Chɔŋ 4:1-54
4 Okoŋ kɔɔli, mi Falisiiya tuɛi maa Chiisu wa waŋnda tau siiŋguuwo buɛiya a nda yiŋɔɔ mbo hiau Chɔŋ. Mɛɛ Chiisu* sina hei
2 (mi che bɛɛ o ve ndupila le wa waŋnda yiŋɔɔ le kɛ buɛiyaa nduaa),
3 mbo faŋaŋ Chudiaa le kɔŋndaŋ vɛlɛ Kalili.
4 Kɛ ndoo nɔ mbo keeku a Sameeliaa.
5 Okoŋ mbo fuuluu o chiee pum o Sameeliaa niŋ diolaŋ aa Saika, o lɛŋnde Chekɔpu ndoo ke Choosɛ po ndɔ leŋ ikɛi.
6 Nduyɛ sooŋ mamɛŋ Chekɔpu wo wa loŋ. Chiisu wa ichali o sooŋ mamɛŋ koŋ ikɛi o saŋgɛi yɔkɔɔ a tiŋ nda buli wo. O wa niŋ lɔɔ 12:00 ipalaa.*
7 Okoŋ mi chua Sameeliaŋnɔɔ huŋ mɛŋndaŋ kɔndɔɔ. Mi Chiisu dimul ndu aa: “Ke ya mɛŋndaŋ mi kol.”
8 (Buɛiyaa nduaa ndaa kuɛ nyɛdiaa piondɔɔ chiee.)
9 Mi chua Sameeliaŋnɔɔ dimul ndu aa: “Num Chuunɔɔ, vɛ ma piɛi ya Sameeliaŋnɔɔ mɛŋndaŋ le kolɔɔ?” (Kanifuule, Chuuwa ndaa suukaŋ a Sameeliaŋnda le.)
10 Mi Chiisu mulul ndu aa: “Te num oo sina pɛ ke Mɛlɛka yɔŋgu fondo fuu wo a wana dimul num aa, ‘Ke ya mɛŋndaŋ mi kol lo,’ a wa ndu dimul mi ndoo ke num mɛŋma yɔŋgu yoomoo waŋ.”
11 Mi chuaa dimul ndu aa: “Fallo, a nɔ nyɛ kuandaa mamɛŋ te, nduyɛ sooŋndo cho o yiŋgilɛi. Mɛɛ kuɛɛnɛ ŋ cho yɛ fula a mɛŋma yɔŋgu yoomoo waŋ?
12 Baa a cho o bɛndu mbo hiau finya naa mamaa Chekɔpu, o ke naa sooŋ chuauwaa nduaa a chɔluaa nduaa ndaa kol hoo wo?”
13 Mi Chiisu mulul ndu aa: “Wana o wana kol pɛ mɛŋndaŋ maŋ, kolɔɔ cho ndu vɛlɛ biyɔɔ.
14 Kɛ wana o wana kol pɛ mɛŋma ya cho ndu ke waŋ, fɛɛŋ bɛɛ kolɔɔ bii lɛ ndu le. Mɛŋma ya cho ndu ke waŋ, ma cho simnɔŋ ndu niŋ maa pee buulu ke ndu yoomu fafɛɛŋndo wo.”
15 Mi chuaa dimul ndu aa: “Fallo, mɛɛ ke ya mɛŋndaŋ maŋ, koŋ tosa kolɔɔ bii lɛ ya le, nduyɛ I ve lɛ hunɔɔ le mamɛŋ kɔndɔɔ o fondaa hoo le.”
16 Mi Chiisu dimul ndu aa: “Kɔ veelu pɔnɔ num mi la hiŋ nanuŋ.”
17 Mi chuaa mulul ndu aa: “I nɔ pɔnɔ le.” Mi Chiisu dimul ndu aa: “Tonya ŋ dimi ni maa a nɔ pɔnɔ le,
18 kanifuule puaa a ŋuɛɛnu ŋ keeku niŋ o ba ni. Nduyɛ po nya cho suŋ suŋndo cho pɔnɔ num te. Tonya kpeekpei ŋ dimi ni.”
