Chɔɔchiaa 11:1-40
11 Kuubanɔ kpaaya bɛndoo pila Chɛfita wa ni, fulaa Kiliaadi. Nduyɛ, wana lanɔ suundɛiyo velu ndu ni. Finyaa Chɛfita ndoo nɔ diolaŋ ni aa Kiliaadi.
2 Kɛ mi lanɔɔ Kiliaadi vialu vɛlɛ puaa cheleŋ. Mɛɛ puaa kaŋ sul kaasoŋnda, ma tuau Chɛfita. Ma dimul ndu aa: “A cho o nyɛm kɛŋ finya naa choo le, kanifuule wana lanɔ cheleŋ velu num ni.”
3 Okoŋ mi Chɛfita nyaanuŋ puaa finya ndɔ velu wa, mbo kɔ chalnuŋ o lɛŋnde Tobi leŋ niŋ. Mi puaa kɔl vesɛiya bii Chɛfita ichaŋya, ma tual ndu kɔɔli.
4 Mɛɛ teleŋ tiŋ hiou, mi Amɔnaitiiya huŋ chiŋalaŋ Isɔluɛiya a sɔŋgɔɔ.
5 Mɛɛ Amɔnaitiiya chiŋalaŋ Isɔluɛiya a sɔŋgɔɔ, mi laŋgbaa kalla Kiliaadi kua chɔ chɔ o lɛŋnde Tobi leŋ niŋ, le ma miŋgi Chɛfita Kiliaadi.
6 Ma dimul Chɛfita aa: “Huŋ ma wa simlachinɔ naa le miŋ sɔŋga a Amɔnaitiiya.”
7 Kɛ mi Chɛfita dimul laŋgbaa kalla Kiliaadi aa: “O cho nya le tul la yɛleŋ tul bɛndoo, okoŋ mi la tuau ya o chiɛi finya nuu niŋ te? Baa le mɛɛ nyɛpalaa tol nya choo yɛ nya hiŋ ya kɔɔli ni?”
8 Okoŋ mi laŋgbaa kalla Kiliaadi dimul Chɛfita aa: “Le sabu koŋ kpeekpei naŋ hiŋ num kɔɔli ni. Te a chɛl pɛ miŋ kuɛ ma kɔ sɔŋga a Amɔnaitiiya, num cho wa simlachinɔɔ le waŋnda o Kiliaadi niŋ kpou ni.”
9 Le hei, mi Chɛfita dimul laŋgbaa kalla Kiliaadi aa: “Te la kuɛ pɛ a ya mi kɔ sɔŋga a Amɔnaitiiya, nduyɛ mi Chɛhowa tosa mi yem nda, mɛɛ ya kpeekpei cho wa simlachinɔ nyaa ni!”
10 Mi laŋgbaa kalla o Kiliaadi niŋ dimul Chɛfita aa: “Chɛhowa cho lesei, te ŋ kɛɛ pɛ le nyɛ ŋ dimi wo tosaa.”
11 Okoŋ, mi Chɛfita kua nda laŋgbaa kalla Kiliaadi. Nduyɛ, mi waŋnda siiŋguu ndu simlachinɔ ndaa, a masa puaa chɔuwa. Diomnda Chɛfita dimi laŋ kpou, mbo miŋgi laŋ sondo Chɛhowa o hɔl Misipa.
12 Okoŋ mi Chɛfita viam waŋnda o masa Amɔnaitiiya lo le ma nyuna ndu aa: “Suɛi kuɛɛ cho yɛ naa tɛɛŋ naa num, le ma huŋ chiŋalaŋ lɛŋnde nileŋ a sɔŋgɔɔ?”
13 Mi masa Amɔnaitiiya dimul wanaa Chɛfita vem nda aa: “Teleŋ Isɔluɛiya fula Ichipi wo, ma chua lɛŋnde nileŋ chɔŋ Anɔŋ mbo kua Chabɔki, haaa Chɔɔdaŋ. Lelaŋ, la miŋgi leŋ yɛlɛŋ.”
14 Kɛ mi Chɛfita miŋgi wanaa o vem nda pila o masa Amɔnaitiiya lo
15 le ma dimul ndu aa:
“Nyɛ Chɛfita dimi wo cho hoo ni: ‘Isɔluɛiya chue lɛŋnde Mowabaitiiya a lɛŋnde Amɔnaitiiya le.
