Chɔɔchiaa 14:1-20
14 Okoŋ, mi Samsiŋ kua Timina, mbo kɔ saaluŋ wana lanɔ Filitiaŋnɔɔ loŋ.
2 Mbo kɔ dimul finya ndɔ a kala ndɔ aa: “I che wana lanɔ Filitiaŋnɔɔ o Timina niŋ, nduyɛ I hɛnaŋ a ndu. I yeema mi la kaalal la ndu mbo wa laa ni.”
3 Kɛ mi finya ndɔ nda kala ndɔ nyuna ndu aa: “Baa a nɔla ma sɔla lanɔɔ o wanayaŋ numndoŋ tɛɛŋ a o Isɔluɛiya tɛɛŋ kpou le? Baa o bɛnda pa ma kɔ chua lanɔɔ Filitiaŋaa sɔla hivi chiɛi kɔɔli le wa tɛɛŋ?” Kɛ mi Samsiŋ dimul finya ndɔ aa: “La kaalal la ndu, kanifuule ndu ya yeema ni.”*
4 Nduyɛ finya ndɔ a kala ndɔ ndaa sina maa kɛɛsiaa Chɛhowa wo le wa koŋ te, kanifuule o wa nɛilaŋ nuuviaa le Filitiaŋnda chiŋalaŋndo a sɔŋgɔɔ. Nduyɛ a teleŋ koŋ, Isɔluɛiya wa Filitiaŋnda o ba bɛŋgu.
5 Mi Samsiŋ kua nda wanaa velu ndu wa Timina. Mɛɛ o fuuluu o kpele makilepiiyo Timina, mi kpɔkuŋndo* hinul ndu a pɛɛliaa!
6 Okoŋ, mi nyina Chɛhowa wo ke ndu kpaayaa, mbo sɛɛsa ndu tɛɛŋ wa, mɛɛ mɛɛ waŋndo sɛɛsa nuaa chuiŋ fɔŋndɔɔ tɛɛŋ a laba yɛ. Kɛ nyɛ o tosa hoo wo, o dimul finya ndɔ a kala ndɔ a ndi okɔɔ le.
7 Okoŋ mi Samsiŋ kua, mbo kɔ suukaŋ a chua koŋ. Kanifuule, ndoo kaala wɔ ndu kɛ.
8 Mɛɛ o wa kɔlaŋ le mbo kɔ huŋ a laa ndɔ, mbo sei le kpɔkuŋ o dii yo tofaa. Okoŋ, mbo cha liaa a piaa cha o paala kpɔkuŋ koŋ choo a liaaŋ leniŋ.
9 Mbo soli lɛma maŋ mbo bii o ba, mbo kua a maŋ dioo. Mɛɛ o bendal finya ndɔ a kala ndɔ, mbo ke nda ma tiŋ le ma de. Kɛ o dimul nda nuaa maa o paala kpɔkuŋndo niŋ te o soli maŋ te.
10 Mi finya ndɔ kua o chuaa lo, nduyɛ mi Samsiŋ tosa dunyɛi bɛnduei loŋ. Kanifuule, lende puaa feleŋguaa ndaa tosa ni.
11 Mɛɛ nda che ndu, ma ke ndu chuaa piaanduaa 30 le ndu malaa.
12 Mi Samsiŋ dimul nda aa: “A yandii, I dimullɔ nya taloo. O palɛi ŋɔmmɛu dunyɛi hei cho tosaŋ nde bɛŋgu, te la tɛɛsial la pɛ taloo hoo, I cho nya ke domala lebɛŋgu laŋ 30 a domala kɛndɛla cheleŋ 30.
13 Kɛ te la nɔla ya ndu tɛɛsial te, mɛɛ nya nɔ ni mi la ke ya domala lebɛŋgu laŋ 30 a domala kɛndɛla cheleŋ 30.” Ma dimi aa: “Dimullɔ naa tale numndo miŋ tuei.”
14 Mbo dimul nda aa:
“Nyɛdiaa fula o nyɛ dia wo niŋ,Nduyɛ mi nyɛ yeelɛiyo fula o nyɛ nɔ kpaayaa wo niŋ.”
Le palɛi i yaa a wa kindiŋndo le taloo hoo tɛɛsiaa, kɛ a nɔla le.
15 O paale hiɔɔluleŋ choo, ma dimul lanɔɔ Samsiŋ aa: “Hui pɔnɔ num, le mbo chɔm naa nyɛ taloo hoo sim ndo. Te o cho koŋ te, ŋ cho num a yuŋgu finya numndo kpou malɔɔ o yiŋ. Baa le nyɛm naŋ poondiaa ŋ veelu naa naŋ ni?”
16 Okoŋ mi lanɔɔ Samsiŋ chaŋ ndu o lani, mbo dimi aa: “A tul la leyɛ, nduyɛ a kaala ya kposoŋ te. A dimul wanaa niaa taloo, kɛ a chɔm ya nyɛ o sim ndo le.” Mi Samsiŋ dimul ndu aa: “Finya nuu a kala nuu bɛɛ I chɔm nda nyɛ o sim ndo le. Baa I nɔ pa mi chɔm num?”
17 O palɛi ŋɔmmɛu dunyɛi wa biinɔŋndo ve choo kpou, o wa hiouwɔɔ lachi a ndu chaŋndo o lani. O mɛɛlulaŋ kpɔŋ, mbo chɔm ndu nyɛ taloo hoo sim ndo o paale ŋɔmmɛuleŋ choo. Kanifuule, o wa ndu iloko lokuei kɔɔli. Okoŋ, mi laa ndɔ kɔ chɔm wanaa nduaa nyɛ taloo hoo sim ndo.
18 O paale ŋɔmmɛuleŋ choo tuupa mi paaleŋ le del, mi puaa o chioo niŋ huŋ dimul ndu aa:
“Yɛɛnɛ yeela yɛ mbo hiau liaaŋ?Nduyɛ yɛɛnɛ nɔ yɛ kpaayaa mbo hiau kpɔkuŋndo?”
Mi Samsiŋ dimul nda aa:
“Te nyaa vee a nau ni fɔŋndɔɔ le,La ve tɛɛsiaa tale nuu sina le.”
19 Okoŋ, mi nyina Chɛhowa wo ke ndu kpaayaa, mbo kua Asikɛlɔŋ mbo kɔ diu puaa 30. Mbo chua nyɛla ndalaŋ, mbo kɔ ke wanaa chɔm tɛɛsiaa tale ndɔɔ wa. Okoŋ, mbo miiŋguŋ o finya ndɔ lo chiee a kɔl tuu bɛndoo.
20 Okoŋ kɔɔli, ma chua lanɔɔ Samsiŋ, ma ke puaa wa ndu malaa wa o pilɛ le mbo wa laa ndɔ.
