Chɔŋ 6:1-71
6 Okoŋ kɔɔli, mi Chiisu taŋ Pioo Kalili leeloo, o nda veelu vɛlɛ aa Tabiliaa wo.
2 Mi waŋnda faŋga bɛndoo tual ndu kɔɔli, kanifuule a wa chɔɔ walta kɔndɔfilta o wa tosaa, mbo wa waŋnda siŋgioo laŋ.
3 Okoŋ mi Chiisu nda buɛiyaa nduaa hel o pembei choo ma chal loŋ.
4 Bɔŋaŋ Hiouwɔɔ Choo Chuuwa wa niŋ kpɛɛluŋ.
5 Mɛɛ Chiisu chua hɔlla mbo cha maa waŋnda faŋga bɛndoo cho hunɔɔ naa ndu chua, mbo nyuna Filipi aa: “Kuɛɛnɛ naŋ cho yɛ beediiyo* sɔla le piondɔɔ le mi waŋnda haa de?”
6 Kɛ le Filipi kɔllo tofaa o wa hei dimioo ni, kanifuule ndoo sina nyɛ o wa hunɔɔ tosa wo.
7 Mi Filipi muli aa: “Ŋ piondu bɛɛ beediiyo dinaluɛiyoŋ* 200, o ve letuu le mi wana o wana sɔla bɛɛ nyɛɛmbɔ le.”
8 Mi buɛiyaa nduaa opilɛ diolaŋ Andulu, pɔmbɔɔ Saimɔŋ Pitɛ dimul ndu aa:
9 “Poombɔ pɔmbɔɔ cho nanuŋ a beedii ŋbaliiyo kpuŋgbaŋ ŋuɛɛnu, a suwaa pɔmbuaa a ŋiɔɔŋ. Kɛ yɛɛnɛ nyɔɔŋ muŋ cho yɛ faŋga kaakuuwo hoo tosal?”
10 Mi Chiisu dimi aa: “La dimul waŋnda ma chal.” Bil puiyaa wa o fondaŋ koŋ tau. Okoŋ mi waŋnda kpou chal lechoo. Puaa suee ndaa wa le 5,000.
11 Mi Chiisu chua beediiyo, mbo piɛi, okoŋ mbo piɔu wanaa wa ichali loŋ nda. Mbo chua vɛlɛ suwaa pɔmbuaa kaŋ mbo tosa nyɛ pilɛ koŋ kpe. Okoŋ mi wana o wana dia mbo hini kɔl.
12 Mɛɛ nda kpou de ma pum cha, mbo dimul buɛiyaa nduaa aa: “La chɔuviaa o nda dema wo, yɔŋii o tambu.”
13 Beedii ŋbalii kpuŋgbaŋ ŋuɛɛnu nda de koŋ ndo, mɛɛ nda chɔuviaa o biŋgi biŋgi nda dema wo, mbo pia kambɛilaŋ 12.
14 Mɛɛ waŋnda che kaamaa o tosa hoo wo, ma dimi aa: “Wana suaa le Mɛlɛka wo kpeekpei cho hoo ni, o ndoo nɔ le hunɔɔ o chieeŋndo niŋndo.”
15 Kɛ mɛɛ Chiisu chiikuu maa waŋnda chal le ndu siiŋguuwo masaa a kaka, mbo faŋaŋ loŋ mbo kuaŋnuŋ vɛlɛ o pembei choo ndu pilɛ kpe.
16 Mɛɛ paaleŋ le del, mi buɛiyaa nduaa tual o mɛŋma ibuŋgaŋ kɔŋgɔ.
17 Okoŋ ma luɛi o dɛndɔɔ niŋ le taŋɔɔ ma kuɛ Kepaaniɔm. Nyumndaŋ maa tol niŋ, nduyɛ Chiisu ndoo miiŋgu wɔ nda o ibuŋ te.
18 Mɛŋndaŋ ma wa vɛlɛ hiilɔŋndo kpeekpei, kanifuule hueiye wa hɔŋndo tau tau.
19 Kɛ mɛɛ buɛiyaa nduaa kuɛ a dɛndɔɔ le kilola ŋuɛɛnu ɔɔ la ŋɔmpum,* ma cha Chiisu hunɔɔ o mɛŋndaŋ choo, o dɛndɔɔ ikɛi. Mi siooŋii bɛnduei bii nda.
