Masaa Diiŋ Nduaa 8:1-29
8 Mi Ilaasia dimul chua o miŋgi po ndɔɔ yoomu wo aa: “Chɔŋ nya ma chua yuŋgu numndo, mi la kɔ wa ba o ba nya yeema pɛ. Kanifuule, Chɛhowa dimi maa yima bɛnduaŋ ma cho delɔɔ o lɛŋndeŋ ndeŋ niŋ. Ma cho wa le wɔsilaŋ la ŋɔmmɛu.”
2 Okoŋ mi chuaa chaŋ, mbo tosa mɛɛ wana Mɛlɛka tonyaa dimul ndu yɛ. Mbo kua a yuŋgu ndɔɔ, ma kɔ chal o lɛŋnde Filitiaŋnda niŋ le wɔsilaŋ la ŋɔmmɛu.
3 Mɛɛ wɔsila ŋɔmmɛula laŋ la chuu, mi chuaa chaŋ o lɛŋnde Filitiaŋnda niŋ mbo miiŋgu o ndu lo. Mɛɛ o miiŋgu, mbo kua le masaa nyɔɔloo le chiɛi ndɔɔ, a yondo ndɔɔ.
4 Nduyɛ masaa wa suɛi o Kehaasi lo, buɛi wana Mɛlɛka tonyaa. O wa ndu dimullo aa: “Yandii, tɛɛsiallɔ ya a sɔɔŋ kɔndɔfiliŋ Ilaasia tosa woŋ kpou okɔɔ.”
5 Mɛɛ o kandu masaa tɛɛsiallo a mɛɛ Ilaasia miŋgi wana vilɛiyo yoomu yɛ, mi chua o miŋgi po ndɔɔ yoomu wo fuuluu kinɛi o masaa lo, le ndu nyɔɔloo le chiɛi ndɔɔ a yondo ndɔɔ. O lepilɛ niŋ kpe, mi Kehaasi dimi aa: “Masanɔ nuu, chua koŋ cho hoo ni, nduyɛ po ndɔ koŋ cho hoo ni, o Ilaasia miŋgi yoomu wo.”
6 Okoŋ, mi masaa nyuna chuaa a ndi okɔɔ. Nduyɛ, mi chuaa tɛɛsial ndu mɛɛ i yɔŋnuŋ yɛ. Mi masaa soli wana pilɛ o wa wallo o chiɛi lemasaa niŋndo, mbo dimul ndu aa: “Miŋgi ndu nyɛm ndɔŋ kpou o ba, nduyɛ ma paawa* ndu nyɛ ndoo sɔla niŋ o yondo ndɔɔ niŋ chɔŋ a teleŋ o faŋaŋ o lɛŋndeŋ ndeŋ niŋndo, haaa huŋ bii a hau.”
7 Mi Ilaasia kua Damasikɔɔ a teleŋ Bɛŋ-hedadi, masaa le Siiliaa del a naa wo. Okoŋ ma dimul masaa aa: “Wana Mɛlɛka tonyaa hiŋ nanuŋ.”
8 Mi masaa dimul Hasayɛɛ aa: “Chua nyɛ o ba ma kuɛ o wana Mɛlɛka tonyaa lo. Dimul ndu mbo nyuna Chɛhowa te I siaŋgu niŋ pɛ a naa hoo.”
9 Mi Hasayɛɛ chua nyɛ o nyɛ kɛndɛ wa Damasikɔɔ mbo yii nyɔɔmiaa 40 o lakɔɔ, okoŋ mbo kua a muŋ o wana Mɛlɛka tonyaa lo. Mɛɛ o fuuluu, mbo sim ndu lachi, mbo dimi aa: “Bɛŋ-hedadi po num, masaa le Siiliaa vem ya naa num chua ni. O dimi maa ya nyuna num te o siaŋgu niŋ pɛ a naa hoo.”
10 Mi Ilaasia mulul ndu aa: “Kɔ dimul ndu maa o cho sioŋgɔɔ. Kɛ Chɛhowa dimul la maa o kpeekpei niŋ, o nɔ le piɔmndo sɔlaa.”
11 Nduyɛ, o lo ndu tofaa haaa mi siɔmbulaŋ la huŋ le Hasayɛɛ biyɔɔ. Okoŋ, mi wana Mɛlɛka tonyaa tusi mɛmiaŋ kpasu kpasu.
12 Mi Hasayɛɛ nyuna ndu aa: “Le yɛɛnɛ ŋ cho yɛ chaŋndo masanɔ nuu?” Mbo mulul ndu aa: “Kanifuule, I sina mɛɛ ŋ cho hunɔɔ waŋnda Isɔluɛi yɔŋ wɔɔŋndo tosal lɛ. Fondaŋnda nda taŋgul la kala kala laŋ, a cho laŋ hunɔɔ mɛli o yiŋ. Puaa ndaa nda tiindaŋ nda, a cho nda hunɔɔ diu diu a muɛi faŋnde. A cho hunɔɔ chuauwaa ndaa pesi wɔ wɔ. Nduyɛ waŋ laanduaa cho a folilaŋ* nda, a cho nda hunɔɔ dembelaŋ kuumbuu.”
13 Mi Hasayɛɛ mulul ndu aa: “Ya buɛi num cho hoo maa tuŋ fondo wo, vɛɛ ya tosa yɛ suɛi waa lende?” Mi Ilaasia dimul ndu aa: “Chɛhowa chɔm ya maa a cho simnɔŋ masaa le Siiliaa.”
