Chɔŋ 15:1-27
15 “Ya cho tɔlɔɔ makilepii kpeekpeiyo ni. Nduyɛ Finya nuu cho wana manda ndu wo ni.
2 Lɛuvii cho pɛ o ya niŋ mi i kɛɛ le komɔɔ, o kelu ndi. Kɛ lɛuvii cho komɔɔ ve, mbo kɛiyiaa* ndi nyɛkɛndɛi le mi i chɔɔlu komɔɔ tau.
3 Diomnda ya dimul nya laŋ la chii nya kɛiyiaa* nyɛkɛndɛi.
4 La hiou lachi a waa diompilɛ a ya, mi ya bɛɛ wa diompilɛ a nya. Lɛuve tiuba mi i kom a ba ndɔ le, mɛɛ mi i wa i mɔɔsaŋ a bɛŋgu tɔlɔɔ. Nya bɛɛ le mi la tiuba le kɔmndeŋ yɔŋgoo, mɛɛ mi la wa diompilɛ a ya.
5 Ya cho tɔlɔɔ makilepiiyo ni. Nya cho lɛuwoŋ ni. Wana o wana hiou pɛ lachi a waa diompilɛ a ya, mi ya bɛɛ wa diompilɛ a ndu, wana koŋ cho kɔmndeŋ yɔŋgɔɔ tau. Kanifuule te o cho ya le, la nɔla mi la tosa nyɛ o nyɛ le.
6 Wana hiu lachi a waa diompilɛ a ya le, wana koŋ cho wa mɛɛ nda kialu nuaa lɛuvii tɔlɔɔ mi i vesa yɛ. Okoŋ waŋnda huŋ tiŋgu ndi, a dɔu ndi o yiŋ, i ŋuɛ.
7 Te la hiou pɛ lachi a waa diompilɛ a ya, nduyɛ mi diomnda nilaŋ la lo nya o lakɔl, nyɛ o nyɛ nya yeema pɛ mi la nyuna le ndu, la cho ndu sɔla.
8 Te la hiou pɛ lachi a kɔmndeŋ yɔŋgoo tau, nduyɛ mi la chɔm maa buɛiyaa niaa nya cho ni, hei tosa mi Finya nuu sɔla saŋgalaa.
9 Mɛɛ Finyaa kaala ya yɛ, lende koni ya bɛɛ kaala nya ni. La lo o kaala nuu bɛŋgu.
10 Te la bii pɛ sawala nilaŋ, la cho lo o kaala nuu bɛŋgu, mɛɛ ya bɛɛ bii sawala Finya nuu, mi lo o kaala ndɔɔ bɛŋgu yɛ.
11 “I dimul nya sɔɔŋ muŋ le mi nyaale nuu wa nya o lakɔl, nduyɛ mi nyaale koŋ fuuluu nya o lakɔl mɛɛ.
12 Sawa nuu cho hoo ni maa, la kaaliaŋ vellaa velle mɛɛ ya kaala nya yɛ.
13 Kaala o kaala cho mbo hiou o waŋndo yɔŋgu yoomu ndɔɔ le chaaŋaa nduaa wo le.
14 Te la tosa pɛ nyɛ ya dimul nya wo, mɛɛ chaaŋaa niaa nya cho ni.
15 I cho lɛ nya veelu aa buɛiya le, kanifuule buɛiyo sina nyɛ masanɔ ndɔɔ tosa wo le. I veelu nya aa chaaŋaa niaa, kanifuule I chii nya chɔm nyɛ o nyɛ Finya nuu dimul la.
16 O cho nya le hɛli ya le, kɛ ya hɛli nya ni. I hɛli nya le mi la hiou lachi a kɔmndeŋ yɔŋgoo, nduyɛ mi kɔmnde nyaleŋ le lo lefafɛɛŋ. Te la tosa lende pɛ, nyɛ o nyɛ nya nyuna pɛ Finya nuu o diola nilaŋ niŋ, o cho nya ndu ke.
17 “I cho nya sɔɔŋ muŋ dimullo le mi la kaaliaŋ vellaa velle.
18 Te chieeŋndo tul nya leyɛ pɛ, la loonuŋ maa ya fɛlɛŋ o tul leyɛ tuupa mbo tul nya leyɛ.
19 Te nyaa wa pɛ le chieeŋndo, chieeŋndo wa nya kaala. Kɛ le mɛɛ ya hɛli nya o chieeŋndo niŋ, nduyɛ la cho lɛ le chieeŋndo le yɛ, le sabu koŋ chieeŋndo tul nya leyɛ ni.
20 La loonuŋ nyɛ ya dimul nya wo. Buɛiyo cho o bɛndu mbo hiau masanɔ ndɔɔ le. Te a tusi ya pɛ nyɛpalaa choo, mɛɛ nya bɛɛ a cho nya nyɛpalaa tusi choo. Te a bii pɛ pɛɛkula nilaŋ, mɛɛ a cho pɛɛkula nyalaŋ biyɔɔ.
21 Sɔɔŋ muŋ kpou, a cho nya muŋ tosal le diola nilaŋ, kanifuule a sina wana vem ya wo le.
22 Te yaa hiŋ mi suaa o nda lo le, haki ve nda wa choo le. Kɛ suŋ suŋ niŋ, a nɔ lɛ ma viinuŋ haki ndaa le.
23 Wana o wana tul la leyɛ pɛ, mɛɛ Finya nuu o tul vɛlɛ leyɛ ni.
24 Te yaa tosa walta wana cheleŋ nɔla tosa le laŋ nda tɛɛŋ te, haki ve nda wa choo le. Kɛ suŋ suŋ niŋ, a che ya nduyɛ ma tul naa leyɛ naa Finya nuu.
25 Kɛ hei yɔŋnuŋ le mi nyɛ cho o poonyiaa o Sawa ndaa niŋndo peeluŋ. Ndu cho ni: ‘A tul la leyɛ o fondo fuu wo choo.’
26 I cho nya wana malaa yɔŋ chɔnɔŋndo o Finya nuu lo. Ndu yɔŋnuŋ ni maa nyina tonyaa, o fula o Finya nuu lo wo. Te o hiŋ pɛ, o cho seileŋ timbi a ya okɔɔ.
27 Nya bɛɛ timbi niŋ seileŋ a ya okɔɔ, kanifuule chɔŋ o kandɔŋndo, nya wa latulu a ya ni.