Masaa Diiŋ Nduaa 22:1-20
22 Choosaya wa wɔsilaŋ la ŋɔmaa mbo simnuŋ masaa, nduyɛ mbo chii wɔsilaŋ 31 o masaleŋ choo Chulusalɛm. Kala ndɔ ndoo nɔ diolaŋ ni aa Chɛdida, chua Adaya wo, fulaa Bɔsikati.
2 Mi Choosaya tosa nyɛ bɛnda Chɛhowa o hɔl lo, nduyɛ mbo kua o nɛila Deeve finya ndɔ mama laŋ choo kpou. O sei o ba kɛndɔɔ choo ɔɔ o ba miallo choo le.
3 Wɔsi 18 Masaa Choosaya wa o masaleŋ choo wo, mbo viam Siafaŋ wana poonyiaa, po Asalaya wo o chiɛi Chɛhowa wo. Asalaya yɛ, finya ndɔ wa Mɛsiulam ni. Mbo dimul ndu aa:
4 “Kɔ o Hilikaya lo, masa wanaa soliaa lasalaa, ma dimul ndu maa o dɔu kaniŋ* nda hiŋ o chiɛi Chɛhowa wo niŋndoŋ kpou diompilɛ, ŋ wanaa manda diola kpakilaŋ nda biu biu waŋnda o laba woŋ.
5 A chua kaniŋ muŋ ma ke wanaa nda yulu iso le chilaŋ chuaa le wali cho tosaŋndo o chiɛi Chɛhowa wo niŋnda, nduyɛ mi nda chua muŋ ma ke wanaa cho wallo o chiɛi Chɛhowa wo niŋ le ndu miŋgioo toosiaa wa.
6 Nda cho ni, wanaa chaa nyɔɔŋ tuuliaa a laba wa, wanaa taŋgulaa, a mɛɛsinɛiya.* Nduyɛ, a nɔ ma soliŋ muŋ kpeku le yɔmnde a pouta sialaa laŋ piondɔɔ, le chiɛiyo miŋgioo toosiaa.
7 Kɛ wana o wana nɔ mbo nyuna nda le ma dɔɔnuŋ kona le kanii nda ke nda ve le, kanifuule a cho wanaa wana nɔla ma tiindaŋ.”
8 Okoŋ kɔɔli, mi Hilikaya masa wanaa soliaa lasalaa dimul Siafaŋ wana poonyiaa aa: “I saaluŋ yau laSawaa o chiɛi Chɛhowa wo niŋ.” Mi Hilikaya ke Siafaŋ yau koŋ mbo kandu diomndaŋ veeloo leniŋ.
9 Okoŋ kɔɔli, mi Siafaŋ wana poonyiaa kua o masaa lo, mbo dimul ndu aa: “Kaniŋ wa o chiɛi Mɛlɛkaa niŋndoŋ kpou, buɛiyaa numnda chua muŋ ma ke wanaa nda handu chilaŋ le wali cho tosaŋndo o chiɛi Chɛhowa wo niŋnda.”
10 Mi Siafaŋ wana poonyiaa dimul vɛlɛ masaa aa: “Hilikaya wana soliaa lasalaa ke ya yauwo.” Okoŋ, mi Siafaŋ kandu diomndaŋ veeloo leniŋ masaa lachi.
11 Dimioo nuaa mi masaa tuɛi diomnda cho o yau laSawaa hoo niŋndaŋ, mbo sɛɛsaŋ domaa lekɔɔ.
12 Okoŋ, mi masaa dimul Hilikaya wanaa soliaa lasalaa, Ahikam po Siafaŋ ndo, Achibɔɔ po Maikaya wo, Siafaŋ wana poonyiaa, a Aasaya buɛi masaa aa:
13 “La kɔ mi la kɔ nyuna Chɛhowa le ya, wanaa cho o lɛŋndeŋ ndeŋ niŋnda, a le wanaa cho o lɛŋnde Chuda leŋ niŋnda kpou a nyɛ cho o poonyiaa o yau nda saaluŋ hoo wo niŋndo okɔɔ. Kanifuule, Chɛhowa dɔɔnuŋ tumbe o kala kala a naa, le mɛɛ finyaa naa mamaa kɛɛ sɔɔŋ cho ŋ poonyiaa o yauwo hoo niŋ a naa okɔɔ woŋ kpou diikɔŋndo yɛ.”
14 Okoŋ mi Hilikaya wana soliaa lasalaa, Ahikam, Achibɔɔ, Siafaŋ, a Aasaya kua o Hulidaa lo, wana lanɔ ndoo suaa le Mɛlɛka wo. Pɔnɔ ndɔ ndoo nɔ diolaŋ ni aa Sialum, po Tikivaa wo. Tikivaa yɛ, Hahaasi velu ndu ni. Sialum wa nyɛla chuɛɛnaŋndaŋ hɔlteŋ ni. Nduyɛ a boondii keŋ, Hulidaa wa ichali o Fondaŋ Sɛnɛiyo Chulusalɛm. Nduyɛ loŋ nda kɔ soo o ndu lo ni.
15 Mbo dimul nda aa: “Nyɛ Chɛhowa, Mɛlɛka Isɔluɛiya dimi wo cho hoo ni, ‘La dimul po vem nya o ya lo wo aa:
16 “Chɛhowa dimi aa, ‘I cho kpundɔɔ tusi fondaa hoo choo a wanaa cho loŋ nda kpou. Nduyɛ nyɛ o nyɛ masaa le Chuda veelu diomndaŋ o yauwo niŋ, o cho peelɔŋ.
17 Kanifuule a mal la, ma muliŋ salalaŋ lomɔɔ o mɛlɛkaa cheleŋnda lo, le ya kɔllo tɛɛmbuuwo a kaala ndala wɔɔŋndaŋ. Lelaŋ, I cho tumbe dɔɔnɔŋ a nda o kala kala mɛɛ yiŋndeŋ le bii nuaa wana nɔla leŋ nyumi le yɛ.’”
18 Kɛ nyɛ nya nɔ mi la dimul masaa le Chuda, o vem nya le mi la huŋ nyuna Chɛhowa wo cho hoo ni, “Nyɛ Chɛhowa, Mɛlɛka Isɔluɛiya dimi a nyɛ ŋ tuei hoo okɔɔ wo cho hoo ni:
19 ‘Mɛɛ ŋ tuei nyɛ ya dimi a fondaa hoo vɛlɛ a wanaa cho loŋ nda okɔɔ maa sendioo cho nda choo, nduyɛ maa a cho simnɔŋ nyɛ mamaa wo, ma tambu kɔl okoŋ ma tusiŋ ya Chɛhowa o hɔl, ma sɛɛsaŋ domaa lekɔɔ, ma chaŋ chaŋndo pila. Nduyɛ, mi tuɛi vɛlɛ nyɛ ŋ dimi wo. Ya Chɛhowa dimi lende ni.
20 Le hei, I cho tosa ma vi o kɔl nyulu niŋ, nduyɛ ma kumbu num o kɔl nyulu niŋ o sɛi numndo niŋ. Kpundɛ o kpundɛ ya dimi le fondaa hoo tusioo choo, a chi niŋ ndu o yɔŋnɔŋndo le.’”’” Okoŋ ma miiŋgu, ma kɔ dounuŋ masaa kona.