20 Kɛ mbo dimul nda aa: “Ya ni, la yɔŋ isiooŋ te!”
21 Okoŋ ma chɛl le ndu lueiyo o dɛndɔɔ niŋ. Kɛ o viu bɛɛ le, mi dɛndɔɔ fuuluu o kɔŋgɔ nda wa kɔlaŋ ndo.
22 Diimandɔɔ, mi faŋga ndoo lo o kɔŋgɔɔ leeloo wo cha maa dɛndɛ pɔmbɔɔ ndupilɛ kpe wa loŋ ni, nduyɛ Chiisu luei o dɛndɛ koŋ niŋ nda buɛiyaa nduaa latulu le, kɛ buɛiyaa nduaa kinɛi kuɛŋnuŋ leniŋ ni.
23 Kɛ mi dɛndɛla cheleŋ la fula Tabiliaa, mi la huŋ o fondaŋ Masanɔɔ piɛi o beediiyo choo, mbo ke waŋnda ma dia wo ikɛi.
24 Mɛɛ waŋnda che maa Chiisu nda buɛiyaa nduaa ve lɛ loŋ te, ma luɛi o dɛndɛla laŋ niŋ ma kua ndu nuuviaa Kepaaniɔm.
25 Mɛɛ nda saaluŋ ndu o kɔŋgɔɔ leeloo, ma nyuna ndu aa: “Wana Pɛɛkaa, lɔɔ kuɛɛnɛ ŋ hiŋ yɛ nanuŋ?”
26 Mi Chiisu mulul nda aa: “A tonya mi dimul nya, o cho le mɛɛ nya che kaamaala ya tosa laŋ yɛ le nya cho ya nuuviaa le, kɛ le beedii nya de mi la pum ndo.
27 La fafala le nyɛdiaa tambu wo le, kɛ la fafala le nyɛdiaa ke wana yoomu fafɛɛŋndo wo, o Po wana pɔnɔɔ cho nya ke wo. Kanifuule, ndu Mɛlɛka Finyaa sui pondaleŋ ni le chɔmndo maa o hini kɔl a ndu.”
28 Okoŋ ma nyuna ndu aa: “Walta kuɛɛ naŋ nɔ yɛ miŋ tosa le mi Mɛlɛka hini kɔl a naa?”
29 Mbo mulul nda aa: “Le wali Mɛlɛkaa tosaa, la nɔ mi la dɔu laalaŋndo o wana o vem ndo niŋ.”
30 Ma dimul ndu aa: “Tosa wɔ kaamaa miŋ che, okoŋ miŋ laalaŋ num. Wali yɛɛnɛ ŋ cho yɛ tosaa?
31 Mi finyaa naa mamaa dia manɛiyo o pollo niŋ a mɛɛ i cho ipoonyiaa yɛ aa, ‘Mbo ke nda nyɛdiaa fulaa o choo choo niŋ le ma de.’”
32 Mi Chiisu dimul nda aa: “A tonya mi dimul nya, o cho Muuse le ke nya nyɛdiaa fula o choo choo niŋndo le, kɛ Finya nuu ke nya nyɛdiaa kpeekpei fula o choo choo niŋndo ni.
33 Kanifuule, nyɛdiaa Mɛlɛkaa cho wana fula o choo choo niŋ, mbo yɔŋgu waŋchieeya o chieeŋndo choo yoomoo wo ni.”
34 Okoŋ ma dimul ndu aa: “Masanɔɔ, wa naa nyɛdiaa hoo kioo lɔɔlɔɔ.”
35 Mi Chiisu dimul nda aa: “Ya cho nyɛdiaa yɔŋgu yoomu kpeekpeiyo wo ni. Wana o wana hiŋ pɛ naa ya chua, pesiŋ bɛɛ yima nɛi lɛ ndu le. Nduyɛ wana o wana dɔu pɛ laalaŋndo o ya niŋ, fɛɛŋ bɛɛ kolɔɔ bii lɛ ndu le.