16 Kanifuule, mɛɛ Isɔluɛiya fula o lɛŋnde Ichipi leŋ niŋ, ma keeku o pollo niŋ haaa o Pee Siaŋa Mɛŋma Ihɛllo ma fuuluu Kadɛsi.
17 Okoŋ mi Isɔluɛiya viam waŋnda o masaa Idɔm ndo, ma dimul ndu aa: “Yandii, chɛl naa miŋ keeku o lɛŋnde numndeŋ niŋ.” Kɛ mi masaa Idɔm kɛɛ. Okoŋ kɔɔli, ma viam vɛlɛ waŋnda o masaa Mowaabi lo, kɛ mi ndu bɛɛ kɛɛ. Le hei, mi Isɔluɛiya hiau lachi a challe Kadɛsi.
18 Mɛɛ nda wa kɔlaŋ o pollo niŋ, ma kpakpala lɛŋnde Idɔm ndeŋ a lɛŋnde Mowaabi leŋ. Ma keeku a lɛŋnde Mowaabi leŋ ba paaleŋ le chaŋ ndo, okoŋ ma kila dɔɔŋgɔɔ o tanda Anɔŋ ndo niŋ. A luei o lɛŋnde Mowaabi leŋ niŋ te, kanifuule Anɔŋ ndoo salu pɛŋgulaŋ a Mowaabi ni.
19 “‘Okoŋ kɔɔli, mi Isɔluɛiya viam waŋnda o masa Amɔluaitiiya lo diolaŋ Saihɔŋ, o wa o masaleŋ choo Hɛsibɔŋ ndo. Ma dimul ndu aa: “A yandii, chɛl naa miŋ keeku o lɛŋnde numndeŋ niŋ, miŋ kuɛ o fonda naa.”
20 Kɛ mi masaa Saihɔŋ kiisaŋ, le mi Isɔluɛiya keeku o tanda ndɔɔ niŋ. Le hei, mbo chuuŋgiaa wanaa nduaa kpou, ma kila dɔɔŋgɔɔ Chahasi, okoŋ ma sɔŋga a Isɔluɛiya.
21 Kɛ mi Chɛhowa, Mɛlɛka Isɔluɛiya mal Saihɔŋ a wanaa nduaa kpou Isɔluɛiya o ba. Okoŋ, mi Isɔluɛiya yam nda. Nduyɛ, mi Isɔluɛiya hialu fonda o fonda Amɔluaitiiya wa o tanda koŋ niŋ.
22 Ma bii tanda Amɔluaitiiya chɔŋ Anɔŋ kɔ Chabɔki, a chɔŋ o pollo kɔ bii Chɔɔdaŋ.
23 “‘Chɛhowa, Mɛlɛka Isɔluɛiya tou Amɔluaitiiya o lɛŋndeŋ ndeŋ niŋ ni, mbo ke wanaa nduaa Isɔluɛiya. Baa a yeema ma soli nda o lɛŋnde leŋ niŋ?
24 Nyɛ o nyɛ mɛlɛka nyaa Kɛmɔɔsi ke nya pɛ, le nya o cho ni. Naa bɛɛ, lɛŋnde kɛ kɛ Chɛhowa Mɛlɛka naa ke naa pɛ, le naa le cho ni.
25 Baa a cho pa o sɔvɛ mbo hiau Belaki po Sipɔɔ wo, masaa le Mowaabi? Le pilɛ bɛɛ o simul Isɔluɛiya le, kɛlɛŋgaa niŋ te mbo chɔulaba nda.
26 Le wɔsilaŋ 300, Isɔluɛiya wa ichali Hɛsibɔŋ a Aloya, vɛlɛ a chieeŋ balu muŋ ndoŋ. Nduyɛ a wa vɛlɛ ichali o chieeŋ bɛnduŋ cho o kɔŋgɔɔ Anɔŋ ndoŋ kpou. Mɛɛ le yɛɛnɛ a kindiŋ le nda solioo a boondii keŋ te?
27 I tosal num suɛi wɔɔŋ te. Lelaŋ, a nɔ di o di le ya chiŋalaŋndo le. Maa Chɛhowa, o cho yamanɔɔ wo kiolu hau yamɛi waŋnda Isɔluɛi tɛɛŋ a waŋnda Amɔŋ.’”