14 Okoŋ mbo mɛi Ilaasia, mbo miiŋgu o masanɔ ndɔɔ lo. Mi masanɔ ndɔɔ nyuna ndu aa: “Yɛɛnɛ Ilaasia dimullɛ num?” Mbo mulul ndu aa: “O dimul la maa a cho sioŋgɔɔ.”
15 Diimandɔɔ, mi Hasayɛɛ chua kola kuumbaŋndo mbo pɔɔla ndu o mɛŋndaŋ niŋ, mbo kuumbuu* ndu o hɔl haaa mbo wu. Okoŋ, mi Hasayɛɛ miiŋgu o masaleŋ choo o foofo ndɔɔ.
16 Wɔsi ŋuɛɛnu ndɔ Chɛholuam po Ehaabi wo, masaa le Isɔluɛi wa o masaleŋ choo wo, Chɛholuam po Chɛhosiafati wo simnuŋ masaa le Chuda ni. Nduyɛ, Chɛhosiafati wa wɔ o masaleŋ choo Chuda.
17 O wa wɔsilaŋ 32 mbo simnuŋ masaa, nduyɛ mbo chii wɔsilaŋ la ŋɔmaa o masaleŋ choo Chulusalɛm.
18 Mbo kua o nɛila masaa keeku Isɔluɛi ya laŋ choo, mɛɛ wanaa fula o yuŋgu Ehaabi wo choo wa tosa yɛ. Kanifuule, mbo chua chua Ehaabi wo o nɔɔ niŋ, nduyɛ mbo hiau lachi a nyɛ bɛnda Chɛhowa o hɔl te wo tosaa.
19 Kɛ le sabu Deeve buɛi ndɔ wo, Chɛhowa ndoo yeema mbo chii waŋnda Chuda le. Kanifuule, mbo chuel ndu buŋgɛi maa o cho ndu a puaa nduaa lambuiyo ke le teleŋ o teleŋ.
20 O palɛi Chɛholuam nde niŋ, mi Idɔm simul Chuda, okoŋ ma hɛli masaa o ndaa.
21 Mi Chɛholuam kua Siaa a nyɛm ndɔŋ nyaanaŋ suaa naŋndoŋ kpou. Mbo chaŋ ichɔllo, mbo yam Idɔmaitiiyaa wa ndu a balaa wa, a wanaa kua a nyɛm nyaanaŋ suaa naŋndoŋ nda wanaa ndaa banaa. Mi puaa chɔuwa nyaanuŋ o tɛndiila ndalaŋ niŋ.
22 Kɛ mi Idɔm hiau lachi a Chuda simullo haaa a paale hauleŋ ndeŋ. Mi Libina bɛɛ simul ndu a teleŋ koŋ.
23 Sɔɔŋ cheleŋ cho a Chɛholuam okɔɔ woŋ, nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ.
24 Okoŋ, mi Chɛholuam wu,* ma kumbu ndu naa nda kumbu finyaa nduaa mamaa wa o Chiee Deeve Wo. Mi Ahasaya po ndɔ miiŋgu o masaleŋ choo o foofo ndɔɔ.
25 O wɔsi 12 Chɛholuam po Ehaabi wo, masaa le Isɔluɛi wa o masaleŋ choo wo niŋ, Ahasaya po Masaa Chɛholuam ndo simnuŋ masaa le Chuda ni.
26 Ahasaya wa wɔsilaŋ 22 mbo simnuŋ masaa, nduyɛ mbo chii wɔsioo o pilɛ o masaleŋ choo Chulusalɛm. Kala ndɔ ndoo nɔ diolaŋ ni aa Atalaya, chua mama* Omili wo, masaa le Isɔluɛi.
27 Mbo tual o nɛi yuŋgu Ehaabi wo choo. Nduyɛ mbo hiau lachi a nyɛ bɛnda Chɛhowa o hɔl te wo tosaa, mɛɛ yuŋgu Ehaabi wo tosa yɛ koni. Kanifuule, wanayɛi wa nda tɛɛŋ nda yuŋgu Ehaabi wo.
28 Le hei, mbo kua latulu nda Chɛholuam po Ehaabi wo, le ma kɔ sɔŋga Hasayɛɛ, masaa le Siiliaa o Luamɔti-kiliaadi niŋ. Kɛ mi Siiliaŋnda boli Chɛholuam.
29 Okoŋ, mi Masaa Chɛholuam miiŋgu Chɛsiluɛɛ le mbo chiɔu yɔŋul nda yɔŋul ndu Luama wo, mɛɛ nda wa Hasayɛɛ masaa le Siiliaa chɔulabaa. Mi Ahasaya po Chɛholuam ndo, masaa le Chuda kua Chɛsiluɛɛ le mbo yil Chɛholuam po Ehaabi wo, le mɛɛ nda yɔŋul ndu o chɔuwo yɛ.*
Tɛɛsiaalaŋ
^ Ɔɔ “sala.”
^ Ɔɔ “yoltaŋ.”
^ Ɔɔ “handu.”
^ Hibuluiye, “ma yambu ndu nda finyaa nduaa mamaa.”
^ Hibuluiye, “chua.”
^ Ɔɔ “o wa a naa.”
