Masaa Diiŋ Nduaa 21:1-26
21 Manaasɛ wa wɔsilaŋ 12 mbo simnuŋ masaa, nduyɛ mbo chii wɔsilaŋ 55 o masaleŋ choo Chulusalɛm. Kala ndɔ ndoo nɔ diolaŋ ni aa Hɛfisiba.
2 Mi Manaasɛ tosa nyɛ bɛnda Chɛhowa o hɔl te wo. Kaayii Chɛhowa tou waŋnda Isɔluɛi lachi ve, mbo tual sɔɔŋ wɔɔŋ ndaa tosa woŋ kɔɔli.
3 Fondaŋnda filioŋnda Hɛsikaya finya ndɔ tɛɛmbuu laŋ, mbo miŋgi laŋ taŋgul. Mbo toosiaa bandula luamaa lasalalaŋ le Baal, nduyɛ mbo toosiaa vɛlɛ suŋgbuleŋ a yɔmndo,* le leŋ sooluuwo mɛɛ Ehaabi, masaa le Isɔluɛi tosa yɛ. Okoŋ, mbo tunduŋ nyɛm Mɛlɛka toosiaa o choo choo niŋndoŋ lachi mbo sooluu muŋ.
4 Mbo taŋgul vɛlɛ bandula luamaa lasalalaŋ o chiɛi Chɛhowa wo niŋ, chiɛi Chɛhowa dimi a ndu okɔɔ aa: “Chulusalɛm diola nilaŋ la cho wa ni” wo.
5 Nduyɛ, mbo taŋgul bandula luamaa lasalalaŋ le nyɛm Mɛlɛka toosiaa o choo choo niŋndoŋ kpou, o bɛɛla tiɔɔŋnda chiɛi Chɛhowa wo.
6 Mbo soli po ndɔɔ salaa o yiŋndeŋ niŋ, mbo wou balaŋ o mandeleŋ niŋ, mbo viam yawalaŋ, nduyɛ mbo hɛli waŋnda le suɛi o waŋvilɛiya lo vɛlɛ a yawalaŋ viomɔɔ. Mbo tosa sɔɔŋ bɛnda Chɛhowa o hɔl te woŋ ŋ hɔbɛi, le ndu kɔllo tɛɛmbuuwo.
7 Mbo luei suŋgbule iyɔm* o sɛl teŋ o chiɛi Mɛlɛkaa niŋ, chiɛi Chɛhowa dimul Deeve a Sɔlɔmɔŋ po ndɔ aa: “Diola nilaŋ la cho wa o chiɛiyo hoo choo a o Chulusalɛm niŋ le fɛɛŋ a fɛɛŋ, chiee ya hɛli o kaalaŋ Isɔluɛi tɛɛŋ kpou wo.
8 Nduyɛ te Isɔluɛiya tosa pɛ nyɛ o nyɛ ya dimul nda, ndu cho yɛ Sawala ya ke buɛi nuu Muuse le ma tol kɔɔli laŋ kpou ni, fɛɛŋ bɛɛ I tosa lɛ ma soli pelei o lɛŋnde ya ke finyaa ndaa mamaa leŋ niŋ te.”
9 Kɛ Isɔluɛiya tosa nyɛ Mɛlɛka dimul nda wo le. Nduyɛ mi Manaasɛ faŋa nda o nɛi ndɔɔ choo, ma tosa sɔɔŋ wɔɔŋndoŋ mbo hiau bɛɛ kaayii Chɛhowa tou nda lachi ve.
10 Mi Chɛhowa hiau lachi a yooŋgulaŋ yɔŋndo sanaa a wanaa suaa le ndu wa. Mbo wa dimioo aa:
11 “Manaasɛ, masaa le Chuda tosa sɔɔŋ wɔɔŋndoŋ muŋ kpou ni. O tosa sɔɔŋ wɔɔŋndoŋ mbo hiau Amɔluaitiiyaa wa ndu lachi wa kpou. Nduyɛ o tosa mi waŋnda Chuda tosa hakioo a piɔmaa nduaa nɔɔlɛiya.*
12 Lelaŋ, nyɛ ya Chɛhowa, Mɛlɛka Isɔluɛiya dimi wo cho hoo ni: ‘Kpundɛ ya cho Chulusalɛm a Chuda tusi choo wo, wana o wana tuei ndu pɛ, kɔndɔfillo cho ndu biyɔɔ.*
13 I cho Chulusalɛm tuu a yoole tuwaale ya tuu Sameeliaa vɛlɛ a chiɛi Ehaabi wo leŋ. Nduyɛ I cho ndu dindi, mɛɛ waŋndo wɔɔsuu nuaa hɛŋgɔɔ mbo dindi ndu, okoŋ mbo kuumbuu ndu yɛ.
