Chɔɔchiaa 1:1-36
1 Mɛɛ Chɔɔsuaa vi, mi Isɔluɛiya* nyuna Chɛhowa aa: “Nɛɛ yaa fɛlɛŋ cho yɛ lakɔ sɔŋga a Kenanaitiiya?”
2 Mi Chɛhowa muli aa: “Chuda fɛlɛŋ cho lakɔ, kanifuule I chii ndu lɛŋndeŋ malɔɔ o ba.”
3 Okoŋ, mi Chuda dimul Simiɔŋ aa: “Huŋ kɔ latulu o tanda* nda ke ya wo niŋ, miŋ kɔ chiŋalaŋ Kenanaitiiya a sɔŋgɔɔ. Nduyɛ, ya bɛɛ I cho lakɔ a num latulu o tanda nda ke numndo niŋ.” Okoŋ mi Simiɔŋ kua a ndu latulu.
4 Mɛɛ waŋnda Chuda kuɛ, mi Chɛhowa mal nda Kenanaitiiya a Pɛluɛsaitiiya o ba. Ma yam puaa 10,000 o Bisɛki niŋ.
5 Ma saaluŋ Adona-bisɛki o Bisɛki niŋ, okoŋ ma sɔŋga a ndu loŋ. Nduyɛ ma yam Kenanaitiiya a Pɛluɛsaitiiya.
6 Mɛɛ Adona-bisɛki nyaanuŋ, ma tisa ndu kɔɔli, ma kɔ bii ndu. Okoŋ, ma kili ndu sooŋ bɛndoŋ o peloŋ a o balaŋ.
7 Mi Adona-bisɛki dimi aa: “Masaa cho ŋwaŋ 70 a ya kili sooŋ bɛndoŋ o peloŋ a o balaŋ nda, nduyɛ nyɛdiaa deli o tibii* nuu bɛŋgu wo nda chɔɔviaa ni ma dia. Mɛɛ ya tosal nda yɛ, lende koni Mɛlɛka tosal la ni.” Okoŋ, ma kua a ndu Chulusalɛm, mbo kɔ wu loŋ.
8 Okoŋ kɔɔli, mi puaa Chuda kɔ del Chulusalɛm choo a sɔŋgɔɔ, ma bii ndu. Ma diu wanaa wa loŋ nda a muɛi faŋnde, okoŋ ma mal chioo o yiŋ.
9 Okoŋ kɔɔli, mi puaa Chuda kɔ chiŋalaŋ Kenanaitiiyaa wa o fondaŋ ŋpemboo, a o tanda Nɛkɛbi* a Siɛfila* wo niŋnda a sɔŋgɔɔ.
10 Mi puaa Chuda kɔ del Kenanaitiiyaa wa o Hɛbulɔŋ niŋnda choo a sɔŋgɔɔ. (Hɛbulɔŋ ndaa veelu paandu ni aa Kiliaati-aba.) Okoŋ ma dii Siɛsiai, Ahimaŋ, a Talimai.
11 Mɛɛ nda chɛŋ loŋ, ma kua le sɔŋgɔɔ a waŋnda Dɛbiluii. (Dɛbiluii ndaa veelu paandu ni aa Kiliaati-sɛfa.)
12 Okoŋ mi Kelɛbi dimi aa: “Wana cho lakɔ Kiliaati-sɛfa delɔɔ choo a sɔŋgɔɔ nduyɛ mbo bii ndu wo, I cho ndu Akisa chua ni ke mbo wa laa ndɔ.”
13 Mi Otiniɛɛ po Kinaasi wo, pɔmbɔɔ Kelɛbi kɔ del chiee koŋ choo nduyɛ mbo bii ndu. Okoŋ, mi Kelɛbi ke ndu Akisa chua ndɔ le mbo wa laa ndɔ.
14 Mɛɛ o wa kɔŋndaŋ o nɔ ndɔɔ, mbo dimul pɔnɔ ndɔ le mbo nyuna Kelɛbi finya ndɔ mbo ke nda yondoo. Okoŋ, mbo tual o sofɛlɛ ndɔɔ choo.* Mi Kelɛbi finya ndɔ nyuna ndu aa: “Yɛɛnɛ ŋ yeema yɛ?”
15 Mi Akisa muli aa: “A yandii, dɔu ya sala. A chii ya niŋ lɛŋndeŋ ba tou wo* ke. Yandii, ke ya vɛlɛ leŋ Kulɔti-mayim.”* Okoŋ, mi Kelɛbi ke ndu Kulɔti Amaluaŋ a Kulɔti Amatou.
16 Mi Kenaitiiya, wanaa fula o pulale lefoo Muuse leŋ choo wa, nda waŋnda Chuda faŋaŋ o chiee bɛndu mawauwo,* ma kua o lɛŋnde polteŋ Chuda, Eluadi ba tou wo. Mɛɛ nda kuɛ, ma kɔ chal wanaa wa loŋ nda tɛɛŋ.
