Masaa Diiŋ Nduaa 3:1-27
3 O wɔsi 18 Chɛhosiafati, masaa le Chuda wa o masaleŋ choo wo niŋ, Chɛholuam, po Ehaabi wo simnuŋ masaa le Isɔluɛi o Sameeliaa niŋ ni. Nduyɛ, mbo chii wɔsilaŋ 12 o masaleŋ choo.
2 Mbo hiau lachi a sɔɔŋ bɛnda Chɛhowa o hɔl te woŋ tosaa, kɛ o sulaŋ maa finya ndɔ nda kala ndɔ le. Kanifuule, mbo faŋa suŋgbule finya ndɔ simi le Baal sooluuwo leŋ.
3 Kɛ nduyɛ, hakila Chɛlobowam po Nebati wo tosa mi waŋnda Isɔluɛi luei balaŋ leniŋ ndaŋ, mbo tualnuŋ o laŋ choo. O mel taŋ te.
4 Mɛsia, masaa le Mowaabi, wana mandaa lasaa o wa ni. Nduyɛ saa fɔŋnduaa 100,000 a saa konduaa nda kili iyiiŋ te wa 100,000 ndoo mal paawaa, o masaa le Isɔluɛi lo ni.
5 Kɛ dimioo nuaa Ehaabi vi, mi masaa le Mowaabi simul masaa le Isɔluɛi.
6 Okoŋ, mi Masaa Chɛholuam chaŋ paale leŋ Sameeliaa mbo kɔ chuuŋgiaa waŋnda Isɔluɛi kpou le sɔŋgɔɔ.
7 Mbo yɔŋ vɛlɛ Chɛhosiafati, masaa le Chuda yooŋgoo aa: “Masaa le Mowaabi simul la. A cho lakɔ a ya latulu miŋ kɔ chɔulaba Mowaabi?” Mbo dimi aa: “I cho lakɔ. Naa num, wanaa piliaa naŋ cho ni. Wanaa niaa, wanaa numnda nda cho ni. Nduyɛ suaa niaa, suaa numnda nda cho ni.”
8 Okoŋ mbo nyuna aa: “A nɛi kuɛɛ naŋ cho yɛ keeku miŋ kuɛ?” Mbo mulul ndu aa: “A nɛi keeku o pollo niŋ Idɔm ndo.”
9 Mi masaa le Isɔluɛi, masaa le Chuda, a masaa le Idɔm chaŋ ma bii kɔlaŋ. Mɛɛ nda kuɛ le palɛi i ŋɔmmɛu, mɛŋma ve lɛ le mi puaa chɔuwa a chɔluaa nda wa kɔlaŋ nda a kol te.
10 Mi masaa le Isɔluɛi dimi aa: “Nuawɔ kpundɛ bɛndu se! Chɛhowa chuuŋgiaa masaa yaa wa haa diompilɛ, le mbo mal nda waŋnda Mowaabi o ba!”
11 Okoŋ, mi Chɛhosiafati nyuna aa: “Mɛɛ wana suaa le Chɛhowa wo cho nanuŋ, o naŋ nɔla miŋ dimul mbo nyuna Chɛhowa wo le?” Mi masaa le Isɔluɛi buɛiyaa nduaa o pilɛ muli aa: “Ilaasia po Siafati wo cho nanuŋ. Ndu ndoo duau Ilaicha mɛŋndaŋ o ba ni.”*
12 Mi Chɛhosiafati dimi aa: “O nɔla mbo dimul naa yooŋgu Chɛhowa wo.” Okoŋ mi masaa le Isɔluɛi, Chɛhosiafati, a masaa le Idɔm kua naa ndu chua.
13 Mi Ilaasia dimul masaa le Isɔluɛi aa: “Kpeku yɛɛ ya nɔ yɛ a num? Wanaa suaa le mɛlɛkaa finya numnda a mɛlɛkaa kala numnda, kɔ o nda lo.” Kɛ mi masaa le Isɔluɛi dimul ndu aa: “I wa lende le, kanifuule Chɛhowa chuuŋgiaa masaa yaawa haa diompilɛ, le mbo mal nda waŋnda Mowaabi o ba.”
14 Okoŋ mi Ilaasia dimi aa: “I mɛnaŋ po o Chɛhowa, Mɛlɛka puaa chɔuwa,* o cho yoomu mi wa ndu piɛiyo* wo lo maa, te ndoo cho le bɛɛle ya nɔ le Chɛhosiafati masaa le Chuda wo leŋ te, I ve num pɛŋ nua ɔɔ mi mulul num te.
15 La chuu ya wana luaa towaa wo.”* Dimioo nuaa wana luaa towaa kandu towaa lɔɔ, mi kpaaya Chɛhowa wo huŋ Ilaasia choo.
16 Mbo dimi aa, “Nyɛ Chɛhowa dimi wo cho hoo ni: ‘La kɔ a sooŋndaŋ touwɔɔ o kpoloŋndo* hoo niŋ.
17 Kanifuule, nyɛ Chɛhowa dimi wo cho hoo ni: “Hueiyii hɔŋ niŋ te, nduyɛ piɔɔ se niŋ te. Kɛ nduyɛ, mɛŋndaŋ ma cho piɔ cha o kpoloŋndo* hoo niŋ, okoŋ mi nya a chɔluaa nyaa kpou kol.”’
