Chɔɔchiaa 18:1-31
18 A teleŋ koŋ, masa o masa ve o Isɔluɛi niŋ te. Nduyɛ a boondii keŋ, yuŋgu Daŋ ndo wa fondaa* nuuviaa le challe. Kanifuule, ndaa chii wɔ nyɛm kɛŋ ndaŋ sɔla o kaalaŋ Isɔluɛi tɛɛŋ te.
2 Mi yuŋgu Daŋ ndo hɛli puaa dialuŋ kalaa a ŋuɛɛnu o yuŋgu ndaa niŋ, fulaa Soluaa a Ɛsitawɔɔ, le ma kɔ balu o lɛŋndeŋ niŋ nduyɛ ma mɛɛndaŋ ndeŋ. Ma dimul nda aa: “La kɔ balu o lɛŋndeŋ niŋ.” Mɛɛ nda fuuluu o tanda ŋpemboo Ifiluem o chiɛi Maika wo, ma lɔl loŋ.
3 Mɛɛ nda sɔɔŋguu chiɛi Maika wo ikɛi, ma tuɛi po Livainɔɔ suɛi. Ma kua o ndu lo, okoŋ ma nyuna ndu aa: “Nɛɛnɛ hiŋ yɛ a num nanuŋ? Yɛɛnɛ ŋ cho yɛ tosaa o fondaa hoo? Le yɛɛnɛ ŋ hiŋ yɛ nanuŋ?”
4 Mbo tɛɛsial nda nyɛ Maika tosal ndu wo. Mbo dimi aa: “Ndu chua ya ni le mi wa wana ndɔ soliaa lasalaa.”
5 Ma dimul ndu aa: “A yandii, nyunal naa Mɛlɛka le sinaa te ŋ cho pɛ batiuwaa sɔla o kela naa hoo niŋ.”
6 Mi wana soliaa lasalaa dimul nda aa: “La kɔ, la buulaŋ te. Chɛhowa cho wa a nya latulu.”
7 Okoŋ, mi puaa ŋuɛɛnuaa haa hiau lachi a kɔlaŋ ma fuuluu Laisi. Nduyɛ, ma cha maa waŋnda o chioo hoo niŋ waŋnuŋ a ba nda maa waŋnda Saidɔŋ. A waŋnuŋ o kɔl nyulu niŋ, nduyɛ buulaŋ kɛ kɛ ve nda le. Masa kɔl vesɛi kɛ kɛ ve nda nyɛpalaa tusi choo le. A wa landaŋ a waŋnda Saidɔŋ, nduyɛ ndaa nɔ mako a wana o wana cheleŋ te.
8 Mɛɛ nda miiŋgu o nda lo Soluaa a Ɛsitawɔɔ, mi wanaa ndaa nyuna nda aa: “Vɛɛ la waa loŋ?”
9 Ma muli aa: “La ŋ kɔ chiŋalaŋ nda, kanifuule ŋ che maa lɛŋnde leŋ le naŋ bɔɔ. La kiisaŋ te. Ŋ duaunuŋ tamala le leŋ kɔlaŋ biyɔɔ le.
10 Te ŋ fuuluu pɛ, la cho chɔ maa wanaa cho loŋ nda heuba le nyɛ o nyɛ le. Lɛŋnde leŋ le choŋnuŋ fɛkɛi, nduyɛ nyɛ o nyɛ cho lepɛŋ loŋ te. Mɛlɛka chii naa leŋ malɔɔ o ba.”
11 Okoŋ, mi puaa 600 fulaa o yuŋgu Daŋ ndo choo bɛɛndiaŋ le chɔuwo. Ma mal Soluaa a Ɛsitawɔɔ le kɔlaŋ sɔŋgɔɔ.
12 Ma kua, ma kɔ kila dɔɔŋgɔɔ Kiliaati-chiaaluim o Chuda niŋ. Le sabu hoo nda veelu fonda cho koŋ Kiliaati-chiaaluim ba paaleŋ le del lo wo ni aa Mahanɛ-daŋ,* haaa a paale hauleŋ ndeŋ.
13 Mɛɛ nda chɛŋ loŋ, ma kua o tanda ŋpemboo Ifiluem, nduyɛ ma kua o chiɛi Maika wo.
14 Okoŋ, mi puaa ŋuɛɛnuaa ndaa kuɛ lɛŋnde Laisi leŋ mɛɛndaŋndo wa dimul chaaŋaa ndaa aa: “La sina pa maa doma biŋgioo,* piɔmaa leyuŋguaa, piɔmaa sialaa, a piɔm ŋchiliŋndo cho o chiɛilaŋ ndaŋ niŋ? Yɛɛnɛ nya yiyaŋ yɛ le tosaa?”
15 Okoŋ ma sim loŋ, ma kua o chiɛi Maika wo naa po Livainɔɔ wa wa. Ma nyuna ndu mɛɛ sɔɔŋ cho a ndu yɛ.
16 A teleŋ koŋ kpou, puaa 600 fula o yuŋgu Daŋ ndo choo, ma wa a bɛɛndiaŋ nda le chɔuwo wa wa isisi o dio kpakioo sondoo.
