Masaa Diiŋ Nduaa 9:1-37
9 Mi Ilaasia wana suaa le Mɛlɛka wo veelu puaa wanaa suaa le Mɛlɛka wa o pilɛ, mbo dimul ndu aa: “Yiinuŋ doma numndo o chaŋ, ma chua sani machuɛiyo hoo chɔ chɔ ma kuɛ Luamɔti-kiliaadi.
2 Te a fuuluu pɛ, nuuviaa Chehu po Chɛhosiafati wo. Chɛhosiafati yɛ, Nimisai velu ndu ni. Te a saaluŋ ndu pɛ, dimul ndu mbo faŋaŋ puaa a piliaa tɛɛŋ, mi la kuɛ nya ndu o lumui cho leniŋ di wo niŋ.
3 Okoŋ a chua sani machuɛiyo a tala ndu chuɛiyaŋ o lebol, a dimul ndu aa, ‘Nyɛ Chɛhowa dimi wo cho hoo ni: “I pɔya num le ma wa masaa le Isɔluɛi.”’ Okoŋ a kumbi dioo, a fulaŋ chɔ chɔ a kiltaŋ.”
4 Mi po wana suaa koŋ le Mɛlɛka wo chaŋ mbo kua Luamɔti-kiliaadi.
5 Mɛɛ o fuuluu, o komal wanaa cho puaa chɔuwa bolleŋ nda ichali. Mbo dimi aa: “I nɔ yooŋgoo le num, fallo masaa.” Mi Chehu nyuna ndu aa: “Le nɛɛnɛ o naa tɛɛŋ?” Mbo muli aa: “Le num, fallo masaa.”
6 Mi Chehu chaŋ mbo luɛi chiɛiniŋ. Okoŋ, mi po wana suaa le Mɛlɛka wo tala ndu chuɛiyaŋ o lebol, mbo dimul ndu aa, “Nyɛ Chɛhowa, Mɛlɛka Isɔluɛiya dimi wo cho hoo ni: ‘I pɔya num le ma wa masaa wanaa Chɛhowa wa choo, Isɔluɛiya.
7 A nɔ ma diu wana o wana cho o yuŋgu Ehaabi masanɔ numndo niŋ, le mi miŋgi maa le kooma buɛiyaa niaa, wanaa ndaa suaa le ya wa, a le buɛiyaa ya Chɛhowa wa kpou, a Chɛsibɛɛ diu wa.
8 Wana o wana cho o yuŋgu Ehaabi wo niŋ cho tambei sɔla. Nduyɛ o Isɔluɛi niŋ kpou, wana pɔnɔ o wana pɔnɔ cho o yuŋgu Ehaabi wo niŋ, I cho nda basɔɔ tɛɛ mi tɛɛmbuu nda. Hali wanaa bala fonduaa a wanaa nɔ kpaaya le wa bɛɛ.
9 I cho tosa mi yuŋgu Ehaabi wo simnuŋ maa yuŋgu Chɛlobowam ndo po Nebati wo, a yuŋgu Baasia wo po Ahicha wo.
10 Nduyɛ Chɛsibɛɛ ndu ndu, o buŋgɛi lelɛŋnde Chɛsiluɛɛ tuŋnda cho dialuŋ ndɔŋ dio ni. Nduyɛ, wana o wana cho ndu kumbɔɔ le.’” Mɛɛ o chii sɔɔŋ muŋ dimi, mbo kumbi dioo, mbo fulaŋ a kiltaŋ.
11 Mɛɛ Chehu miiŋgu o wanaa cho puaa chɔuwa bolleŋ nda lo, ma nyuna ndu aa: “Nyɛ o nyɛ cho pa o kɛndɛ? Le yɛɛ po seemɛi koŋ hiŋ yɛ o numndo?” Mbo mulul nda aa: “La sina po koŋ fau a sɔɔŋ ndɔŋ.”
12 Kɛ ma dimi aa: “I cho tonya le! Yandii, dimul naa nyɛ o dimul numndo.” Mi Chehu dimul nda nyɛ poo dimul ndu wo. Mbo chɔɔlu nda vɛlɛ dimul maa mi poo dimi vɛlɛ aa, ‘Nyɛ Chɛhowa dimi wo cho hoo ni: “I pɔya num le ma wa masaa le Isɔluɛi.”’
13 Okoŋ, mi o kɛ kɛ keleŋa doma ndɔɔ chua ma pɛŋgɛliaa laŋ Chehu o peloŋ bɛŋgu. Ma hɔŋ buloo ma dimi aa: “Chehu simnuŋ masaa!”
14 Okoŋ kɔɔli, mi Chehu po Chɛhosiafati wo yii Chɛholuam dumbu. Chɛhosiafati yɛ, Nimisai velu ndu ni.
Chɛholuam nda puaa chɔuwa Isɔluɛi kpou wa Luamɔti-kiliaadi o chɔuwo. Kanifuule, mi Hasayɛɛ masaa le Siiliaa chiŋalaŋ Isɔluɛi.