18 Kɛ hei cho bɛɛ suɛi kala Chɛhowa o hɔl te, kanifuule o cho vɛlɛ malɔɔ waŋnda Mowaabi nya o ba.
19 Chieeŋ nda taŋgul a kpakila kala kalalaŋ ndoŋ, vɛlɛ a chieeŋ ndaŋ kɛndɛ kɛndɛŋ cheleŋndoŋ kpou, la tɛɛmbuu muŋ. Yɔm o yɔm kɛndɛ cho loŋ, la nɔ mi la keŋ ndu, nduyɛ mi la beŋul sooŋnda mamɛŋndaŋ kpou. Buŋgɛi lelɛŋ o lelɛŋ nya che pɛ maa i naŋ, la deŋgela poutaŋ lechoo mi la tɛɛmbuu ndi.”
20 Nduyɛ idiiyo, a teleŋ nda soli nuaa sala ŋkullo kinɛiyo, mi mɛŋndaŋ ma buli o lepilɛ niŋ kpe chɔnɔŋndo kumbu Idɔm ndo, mi ma chua lɛŋndeŋ kpou.
21 Mi Mowabaitiiya kpou tuɛi maa masaa haa hiŋ le sɔŋgɔɔ a nda. Okoŋ, ma chuuŋgiaa wana pɔnɔ o wana pɔnɔ ndoo nɔla mbo chua wolɔɔla chɔulaŋ,* nduyɛ ma kɔ sim o pɛŋgulaŋ.
22 Mɛɛ nda chɛŋ idiiyo puŋ, yɛŋndeŋ le wa lɔɔ o mɛŋndaŋ choo. Nduyɛ mi Mowabaitiiyaa wa haa kumbuei i pilɛi ya cha mɛŋndaŋ maŋ ma siaŋa maa makoŋgo.
23 Ma dimi aa: “La nuawɔ se koowaŋ! Masaa haa diuwaŋ a mɔɔŋ faŋndoŋ. Lelaŋ waŋnda Mowaabi, ŋ kɔ puŋgaŋ nyɛm ndaŋ!”
24 Mɛɛ waŋnda Mowaabi hiŋ o dɔɔŋgɔ Isɔluɛiya niŋ, mi Isɔluɛiya chaŋ ma kandu nda diu diuwo, okoŋ ma piɔl a kiltaŋ. Ma tisa nda kɔɔli haaa ma luɛi Mowaabi. Nduyɛ, a wa kɔlaŋ a waŋnda Mowaabi diu diuwo.
25 Ma pesi pesi chieeŋ ndaŋ bɛndoŋ, nduyɛ mi puaa chɔuwa o kɛ kɛ chua pouwo, ma kɔ deŋgela laŋ o buŋgaŋ lelɛŋ kɛndɔŋ choo. Ma beŋul sooŋnda mamɛŋndaŋ, nduyɛ ma kiiŋuu yɔmii kɛndɛi kpou. O mɛɛlulaŋ kpɔŋ, mɛɛ le chioo Kiaa-haluɛsɛti* mbo lo isisi. Kɛ ndu bɛɛ, mi puaa sɔŋga a faandalaŋ nda kɔ balu ndu, nduyɛ ma kandu ndu tɛɛmbuuwo.
26 Mɛɛ masaa le Mowaabi che maa a yem ndu, mbo chua puaa chɔuwa 700, nda kpou a mɔɔŋ faŋndoŋ o laba, okoŋ mbo kua kumbu masaa le Idɔm wa wo le mbo hɛluŋ, kɛ a sɔla batiuwaa le.
27 Okoŋ mbo bii po ndɔ tasoo, o ndoo nɔ le miiŋgoo o masaleŋ choo o foofo ndɔɔ wo, mbo soli ndu sala luamaa o chiiyii kpaki chioo choo. Le hei, mi puaa chɔuwa duaunuŋ tumbe o kala kala a waŋnda Isɔluɛi. Okoŋ ma faŋaŋ ndu kɔɔli, ma miiŋguŋ o lɛŋnde ndaleŋ niŋ.
Tɛɛsiaalaŋ
^ Ɔɔ “ndu wa buɛi Ilaicha wo ni.”
^ Koŋ cho ni, puaa chɔuwa o choo choo niŋ.
^ Hibuluiye, “mi wa isisi ndu lachi.”
^ Ɔɔ “wana luaa nyɛchaa.”
^ Ɔɔ “pioo.”
^ Ɔɔ “pioo.”
^ Ɔɔ “wana o wana yiinuŋ yauleŋ.”
^ Ɔɔ “kpaki nda taŋgul a poutaŋ Kiaa-haluɛsɛti wo.”
