Chɔɔchiaa 15:1-20
-
Samsiŋ miŋgul Filitiaŋnda maa (1-20)
15 Mɛɛ teleŋ tiŋ hiou, a boondii kuauwaa ŋwitiiye kinɛi, mi Samsiŋ bii chuiŋ fɔŋndɔɔ mbo kua laa ndɔ yilɔɔ. Mbo dimi aa: “I yeema mi luɛi o lumuiyo niŋ naa laa nuu cho wa.” Kɛ finyaa laa ndɔ chɛl ndu mbo luɛi le.
2 Mi finyaa chuaa dimi aa:“Yaa yiyaŋ ko maa ‘yɛleŋ kpeekpei ŋ tul ndu ni.’ Le hei, mi yɔŋgu ndu wanaa num aa malaa o pilɛ. Pɔmbɔ ndɔ cho nanuŋ nduyɛ o hiou ndu naŋɔɔ poloŋ. A yandii, chua ndu sɔŋgɔ bɛ ndɔ wo.”
3 Mi Samsiŋ dimul nda aa: “O laŋ niŋ, Filitiaŋnda cho lɛ ya tɔɔyaŋ biyɔɔ le nyɛ ya cho nda tosal lo le.”
4 Okoŋ mi Samsiŋ kua, mbo kɔ bii siifaa 300. Mbo yiu yiu nda puiye a ŋiɔɔŋ ŋiɔɔŋ. Nduyɛ mbo chua tɛŋgɛlaŋ, mbo sɔɔŋiaa naa o yiu nda wa.
5 Okoŋ mbo mɛndul tɛŋgɛla laŋ, mbo mal siifaa o chiɔɔŋ Filitiaŋnda niŋ. Witiiŋ ndaa yii a kpɔŋndaŋ ndoŋ, ŋ ndaa kilu wɔ le woŋ, kɔ bii a kpelela makilepiilaŋ vɛlɛ a kpelela yɔmii ɔlifiive kpou, mbo mal o yiŋ.
6 Mi Filitiaŋnda nyuna aa: “Nɛɛnɛ tosa yɛ hei?” Ma dimul nda aa: “Samsiŋ ni, lefoo Timinaitiinɔɔ. Le mɛɛ o chua laa ndɔ mbo ke puaa nduaa malaa o pilɛ yɛ.” Le hei, mi Filitiaŋnda kɔ bii chua koŋ nda finya ndɔ, ma luam nda.
7 Mi Samsiŋ dimul nda aa: “Le nyɛ nya tosa hoo wo, te I miŋgul nya maa le I feŋaŋ nanuŋ te.”
8 Mbo chiŋalaŋ nda a pilɛŋ pilɛŋnda, mbo diu nda diuwo pila. Okoŋ, mbo kɔ chalnuŋ o buuloo niŋ o pou bɛndoo Ɛtam bɛŋgu.
9 Mɛɛ teleŋ tiŋ hiou, mi Filitiaŋnda kua Chuda ma kila dɔɔŋgɔɔ loŋ, nduyɛ ma balu o tanda Lɛhi wo niŋ.
10 Mi waŋnda Chuda nyuna nda aa: “Le yɛɛnɛ nya hiŋ yɛ naa chiŋalaŋndo a sɔŋgɔɔ?” Ma muli aa: “Samsiŋ naŋ hiŋ biyɔɔ ni. Ŋ yeema miŋ miŋgul ndu maa le nyɛ o tosal naa wo.”
11 Okoŋ, mi puaa 3,000 o Chuda niŋ kua o pou bɛndoo Ɛtam, naa Samsiŋ wa o buuloo niŋnda. Ma dimul ndu aa: “A sina nuaa maa Filitiaŋnda o ba bɛŋgu le naŋ cho le? Le yɛɛnɛ ŋ tosallɛ naa hei?” Mbo dimul nda aa: “Nyɛ nda tosal la wo, maa koŋ ya miŋgul nda ni.”
12 Kɛ ma dimul ndu aa: “Num naŋ hiŋ nuaa biyɔɔ ni le miŋ kuɛ a num o Filitiaŋnda lo.” Mi Samsiŋ dimul nda aa: “La mɛnaŋ maa la cho ya nyɛ o nyɛ yɔŋ te.”
13 Ma dimul ndu aa: “Sako, ŋ cho num diyɔɔ le. Yiiyo kinɛi naŋ cho num ni, miŋ kuɛ a num o nda lo.”
Okoŋ ma yii ndu a yuei sɛnɛiye i ŋiiŋ, ma soli ndu o pouwo bɛŋgu.
14 Mɛɛ Samsiŋ fuuluu Lɛhi, mi Filitiaŋnda deŋi choo choo a nyaaloo le mɛɛ nda che ndu yɛ. Okoŋ mi nyina Chɛhowa wo ke Samsiŋ kpaayaa, mbo kili kili yuei wa ndu i yiyaa o laba ve, mɛɛ yiŋndeŋ le kili nuaa kɛiyo yɛ. Nduyɛ mi yuei nda yii ndu keŋ nde deli deli lɛŋ.
15 Mi Samsiŋ saaluŋ yaale sofɛlɛ piaandu ndaa dii sɛnɛiyo, mbo chua ndu kau, mbo dii puaa 1,000 a ndu.
16 Okoŋ mi Samsiŋ dimi aa:
“A yaale sofɛlɔɔ, mi dii waŋnda bemboo pilɛ, bembelaŋ la tiɔɔŋ!
A yaale sofɛlɔɔ, mi dii puaa 1,000.”
17 Mɛɛ o chii hei dimi, mbo viau yaale koŋ. Mbo ke fondaŋ koŋ diolaŋ aa Luamati-lɛhi.*
18 Okoŋ kɔɔli, mi kolɔɔ bii ndu tau. Le hei, mbo muliŋ o Chɛhowa lo mbo dimul ndu aa: “Num tosa ni mi buɛi numndo sɔla batiuwaa hoo. Baa a yeema ya mi vi a bolola vesɛilaŋ, nduyɛ mi del wanaa sɔla haa hivi chiɛi kɔɔli le wa o ba?”
19 Okoŋ, mi Mɛlɛka tosa mi mɛŋndaŋ ma buli o sooŋ wa Lɛhi wo niŋ. Mɛɛ o kol, mbo miiŋgu yoomuaŋ sɔla. Le sabu koŋ o ke fonda koŋ diolaŋ ni aa, Ɛŋ-hakolui.* Haaa a paale hauleŋ ndeŋ, o cho wɔ Lɛhi.
20 Nduyɛ le wɔsilaŋ 20, Samsiŋ wa wana kialaa ŋyamaa o Isɔluɛi niŋ a boondii Filitiaŋnda.