17 Kɛ mi yuŋgu Chuda wo a yuŋgu Simiɔŋ ndo kɔ del Kenanaitiiyaa wa Sɛfati wa choo a sɔŋgɔɔ, nduyɛ ma tɛɛmbuu chioo kpata kpata. Okoŋ ma ke chiee koŋ diolaŋ aa Hɔɔma.*
18 Mi Chuda bii Kaasa a tanda ndɔɔ, Asikɛlɔŋ a tanda ndɔɔ, vɛlɛ a Ɛkulɔŋ a tanda ndɔɔ.
19 Chɛhowa wa a waŋnda Chuda latulu. Le hei, ma bii fondaŋnda ŋpembulaŋ, kɛ a tiuba ma tou wanaa wa o lɛŋnde dɛŋgbɛleŋ niŋnda le, kanifuule nyɛm ndaŋ nyaanaŋ suaa naŋndoŋ muŋ nɔ chiliŋuŋ sɛɛmbiaŋ.*
20 Nduyɛ a mɛɛ Muuse mɛi lediom yɛ, ma ke Kelɛbi Hɛbulɔŋ. Okoŋ, mbo tuau puaa yaa waa Enaki wa loŋ.
21 Kɛ yuŋgu Bɛŋjamiŋ ndo tuu Chɛbusaitiiyaa wa Chulusalɛm nda le. Le hei, mi Chɛbusaitiiya hiau lachi a waa latulu a yuŋgu Bɛŋjamiŋ ndo haaa a paale hauleŋ ndeŋ.
22 A boondii keŋ, mi yuŋgu Choosɛ wo kua le Bɛtɛl chiŋalaŋndo a sɔŋgɔɔ. Nduyɛ Chɛhowa wa a nda latulu.
23 Mi yuŋgu Choosɛ wo viam suaŋ suaŋnda Bɛtɛl. (Nduyɛ, chioo hoo ndaa veelu paandu ni aa Luusi.)
24 Mɛɛ suaŋ suaŋnda che poo fulaa o chioo hoo niŋ, ma dimul ndu aa: “A yandii, chɔm naa nɛi wana keeku le luɛiyɔɔ chiee wo, okoŋ miŋ bii num nyɛkɛndɛi.”*
25 Mbo chɔm nda nɛiyo le luɛiyɔɔ chiee, ma kɔ diu diu wanaa wa loŋ nda a muɛi faŋnde. Kɛ po koŋ a yuŋgu ndɔɔ kpou, a yɔŋ nda nyɛ o nyɛ le.
26 Mi po koŋ kuaŋnuŋ o lɛŋnde Hitaitiiya niŋ, mbo kɔ taŋgul chioo loŋ, mbo ke ndu diolaŋ aa Luusi. Diolaŋ ndaŋ la cho wɔ chioo hoo choo ni haaa a paale hauleŋ ndeŋ.
27 Chieeŋ bɛndoŋ muŋ, Bɛti-siaŋ, Taanaki, Dɔɔ, Ibiliam, Mɛkidɔɔ, vɛlɛ a chieeŋ balu muŋ ndoŋ kpou, yuŋgu Manaasɛ wo tuu wanaa wa o chieeŋ muŋ niŋnda le. Mi Kenanaitiiya hiau lachi a waa o lɛŋnde leŋ niŋ.
28 Mɛɛ Isɔluɛiya sɔla kpaayaa, a tuu Kenanaitiiya kpou le. Kɛ ma siiŋguu nda chiaa.
29 Kenanaitiiyaa wa Kiisa wa, Ifiluem bɛɛ tuu nda le. Kɛ mi Kenanaitiiya hiau lachi a waa nda tɛɛŋ o Kiisa niŋ.
30 Wanaa wa Kitilɔŋ a Nahalɔɔ wa, Sɛbulɔŋ tuu nda le. Kɛ mi Kenanaitiiya hiau lachi a waa nda tɛɛŋ, nduyɛ ma siiŋguu nda chiaa.
31 Wanaa wa Ako, Saidɔŋ, Alabi, Akisibi, Hɛlibaa, Afiki, a Luihɔbi wa, Asia tuu nda le.
32 Le hei, mi waŋnda Asia hiau lachi a waa Kenanaitiiya tɛɛŋ o lɛŋnde leŋ niŋ, kanifuule a tuu nda le.
33 Wanaa wa Bɛti-siɛmɛsi a Bɛti-anati wa, Nafitalii tuu nda le. Kɛ ma hiau lachi a waa Kenanaitiiya tɛɛŋ o lɛŋnde leŋ niŋ. Mi wanaa wa Bɛti-siɛmɛsi a Bɛti-anati wa simnuŋ chiaa le nda.
34 Mi Amɔluaitiiya tosa mi yuŋgu Daŋ ndo kɔ chal o fondaŋ ŋpemboo. A chɛl nda le ma tol o lɛŋnde dɛŋgbɛleŋ niŋ te.
35 Mi Amɔluaitiiya kɛɛ le faŋaŋndo o Pembii Hɛluɛsi Ve, vɛlɛ a o chieeŋ bɛndoŋ Aichalɔŋ a Siaabim niŋ. Kɛ mɛɛ yuŋgu Choosɛ wo chɔɔlu kpaayaa sɔla, ma siiŋguu nda chiaa.
36 Tanda Amɔluaitiiya ndoo kanduŋ Akilabim ba luaŋ ndo haaa mbo kua Sila ba luaŋ ndo.
Tɛɛsiaalaŋ
^ Hibuluiye, “chuauwa Isɔluɛi.”
^ Hibuluiye, “buŋgɛi nii.”
^ Ɔɔ “tabali.”
^ Ɔɔ “lɛŋndeŋ ba tou wo.”
^ Ɔɔ “fondaŋ pembuŋ pɔmbɔŋ cho wo.”
^ Ɔɔ naapum, “mbo tiam balaŋ teleŋ o wa o sofɛlɔɔ choo wo.”
^ Ɔɔ “Nɛkɛbi.”
^ O sim “fondaŋnda mamɛŋndaŋ.”
^ Koŋ cho ni, Chɛluiko.
^ O sim “Tɛɛmbuuwo Kpata Kpata.”
^ Hibuluiye, “nyɛm nyaanaŋ wa ŋ toosiaa a chiliŋndoŋ kpu woŋ.”
^ Hibuluiye, “chɔm num kaala lo lechoo wo.”
