Chɔɔchiaa 17:1-13
-
Piɔmaa Maika wa a wana ndɔ soliaa lasalaa (1-13)
17 Po pilɛ wa o tanda ŋpemboo o Ifiluem niŋ diolaŋ aa Maika.
2 Mbo dimul kala ndɔ aa: “Kaniŋ humbuŋ 1,100 muŋ lo num o ba, nduyɛ mi tuɛi num mɛnaa le muŋ ndoŋ, ya chua muŋ ni, ŋ cho ya o ba.” Mi kala ndɔ dimul ndu aa: “Maa Chɛhowa dɔu num sala fɔ po nuu!”
3 Okoŋ, mbo chua kaniŋ humbuŋ 1,100 o chua woŋ, mbo miŋgi kala ndɔ o ba. Kɛ mi kala ndɔ dimi aa: “I cho kaniŋ humboŋ muŋ chua mi ke Chɛhowa, le mi po nuu soliŋ muŋ kpeku le piɔmndo siɔlɔɔ vɛlɛ a piɔm ŋkooliiyo toosiaa. Lelaŋ, I miŋgi wɔ num muŋ o ba.”
4 Mɛɛ o miŋgi kala ndɔ kaniŋ humboŋ o ba, mi kala ndɔ chua kaniŋ humboŋ 200 mbo ke wana tosa wallo a kaniŋ humboŋ ndo. Okoŋ mbo sial piɔmndo, nduyɛ mbo toosiaa piɔm ŋchiliŋndo, ma kɛsi piɔmaa kaŋ o Maika lo chiɛiniŋ.
5 Maika hoo yɛ, ndoo nɔ chiɛi ndoo sooluu piɔmaa nduaa wo. Mbo toosiaa doma biŋgioo* a piɔmaa leyuŋguaa, okoŋ mbo hɛli puaa nduaa o pilɛ le mbo wa wana soliaa lasalaa le ndu.
6 A teleŋ koŋ, masa o masa ve o Isɔluɛi niŋ te. Wana o wana wa nyɛ o hɛnaŋ ndo tosaa.
7 Po feleŋgɔnɔ pilɛ wa Bɛtilɛhɛm o Chuda niŋ, fulaa o yuŋgu Chuda wo choo. Livainɔɔ o wa ni, nduyɛ o wa loŋ le teleŋ vilɛi.
8 Mi poo hoo faŋaŋ Bɛtilɛhɛm o Chuda niŋ, mbo kua chaltaŋ nuuviaa. O lo kɔlaŋ, mbo fuuluu o tanda ŋpemboo Ifiluem o chiɛi Maika wo.
9 Okoŋ mi Maika nyuna ndu aa: “Kuɛɛnɛ ŋ chɛŋ yɛ?” Mbo muli aa: “Livainɔɔ ya cho ni, fulaa Bɛtilɛhɛm o Chuda niŋ. Nduyɛ chaltaŋ ya cho nuuviaa ni.”
10 Mi Maika dimul ndu aa: “Wa niko nanuŋ ma wa wana ni silaa,* a wana ni soliaa lasalaa. I cho num wa kioo kaniŋ humboŋ tɔ o wɔsioo niŋ, nduyɛ mi ke num nyɛ chuɛɛnaŋndo a nyɛdiaa.” Okoŋ, mi Livainɔɔ luɛi chiɛiniŋ.
11 Nduyɛ, mi Livainɔɔ hoo chɛl le mbo wa o Maika lo, okoŋ mbo simnuŋ maa po ndɔ.
12 Okoŋ kɔɔli, mi Maika siiŋguu Livainɔɔ hoo wana ndɔ soliaa lasalaa. Nduyɛ o Maika lo chiɛiniŋ o wa niŋ ni.
13 Mi Maika dimi aa: “I sina niŋ kɛsɛ maa Chɛhowa cho ya wa biyɔɔ nyɛkɛndɛi, kanifuule Livainɔɔ simnuŋ wana ni soliaa lasalaa.”