19 Mi chuaa dimul ndu aa: “Fallo, I che maa wana suaa le Mɛlɛka wo ŋ cho ni.
20 O pembei hei choo finyaa naa mamaa ndaa piɛi Mɛlɛka ni. Kɛ nya dimi maa Chulusalɛm waŋnda nɔ ni ma kuɛ le ndu piɛiyo.”
21 Mi Chiisu dimul ndu aa: “Laalaŋ ya chuaa, teleŋ cho fuuluu, waŋnda hiŋ lɛ niŋ o pembei hei choo ɔɔ ma kuɛ Chulusalɛm le Mɛlɛka piɛiyo le.
22 Nyɛ nya sina le wo nya cho piɛiyo ni. Naa yɛ, nyɛ naŋ sina wo naŋ cho piɛiyo ni, kanifuule Chuuwa fɛlɛŋ Mɛlɛka chɔm nɛiyo le pioŋɔɔ sɔlaa.
23 Teleŋ cho fuuluu, nduyɛ o chii niŋ bɛɛ fuuluu, mi wanaa cho Mɛlɛka piɛiyo o tonyaa choo wa piɛi ndu mbo wa o chɛlaŋ a nyina ndɔɔ vɛlɛ a tonyaa, kanifuule wanaa suu waa nuaa Mɛlɛka cho nuuviaa ni le ma piɛi ndu.
24 Nyinaa Mɛlɛka cho ni. Nduyɛ wanaa cho ndu piɛiyo wa nɔ ma piɛi ndu mbo wa o chɛlaŋ a nyina ndɔɔ vɛlɛ a tonyaa.”
25 Mi chuaa dimul ndu aa: “I sina maa Mɛsayanɔɔ, o nda veelu aa Kiliti wo cho hunɔɔ. Teleŋ o teleŋ o hiŋ pɛ, o cho naa sɔɔŋ muŋ kpou chɔm.”
26 Mi Chiisu dimul ndu aa: “Ya cho wana koŋ ni, wana cho hoo suɛi o numndo wo.”
27 A boondii keŋ kinɛi, mi buɛiyaa nduaa huŋ. Mi kɔndɔfillo bii nda mɛɛ nda che ndu suukaŋndo nda wana lanɔɔ. Kɛ wana pilɛ bɛɛ nyuna ndu le sabu o wa suukaŋndo a chuaa hoo ɔɔ nyɛ ndoo yeema wo le.
28 Okoŋ mi chuaa mɛi kpɛɛnɛi nduɛi mamɛŋnde mbo kua chiee mbo kɔ dimul waŋnda aa:
29 “La huŋ ŋ kɔŋnuŋ mi la che laŋunɔ pum o chɔm ya nyɛ o nyɛ ya tosa paandu wo. O kɛɛ wa ndu le cho Kiliti le!”
30 Mi wanaa wa o chioo niŋnda yom ma kandu kɔlaŋ naa Chiisu chua.
31 A boondii keŋ, buɛiyaa nduaa wa ndu dɛɛniaa aa: “Wana Pɛɛkaa, dio nyɛdiaa.”
32 Kɛ mbo dimul nda aa: “I nɔ nyɛdiaa le dioo o nya sina a ndu okɔɔ le wo.”
33 Okoŋ mi buɛiyaa nduaa nyuuniaŋ aa: “Baa mbo wa maa waŋndo chuu ndu nyɛdiaa ni?”
34 Mi Chiisu dimul nda aa: “Nyɛdiaa nuu cho hɛnaŋ wana vem ya wo tosaa a wali ndɔɔ siouwo ni.
35 O cho nuaa le nya dimi maa o lo niŋ paŋgoŋ ŋhiɔɔlu mi chiɔɔŋ vesa le? Kɛ mi dimul nya: La heelu wɔ hɔlla mi la tofa chiɔɔŋ, ŋ vesa le kouwɔɔ.
36 Wana kuauwaa cho niŋ bɛɛ paawa* ndɔɔ sɔlaa, nduyɛ o cho kulloŋ chuuŋgiaa le yoomu fafɛɛŋndo, le mi wana saŋ ndo, a wana kou wo dɔɔnuŋ nyaale latulu.
