Chɔŋ 3:1-36
3 Po Falisiinɔ pilɛ wa diolaŋ aa Nikodimɔɔ. Wana bɛndu Chuuwa o wa ni.
2 Mi poo hoo huŋ naa Chiisu chua a nyumndaŋ, mbo dimul ndu aa: “Wana Pɛɛkaa, ŋ sina maa wana pɛɛkaa Mɛlɛka vem ndo ŋ cho ni. Nduyɛ, wana o wana nɔla mbo tosa kaamaala ŋ cho laŋ tosaa laŋ te, mɛɛ mi Mɛlɛka wa a ndu latulu.”
3 Mi Chiisu dimul ndu aa: “A tonya mi dimul num, mɛɛ mi waŋndo miiŋgu violɔŋ pila malaŋ o luɛi o Masale Mɛlɛkaleŋ niŋ.”
4 Mi Nikodimɔɔ nyuna ndu aa: “Vɛɛ wana cho niŋ hoo kaasoŋnɔɔ wo nɔla yɛ mbo miiŋgu vɛlɛ violɔŋ? O nɔla pa mbo miiŋgu kala ndɔ o dembe mbo veluŋ vɛlɛ?”
5 Mi Chiisu mulul ndu aa: “A tonya mi dimul num, mɛɛ mi waŋndo veluŋ a mɛŋndaŋ vɛlɛ a nyina Mɛlɛkaa malaŋ o luɛi o Masale Mɛlɛkaleŋ niŋ.
6 Wanaa waŋchieeya velu wa, waŋchieeya nda cho ni. Nduyɛ wanaa veluŋ a nyina Mɛlɛkaa wa, chuauwaa Mɛlɛkaa nda cho ni.
7 Kɔndɔfili nɔ mbo bii num le mɛɛ ya dimi maa la nɔ mi la miiŋgu violɔŋ yɛ le.
8 Naa hueiye yeema hɔŋndo wa, loŋ i hɔŋ ni. Mi wana tuei ndi hɔŋndo, kɛ a sina naa i chɛŋ a hɔŋndo wa le, nduyɛ a sina naa i cho kɔlaŋ nda le. Lende koni i cho a wanaa veluŋ a nyina Mɛlɛkaa wa ni.”
9 Mi Nikodimɔɔ nyuna ndu aa: “Vɛɛ hei looku yɛ yɔŋnɔŋ?”
10 Mi Chiisu mulul ndu aa: “Wana pɛɛkaa ŋ cho Isɔluɛi ni. Le yɛɛnɛ a sina sɔɔŋ muŋ pɛŋgu le?
11 A tonya mi dimul num, sɔɔŋ naŋ sina woŋ, muŋ naŋ dimi ni. Nduyɛ sɔɔŋ naŋ che woŋ, a muŋ okɔɔ naŋ timbi seileŋ ni, kɛ la laalaŋ nyɛ naŋ dimi wo le.
12 I dimul nya a sɔɔŋ waa o lɛŋndeŋ choo okɔɔ la laalaŋ te. Te I dimul nya pɛ a sɔɔŋ waa o choo choo niŋ okɔɔ, la laalaŋ niŋ pa?
13 Wana o wana hel lɔ o choo choo niŋ te, mɛɛ Po wana pɔnɔɔ, o chɛŋ o choo choo niŋ mbo tual lo.
14 Mɛɛ Muuse heelu kɛuwo o yɔmndo choo o pollo niŋ yɛ, lende koni waŋnda cho Po wana pɔnɔɔ heelu ni.
15 Okoŋ, wana o wana dɔu laalaŋndo o ndu niŋ pɛ, o sɔla yoomu fafɛɛŋndo.
16 “Le mɛɛ Mɛlɛka kaala chieeŋndo tau yɛ, mbo yɔŋgu Po ndɔ pilɔɔ kpe. Nduyɛ wana o wana dɔu laalaŋndo o ndu niŋ pɛ, o cho tambii sɔla le, kɛ o cho yoomu fafɛɛŋndo sɔla.
17 Mɛlɛka yɔŋgu Po ndɔɔ o chieeŋndo niŋ le mbo kɔɔsa a chieeŋndo le, kɛ le mbo baŋa chieeŋndo.
18 Wana o wana dɔu laalaŋndo o ndu niŋ pɛ, o sɔla niŋ kɔɔsɔ le. Kɛ wana o wana dou laalaŋndo o ndu niŋ te, mɛɛ o chii kɔɔsɔɔ o ndɔɔ sɔla. Kanifuule, o kɛɛ laalaŋndo dɔwɔɔ o Mɛlɛka Po ndɔ pilɔɔ niŋ.