28 Kɛ mi masa Amɔnaitiiya kɛɛ le nilaŋ yaŋɔɔ o yooŋgu Chɛfita yɔŋ ndu wo.
29 Mi nyina Chɛhowa wo tosa mi Chɛfita keeku Kiliaadi a Manaasɛ, le kɔlaŋ Misipa o Kiliaadi niŋ. Nduyɛ mbo chaŋ Misipa o Kiliaadi niŋ mbo hiau lachi a kɔlaŋ le mbo kɔ sɔŋga a Amɔnaitiiya.
30 Okoŋ mi Chɛfita chuel Chɛhowa buŋgɛi. Mbo dimi aa: “Te a tosa pɛ mi yem Amɔnaitiiya,
31 nduyɛ mi miiŋgu o kɔl nyulu niŋ, wana cho fula o ya lo chiɛiniŋ mbo hiŋ le ya demullo wo cho wa le Chɛhowa, nduyɛ mi yɔŋgu ndu maa sala luamaa.”
32 Okoŋ mi Chɛfita kɔ sɔŋga a Amɔnaitiiya, nduyɛ mi Chɛhowa tosa mbo yam nda.
33 Mbo diu nda chɔŋ Aloya kɔ Miniti haaa mbo kua Ebɛl-kiluamim. Mbo diu waŋnda diuwo pila, nduyɛ mbo bii chieeŋ bɛndoŋ 20. Mɛɛ nuaa Isɔluɛiya yem Amɔnaitiiya ni.
34 Mɛɛ Chɛfita miiŋgu o ndu lo Misipa, mi chua ndɔɔ fula le ndu hunɔɔ demullo! O wa hunɔɔ a dundu pɔmbɔɔ lɔɔ nduyɛ mbo ya! Chuale pilɛ le leŋ kinɛi ndoo nɔ ni. O fulawɔ o leŋ kɔɔli, ndoo nɔ lɛ po cheleŋ ɔɔ chua cheleŋ te.
35 Mɛɛ Chɛfita che ndu, mbo sɛɛsiaŋ domaa lekɔɔ, okoŋ mbo dimi aa: “Kpokoo ya chua nuu, a tɛɛmbuu ya bɔɔ kɔllo fɔ!* Kanifuule, a hiŋ ya mɛi ma kuɛŋnuŋ. I chii Chɛhowa buŋgɛi chuel, nduyɛ I nɔ mi lo o lediom.”
36 Kɛ mbo dimul finya ndɔ aa: “Kɛkɛ, te a chii niŋ pɛ buŋgɛi chua o Chɛhowa lo, mɛɛ tosa nyɛ ŋ tuu le tosaa a ya wo. Kanifuule, Chɛhowa mala num le yaamɔɔwaa numnda, Amɔnaitiiya yomɔɔ.”
37 Okoŋ mbo dimul finya ndɔ aa: “Nyɛ ya yeema ma tosal la kinɛiyo cho hoo ni: Mal la le paŋgoŋ ŋ muuŋ, mi kuɛ o pemboŋ choo, mi kɔ chaŋ yembule nileŋ choo latulu naa chaaŋaa niaa laanduaa.*”
38 Mi finya ndɔ dimul ndu aa: “Awa, kɔ!” Okoŋ mbo mal ndu le paŋgoŋ ŋ muuŋ, mbo kua o pemboŋ choo nda chaaŋaa nduaa, le mbo chaŋ o yembule ndɔleŋ choo.
39 Mɛɛ paŋguŋ muuŋ ndoŋ chuu, mbo miiŋgu o finya ndɔ lo. Okoŋ kɔɔli, mi finya ndɔ peelu buŋgɛi o chua a ndu okɔɔ ve. Le pilɛ bɛɛ o hiu wana pɔnɔɔ kɔɔli le. Nduyɛ mi hei simnuŋ naamoo o Isɔluɛi niŋ:
40 Palɛi ihiɔɔlu o iwɔsi o wɔsi niŋ, mi chuaa laanduaa o Isɔluɛi niŋ ndaa kuɛ chua Chɛfita wo yoomuaŋ lueiyo.
Tɛɛsiaalaŋ
^ Hibuluiye, “a tusi ya toolo.”
^ Ɔɔ “mi kɔ chaŋ naa chaaŋaa niaa, kanifuule fɛɛŋ bɛɛ I cho ichali o nɔ le.”