Masaa Diiŋ Nduaa 25:1-30
25 Wɔsi ŋɔmahiɔɔlu ndɔ Sɛdikaya wa o masaleŋ choo wo, o paŋgii tɔ ve niŋ malɔ tɔ, mi Nɛbukanɛɛsa masaa le Babilɔŋ huŋ a puaa nduaa chɔuwa kpou le Chulusalɛm chiŋalaŋndo a sɔŋgɔɔ. Ma kila dɔɔŋgɔɔ ndu ikɛi, nduyɛ ma taŋgul kpakioo, ma luei chioo kpou o piŋndo niŋ.
2 Chioo lo o piŋndo niŋ haaa wɔsi 11 Masaa Sɛdikaya wa o masaleŋ choo wo.
3 O paŋgii hiɔɔluei niŋ malɔ le ŋɔmahiɔɔlu, mi yima bɛnduaŋ ma bii waŋnda o chioo niŋ, nduyɛ nyɛdiaa o nyɛdiaa ve lɛ nda o ba o lɛŋndeŋ niŋ te.
4 Chioo wa o piŋndo niŋ, mi Kaadiaŋnda pial kpakioo a nyumndaŋ. Kɛ mi puaa chɔuwa kpou keeku o dio wa o kpakila tiɔɔŋnda wa o kpele masaa ikɛi laŋ, ma nyaanuŋ. Nduyɛ, mi masaa nyaanuŋ o nɛi kuɛ Aluaba wo.
5 Kɛ mi puaa chɔuwaa Kaadiaŋnda tisa masaa kɔɔli, nduyɛ ma kɔ bii ndu o pollo niŋ Chɛluiko. Okoŋ, mi puaa nduaa chɔuwa kpou mɛi ndu ma nyaanuŋ.
6 Mɛɛ nda bii masaa, ma kua a ndu o masaa le Babilɔŋ ndo Luibila, okoŋ ma kilul ndu yamɛi.
7 Ma dii puaa Sɛdikaya wa ndu o hɔl, nduyɛ mi Nɛbukanɛɛsa suumiaa ndu, mbo wou ndu o kpiɔɔ, o nda toosiaa a chiliŋii siaŋɛi yo,* mbo kua a ndu Babilɔŋ.
8 O paŋgii ŋuɛɛnuei niŋ lɔma le ŋɔmmɛu, koŋ cho ni, wɔsi 19 Nɛbukanɛɛsa masaa le Babilɔŋ wa o masaleŋ choo wo niŋ, mi Nɛbusaluadaŋ, wana cho wanaa manda masaa wa bolleŋ ndo, buɛi masaa le Babilɔŋ huŋ Chulusalɛm.
9 Mbo luam chiɛi Chɛhowa wo, chiɛi lemasaa, a chiɛila wa Chulusalɛm ndaŋ kpou. Mbo luam vɛlɛ chiɛila puaa ndaa fula tɔɔ wa kpou.
10 Nduyɛ kpakila laa balu Chulusalɛm ndaŋ kpou, Kaadiaŋnda a wa latulu a wana bɛndoo le wanaa manda masaa wa koombiaa laŋ kpou.
11 Mi Nɛbusaluadaŋ wana cho wanaa manda masaa wa bolleŋ ndo, kua a wanaa lo o chioo niŋnda kpou vɛlɛ a wanaa yɔŋguŋ o masaa Babilɔŋ ndo wa o biyɔɔ niŋ.
12 Kɛ mi wana bɛndu wanaa manda masaa wa mɛi wanaa bala fondo fonduaa o lɛŋndeŋ niŋ, le yɔmii makilepiiye kɛiyaa a wali lechiɔɔ tosaa.
13 Mi Kaadiaŋnda pesi pesi suŋgbuma nda toosiaa a chiliŋii siaŋɛi o chiɛi Chɛhowa wo waŋ, nyɛla viliaa mamɛŋndaŋ, a Pee Mɛŋma Ihɛl nda toosiaa a chiliŋii siaŋɛi mi la wa o chiɛi Chɛhowa wo laŋ, okoŋ ma kuaŋnuŋ a chiliŋii siaŋɛi Babilɔŋ.
14 Ma chua vɛlɛ hɛŋgɛila nda duau pultaŋ ndaŋ, siɔbuiilaŋ,* nyɛla nyumiaa leyiŋndaŋ, taalalaŋ, a nyɛm laanduŋ nda toosiaa a chiliŋii siaŋɛi le wallo o chiɛi Mɛlɛkaa niŋndaŋ kpou.
15 Mi wana bɛndu wanaa manda masaa wa chua nyɛla chuaa leyiŋndaŋ, a hɛŋgɛila nda toosiaa a koolii kɛndɛ kɛndɛi vɛlɛ a kanii humbuei laŋ.
16 Kɛ suŋgbuma miɔɔŋ ndaŋ, pee mɛŋma ihɛllo, a nyɛla viliaa lawolɔɔla Sɔlɔmɔŋ toosiaa o chiɛi Chɛhowa wo niŋndaŋ, chiliŋii siaŋɛi nda soliŋ kpeku le laŋ toosiaa ve, wana ndoo nɔla ndi tuu le.