36 Kɛ a mɛɛ ya dimul nya yɛ, la che ya, kɛ la laalaŋ te.
37 Wanaa Finya nuu ke ya wa kpou, a cho hunɔɔ naa ya chua, nduyɛ wana hiŋ naa ya chua pɛ, fɛɛŋ bɛɛ I tuu ndu le.
38 Kanifuule, o cho le hɛnaŋ ni tosa le ya fula choo choo mi huŋ te, kɛ le hɛnaŋ wana vem ya wo tosaa.
39 Hɛnaŋ wana vem ya wo cho ni maa, wanaa o ke ya wa kpou, opilɛ bɛɛ luusiaŋ te, kɛ mi miŋgi nda yoomu o paale mɛɛlaaleŋ choo.
40 Kanifuule, hɛnaŋ Finya nuu cho hoo ni maa, wana o wana sina pɛ Po ndɔɔ, mbo dɔu laalaŋndo o ndu niŋ, o sɔla yoomu fafɛɛŋndo. Nduyɛ I cho ndu miŋgi yoomu o paale mɛɛlaaleŋ choo.
41 Okoŋ mi Chuuwa kandu inyiimu nyiimuei a ndu okɔɔ, kanifuule o dimi aa: “Ya cho nyɛdiaa fula o choo choo niŋndo ni.”
42 Ma kandu dimioo aa: “O cho Chiisu, po Choosɛ wo le cho hoo le? Ŋ sina finya ndɔ a kala ndɔ. Le yɛɛnɛ o dimi yɛ niko aa, ‘O choo choo niŋ ya fula ni’?”
43 Mi Chiisu mulul nda aa: “La pɛŋgi inyiimu nyiimuei nyapila tɛɛŋ.
44 Wana o wana nɔla mbo hiŋ naa ya chua le, mɛɛ mi Finya nuu, o vem ya wo hiŋ a ndu. Nduyɛ, I cho ndu miŋgi yoomu o paale mɛɛlaaleŋ choo.
45 Mi wanaa ndaa suaa le Mɛlɛka wa poonyiaa aa, ‘Chɛhowa* cho waŋnda kpou pɛɛku.’ Wana o wana yaŋ pɛ Finya nuu nilaŋ, nduyɛ mbo sɔla ndu pɛɛkoo o ba, ndu huŋ o ya lo ni.
46 Koŋ chɔm naa maa waŋndo opilɛ bɛɛ che niŋ Finyaa le, mɛɛ wana fula o Mɛlɛka lo wo, kanifuule ndu che niŋ Finyaa.
47 A tonya mi dimul nya, wana o wana laalaŋ pɛ, o cho yoomu fafɛɛŋndo sɔla.
48 “Ya cho nyɛdiaa yɔŋgu yoomoo wo ni.
49 Mi finyaa nyaa mamaa dia manɛiyo o pollo niŋ, kɛ a koŋ kpou ma wu.
50 Nyɛdiaa fula o choo choo niŋndo cho hoo ni. Wana o wana de ndu pɛ, o vi lɛ le.
51 Ya cho nyɛdiaa yɔŋgu yoomoo wo ni, o fula o choo choo niŋndo. Wana o wana de nyɛdiaa hoo pɛ, o cho wa yoomu lefafɛɛŋ. Nduyɛ, nyɛdiaa ya cho koŋ yɔŋgu wo cho dialuŋ nuŋ ni, le mi waŋchieeya* wa yoomu.”
52 Okoŋ, mi Chuuwa kandu diomndaŋ hiŋaŋndo ndapila tɛɛŋ, ma wa dimioo aa: “Vɛɛ poo hoo ke yɛ naa dialuŋ ndɔŋ miŋ de muŋ?”
53 Mi Chiisu dimul nda aa: “A tonya mi dimul nya, te o cho mi la de dialuŋ Po wana pɔnɔɔ nduyɛ mi la kol kooma nduaŋ te, la sɔla yoomoo o nyapila niŋ te.
54 Wana o wana de pɛ dialuŋ nuŋ, nduyɛ mbo kol kooma niaŋ, o cho yoomu fafɛɛŋndo sɔla, nduyɛ I cho ndu miŋgi yoomu o paale mɛɛlaaleŋ choo.
55 Kanifuule, dialuŋ nuŋ cho nyɛdiaa kpeekpeiyo ni, nduyɛ kooma niaŋ ma cho nyɛ kolaa kpeekpeiyo ni.
56 Wana o wana de pɛ dialuŋ nuŋ nduyɛ mbo kol kooma niaŋ, wana koŋ cho diompilɛ a ya, mi ya wa diompilɛ a ndu.
57 Mɛɛ Finyaa o cho yoomu wo vem ya, nduyɛ mi wa yoomu o sabu Finyaa niŋ yɛ, lende koni wana cho dialuŋ nuŋ dio wo wa niŋ yoomu o sabu nuu niŋ ni.