17 Mi puaa ŋuɛɛnuaa ndaa kuɛ lɛŋndeŋ mɛɛndaŋndo wa luɛi chiɛiniŋ, le ma chua piɔm sialaa, doma biŋgioo, piɔmaa leyuŋguaa, a piɔm ŋchiliŋndo. (Wana soliaa lasalaa wa isisi o dio kpakioo sondoo nda puaa 600 wa a bɛɛndiaŋ le chɔuwo wa.)
18 Ma luɛi o chiɛi Maika wo niŋ, okoŋ ma chua piɔm sialaa, doma biŋgioo, piɔmaa leyuŋguaa, a piɔm ŋchiliŋndo. Mi wana soliaa lasalaa nyuna nda aa: “Yɛɛnɛ nya cho yɛ koŋ tosaa?”
19 Ma dimul ndu aa: “Mei doŋ. Suaa lɛ hau le. Tol naa kɔɔli ma wa wana naa silaa,* a wana naa soliaa lasalaa. Waa wana soliaa lasalaa o waŋndo o pilɛ lo chiɛiniŋ, a waa wana soliaa lasalaa le kaaleŋ a yuŋgoo o Isɔluɛi niŋ kpou, o kuɛɛnɛ hiou yɛ bɛnda le num?”
20 Le hei, mi wana soliaa lasalaa naŋ kɔl, okoŋ mbo chua doma biŋgioo, piɔmaa leyuŋguaa, a piɔm sialaa, mbo kua a nda latulu.
21 Okoŋ, ma bii nɛiyo le kɔlaŋ. Ma hivi chuauwaa ndaa, chɔluaa, vɛlɛ a nyɛm ndaŋ sɔviɔŋ lachi.
22 Mɛɛ nda kuɛ landaŋ, mi wanaa chiɛɛliaŋ bɛɛlaŋ a Maika wa chuuŋgiaŋ naapilɛ, ma tisa yuŋgu Daŋ ndo kɔɔli, ma bendal nda.
23 Ma veelu yuŋgu Daŋ ndo choo choo, okoŋ ma muliŋ ma nyuna Maika aa: “Yɛɛnɛ yɔŋnuŋ yɛ? Le yɛɛnɛ nya hiŋ yɛ kunda bɛndoo nuaa?”
24 Mi Maika mulul nda aa: “La chua mɛlɛkaa niaa ya toosiaa wa a wana ni soliaa lasalaa mi la kuaŋnuŋ a nda. Yɛɛnɛ nya mel lɛ ya, mi la huŋ ya nyunaa aa, ‘Yɛɛnɛ yɔŋnuŋ yɛ?’”
25 Mi yuŋgu Daŋ ndo dimi aa: “Deŋul naa le, yɔŋii puaa kɔl tuuwa del num choo mi yoomu numndo a yoomula wanaa numnda luɛi o kpundɔɔ niŋ.”
26 Okoŋ, mi yuŋgu Daŋ ndo kuaŋnuŋ. Nduyɛ mɛɛ Maika che maa a hiou ndu mayoomu, mbo miiŋguŋ o ndu lo bɛɛ.
27 Mɛɛ nda chua nyɛm Maika toosiaa woŋ vɛlɛ a wana ndɔ soliaa lasalaa, ma kua Laisi o wanaa waŋnuŋ o kɔl nyulu niŋ nduyɛ ndaa buulaŋ le nyɛ o nyɛ le wa lo. Ma diu diu nda a muɛi faŋnde, nduyɛ ma mal chioo o yiŋ.
28 Wana o wana ve le nda piŋi le, kanifuule a wa landaŋ a Saidɔŋ. Nduyɛ, ndaa nɔ mako a wana o wana cheleŋ te. Laisi wa o lɛŋnde dɛŋgbɛleŋ niŋ o tanda Bɛti-luihɔbi wo niŋ. Okoŋ ma miŋgi chioo taŋgul, ma chal loŋ.
29 Okoŋ kɔɔli, ma ke chiee koŋ diolaŋ aa Daŋ. Nduyɛ, finya nda mama ndoo nɔ diolaŋ ni aa Daŋ, po Isɔluɛiyo. Kɛ chioo hoo ndaa veelu paandu ni aa Laisi.
30 Okoŋ kɔɔli, mi yuŋgu Daŋ ndo kɔ simi piɔm sialaa koŋ le ndu sooluuwo. Mi Chonataŋ, po Kɛɛsiɔm ndo a puaa nduaa simnuŋ wanaa soliaa lasalaa le yuŋgu Daŋ ndo. Kɛɛsiɔm yɛ, Muuse velu ndu ni. A wa wanaa soliaa lasalaa haaa ma kua a wanaa wa o lɛŋnde leŋ niŋnda o chɛleŋ niŋ.
31 Ma simi piɔm Maika ndoo toosiaa wo. Nduyɛ, o lo loŋ haaa a boondii chiɛi Mɛlɛka tonyaa wa Silɔɔ ve kpou.