37 Mɛɛ tale dimiŋ o hei niŋndo cho tonya aa: Waŋndo cho le saŋɔɔ, mi hoo wa le kouwɔɔ.
38 Nyɛ nya saŋga le ndu le wo ya vem nya kouwɔɔ ni. Acheleŋnda saŋga ni, kɛ mi nya bɛɛ wa tɔnɔɔ sɔlaa o saŋga ndaa niŋ.”
39 Mi Sameeliaŋaa bɔɔbɔɔ o chiee koŋ niŋ duau laalaŋndo o Chiisu niŋ le mɛɛ chuaa timbi seileŋ a ndu okɔɔ yɛ aa: “Mbo chɔm ya nyɛ o nyɛ ya tosa paandu.”
40 Mɛɛ Sameeliaŋnda hiŋ naa ndu chua, ma dimul ndu le mbo lo nda ndaa, nduyɛ mbo tosa loŋ palɛi i ŋiiŋ.
41 Mi koŋ tosa mi wanaa bɔɔbɔɔ cheleŋ duau laalaŋndo o ndu niŋ le mɛɛ nda tuei nyɛ o dimi wo yɛ.
42 Okoŋ ma dimul chuaa aa: “O cho lɛ ko le nyɛ ŋ dimul naa wo le naŋ laalaŋ te, kɛ naapila ŋ tuei, nduyɛ ŋ sina niŋ suŋ suŋ maa poo hoo kpeekpei cho wana cho chieeŋndo piŋi wo ni.”
43 Palɛi ŋiiŋnde hiouwɔɔ, mi Chiisu mal le kɔlaŋ Kalili.
44 Kɛ mi Chiisu pila dimi maa wana suaa le Mɛlɛka wo, waŋnda o ndu lo chiee a ke ndu lebɛɛ le.
45 Mɛɛ o fuuluu Kalili, mi Kaliliaŋnda a bii ndu nyɛkɛndɛi, kanifuule ma cha nyɛ o nyɛ o tosa o bɔŋaŋ loonaŋndo Chulusalɛm. Nda bɛɛ wa o bɔŋaŋ koŋ.
46 Okoŋ mbo huŋ vɛlɛ Kena o tanda Kalili wo niŋ, naa o siiŋguu mɛŋndaŋ muɛiyaŋ nda. Nduyɛ wana bɛndu pilɛ wa Kepaaniɔm, po ndɔɔ wa a naa.
47 Mɛɛ wana bɛndoo hoo tuei maa Chiisu faŋaŋ Chudiaa mbo huŋ Kalili, mbo kua naa ndu chua mbo nyɔɔlu ndu le mbo kɔ siŋgul ndu po ndɔɔ, kanifuule o wa niŋ tendu piɔm.
48 Kɛ mi Chiisu dimul ndu aa: “Te o cho mi la che sɔɔŋ kɔndɔfilloŋ a kaamaalaŋ te, la laalaŋ te.”
49 Mi wana bɛndoo hoo dimul Chiisu aa: “Masanɔɔ, huŋ kɔ yɔŋii po nuu wu.”
50 Mi Chiisu dimul ndu aa: “Kɔ, po numndo seŋgu.” Mi wana bɛndoo hoo laalaŋ nyɛ Chiisu dimul ndu wo, okoŋ mbo kuaŋnuŋ.
51 Kɛ o lo nɛi tɛɛŋ, ma kei bɔŋaŋ nda buɛiyaa nduaa ma dimul ndu maa po ndɔɔ seŋgu.
52 Okoŋ mbo nyuna nda teleŋ o seŋgu wo. Ma dimul ndu aa: “Chiɛi o seŋgu ni, a lɔɔ 1:00 ipalaa.”*
53 Mi finyaa poombɔɔ loonuŋ maa a teleŋ koŋ kpeekpei Chiisu dimul ndu ni aa: “Po numndo seŋgu.” Okoŋ, mi poo hoo a wanaa wa o ndu lo chiɛiniŋ nda kpou duau laalaŋndo o Chiisu niŋ.
54 Hei wa kaama diiŋ ndɔ Chiisu tosa wo ni mɛɛ o fula Chudiaa mbo huŋ Kalili.
Tɛɛsiaalaŋ
^ Kilikiiye, “Masanɔɔ.”
^ Kilikiiye, “hawɛi ɔɔ lɛɛlɛ ŋɔmpumndo.”
^ Ɔɔ “sala.”
^ Kilikiiye, “hawɛi ɔɔ lɛɛlɛ ŋɔmmɛuwo.”
