Masaa Diiŋ Nduaa 7:1-20
7 Mi Ilaasia dimul nda aa, “La yaŋ nilaŋ mi la tuei nyɛ Chɛhowa dimi wo. Nyɛ Chɛhowa dimi wo cho hoo ni: ‘A teleŋ waa nuaa siɔdii, kolo kɛndɛ kɛndɔɔ kiloo le hiɔɔlu,* o cho nɔ baa siɛkɛlle i pilɛ* o dio kpakioo* Sameeliaa. Nduyɛ baliiyoŋ kiloo le ŋɔmaa, ŋ cho nɔ baa siɛkɛlle i pilɛ.’”
2 Mi wana malaa le wana cho puaa chɔuwa bolleŋ ndo, o masaa tiindaŋ ndo dimul wana Mɛlɛka tonyaa aa: “O yɔŋ bɛɛ mi Chɛhowa kumbi diolaŋ o choo choo niŋ, baa nyɛ ŋ dimi hoo wo nɔla pa mbo yɔŋnuŋ?” Le hei, mbo dimul ndu aa: “A cho ndu chɔ a lehɔl pɛɛŋ, kɛ a di niŋ ndu le.”
3 Wanaa ŋlɛliaa a hiɔɔlu wa ichali o dio kpaki chioo. Ma dimulaŋ aa: “Le yɛɛ naŋ cho yɛ lo ichali naŋnuŋ haaa miŋ vi?
4 Te ŋ dimi pɛ aa, ‘Ŋ kɔŋnuŋ chiee,’ ŋ cho lakɔ wu, kanifuule yiaaŋ ma cho chiee. Nduyɛ te ŋ lo yɛ pɛ ichali nanuŋ, ŋ cho wu kaŋgalaŋ. Lelaŋ, ŋ kɔŋnuŋ o dɔɔŋgɔ Siiliaŋnda. Te a tuiinuŋ naa inyiɛɛ pɛ, ŋ cho wa yoomu. Kɛ te a wa yɛ naa diyɔɔ pɛ, a dii naa.”
5 A teleŋ nyumndaŋ ma kandu tolɔɔ kinɛiyo, ma chaŋ ma kua o dɔɔŋgɔ Siiliaŋnda. Mɛɛ nda fuuluu o dɔɔŋgɔ Siiliaŋnda, wana o wana ve loŋ te.
6 Kanifuule, mi Chɛhowa tosa mi Siiliaŋaa wa o dɔɔŋgɔɔ niŋnda tuɛi bɔɔluu nyɛm nyaanaŋ suaa naŋndoŋ a suaa, nduyɛ a bɔɔluu puaa chɔuwa kunda bɛndoo. Le hei, ma dimulaŋ aa: “Masaa le Isɔluɛi paawa* masaa Hitaitiiya a masaa cho Ichipi wa, le ma huŋ del naa choo a sɔŋgɔɔ!”
7 Ma chaŋ o lepilɛ niŋ kpe a teleŋ nyumndaŋ ma kandu koŋ tolɔɔ wo, ma mɛi tɛndiila ndalaŋ, suaa, sofɛliaa, a dɔɔŋgɔɔ lende, ma nyaanuŋ le yoomula ndalaŋ piŋioo.
8 Mɛɛ wanaa ŋlɛliaa haa fuuluu o dɔɔŋgɔɔ niŋ, ma luɛi o tɛndiiyo o pilɛ niŋ, ma kandu nyɛdiaa dioo a kolɔɔ. Ma chua kaniŋ humboŋ, kooliiyoŋ, a domalaŋ, ma kuaŋnuŋ a muŋ ma kɔ vioŋ. Okoŋ kɔɔli, ma miiŋgu ma kɔ luɛi o tɛndii cheleŋ niŋ ma chua nyɛm wa loŋ ndoŋ, ma kuaŋnuŋ a muŋ ma kɔ vioŋ.
9 O mɛɛlulaŋ kpɔŋ, ma dimulaŋ aa: “Nyɛ naŋ cho hoo tosaa wo bɛnda le. Paale kɔl kɛndɛ leŋ le cho leŋ ni. Ŋ nɔ miŋ dimul waŋnda yooŋgoo hoo! Kɛ te ŋ lo pɛ chumndo haaa mi paaleŋ le sɛ, a cho naa nyɛpalaa tusi choo. Ŋ kɔŋnuŋ chɔ chɔ o chiɛi lemasaa, miŋ kɔ dimul nda yooŋgoo hoo.”
10 Okoŋ ma kua, ma veelu wanaa manda dio kpaki chioo wa, ma dimul nda aa: “Ŋ kuɛ o dɔɔŋgɔ Siiliaŋnda, kɛ ŋ komal wana o wana loŋ te, nduyɛ kpɛkɛlɛ bɛɛ ŋ tui wana o wana le. Suaa a sofɛliaa kinɛi naŋ komal a baa ni, nduyɛ ma mɛi tɛndiilaŋ lende.”
