Masaa Diiŋ Nduaa 5:1-27
5 Po pilɛ wa diolaŋ aa Naamaŋ. Ndu wa masa puaa chɔuwa le masa wa Siiliaa wo ni. Tɔɔ pila ndoo fula ni, nduyɛ masanɔ ndɔɔ ndoo nɔ bɛɛleŋ tau le ndu, kanifuule mi Chɛhowa piŋi Siiliaa sanaa o ndu niŋ. Kuubanɔ chɔuwo o wa ni, mi che bɛɛ ndoo nɔ naa ŋlɛlɔɔ.*
2 A teleŋ pilɛ, mɛɛ Siiliaŋnda kɔ del waŋnda choo o lɛŋnde Isɔluɛi leŋ niŋ, ma bii chuaambɔ pilɛ, nduyɛ mbo simnuŋ buɛi lanɔɔ Naamaŋ ndo.
3 Mi chuaambɔɔ hoo dimul lanɔɔ Naamaŋ aa: “Te ndoo yɔŋ pɛ kinɛi mi masanɔ nuu ndoo kuɛ o wana suaa le Mɛlɛka wo lo Sameeliaa, o wa ndu siŋgi a naa ŋlɛlɛ o nɔ wo!”
4 Okoŋ mbo* kɔ dimul masanɔ ndɔɔ nyɛ chuaambɔ Isɔluɛinɔɔ dimul ndu wo.
5 Mi masaa le Siiliaa dimi aa: “Kɔ sakpo! I cho masaa le Isɔluɛi yauwo yɔŋ.” Okoŋ mi Naamaŋ kua. Nduyɛ, mbo chua kaniŋ humboŋ, ŋ wa talɛŋndoŋ tɔ,* kooliiyoŋ 6,000, a domalaŋ tɔ.
6 Mbo yoo masaa le Isɔluɛi yauwo hoo. Nduyɛ nyɛ wa o poonyiaa leniŋ ndo cho hoo ni: “I yɔŋ yauwo hoo a buɛi nuu Naamaŋ latulu, le halikpeŋ ma siŋgi ndu a naa ŋlɛlɛ cho ndu lekɔɔ wo.”
7 Dimioo nuaa masaa le Isɔluɛi veelu diomndaŋ o yauwo hoo niŋ, mbo sɛɛsa doma ndɔɔ. Mbo dimi aa: “Le yɛɛnɛ mbo yɔŋ ya poo hoo le mi siŋgi ndu a naa ŋlɛlɛ o nɔ wo? Baa Mɛlɛka ya cho ni le mi nɔ kpaayaa piɔmndo choo a yoomoo? Nyapila cho chɔɔ maa poo hoo cho ya sɛɛŋgiaŋndo nuuviaa o ŋdial.”
8 Kɛ dimioo nuaa Ilaasia, wana Mɛlɛka tonyaa tuei maa masaa le Isɔluɛi sɛɛsa doma ndɔɔ, mbo yɔŋ ndu diomndeŋ o lepilɛ niŋ kpe aa: “Le yɛɛnɛ ŋ sɛɛsa yɛ doma numndo? Yandii dimul ndu mbo hiŋ naa ya chua, le mbo sina maa wana suaa le Mɛlɛka wo cho o Isɔluɛi niŋ.”
9 Okoŋ mi Naamaŋ huŋ a suaa nduaa, nyɛm nyaanaŋ suaa naŋndoŋ, nduyɛ mbo huŋ sim o chiɛi Ilaasia wo sondoo.
10 Kɛ mi Ilaasia viam waŋndo le mbo dimul ndu aa: “Kɔ ma kɔ puluŋ o pioo Chɔɔdaŋ bɛmbɔɔ le ŋɔmmɛu. Okoŋ dialuŋ numndoŋ cho diondɔɔ fo, miŋ miiŋgu maa paandu.”
