŋ 50. Yandii, ŋ viam ndɔ nda ma kɔ nuuviaa masanɔ numndo. Kɛlɛŋgaa nyina Chɛhowa wo* chua ndu ni, mbo kɔ mal ndu o pembii bɛnduei choo ɔɔ o kpoloŋndo niŋ.” Kɛ mbo dimi aa: “La viam nda le.”
17 Kɛ a lo ndu kɔɔli haaa mi suɛi pala ndu, okoŋ mbo dimul nda aa: “La viom nda.” Ma viam puaa 50 haa, ma kɔ nuuviaa ndu le palɛi i yaa, kɛ a chi ndu le.
18 Mɛɛ nda miiŋgu naa ndu chua, o wa Chɛluiko. Okoŋ mbo dimi aa: “I dimul nya maa la kua le, lende le?”
19 A teleŋ pilɛ, mi puaa cho chiee loŋ nda dimul Ilaasia aa: “Masanɔ naa, numpila cho chɔɔ maa o fondaŋ kɛndɔɔ chioo hoo taŋguluŋ ni. Kɛ o nɔ mɛŋma kɛndɛ le, nduyɛ lɛŋnde ndɔleŋ bɛɛ le niŋ nyɛ le.”*
20 Okoŋ mbo dimi aa: “La chuu ya hɛŋgɛi pɔmbɔ sɛnɛiyo a hɛlle leniŋ.” Ma chuu ndu hɛŋgɛi o dimi wo.
21 Okoŋ, mbo kua naa mɛŋndaŋ ma wa fulaa wa, mbo wuu hɛlle leniŋ, mbo dimi aa: “Nyɛ Chɛhowa dimi wo cho hoo ni, ‘I miŋgi mɛŋndaŋ maŋ ma kɛndɛ. Fɛɛŋ bɛɛ ma cho lɛ tosa mi wana vi ɔɔ mi ma tosa wana vilu lɛ le le.’”*
22 Nduyɛ chɔŋ a teleŋ koŋ haaa huŋ bii a paale hauleŋ ndeŋ, mɛŋma maŋ ma cho ma kɛndɛ, a mɛɛ Ilaasia dimi yɛ.
23 Mbo chaŋ loŋ le kɔlaŋ Bɛtɛl. Mɛɛ o wa kɔlaŋ o nɛi, mi puaambuaa apum fula chiee ma huŋ kandu ndu mamɔɔ. Ma wa ndu dimullo aa: “Num fal tembello hoo, faŋaŋ nanuŋ! Faŋaŋ naŋ a tembel num koŋ ma kuɛ!”
24 O mɛɛlulaŋ kpɔŋ, mbo muliŋ mbo tofa nda. Nduyɛ mbo mɛna nda o diola Chɛhowa laŋ niŋ. Okoŋ, mi sulukuaa laanduaa a ŋiɔɔŋ fula o bundɔɔ niŋ, ma huŋ sɛɛsiaa chuaambuaa haa ŋwaŋ 42.
25 Mbo hiau lachi a kɔlaŋ haaa mbo fuuluu o Pembii Kamɛɛ Ve. Mɛɛ o chɛŋ loŋ, mbo miiŋgu Sameeliaa.
Tɛɛsiaalaŋ
^ Ɔɔ “o halaa niŋ.”
^ Wana che pɛ maa, puaa wanaa suaa le Mɛlɛka wa sim le sukuu nda pɛɛku wanaa suaa le Mɛlɛka wa, ɔɔ kunda wanaa suaa le Mɛlɛka wa.
^ Ɔɔ “o halaa niŋ.”
^ Ɔɔ “hueiyii Chɛhowa ve.”
^ Ɔɔ naapum, “viikuulaŋ la cho o lɛŋndeŋ niŋ.”
^ Ɔɔ naapum, “mi wana viikuu le.”
