Masaa Diiŋ Nduaa 6:1-33
6 Mi puaa wanaa suaa le Mɛlɛka wa dimul Ilaasia aa: “Fondaŋ naŋ cho hoo ichali naa nyaa wo, o dɔɔnaŋ bɔɔ le naa.
2 Yandii chɛl naa miŋ kuɛ o pioo Chɔɔdaŋ, mi wana o wana kɔ kiolu yɔmndo loŋ, miŋ toosiaa fondaa le miŋ wa loŋ.” Mbo dimi aa: “La kɔ.”
3 Mi o pilɛ nyuna ndu aa: “A cho lakɔ a naa* latulu?” Okoŋ mbo dimi aa: “I cho lakɔ.”
4 Mbo kua a nda latulu o pioo Chɔɔdaŋ, nduyɛ ma kɔ kandu yɔmnde kiolɔɔ.
5 Wana pilɛ lo yɔmndo kiolɔɔ, mi chuei bɛŋiŋ mi i del o peelo. Mbo deŋi choo choo aa: “Ee masanɔ nuu, chuei hei youwo ya you ndi ni!”
6 Mi wana Mɛlɛka tonyaa nyuna ndu aa: “Kuɛɛnɛ i del lɛ?” Mbo chɔm ndu naa i del la. Mi Ilaasia kialu sioŋndeŋ mbo mal o fondaŋ koŋ, okoŋ mi chuei hel o mɛŋndaŋ choo.
7 Mbo dimul ndu aa: “Soli ndi.” Okoŋ mbo siɛndi baa mbo soli ndi.
8 Okoŋ kɔɔli, mi masaa le Siiliaa kua le Isɔluɛiya chiŋalaŋndo a sɔŋgɔɔ. Mbo suukaŋ a laŋgbaa nduaa kalla, nduyɛ mbo dimi aa: “I cho lakɔ mi kɔ kila dɔɔŋgɔɔ naa nyaa, o fondaŋ waa nuaa a o fondaŋ waa nuaa.”
9 Okoŋ, mi wana Mɛlɛka tonyaa yɔŋ diomndeŋ o masaa le Isɔluɛi lo. Mbo dimul ndu aa: “Te a wa pɛ keilaŋ o fondaŋndo hoo, mandaŋ, kanifuule loŋ Siiliaŋnda cho hunɔɔ ni.”
10 Le hei, mi masaa le Isɔluɛi yɔŋ diomndeŋ o wanaa cho o fondaŋ wana Mɛlɛka tonyaa dimul ndu maa o mandaŋ ndo. Mi Ilaasia hiau lachi a ndu silaa, nduyɛ teleŋnda bɔɔbɔɔ ndoo kue loŋ te.
11 Mi hei tosa mi masaa le Siiliaa tuulu kɔl tau. Okoŋ mbo veelu laŋgbaa nduaa kalla, mbo nyuna nda aa: “La dimullɔ ya! Nɛɛnɛ cho yɛ naa tɛɛŋ mbo wa kumbuii masaa le Isɔluɛi?”
12 Mi wana pilɛ dimul ndu aa: “Wana o wana bɛɛ naa tɛɛŋ masanɔ nuu! Ilaasia ni, wana suaa le Mɛlɛka o Isɔluɛi niŋndo. Nyɛ o nyɛ ŋ dimi o kpele numndo choo, ndu cho masaa le Isɔluɛi dimullo a ndu okɔɔ ni.”
13 Mbo dimi aa: “La kɔ nuuviaa ndu mi la sina naa o cho wa. Okoŋ I cho puaa yɔŋ ma kɔ bii ndu.” O mɛɛlulaŋ kpɔŋ, ma dounuŋ ndu kona aa: “O cho Dotaŋ.”
14 O lepilɛ niŋ kpe, mbo yɔŋ suaa, nyɛm nyaanaŋ suaa naŋndoŋ, a puaa chɔuwa kunda bɛndoo loŋ. Ma huŋ a nyumndaŋ, ma huŋ balu chioo silɔ.
15 Mɛɛ buɛi* wana Mɛlɛka tonyaa chɛŋ idiiyo puŋ mbo fula o bɛɛ, mbo cha maa puaa chɔuwa a suaa ndaa, vɛlɛ a nyɛla nyaanaŋnda suaa naŋndaŋ la balu chioo silɔ. Mi wana ndɔ malaa dimul ndu o lepilɛ niŋ kpe aa: “Kpokoo masanɔ nuu! Yɛɛnɛ naŋ cho yɛ tosa?”
16 Kɛ mbo dimul ndu aa: “Yɔŋ isiooŋ te! Kanifuule, wanaa cho a naa latulu wa hiou poloŋ a wanaa cho a nda latulu wa.”
17 Okoŋ mi Ilaasia kandu piɛileŋ, mbo dimi aa: “Oo Chɛhowa, yandii kumbi ndu hɔltaŋ mbo che.” O lepilɛ niŋ kpe, mi Chɛhowa kumbi buɛi ndɔɔ hɔltaŋ, nduyɛ mbo cha tanda ŋpemboo o piaa cha a suaa, vɛlɛ a nyɛla nyaanaŋnda leyiŋnda suaa naŋndaŋ Ilaasia la balaa silɔ.