11 Le hei, mi Naamaŋ tuulu kɔl tau, mbo kandu miiŋgɔŋndo. Mbo wa dimioo aa: “I wa yiyaŋndo maa, ‘O cho fula naa ya chua mbo huŋ sim naŋ, mbo veelu diola Chɛhowa Mɛlɛka ndɔɔ, mbo keeliaa ya baa choo le naa ŋlɛlɔɔ hoo siŋgioo.’
12 Baa peela cho Damasikɔɔ laŋ, Abana a Fapaa, la cho la sɔvɛ mi la hiau peelaŋ Isɔluɛi kpou le? Baa I nɔla mi puluŋ loŋ mi dendu le?” Okoŋ, mbo muliŋ kɔŋndaŋ a tumboo.
13 Mi buɛiyaa nduaa sɔɔŋguu naa ndu chua, ma dimul ndu aa: “Masanɔ naa,* te wana suaa le Mɛlɛka wo ndoo dimul num pɛ le suɛi kendu ve tosaa, baa a ve ndi tosa le? Ɔɔ niŋ te o dimul num pɛ kinɛi aa, ‘Kɔ puluŋ ma dendu’?”
14 Okoŋ mbo kua, mbo kɔ del* o pioo Chɔɔdaŋ bɛmbɔɔ le ŋɔmmɛu, mɛɛ wana Mɛlɛka tonyaa dimi yɛ. Nduyɛ mi dialuŋ ndɔŋ diandu fo, miŋ miiŋgu maa dialuŋ poombɔ pɔmbɔ.
15 Okoŋ kɔɔli, ndu ni, a wanaa liila ndu wa kpou, ma miiŋgu pila o wana Mɛlɛka tonyaa lo. Nduyɛ mbo kɔ sim ndu lachi, mbo dimi aa: “I sina niŋ kpendekele maa o chieeŋndo choo kpou, o Isɔluɛi niŋ kinɛi Mɛlɛka cho ni. Lelaŋ a yandii, chɛl kioo* hoo buɛi numndo o ba.”
16 Kɛ mi Ilaasia dimi aa: “I mɛnaŋ po o Chɛhowa, Mɛlɛka cho yoomu, mi wa ndu piɛiyo wo* lo maa, I cho ndu biyɔɔ le.” Mbo lambaŋ Ilaasia dɛɛniaa le mbo chɛl kioo hoo, kɛ mi Ilaasia kɛɛ kpooŋ.
17 O mɛɛlulaŋ kpɔŋ, mi Naamaŋ dimi aa: “Te o cho yɛ koŋ te, mɛɛ a yandii, ke buɛi numndo puuloo o lɛŋndeŋ ndeŋ niŋ, o chɔluaa yɛyii muuliaŋnda* a ŋiɔɔŋ nɔla ma chua wo. Kanifuule, buɛi numndo soli lɛ niŋ sala luamaa ɔɔ sala cheleŋ o mɛlɛkaa cheleŋnda lo le, mɛɛ Chɛhowa.
18 Kɛ, Mɛlɛka Chɛhowa o mal buɛi numndo haki le nyɔɔ o pilɛ kpe: Te masanɔ nuu o kuɛ pɛ o maaŋ mɛlɛka Luimɔŋ ndo niŋ le tundɔŋndo mbo beŋ ndu wulaŋ, o ba nuu choo o tiindaŋ ni. Le hei, I nɔ mi tunduŋ mi baŋ wulaŋ o maaŋ mɛlɛka Luimɔŋ ndo niŋ. A yandii, te I baŋ pɛ wulaŋ o maaŋndo hoo niŋ, maa Chɛhowa mal buɛi numndo haki le keŋ.”
19 Mi Ilaasia dimul ndu aa: “Kɔ o kɔl nyulu niŋ.” Mɛɛ o faŋaŋ loŋ mbo kua tiŋ landaŋ,
20 mi Kehaasi, buɛi Ilaasia wo, wana Mɛlɛka tonyaa dimi o kɔl niŋ aa: ‘Masanɔ nuu mal Naamaŋ po Siiliaŋnɔɔ hoo kɔŋndaŋ, nyɛ o nyɛ o hiŋ, o bii ndu o ba le. I mɛnaŋ po o Chɛhowa, Mɛlɛka cho yoomu wo lo maa, I cho ndu nyaanɔŋ kɔɔli nduyɛ mi kɔ bii ndu nyɛ o ba.’