11 Mi wanaa manda dio kpakioo wa kua chɔ chɔ o chiɛi lemasaa, ma kɔ dimul nda yooŋgoo hoo.
12 Mi masaa chaŋ o lepilɛ niŋ kpe ichɔl koŋ, mbo dimul laŋgbaa nduaa kalla aa: “Yandii, I dimullɔ nya nyɛ Siiliaŋnda kɛɛsiaa le naa tosallo wo. A sina maa yima bɛnduaŋ ma cho naa choo. Nyɛ koŋ nda mal dɔɔŋgɔɔ lende ni, ma kɔ vioŋnuŋ yondoo niŋ. Ma dimi aa, ‘A cho chioo malɔɔ ma hiŋ, nduyɛ a cho wa yoomu miŋ bii nda, okoŋ miŋ hel chiee.’”
13 Mi laŋgbaa nduaa kalla o pilɛ dimul ndu aa: “Yandii dimul puaa apum, ma chua suaa a ŋuɛɛnu o a lo wa tɛɛŋ, miŋ vem nda ma kɔ tofa. Kanifuule, a kɔ, a kua le, a cho piɔmndo sɔla maa Isɔluɛiyaa faŋga bɛnduaa lo haa naŋ nda kpou, ɔɔ maa Isɔluɛiyaa faŋga bɛnduaa vi niŋnda.”
14 Mi puaa haa chua nyɛla nyaanaŋnda suaa naŋndaŋ la tiɔɔŋ a suaa, okoŋ mi masaa viam nda o dɔɔŋgɔ Siiliaŋnda niŋ. Mbo dimul nda aa: “La kɔ, mi la kɔ tofa.”
15 Mi wanaa nda vem haa wa kua Siiliaŋnda kɔɔli haaa o pioo Chɔɔdaŋ. Nduyɛ teleŋ Siiliaŋnda laasiaŋ kɔltaŋ ma wa kiltaŋ ndo, domalaŋ a nyɛm nda vii vii yoŋ, ma komal muŋ ŋ tiuwaa o nɛi kpou. Okoŋ ma miiŋgu, ma kɔ dounuŋ masaa kona.
16 Mi waŋnda kua o dɔɔŋgɔ Siiliaŋnda, ma kɔ puŋga nyɛm ndaŋ. Le hei, mi kolo kɛndɛ kɛndɔɔ kiloo le hiɔɔlu tual baa siɛkɛlle i pilɛ, nduyɛ mi baliiyoŋ le kiloo le ŋɔmaa tual baa siɛkɛlle i pilɛ, a mɛɛ Chɛhowa dimi yɛ.
17 Masaa ndoo hɛli niŋ wana mala wana cho puaa chɔuwa bolleŋ ndo, o ndoo tiindaŋ ndo le mbo wa dio kpaki chioo hɔlteŋ. Kɛ mi waŋnda kei ndu niɔu niɔu choo mbo wu o dio kpaki chioo loŋ, mɛɛ o mɛɛ wana Mɛlɛka tonyaa dimul masaa yɛ, teleŋ o kuɛ o ndu lo wo.
18 Mi i yɔŋnuŋ mɛɛ o mɛɛ wana Mɛlɛka tonyaa dimul masaa yɛ aa: “Baliiyoŋ le kiloo le ŋɔmaa, ŋ cho tolɔɔ baa siɛkɛlle i pilɛ, nduyɛ mi kolo kɛndɛ kɛndɔɔ le kiloo le hiɔɔlu tol baa siɛkɛlle i pilɛ a teleŋndo hoo siɔdii o dio kpaki chioo Sameeliaa.”
19 Kɛ mi wana malaa le wana cho puaa chɔuwa bolleŋ ndo dimul wana Mɛlɛka tonyaa aa: “O yɔŋ bɛɛ mi Chɛhowa kumbi diolaŋ o choo choo niŋ, baa nyɛ ŋ dimi hoo wo nɔla pa mbo yɔŋnuŋ?” Le hei, mi Ilaasia dimul ndu aa: “A cho ndu chɔ a lehɔl pɛɛŋ, kɛ a di niŋ ndu le.”
20 Nduyɛ, lende kpeekpei i yɔŋnuŋ ndu ni, kanifuule mi waŋnda lo ndu niɔu niɔuwo haaa mbo wu o dio kpaki chioo.
Tɛɛsiaalaŋ
^ Hibuluiye, “siaa o pilɛ.” Tofa Tɛɛsiaa B14.
^ Tofa Tɛɛsiaa B14.
^ Ɔɔ “o lɔɔlaŋ.”
^ Ɔɔ “sala.”
