Timoti Diiŋ Ndɔɔ 3:1-17
3 Kɛsiŋ o kɔl maa o palɛi mɛɛlɛi niŋ, nyɔɔ kiandu niŋ bɔɔ.*
2 Kanifuule, waŋnda kaala niŋ ndapila, nduyɛ ma kaala kaniei.* A wa niŋ wanaa heelaŋnda, wanaa yoŋgaa, a wanaa tɛɛmbuu Mɛlɛka tɔɔ wa. A tuii niŋ wanaa velu nda wa diom te. A ve niŋ wanaa sinaa ikɛndɛ le. A lo niŋ o lediom te.
3 A nɔ niŋ inyiɛɛ le. A chɛl niŋ acheleŋnda diom te. A wa niŋ wanaa tɛɛmbuu chaanda tɔɔ wa. A tiu niŋ kɔlta ndalaŋ ba le. A wa niŋ wanaa kɔl vesɛi, nduyɛ ma tul nyɛ cho o kɛndɔɔ wo leyɛ.
4 A wa niŋ wanaa pisi chaaŋaa ndaa wa, wanaa bolii kalaa, a wanaa hɔlaa heelaa bɛndu. A kaala niŋ yelelaŋndo mbo hiou Mɛlɛka.
5 Ma chɔm maa a cho a yɔŋgaŋ o Mɛlɛka lo, kɛ ma kɛɛ le mi kpaaya ndɔɔ tosa wallo o yoomula ndalaŋ niŋ. La holnuŋ wanaa waa nuaa le.
6 O waŋnda haa tɛɛŋ, mi puaa apum nuuviaa nɛilaŋ ma luɛi o chiɛila pilalaŋ niŋ. Okoŋ ma muli waŋ laanduaa tosa niŋ hakioo tau wa kɔltaŋ, ma tiu nda ba. Waŋ laanduaa haa yɛ, yeemaŋ suu o suu cho nda o lakɔl.
7 Waŋ laanduaa haa cho pɛɛkoo lɔɔlɔɔ, kɛ a nɔla ma sina kɔl kalu kpeekpei cho a tonyaa okɔɔ wo le.
8 Mɛɛ Chaniisi nda Chambili ndaa simul Muuse teleŋ koŋ yɛ, lende koni waŋnda haa simul tonyaa ni. Yiyaŋnda ndalaŋ la laasiaŋ, nduyɛ mi Mɛlɛka kɛɛ nda le mɛɛ nda mal laalaŋ ndaa yɛ.
9 Nduyɛ a tosa lɛ niŋ hiouwɔɔ lachi kɛ kɛ le, kanifuule diɔmii ndɛi cho wa i chɔmnaŋ kpendekele, a mɛɛ i yɔŋnuŋ puaa ŋiɔɔŋaa kaŋ yɛ.
10 Kɛ num, a sina pɛɛkula nilaŋ, kaa nuu, nyɛ ya tuu le tosaa wo, laalaŋ nuu, biuwɔŋ nuu, kaala nuu, a lo lechoo nuu nyɛkɛndɛi.
11 A sina nyɛpalaa nda tusi ya choo wo. Saŋgala ya keeku niŋ o Aŋtiɔɔ, Akooniɔm, a Lista niŋndaŋ kpou, a sina. Muŋ kpou mi biunuŋ, nduyɛ mi Masanɔɔ piŋi ya o nyɛpalaa koŋ niŋ.
12 Sina pɛŋgu maa wanaa yeema yɔŋgɔŋndo o Mɛlɛka lo, nduyɛ ma wa buɛiya le Chiisu Kiliti wa kpou, waŋnda cho nda nyɛpalaa tusi choo.
13 Kɛ wanaa dɛnɛ wɔɔŋnda, a wanaa lachoowaa hiau niŋ lachi a sɔɔŋ wɔɔŋndoŋ tosaa mbo hiou bɛɛ maa paandu. A hui niŋ waŋnda, nduyɛ mi waŋnda bɛɛ hui nda.
14 Num yɛ, sɔɔŋ ŋ pɛɛku, nduyɛ ma laalaŋ muŋ ndoŋ, hiou lachi a muŋ biyɔɔ kpiŋ, kanifuule a sina wanaa ŋ pɛɛku muŋ o ba wa.
15 A wa wɔ o pɔmbɔ ma sina sɔɔŋ cho ŋ poonyiaa o yaula diandaa laŋ niŋndoŋ. Sɔɔŋ muŋ mala num ma wa wana taasi, le ma sɔla pioŋɔɔ sanaa a laalaŋ ŋ dɔu o Chiisu Kiliti niŋndo.
16 Nyɛ o nyɛ cho o poonyiaa o Yau Mɛlɛkaa niŋ, nyina Mɛlɛkaa tosa ni ma poonyiaa ndu. O mala le waŋnda pɛɛkoo, le nda miŋgioo o nɛi, le sɔɔŋ miŋgioo sakpo, a le nda silaa o sandei choo,
17 le halikpeŋ mi wana wali Mɛlɛkaa suliŋ nyɛkɛndɛi, nduyɛ mbo wa o bɛɛndiaŋ le wali o wali kɛndɛ tosaa.
