Chɔɔchiaa 12:1-15
12 Okoŋ mi puaa Ifiluem chuuŋgiaŋ, ma taŋ ma kua Safɔŋ.* Ma dimul Chɛfita aa: “Le yɛɛnɛ a veelu naa teleŋ ŋ taŋ le sɔŋgɔɔ a Amɔnaitiiya wo le? Ŋ cho num lomɔɔ a chiɛi numndo latulu.”
2 Kɛ mi Chɛfita dimul nda aa: “Mɛɛ sɛɛŋgiaŋ bɛndoo del naa tɛɛŋ naa Amɔnaitiiya, mi veelu nya le ya malaa, kɛ la hiŋ te.
3 Mɛɛ ya che maa la hiŋ niŋ le ya mala le, mi luei yoomu nuu o kpundɔɔ niŋ, okoŋ mi kɔ chiŋalaŋ Amɔnaitiiya. Nduyɛ, mi Chɛhowa tosa mi yam nda. Mɛɛ, le yɛɛnɛ nya hiŋ yɛ hau le sɔŋgɔɔ a ya?”
4 Mi Chɛfita chuuŋgiaa puaa o Kiliaadi niŋ kpou, ma sɔŋga a Ifiluem. Okoŋ mi puaa Kiliaadi tiu Ifiluem ba. Puaa haa ndaa dimi paandu ni aa: “Mi che bɛɛ nya waŋnda Kiliaadi, la cho ichali o tandala Ifiluem a Manaasɛ laŋ niŋ, kɛ wanaa kelaŋnda koni nya cho ni, fulaa o yuŋgu Ifiluem ndo choo.”
5 Mi waŋnda Kiliaadi kialu waŋnda Ifiluem lachi, okoŋ ma kɔ bii fondaŋnda taŋaalaŋ Chɔɔdaŋ, yɔŋii waŋnda Ifiluem nyaanuŋ. Nduyɛ te wana waa Ifiluem ndoo hiŋ pɛ mbo dimi aa, “I yeema mi taŋ,” puaa Kiliaadi nyuna ndu aa, “Wana waa Ifiluem ŋ cho ni?” Te o muli pɛ aa, “Ɛ ɛ!”
6 a dimul ndu aa, “Yandii, dimi wɔ aa Sibolɛti.” Kɛ mbo dimi aa, “Sibɔlɛti.” Kanifuule, ndoo tiuba le diom koŋ veeloo nyɛkɛndɛi le. Okoŋ a bii ndu, a dii ndu o fonda taŋaa koŋ Chɔɔdaŋ. Le hei, mi waŋnda Ifiluem wu 42,000 a teleŋ koŋ.
7 Chɛfita wa wana kialaa ŋyamaa o Isɔluɛi niŋ le wɔsilaŋ la ŋɔmpum. Okoŋ kɔɔli, mbo wu, ma kumbu ndu Kiliaadi o ndu lo chiee.
8 O ndu kɔɔli, mi Ibisaŋ fulaa Bɛtilɛhɛm simnuŋ wana kialaa ŋyamaa o Isɔluɛi niŋ.
9 Ndoo velu puaa 30 a waŋ laanduaa 30. Mbo yɔŋ chuaa nduaa laanduaa o buŋgaŋ cheleŋ niŋ ma kɔ chal puaa o ba o nɔ laŋ niŋ. Nduyɛ mbo huŋ a waŋ laanduaa 30, mi puaa nduaa chua nda o nɔ laŋ niŋ. Ibisaŋ wa wana kialaa ŋyamaa le wɔsilaŋ la ŋɔmmɛu o Isɔluɛi niŋ.
10 Okoŋ mbo wu, ma kumbu ndu o Bɛtilɛhɛm niŋ.
11 O ndu kɔɔli, mi Ɛlɔŋ fulaa o yuŋgu Sɛbulɔŋ ndo choo simnuŋ wana kialaa ŋyamaa o Isɔluɛi niŋ. Nduyɛ, o wa wana kialaa ŋyamaa le wɔsilaŋ tɔ.
12 Okoŋ mbo wu, ma kumbu ndu Aichalɔŋ o lɛŋnde Sɛbulɔŋ ndeŋ niŋ.
13 O ndu kɔɔli, mi Abidɔŋ po Hilɛɛ wo, fulaa o yuŋgu Piluatɔŋ ndo choo simnuŋ wana kialaa ŋyamaa o Isɔluɛi niŋ.
14 Ndoo velu puaa 40, nduyɛ ndoo nɔ puaa mamaa 30. O kɛ kɛ ndoo nɔ sofɛlɔɔ. O wa wana kialaa ŋyamaa o Isɔluɛi niŋ le wɔsilaŋ la ŋɔmaa.
15 Okoŋ, mi Abidɔŋ po Hilɛɛ wo wu, ma kumbu ndu Piluatɔŋ o lɛŋnde Ifiluem ndeŋ niŋ, o pembii Amalɛkaitiiya.
Tɛɛsiaalaŋ
^ Ɔɔ naapum, “ma taŋ ma kua ba luaŋ ndo.”