58 Nyɛdiaa fula o choo choo niŋndo cho hoo ni. O cho maa o finyaa nyaa mamaa de, kɛ a koŋ kpou ma wu wo le. Wana o wana de pɛ nyɛdiaa hoo, o cho wa yoomu lefafɛɛŋ.”
59 Teleŋ Chiisu wa waŋnda pɛɛkoo o chiɛi Chuuwa piɛi Mɛlɛka wo niŋ Kepaaniɔm ndo o dimi sɔɔŋ muŋ ni.
60 Mɛɛ nda tuei hei, mi buɛiyaa nduaa a bɔɔbɔɔ dimi aa: “Tueiyɔ suɛi wɔɔŋ se! Nɛɛnɛ nɔla yɛ mbo yaŋ hei nilaŋ?”
61 Kɛ mɛɛ Chiisu sina maa buɛiyaa nduaa wa inyiimu nyiimuei le nyɛ o dimi wo, mbo nyuna nda aa: “Baa nyɛ ya dimi hoo wo paaliaŋ nya?
62 Kɛ, te o wa yɛ niŋ mi la che Po wana pɔnɔɔ helnɔŋndo o fondaŋ o wa paandu wo?
63 Nyina Mɛlɛkaa ke wana yoomoo ni, kɛ dialloŋ muŋ nɔ kpeku o kpeku le. Sɔɔŋ ya dimul nya muŋ ndoŋ fula nyina diandaa o ba, nduyɛ muŋ yɔŋgu yoomoo ni.
64 Kɛ wanaa pum cho nya tɛɛŋ a laalaŋ te.” Kanifuule, chɔŋ o kandɔŋndo, Chiisu ndoo sina wanaa laalaŋ te wa, a wana ndoo pisi niŋ ndu wo.
65 Mbo dimi vɛlɛ aa: “Le saboo hoo ya dimul nya ni maa wana o wana nɔla mbo hiŋ naa ya chua le, mɛɛ mi Finya nuu chɛl ndu.”
66 Le hei, mi buɛiyaa nduaa a bɔɔbɔɔ faŋaŋ ndu kɔɔli ma miiŋguŋ o nyɛm nda mɛi kɔɔli woŋ, nduyɛ a tul lɛ ndu kɔɔli le.
67 Okoŋ mi Chiisu nyuna kiilaa 12 nda aa: “Nya bɛɛ la yeema mi la kuɛŋnuŋ?”
68 Mi Saimɔŋ Pitɛ mulul ndu aa: “Masanɔɔ, mi o nɛɛnɛ lo naŋ kuɛ yɛ? Sɔɔŋ ŋ dimi woŋ tosa mi wana sɔla yoomu fafɛɛŋndo.
69 Ŋ laalaŋ, nduyɛ ŋ sina niŋ walaŋ maa num cho Buɛi Diandaa Mɛlɛkaa ni.”
70 Mi Chiisu dimul nda aa: “I hɛli nya ŋwaŋ 12, lende le? Kɛ nduyɛ, wana pilɛ cho nya tɛɛŋ, o cho ko maa Setana.”*
71 A Chuda, po Saimɔŋ Isikaliɔɔ wo okɔɔ o wa suɛi ni, kanifuule ndu wa ndu hunɔɔ pisi ni, mi che bɛɛ o wa wana pilɛ o kiilaa 12 nda tɛɛŋ.
Tɛɛsiaalaŋ
^ Ɔɔ “buloo.”
^ Tofa Tɛɛsiaa.
^ Kilikiiye, “le mɛɛliilaŋ la yaa ɔɔ la hiɔɔlu. Fondaŋnda bɛndula luaa bɔltaŋ le 25 ɔɔ 30.” Tofa Tɛɛsiaa.
^ Tofa Tɛɛsiaa.
^ Kilikiiye, “chieeŋndo.”
^ “Kilikiiye, diabolos. O sim le “wana tɛɛmbuu acheleŋnda tɔɔ wo.”
