Chɔŋ Ŋgaa Ndɔɔ 1:1-14
1 Ya bɛndu yuuwo, ya cho yauwo hoo poonyiaa naa Kayɔɔ chua ni. I kaala num a kɔl nuu kpou.
2 Chaaŋ ni kaalaa, I cho piɛileŋ le ma wa kɛndiaa, nduyɛ mi nyɛ o nyɛ o yoomu numndo niŋ hiou lachi a waa o kɛndɛ, mɛɛ o cho suŋ suŋ yɛ.
3 Kanifuule, mɛɛ puaapiliaa apum huŋ dimul la a mɛɛ ŋ bii tonyaa kpiŋ, nduyɛ ma wa hiouwɔɔ lachi a kɔlaŋ lechoo yɛ, mi duaunuŋ nyaale tau.
4 Nyaale kɛ kɛ cho ya o kɔl, mbo hiau tueiyɔɔ maa chuauwaa niaa cho hiouwɔɔ lachi a kɔlaŋ o nɛi tonyaa choo le.
5 Chaaŋ ni kaalaa, a cho lo lechoo numndo chɔmndo o Mɛlɛka lo, a mɛɛ ŋ cho puaapiliaa malaa yɛ, mi che bɛɛ a sina nda paandu le.
6 Mi puaapiliaa dounuŋ kundaa kona a kaala numndo okɔɔ. Te puaapiliaa haa wa kɔlaŋ pɛ, a yandii kindiŋ ma mala nda o nɛi Mɛlɛka hɛnaŋndo choo.
7 Kanifuule, le sabu diola Mɛlɛkalaŋ nda kuɛ ni. Nduyɛ a bii nyɛ o nyɛ wanaa cheleŋnda* o ba le.
8 Lelaŋ, i cho naa kuee le miŋ yiya wanaa waa nuaa, le halikpeŋ miŋ simnuŋ wanaa walla latulu naa ndaa o tonyaa niŋ.
9 Mi poonyial nya cho o kundaa niŋnda kpou yauwo. Kɛ Diotɛluɛfɛsi ndu, nyɛ o nyɛ naŋ dimi pɛ, o chɔm lebɛɛ le ndu le. Kanifuule, o yeema mbo siiŋguu ndupila wana bɛndoo nya tɛɛŋ.
10 Lelaŋ te I hiŋ pɛ, I cho nya chɔm sɔɔŋ wɔɔŋ o cho keiyo dimioo a naa okɔɔ woŋ. O mɛɛlu bɛɛ o koŋ te, kɛ te puaapiliaa hiŋ pɛ, o bii nda biyɔɔ kɛndɛ le. Wanaa chɛl le nda yiyaa wa bɛɛ, mbo kindiŋ le nda kuunaa, nduyɛ mbo soli nda o kundaa niŋ po.
11 Chaaŋ ni kaalaa, tual tamasi wɔɔŋndo kɔɔli le, kɛ tol tamasi kɛndɔɔ kɔɔli. Wana tosa pɛ nyɛ cho o kɛndɔɔ wo, mɛɛ le Mɛlɛka o cho ni. Kɛ wana tosa pɛ nyɛ cho o wɔɔŋndo wo, mɛɛ o chi wɔ Mɛlɛka le.*
12 Waŋnda kpou cho sɔɔŋ kɛndɔŋ dimioo a Dɛmituluisi okɔɔ. Nduyɛ sɔɔŋ muŋ chɔm maa o cho kɔlaŋ o nɛi tonyaa choo. Naa bɛɛ cho seileŋ timbioo a ndu okɔɔ. Nduyɛ la sina maa tonyaa nyɛ naŋ cho dimioo wo cho ni.
13 I nɔ sɔɔŋ tau le num dimullo, kɛ I yeema mi poonyiaa muŋ o yau choo le.
14 I nɔ yeemɛi le num chɔɔ, okoŋ mi soo o numndo sanaa.*
Maa sɔla kɔl nyuloo fɔ!
Chaaŋaa naa nanuŋ yil num lapi. Yil la chaaŋaa niaa loŋ a pilɛŋ pilɛŋnda kpou.
Tɛɛsiaalaŋ
^ Kilikiiye, “wanaa lekaawa.” Koŋ cho ni, wanaa cho ŋChuu le wa, a laalaŋ o Kiliti niŋ te wa.
^ Koŋ cho ni, o sina wɔ Mɛlɛka le.
^ Kilikiiye, “hɔlla a hɔlla.”