15 Masaa Chɛholuam lo sɔŋgɔɔ nda Masaa Hasayɛɛ, mi Siiliaŋnda booluu ndu. Le hei, mbo miiŋgu Chɛsiluɛɛ le mbo kɔ dɔunuŋ danda.
Mi Chehu dimi aa: “Te la chɛl la diom pɛ, la chɛl mi wana o wana mal chioo mbo kuɛ a yooŋgoo hoo Chɛsiluɛɛ le.”
16 Okoŋ, mi Chehu hel o nyɛ ndɔ nyaanaŋ suaa naŋndo choo mbo kua Chɛsiluɛɛ. Kanifuule, Chɛholuam wa ihini loŋ a pauvii nduɛi. Nduyɛ Ahasaya, masaa le Chuda ndoo kuɛ Chɛholuam yilɔɔ.
17 Wana mɛŋgɛlaa wa isisi o bandu mɛŋgɛlaa Chɛsiluɛɛ, mbo cha puaa Chehu wa hunɔɔ kunda bɛndoo. O lepilɛ niŋ kpe mbo dimi aa: “I cho chɔɔ puaa hunɔɔ kunda bɛndoo.” Mi Chɛholuam dimi aa: “Viom wana kua o soo choo wo mbo kuɛ nda lachi, okoŋ mbo nyuna nda aa, ‘Baa hunɔɔ kɔl nyuloo pa ŋ hiŋ ni?’”
18 Mi wana kua o soo choo wo kua ndu lachi, mbo dimul ndu aa: “Masaa vem ya le mi nyuna num aa, ‘Baa hunɔɔ kɔl nyuloo pa ŋ hiŋ ni?’” Kɛ mi Chehu nyuna ndu aa: “Yɛɛnɛ ŋ sina yɛ a kɔl nyuloo okɔɔ? Hiou ma tol la kɔɔli!”
Mi wana mɛŋgɛlaa duaunuŋ kona aa: “Wana ya vem ndo komal nda, kɛ o miiŋgu wɔ nanuŋ te.”
19 Mbo viam vɛlɛ wana cheleŋ kua o soo choo wo. Mɛɛ o komal nda, mbo dimi aa: “Masaa vem ya le mi nyuna num aa, ‘Baa hunɔɔ kɔl nyuloo pa ŋ hiŋ ni?’” Kɛ mi Chehu nyuna ndu aa: “Yɛɛnɛ ŋ sina yɛ a kɔl nyuloo okɔɔ? Hiou ma tol la kɔɔli!”
20 Mi wana mɛŋgɛlaa duaunuŋ kona aa: “O komal nda, kɛ o miiŋgu wɔ nanuŋ te. Nduyɛ wana cho hunɔɔ a nyɛ nyaanaŋndo wo, wana che ndu pɛ aa Chehu ni, po mama* Nimisai yo. Kanifuule, o cho ndu nyaanɔŋndo maa wana seemɛi.”
21 Mi Chɛholuam dimi aa: “La bɛɛndiaa nyɛ nyaanaŋ suaa naŋndo!” Okoŋ ma bɛɛndiaa nyɛ ndɔ nyaanaŋ suaa naŋndo, mi Chɛholuam masaa le Isɔluɛi, a Ahasaya masaa le Chuda, o kɛ kɛ luɛi o nyɛ ndɔ nyaanaŋ suaa naŋndo niŋ, ma kua Chehu lachi. Ma bɔŋaŋ nda ndaa o buŋgɛi lelɛŋ Nabɔti ve, wana waa Chɛsiluɛɛ.
22 Dimioo nuaa mi Chɛholuam cha Chehu, mbo nyuna ndu aa: “Baa hunɔɔ kɔl nyuloo pa ŋ hiŋ ni Chehu?” Mbo mulul ndu aa: “Vɛɛ kɔl nyuloo nɔla yɛ mbo wa, te Chɛsibɛɛ kala num wa pɛ kaa suundɛiyo a sɔɔŋ ndɔŋ lemandioŋ tosaa?”
23 Mi Chɛholuam muli nyɛ ndɔ nyaanaŋ suaa naŋndo o lepilɛ niŋ kpe le mbo nyaanuŋ. Nduyɛ mbo dimul Ahasaya aa: “Ŋ del o yaŋɔɔleŋ niŋ fɔ Ahasaya!”
24 Mi Chehu kindu chiɔu ndɔɔ mbo via Chɛholuam o kɔɔ, mi le kɔ buli ndu kɔllo mi le fula lekɔɔli, nduyɛ mbo del o nyɛ ndɔ nyaanaŋ suaa naŋndo niŋ.
