Chɔɔchiaa 10:1-18
10 Mɛɛ Abimɛlɛki vi, mi Tola po Puwa wo chaŋ le Isɔluɛiya piŋioo. Nduyɛ Puwa yɛ, finya ndɔ wa Dodo ni, fulaa o yuŋgu Isaka wo choo. Siamɛɛ o wa ichali ni, o tanda ŋpemboo Ifiluem.
2 Tola wa wana kialaa ŋyamaa le wɔsilaŋ 23 o Isɔluɛi niŋ. Okoŋ, mbo wu, ma kumbu ndu Siamɛɛ.
3 O ndu kɔɔli, mi Chaa wana waa Kiliaadi chaŋ, nduyɛ o wa wana kialaa ŋyamaa le wɔsilaŋ 22 o Isɔluɛi niŋ.
4 Chaa ndoo nɔ puaa 30. Nduyɛ puaa nduaa haa o kɛ kɛ ndoo nɔ sofɛlɔɔ o pilɛ le balɔɔ lechoo, vɛlɛ a chiee bɛndoo o pilɛ. Haaa a paale hauleŋ ndeŋ, chieeŋ 30 woŋ muŋ nda veelu ni aa Havɔti-chaa. Nduyɛ o lɛŋnde Kiliaadi leŋ niŋ ŋ cho ni.
5 Okoŋ, mi Chaa wu, ma kumbu ndu Kamɔŋ.
6 Okoŋ kɔɔli, mi Isɔluɛiya tosa vɛlɛ nyɛ bɛnda Chɛhowa o hɔl te wo. Nduyɛ, ma kandu suŋgbuma Baal laŋ a suŋgbuma Asitɔluɛɛ waŋ sooluuwo. Okoŋ ma muliŋ mɛlɛkaa waŋnda Aluam, Saidɔŋ, Mowaabi, Amɔŋ a Filitiaa sooluuwo. Ma mal Chɛhowa, nduyɛ ma kɛɛ le ndu piɛiyo.
7 Le hei, mi Chɛhowa duaunuŋ tumbe o kala kala a waŋnda Isɔluɛi, okoŋ mbo mal nda* waŋnda Filitiaa a Amɔŋ o ba.
8 Ma tusi Isɔluɛiya nyɛpalaa kala kalaa choo o wɔsi koŋ niŋ. Le wɔsilaŋ 18, a wa Isɔluɛiyaa wa ichali o lɛŋnde Amɔŋ ndeŋ niŋ Kiliaadi, Chɔɔdaŋ ndaŋ ba paaleŋ le chaŋ ndo wa kpou nyɛpalaa tusioo choo.
9 Mi waŋnda Amɔŋ ndaa taŋ Chɔɔdaŋ ndaŋ, ma kɔ sɔŋga a yuŋgu Chuda wo, yuŋgu Bɛŋjamiŋ ndo, vɛlɛ a yuŋgu Ifiluem ndo. Isɔluɛiya wa o nyɛpalaa kala kalaa bɛŋgu.
10 Okoŋ, mi Isɔluɛiya muliŋ o Chɛhowa lo le malaa. Ma dimi aa: “Ŋ tosa hakioo a num, kanifuule ŋ mal Mɛlɛka naa miŋ muliŋ suŋgbuma Baal laŋ sooluuwo.”
11 Kɛ mi Chɛhowa nyuna Isɔluɛiya aa: “Baa o cho ya le soli nya o lɛŋnde Ichipi leŋ niŋ, nduyɛ mi piŋi nya Amɔluaitiiya, Amɔnaitiiya, Filitiaŋnda,
12 Saidoniaŋnda, Amalɛkaitiiya a Midianaitiiya o ba teleŋ nda wa nya nyɛpalaa tusioo choo wo le? Mɛɛ nya muliŋ o ya lo, mi piŋi nya nda o ba.
13 Kɛ mi la mal la, mi la muliŋ mɛlɛkaa cheleŋnda sooluuwo. Lelaŋ, I cho lɛ nya piŋi le.
14 La kɔ o mɛlɛkaa nya hɛli kaŋ nda lo, mi la nyuna nda le malaa. Mɛlɛkaa kaŋ a piŋi nya o dɛnɛ palaa nya cho niŋndo.”
15 Kɛ mi Isɔluɛiya dimul Chɛhowa aa: “Ŋ tosa hakioo a num. Nyɛ o nyɛ ŋ yeema pɛ, tosal naa. Kɛ a yandii, piŋi naa paale hauleŋ ndeŋ.”
16 Okoŋ ma faaŋiaa mɛlɛkaa lachoowaa wa nda tɛɛŋ nda, ma muliŋ Chɛhowa piɛiyo. Le hei, o nɔla lɛ hiouwɔɔ lachi a biuwɔŋndo saŋga Isɔluɛiya wa wo le.
17 Okoŋ kɔɔli, mi Amɔnaitiiya chuuŋgiaŋ naapilɛ, ma kila dɔɔŋgɔɔ Kiliaadi. Nduyɛ mi Isɔluɛiya bɛɛ chuuŋgiaŋ naapilɛ, ma kila dɔɔŋgɔɔ Misipa.
18 Mi waŋnda a waŋ banaa chieeya Kiliaadi dimulaŋ aa: “O nɛɛnɛ cho yɛ naa isisi lachi le miŋ kɔ sɔŋga Amɔnaitiiya? Wana koŋ cho simnɔŋ masaa le waŋnda Kiliaadi kpou.”
Tɛɛsiaalaŋ
^ Hibuluiye, “pisi nda.”