14 I cho wanaa lo haa o nyɛm kɛŋ nuŋ tɛɛŋ nda kɛɛ, mi mal nda yaamɔɔwaa ndaa o ba. Yaamɔɔwaa ndaa cho nda biyɔɔ ma puŋga nyɛm ndaŋ, nduyɛ ma kuɛ a nda o biyɔɔ niŋ.
15 Kanifuule, a tosa nyɛ bɛnda ya o hɔl te wo. Nduyɛ, chɔŋ a paale finyaa ndaa mamaa fula Ichipi leŋ haaa a paale hauleŋ ndeŋ, a cho hiouwɔɔ lachi a ya kɔllo tɛɛmbuuwo.’”
16 Mi haki Manaasɛ tosa wo tosa mi waŋnda Chuda luei balaŋ o hakioo niŋ, ma tosa nyɛ bɛnda Chɛhowa o hɔl te wo. Okoŋ kɔɔli, mi Manaasɛ tosa mi kooma wanaa tɛɛmbuu isɔɔ le wa ma kua koŋgilaŋ Chulusalɛm. Mbo dii waŋnda o Chulusalɛm niŋ chɔŋ kpeŋgei i pilɛ mbo kɔ bii kpeŋgei i pilɛi.
17 Sɔɔŋ cheleŋ cho a Manaasɛ okɔɔ woŋ, nyɛ o nyɛ o tosa, a hakila o tosa laŋ kpou, ŋ cho o yau nda poonyiaa konaa a masaa keeku Chuda wa okɔɔ wo niŋ.
18 Okoŋ, mi Manaasɛ wu.* Ma kumbu ndu o kpeloo Yuusa, kpele wa o chiɛi ndɔɔ ikɛiyo. Nduyɛ mi Amɔŋ po ndɔ miiŋgu o masaleŋ choo o foofo ndɔɔ.
19 Amɔŋ wa wɔsilaŋ 22 mbo simnuŋ masaa, nduyɛ mbo chii wɔsilaŋ la tiɔɔŋ o masaleŋ choo Chulusalɛm. Kala ndɔ ndoo nɔ diolaŋ ni aa Mɛsiulɛmɛti, chua Halusi wo, fulaa Chotibaa.
20 Mi Amɔŋ hiau lachi a nyɛ bɛnda Chɛhowa o hɔl te wo tosaa, mɛɛ Manaasɛ finya ndɔ tosa yɛ.
21 Mbo hiau lachi a kɔlaŋ o nɛila finya ndɔ laŋ choo kpou. Nduyɛ, o wa hiouwɔɔ lachi a tundɔŋndo piɔmaa nɔɔlɛiyaa finya ndɔ ndoo sooluu wa lachi, le nda sooluuwo.
22 Le hei, mbo faŋaŋ Chɛhowa, Mɛlɛka finyaa nduaa mamaa kɔɔli, nduyɛ o tul nɛi Chɛhowa wo kɔɔli le.
23 O mɛɛlulaŋ kpɔŋ, mi buɛiyaa Masaa Amɔŋ nda yii ndu dumbu,* ma dii ndu o ndu lo chiɛiniŋ.
24 Kɛ mi waŋnda o lɛŋnde leŋ niŋ diu diu wana o wana yii Masaa Amɔŋ dumbu. Okoŋ kɔɔli, ma siiŋguu Choosaya po ndɔ masaa o foofo ndɔɔ.
25 Sɔɔŋ cheleŋ cho a Amɔŋ okɔɔ woŋ, a nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ.
26 Okoŋ, ma kumbu ndu o sɛi ndɔɔ niŋ o kpeloo Yuusa, nduyɛ mi Choosaya po ndɔ miiŋgu o masaleŋ choo o foofo ndɔɔ.
Tɛɛsiaalaŋ
^ Tofa Tɛɛsiaa.
^ Tofa Tɛɛsiaa.
^ Diom maHibului nda soliŋ kpeku wo chiɛɛliaŋ lepum a “poolaŋ.” Nduyɛ ma soliŋ ndu kpeku le nyɔɔ pɛɛsaa.
^ Hibuluiye, “nilaŋ la cho ndu nyumul.”
^ Hibuluiye, “ma yambu ndu nda finyaa nduaa mamaa.”
^ Ɔɔ “defoo.”