25 Okoŋ mi Chehu dimul Bidikaa wana ndɔ malaa aa: “Chua ndu ma viou ndu o buŋgɛi lelɛŋ Nabɔti ve niŋ, wana waa Chɛsiluɛɛ. Boondii naŋ wa Ehaabi finya ndɔ balɔɔ kɔɔli naa num a nyɛla nyaanaŋnda suaa naŋndaŋ nde, a loonuŋ nyɛ Chɛhowa pila dimi a ndu okɔɔ wo.
26 Mi Chɛhowa dimul Ehaabi aa: “‘Mi cha kooma Nabɔti waŋ a kooma puaa nduaa chiɛi. Lelaŋ kɛsiŋ o kɔl maa, o buŋgɛi lelɛŋnde hei choo kpeekpei ya cho num maa miŋgul ni.” Ya Chɛhowa dimi lende ni.’ Lelaŋ chua ndu ma viou ndu o buŋgɛi lelɛŋnde hei choo, a mɛɛ Chɛhowa dimi yɛ.”
27 Mɛɛ Masaa Ahasaya, masaa le Chuda che nyɛ wa yɔŋnɔŋndo wo, mbo nyaanuŋ o nɛi kuɛ o chiɛi wa o kpeloo niŋndo. (Okoŋ kɔɔli, mi Chehu tual ndu kɔɔli, nduyɛ mbo dimi aa: “Ndu bɛɛ la dii ndu!” Okoŋ, ma yɔŋul ndu yɔŋullo pila o nyɛ ndɔ nyaanaŋ suaa naŋndo niŋ o nɛi kuɛ Kɔɔ wo, kpeŋgii Ibiliam nde. Kɛ mbo hiau lachi a kiltaŋ haaa Mɛkidɔɔ, mbo kɔ wu loŋ.
28 Okoŋ mi buɛiyaa nduaa kua a ndu o nyɛ nyaanaŋ suaa naŋndo niŋ Chulusalɛm, ma kɔ kumbu ndu a finyaa nduaa mamaa latulu o sɛi ndɔɔ niŋ, o Chiee Deeve Wo.
29 Wɔsi 11 Chɛholuam, po Ehaabi wo wa o masaleŋ choo wo, Ahasaya simnuŋ masaa le Chuda ni.)
30 Mɛɛ Chehu fuuluu Chɛsiluɛɛ, mi Chɛsibɛɛ tuɛi a ndi okɔɔ. Okoŋ mbo suunuŋ tiwei tiŋioo o lahɔl, mbo bɛɛndiaa yiiŋii nduɛi nyɛkɛndɛi, mbo wa tofaa lɛŋ o wundɛiyo.*
31 Mɛɛ Chehu luɛi o kpakioo niŋ, mi Chɛsibɛɛ nyuna ndu aa: “A sina nyɛ yɔŋnuŋ Simili, o dii masanɔ ndɔɔ wo?”
32 Mɛɛ Chehu heelu hɔlla mbo tofa o wundɛiyo, mbo nyuna aa: “O nɛɛnɛ cho yɛ kumbuii nii?” Mi wanaa tosa wallo o chiɛi lemasaa niŋnda a ŋiɔɔŋ ɔɔ a yaa tofa ndu o wundɛiyo.
33 Mi Chehu dimi aa: “La viou ndu lɛŋ nanuŋ!” Okoŋ ma viau ndu lɛŋ. Mi kooma nduaŋ ma tiŋ ma fasaŋiaŋ o chiɛiyo a o suaa, nduyɛ mi suaa niɔu niɔu ndu.
34 Okoŋ kɔɔli, mbo luɛi chiɛiniŋ mbo dia nyɛdiaa, nduyɛ mbo kol. Mbo dimi aa: “Yandii, la kɔ chua chua sendioo cho koŋ choo wo mi la kumbu ndu. Kanifuule, chua masaa o cho ni.”
35 Kɛ mɛɛ nda kuɛ le ndu kumbɔɔ, kpokpo ndɔɔ, peluŋ ndɔŋ, a bala ndɔla kɔltaŋ kinɛi nda komal ni.
36 Mɛɛ nda miiŋgu ma dounuŋ Chehu kona, mbo dimi aa: “Nyɛ Chɛhowa dimi sanaa a buɛi ndɔɔ Ilaicha, Tisibaitiinɔɔ wo peeluŋ hoo ni. Mbo dimi aa, ‘O buŋgɛi lelɛŋnde Chɛsiluɛɛ tuŋnda cho Chɛsibɛɛ dio ni.
37 Nduyɛ dialuŋ vilɛi Chɛsibɛɛ woŋ cho simnɔŋ nyɛ nɛŋi tɔlɔɔ wo o buŋgɛi lelɛŋnde Chɛsiluɛɛ. Okoŋ wana o wana dimi nuaa aa: “Chɛsibɛɛ cho hoo ni” le.’”