17 Suŋgbule kɛ kɛ, le wa bandei nɛiyo 27.* Nduyɛ nyɛla nda handu o suŋgbuaŋ bolle laŋ, a chiliŋii siaŋɛi nda toosiaa laŋ ni. O kɛ kɛ, o wa helɔɔ nɛiyo le hiɔɔlu a tɛndaa tɛɛŋ. Nduyɛ nyɛ nda kiŋi kiŋi lechoo maa yala a pɔmɛkilanɛtiima nda toosiaa lechoo waŋ kpou, a chiliŋii siaŋɛi nda toosiaa laŋ ni. Suŋgbuma miɔɔŋ ndaŋ kpou, nyɛpilɔɔ kpe ma wa ni.
18 Mi wana bɛndu wanaa manda masaa wa kua vɛlɛ a Sɛluiya masa wanaa soliaa lasalaa, Sɛfanaya wana soliaa lasala diiŋ ndɔɔ, a wanaa yaa waa manda diolaŋ nda.
19 Mbo kua vɛlɛ a wana pilɛ o wa o chiɛi lemasaa niŋ mbo wa puaa chɔuwa bolleŋ ndo, masaa chaaŋaa nduaa kpɛɛluŋnda a ŋuɛɛnu a o saaluŋ o chioo niŋnda, wana poonyiaa le wana wa puaa chɔuwa bolleŋ ndo, o ndoo yooŋgu puaa chɔuwa o lɛŋnde leŋ niŋ le kɔlaŋ o chɔuwo wo, a puaa cheleŋ o saaluŋ o chioo niŋnda ŋwaŋ 60.
20 Mi Nɛbusaluadaŋ wana cho wanaa manda masaa wa bolleŋ ndo chua nda, mbo kua a nda o masaa le Babilɔŋ ndo Luibila.
21 Mi masaa le Babilɔŋ diu diu nda Luibila o lɛŋnde Hamaatiiya niŋ. Mɛɛ nuaa nda looku waŋnda Chuda faŋa o lɛŋnde ndaleŋ niŋ ni ma kua a nda o biyɔɔ niŋ.
22 Mi Nɛbukanɛɛsa masaa le Babilɔŋ, hɛli Kɛdalaya po Ahikam ndo le mbo wa wanaa lo o lɛŋnde Chuda leŋ niŋnda chilaŋ. Ahikam yɛ, Siafaŋ velu ndu ni.
23 Mɛɛ wanaa wa puaa chɔuwa bolleŋ nda kpou tuei maa masaa le Babilɔŋ hɛli Kɛdalaya le mbo wa waŋnda chilaŋ, o lepilɛ niŋ kpe ma huŋ o Kɛdalaya lo Misipa. Puaa kaŋ cho haa ni: Isimɛɛ po Nɛtanaya wo, Chohinaŋ po Kaluiya wo, Sɛluiya po Tanihumɛti wo, fulaa Nɛtofa, a Chaasanaya po wana waa Maakati. Nduyɛ ma huŋ latulu a puaa ndaa chɔuwa.
24 Mi Kɛdalaya chuel nda buŋgɛi. Nduyɛ mbo dimul nda a puaa ndaa chɔuwa aa: “La yɔŋ isiooŋ le waa buɛiya le Kaadiaŋnda le. La chal o lɛŋndeŋ ndeŋ niŋ mi la wa buɛiya le masaa Babilɔŋ, okoŋ nyɛ o nyɛ cho wa o kɛndɛ a nya.”
25 O paŋgii ŋɔmmɛu ve niŋ, mi Isimɛɛ po Nɛtanaya wo, o fula o yuŋgu lemasaa choo wo,* huŋ a puaa cheleŋ tɔ ma huŋ del Kɛdalaya choo, ma dii ndu. Ma diu diu vɛlɛ Chuuwa a Kaadiaŋaa wa a ndu latulu Misipa wa. Nɛtanaya yɛ, finya ndɔ wa Ɛlisiama ni.
26 Mɛɛ keŋ yɔŋnuŋ, mi waŋnda kpou, chuaambɔ ni, bɛndu ni, a wanaa wa puaa chɔuwa bolleŋ nda chaŋ ma kua Ichipi, kanifuule a wa siooŋnde le Kaadiaŋnda.
27 Wɔsi 37 Chɛhowakiŋ masaa le Chuda wa o chɛleŋ niŋndo, o paŋgii 12 niŋ lɔma 27, mi Ivi-mɛlodaki masaa le Babilɔŋ, soli Chɛhowakiŋ masaa le Chuda o chiɛi manyumndo niŋ. Nduyɛ wɔsi koŋ Ivi-mɛlodaki simnuŋ masaa ni.
28 Mbo suaa o ndu lo nyɛkɛndɛi, nduyɛ mbo ke ndu foofoo mbo hiau masa kɛ kɛ wa a ndu latulu Babilɔŋ.
29 Okoŋ, mi Chɛhowakiŋ soli nyɛla wa ndu lekɔɔ o chiɛi manyumndo niŋndaŋ. Nduyɛ teleŋ o teleŋ, nda masaa ndaa dia nyɛdiaa latulu ni haaa a yoomu ndɔɔ mɛɛlulaŋ.
30 Haaa mbo wu, mi masaa ndoo ke ndu nyɛdiaa lepaa o lepaa.
