Timoti Diiŋ Ndɔɔ 1:1-18
1 Ya Pɔɔl, kiilanɔɔ le Chiisu Kiliti o hɛnaŋ Mɛlɛkaa niŋ cho yauwo hoo poonyiaa ni, a mɛɛ o mɛi lediom le naa yoomu kpeekpeiyo kioo sanaa o Chiisu Kiliti niŋ yɛ.
2 Le num Timoti, po ni kaalaa ya cho ndu poonyiaa ni:
Maa Mɛlɛka Finya naa nda Masanɔɔ Chiisu Kiliti tuiinuŋ num inyiɛɛ, ma ke num kɔl nyuloo, nduyɛ ma tosal num kɛndɛi ndɛi bɛnduei fɔ!
3 I mel Mɛlɛka balikaa, o ya cho wali ndɔɔ tosaa a kɔl nuu kpou maa Finyaa niaa mamaa wo. Idii a ichɔl, I cho loonɔŋndo a num o piɛileŋ niŋ.
4 Te I loonuŋ pɛ a mɛɛ ŋ tusi mɛmiaŋ le ya yɛ, mi yeemɛi bii ya le num chɔɔ, le mi chɔɔlu vɛlɛ nyaaloo sɔla.
5 I cho loonɔŋndo a mɛɛ ŋ nɔ laalaŋ kpeekpeiyo yɛ. Lɔɔsi mama num, a Yunisi kala num fɛlɛŋ ndaa nɔ laalaŋ waa lende. Nduyɛ I sina kɛsɛ maa num bɛɛ nɔ laalaŋ waa lende.
6 Le saboo hoo ya cho num yiyalaŋndo ni maa, nyɛ Mɛlɛka ke num boondii ya handu num balaŋ choo ve, hiou lachi a ndu soliŋndo kpeku nyɛkɛndɛi.
7 O cho nyina tosa miŋ nɔ siooŋnde wo le Mɛlɛka ke naa le. Kɛ nyina tosa miŋ nɔ kpaayaa, kaalaa, a taasioo wo o ke naa ni.
8 Lelaŋ, yɔŋ lasiɔmbu le suɛi a Masanɔɔ okɔɔ, ɔɔ a ya cho o chiɛi manyumndo niŋ le ndu wo le. Wa o bɛɛndiaŋ le saŋgaa sɔlaa le yooŋgu kɛndɔɔ o kpaaya Mɛlɛkaa bɛŋgu.
9 Ndu piŋi naa ni, nduyɛ mbo veelu naa le miŋ wa wanaa diandaa. O cho le walta naala kɛndɛlaŋ te, kɛ lende o kɛɛsiaa ni. Nduyɛ o tosa ndi le kɛndɛi nduɛi bɛnduei. Sindɛ niŋ pa o tosal naa kɛndɛi hei ni sanaa o Chiisu Kiliti niŋ.
10 Mi kɛndɛi hei chɔɔmuŋ kpendekele teleŋ wana naa piŋiaa Chiisu Kiliti hiŋ, mbo faŋa naa piɔmndo choo wo. Okoŋ kɔɔli, mbo chuu naa yoomu vi lɛ le wo sanaa a yooŋgu kɛndɛ o dimi wo.
11 Nduyɛ le yooŋgu kɛndɔɔ hoo dimioo Mɛlɛka hɛli ya ni, le mi simnuŋ kiilanɔɔ a wana pɛɛkaa.
12 Le saboo hoo ya cho o saŋgaa hoo niŋ ni. Kɛ siɔmbula cho ya le, kanifuule I sina wana ya dɔu laalaŋndo o ndu niŋndo. Nduyɛ I nɔ tiindaŋndo maa o nɔla mbo mandal la nyɛ ya ke ndu wo haaa mi paale leŋ le fuuluu.
13 Hiou lachi a diomnda tonyala ya pɛɛku num ndaŋ biyɔɔ kpiŋ, nduyɛ ma chɔm laalaŋndo a kaalaa le mɛɛ ŋ cho o diompilɔɔ niŋ a Chiisu Kiliti yɛ.
14 Nyina diandaa naŋ nɔ wo mala num ma manda nyɛm sɔvɛŋ ŋ sɔla muŋ ndoŋ.
15 Numpila sina maa wanaa cho o buŋgɛi Eesiaa ve niŋnda kpou a chii ya malɔɔ. Fachɛlɔɔsi nda Hɛmɔchinii bɛɛ mal la.
16 Maa Masanɔɔ tuiinuŋ yuŋgu Onɛsifulɔɔ wo inyiɛɛ fɔ! Kanifuule, mbo dɛɛniaa ya kɔllo le teleŋnda bɔɔbɔɔ. Siɔmbula bii ndu le mɛɛ ya wa o biyɔɔ niŋ o yɔlɔŋ yɛ le.
17 Kɛ nduyɛ, teleŋ o hiŋ Luom ndo, o lo ya nuuviaa tei mbo saaluŋ ya.
18 Numpila sina nyɛ o nyɛ o tosa le ya Ɛfisɔɔ. Maa Masanɔɔ tosa mi Chɛhowa* tuiinuŋ ndu inyiɛɛ o paale kɔɔsɔleŋ choo fɔ!
Tɛɛsiaalaŋ
^ Tofa Tɛɛsiaa.