19 Sabu kɔɔsɔɔ wa niŋndo cho ni maa, nyɛ teŋgaa hiŋ o chieeŋndo niŋ, kɛ mi waŋchieeya kaala nyumndaŋ mbo hiau nyɛ teŋgaa, kanifuule le sɔɔŋ dɛnɛ wɔɔŋ nda cho tosaa woŋ.
20 Wana o wana wa pɛ sɔɔŋ wɔɔŋndoŋ tosaa, yɛleŋ o tul nyɛ teŋgaa ni. Nduyɛ o yeema mbo hiŋ o nyɛ teŋgaa le, yɔŋii waŋnda chɔ sɔɔŋ wɔɔŋ o cho choo woŋ.
21 Kɛ te waŋndo wa pɛ sɔɔŋ kɛndɔŋ tosaa, o nyɛ teŋgaa o huŋ ni, le mi waŋnda che maa o cho hɛnaŋ Mɛlɛkaa tosaa.”
22 Okoŋ kɔɔli, mi Chiisu kua nda buɛiyaa nduaa o sɔndɔkɔlta wa Chudiaa ikɛi laŋ. Mbo chua palɛi itiŋ loŋ nda ndaa, nduyɛ mbo wa waŋnda yiŋɔɔ.
23 Chɔŋ bɛɛ wa waŋnda yiŋɔɔ Enɔŋ, Salim ikɛi, kanifuule mɛŋndaŋ ma wa loŋ tau. Waŋnda wa kɔlaŋ loŋ le yiŋɔɔ sɔlaa.
24 Nduyɛ ndaa dou wɔ Chɔŋ o chiɛi manyumndo niŋ te.
25 Mi sɛɛŋgiaŋndo del buɛiyaa Chɔŋ nda tɛɛŋ nda po Chuunɔ pilɛ o naamu nda nɔ a diondɔɔ okɔɔ wo choo.
26 Okoŋ ma huŋ naa Chɔŋ chua ma dimul ndu aa: “Wana Pɛɛkaa, a loonuŋ po ŋ dimul naa koŋ a ndu okɔɔ mi la wa Chɔɔdaŋ leeloo nya ndu wo? O cho waŋnda yiŋɔɔ, nduyɛ waŋnda kpou cho kɔlaŋ o ndu lo.”
27 Mi Chɔŋ mulul nda aa: “Te o cho mi waŋndo sɔla kioo fulaa Mɛlɛka o ba le, o nɔla mbo sɔla nyɛ o nyɛ le.
28 Nyapila cho lesei mi dimi maa, ‘O cho ya le cho Kiliti le, kɛ viomɔɔ nda vem ya ndu lachi ni.’
29 Wana cho lanɔɔ chuaa wo, ndu nɔ lanɔɔ ni. Kɛ te chaaŋ o wana cho lanɔɔ chuaa wo sim pɛ mbo tuei wana cho lanɔɔ chuaa wo suɛi, mbo dɔɔnuŋ nyaale tau le mɛɛ o tuei ndu diom yɛ. Lende koni nyaaloo cho ya o kɔl ni.
30 Wana koŋ nɔ mbo hiou lachi a waa o bɛndu, mi ya hiou lachi a dɔɔnaŋndo.”
31 Wana chɛŋ o choo choo niŋndo hiou a wana o wana. Wana cho o lɛŋndeŋ choo wo, o lɛŋndeŋ choo o cho ni. Nduyɛ a sɔɔŋ waa o lɛŋndeŋ choo okɔɔ o suaa ni. Wana chɛŋ o choo choo niŋndo hiou a wana o wana.
32 Nyɛ o che, nduyɛ mbo tuɛiyo, a ndu okɔɔ o timbi seileŋ ni. Kɛ wana o wana laalaŋ ndu le.
33 Wana o wana laalaŋ pɛ a seile o timbi leŋ, mɛɛ o chɛl maa nyɛ Mɛlɛka dimi wo cho tonya.
34 Wana Mɛlɛka vem ndo, ndu dimul waŋnda nyɛ Mɛlɛka dimi wo ni, kanifuule Mɛlɛka yɔŋgu nyina ndɔɔ nyɛɛmbɔ le.
35 Finyaa kaala Po ndɔɔ, nduyɛ mbo mal ndu nyɔɔŋ kpou o ba.
36 Wana dɔu pɛ laalaŋndo o Po ndɔɔ hoo niŋ, o cho yoomu fafɛɛŋndo sɔla. Kɛ wana diikuŋ Po ndɔɔ le, o sɔla yoomu fafɛɛŋndo le. Nduyɛ kɔl tuu Mɛlɛkaa cho wa wana koŋ choo.