18 Mɛɛ Siiliaŋnda sɔɔŋguu Ilaasia ikɛi, mbo piɛi o Chɛhowa lo, mbo dimi aa: “A yandii, suumiaa waŋnda haa.”* Mi Mɛlɛka suumiaa nda, mɛɛ Ilaasia dimul ndu yɛ.
19 Mi Ilaasia dimul nda aa: “La bendu nɛiyo, o cho chiee koŋ te cho hoo le. La tol la kɔɔli, mi kɔ chɔm nya wana nya cho nuuviaa wo.” Kɛ, mbo kua a nda Sameeliaa.
20 Mɛɛ nda fuuluu Sameeliaa, mi Ilaasia dimi aa: “Oo Chɛhowa, kumbi nda hɔltaŋ le ma che.” Mi Chɛhowa kumbi nda hɔltaŋ, nduyɛ ma cha maa Sameeliaa chiee deŋ nda cho ni.
21 Mɛɛ masaa le Isɔluɛi che nda, mbo nyuna Ilaasia aa: “Fallo, I diu nda, I diu nda kpou?”
22 Kɛ mbo mulul ndu aa: “A nɔ ma diu nda le. Baa ma diu pa wanaa ŋ bii o chɔuwo a muɛi faŋnde vɛlɛ a chiɔuwo wa? Ke nda nyɛdiaa a mɛŋndaŋ ma de ma kol, okoŋ ma miiŋgu o masanɔ ndaa lo.”
23 Mbo ke nda nyɛdiaa tau, ma dia ma kol. Okoŋ kɔɔli, mbo mal nda ma miiŋgu o masanɔ ndaa lo. Chɔŋ niŋ a teleŋ koŋ, le pilɛ bɛɛ Siiliaŋaa kei waŋnda delɔɔ choo ma puŋga nyɛm ndaŋ nda hiŋ lɛ o lɛŋnde Isɔluɛi leŋ niŋ te.
24 Okoŋ kɔɔli, mi Bɛŋ-hedadi masaa le Siiliaa chuuŋgiaa puaa chɔuwa kpou naapilɛ, ma kɔ luei Sameeliaa o piŋndo niŋ.
25 Le hei, mi yima bɛnduaŋ ma del Sameeliaa. O lo o piŋndo niŋ haaa mi bolle sofɛlɔɔ le hel baa kaniŋ humboŋ 80, nduyɛ poola kaŋgboo baa le diiŋ, mi la hel baa kaniŋ humboŋ 5.
26 Mɛɛ masaa le Isɔluɛi wa hiouwɔɔ o kpakioo choo, mi chuaa pum chaŋ o ndu lo. Mbo dimi aa: “Oo masanɔ nuu, mala naa fɔ!”
27 Mbo nyuna ndu aa: “Te Chɛhowa mala num te, kuɛɛ ya cho yɛ nyɛ sɔla le num malaa? Baa o yasaba? Ɔɔ o doola nda vaa muɛiyaŋ ɔɔ chuɛiyaŋ ndo?”
28 Mi masaa nyuna ndu vɛlɛ aa: “Yɛɛ cho yɛ bahawɛi numndo?” Mbo mulul ndu aa: “Chuaa hoo dimul la ni aa, ‘Yɔŋgu po numndo miŋ de ndu hau, okoŋ siɔdii ŋ de po nuu.’
29 Nduyɛ miŋ yau po nuu miŋ dia ndu. Diimandɔɔ, mi dimul ndu aa, ‘Yɔŋgu po numndo miŋ de ndu.’ Kɛ mbo viaŋ po ndɔɔ.”
30 Dimioo nuaa masaa tuei nyɛ chuaa hoo dimi wo, mbo sɛɛsa doma ndɔɔ. Mɛɛ o wa hiouwɔɔ o kpakioo choo, mi waŋnda cha maa o wounuŋ nyɛla labɛkilaŋ o doma ndɔɔ bɛŋgu.
31 Okoŋ mi masaa dimi aa: “Te I kilu hau Ilaasia po Siafati wo bolleŋ te, Mɛlɛka tusi ya nyɛpalaa bɛndoo choo!”
32 Ilaasia wa ichali o ndu lo chiɛiniŋ a waŋ bɛnduaa latulu. Okoŋ, mi masaa viam waŋndo ndu lachi. Kɛ tuupa mi wana o vem ndo fuuluu, mi Ilaasia dimul waŋ bɛnduaa aa: “La che mɛɛ po wana diyaa hoo vem waŋndo le ya bolleŋ kiolɔɔ yɛ? La wa tofaa. Te la che wana o vem ndo hunɔɔ pɛ, la kindal ndu dioo yɔŋii o luɛi. Baa la cho tueiyɔɔ peluŋ masanɔ ndɔɔ ndu hunɔɔ kɔɔli le?”
33 Ilaasia lo suɛi o nda lo, mi wana o vem ndo fuuluu o ndu lo. Okoŋ mi masaa dimi aa: “Chɛhowa tusi naa kpundɔɔ hoo choo ni. Le yɛɛ ya chum yɛ vɛlɛ Chɛhowa?”