21 Le hei, mi Kehaasi nyaanuŋ Naamaŋ kɔɔli. Mɛɛ Naamaŋ che maa waŋndo cho ndu kiltaŋ kɔɔli, mbo tual o nyɛ ndɔ nyaanaŋ suaa naŋndo choo, mbo demul ndu. Mbo nyuna ndu aa: “Nyɛ o nyɛ cho pa o kɛndɛ?”
22 Mbo dimi aa: “Nyɛ o nyɛ cho o kɛndɛ. Masanɔ nuu vem ya ni, mbo dimi aa, ‘Puaa feleŋguaa a ŋiɔɔŋ o puaa wanaa suaa le Mɛlɛka wa tɛɛŋ laŋga chɔŋ suŋ suŋ o fondaŋ ŋpemboo, o tanda Ifiluem ndo niŋ, ma huŋ naa ya chua. Lelaŋ a yandii, ke nda kaniŋ humboŋ talɛŋnde ipilɛ, a domalaŋ la tiɔɔŋ.’”
23 Mi Naamaŋ dimul ndu aa: “Kpoo, chua talɛŋndoŋ ŋmuuŋ.” Mbo lambaŋ ndu kɔɔli, okoŋ mbo wou kaniŋ humboŋ talɛŋndoŋ ŋmuuŋ o bɔlɔlaŋ la tiɔɔŋ niŋ a domalaŋ la tiɔɔŋ, mbo ke buɛiyaa nduaa a ŋiɔɔŋ ma liila ndu a muŋ.
24 Mɛɛ nda fuuluu Ofɛɛ,* mbo bii nda muŋ o ba, mbo kɔ kɛsi chiɛiniŋ, okoŋ mbo mal nda ma kuaŋnuŋ. Mɛɛ nda kuɛŋnuŋ,
25 mbo luɛi chiɛiniŋ, mbo kɔ sim masanɔ ndɔɔ ikɛi. Mi Ilaasia nyuna ndu aa: “Kuɛɛnɛ ŋ wa yɛ Kehaasi?” Kɛ mbo mulul ndu aa: “Buɛi numndo kue ba o ba le.”
26 Mi Ilaasia nyuna ndu aa: “A yiyaŋ maa teleŋ ŋ kuɛ po koŋ kɔɔli, mbo tual o nyɛ ndɔ nyaanaŋ suaa naŋndo choo le num demullo wo, I sina le? Baa teleŋndo cho hoo ni mi chɛl kaniŋ humboŋ, domalaŋ, kpele ma ɔlifiiyo, kpele makilepiiyo, saa, nauwa, buɛiyaa piaanduaa, ɔɔ a laanduaa maa ke?
27 Lelaŋ, lɛlɔŋ Naamaŋ ndoŋ cho num taŋɔɔ a wanaa cho fula o pulale numndeŋ choo wa le fɛɛŋ a fɛɛŋ.” O lepilɛ niŋ kpe, mbo faŋaŋ Ilaasia o hɔl a lɛlɔŋ ndu lekɔɔ, ŋ humbu fofo maa mɔm.
Tɛɛsiaalaŋ
^ Ɔɔ “naa fula o kɔɔleŋ ndo.”
^ Naapum Naamaŋ.
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Hibuluiye, “kɛkɛ nuu.”
^ Ɔɔ “mbo kɔ mɔɔwa.”
^ Hibuluiye, “sala duauwaa.”
^ Hibuluiye, “o ya sim lachi wo.”
^ Chɔluaa haa, sofɛlɛ piaandoo hel so laandoo ni ma kom nda.
^ Fondaŋndo opum o Sameeliaa niŋ. Naapum pembei ɔɔ fondaŋ nda taŋgul o kala kala wo.
