Chɔɔchiaa 19:1-30
-
Yuŋgu Bɛŋjamiŋ ndo tosa kaa ihini nɔɔlɛiyo o Kibiya niŋ (1-30)
19 A teleŋ masa o masa ve o Isɔluɛi niŋ te wo, po Livainɔ pilɛ wa o fondaŋ yololiɔɔ o tanda ŋpemboo Ifiluem. Mbo chua wana lanɔ pilɛ Bɛtilɛhɛm o Chuda niŋ le mbo wa laa ndɔ.
2 Kɛ mi laa ndɔ kɛɛ lo lechoo wo chɔmndo o ndu lo, mbo mal ndu, mbo kuaŋnuŋ o finya ndɔ lo Bɛtilɛhɛm o Chuda niŋ. Nduyɛ le paŋgoŋ ŋhiɔɔlu o waŋnuŋ loŋ.
3 Okoŋ, mi pɔnɔ ndɔ kua ndu kɔɔli le mbo dɛɛniaa ndu mbo miiŋgu. Mbo chua buɛi ndɔɔ a sofɛliaa a ŋiɔɔŋ ma kua. Mi laa ndɔ yiya ndu o finya ndɔ lo chiɛiniŋ. Mɛɛ finya ndɔ che ndu, mbo naŋ kɔl tau.
4 Okoŋ, mi finyaa chuaa dɛɛniaa lefu ndɔ le mbo wa ndu o bɛŋgu choo le palɛi i yaa. A wa diolaŋ a kolɔɔ, nduyɛ loŋ ndoo lɔl ni.
5 O paale hiɔɔluleŋ choo, mɛɛ nda chɛŋ idiiyo puŋ le kɔŋndaŋ, mi finyaa chuaa dimul lefu ndɔ aa: “Dio fɛlɛŋ nyɛdiaa le ma sɔla yoomuaŋ, okoŋ mi la kuɛ.”
6 Okoŋ ma chal, ma dia nyɛdiaa, nduyɛ ma kol latulu. Okoŋ kɔɔli, mi finyaa chuaa dimul lefu ndɔ aa: “Yandii, lɔl nanuŋ ma tuei yoomu numndo yeela.”
7 Mɛɛ poo chɛŋ le kɔŋndaŋ, mi lefu ndɔ lambaŋ ndu nyɔɔloo. Le hei, mbo lɔl vɛlɛ loŋ.
8 Mɛɛ o chɛŋ idiiyo puŋ o paale ŋuɛɛnuleŋ choo le kɔŋndaŋ, mi finyaa chuaa dimul lefu ndɔ aa: “Yandii, dio fɛlɛŋ nyɛdiaa le ma sɔla yoomuaŋ.” A lo isiɛlɛŋ siɛlɛŋnde tei mi paaleŋ le yɔŋguŋ. Nduyɛ a wa hiouwɔɔ tuŋ lachi a diolaŋ.
9 Mɛɛ poo chɛŋ le kɔŋndaŋ a laa ndɔ vɛlɛ a buɛi ndɔɔ, mi lefu ndɔ dimul ndu aa: “Kpoo poo, nyumndaŋ ma cho niŋ tolɔɔ nuaa ni. Yandii, lɔl nanuŋ, paaleŋ le chuunuŋ. A yandii, la lɔl nanuŋ mi la tuei yoomoo yeela. Siɔdii dii puŋ la chɛŋ la miiŋgu o nya lo.”
10 Kɛ poo ndoo yeema lɛ mbo lɔl loŋ ichɔl koŋ te. Le hei, mbo chaŋ, mbo kua ba Chɛbusi wo, koŋ cho ni, Chulusalɛm. Nduyɛ sofɛliaa nduaa ŋiɔɔŋ nda, laa ndɔ, vɛlɛ a buɛi ndɔɔ wa a ndu latulu.
11 Mɛɛ nda fuuluu Chɛbusi ikɛi, paaleŋ le wa niŋ le chuwɔɔ. Okoŋ, mi buɛi ndɔɔ dimul ndu aa: “Baa o bɛnda miŋ pɛŋgi, nduyɛ miŋ lɔl o chiee Chɛbusaitiiya haa niŋ te?”
12 Kɛ mi masanɔ ndɔɔ dimul ndu aa: “O bɛnda miŋ lɔl o chiee Isɔluɛiyaa cho le wo niŋ te. La ŋ kɔŋnuŋ Kibiya.”
13 Mbo dimul vɛlɛ buɛi ndɔɔ aa: “La ŋ kindi kindiŋ miŋ kɔ lɔlnuŋ Kibiya ɔɔ Luama.”
14 Okoŋ, ma hiau lachi a kɔlaŋ. Mɛɛ nda fuuluu Kibiya ikɛi o tanda Bɛŋjamiŋ ndo niŋ, paaleŋ lee del niŋ doŋ.
15 Mɛɛ nda fuuluu Kibiya, ma kɔ chal o luŋ le ma lɔl loŋ. Kɛ wana o wana yiya nda le.
16 Ichɔl koŋ, mi fal yuwɛi pilɛ fula yondoo niŋ, o fonda ndɔ wallo. Kibiya fallo hoo wa niŋ ichali ni. Kɛ kɔɔlima nduaŋ ma wa tanda ŋpemboo Ifiluem ni. Nduyɛ, yuŋgu Bɛŋjamiŋ ndo wa ichali o Kibiya niŋ ni.
17 Mɛɛ fallo heelu hɔlla, mbo cha po mial koŋ ichali o luŋ. Mbo nyuna ndu aa: “Kuɛɛnɛ ŋ chɛŋ yɛ, nduyɛ kuɛɛnɛ ŋ cho yɛ kɔlaŋ?”
18 Mbo muli aa: “Bɛtilɛhɛm naŋ fula ni o Chuda niŋ, miŋ wa kɔlaŋ o fondaŋ yololiɔɔ o tanda ŋpemboo Ifiluem, naa ya fula wa. Bɛtilɛhɛm o Chuda niŋ yaa kuɛ ni, mi wa miiŋgoo o chiɛi Chɛhowa wo.* Kɛ wana o wana yiya ya o ndu lo chiɛiniŋ te.
19 Ŋ nɔ billo tau le sofɛliaa naa. Nduyɛ, ya ni, laa nuu ni, a buɛi naa, ŋ nɔ nyɛdiaa a muɛiyaŋ. Nyɛ o nyɛ cho naa lepɛŋ te.”
20 Kɛ mi fallo dimul ndu aa: “A chaa hunɔɔ!* Nyɛ o nyɛ ŋ hauba pɛ, I cho num ke. Kɛ la lɔl o luŋ naŋ te.”
21 Mbo kua a nda o ndu lo chiɛiniŋ, nduyɛ mbo ke sofɛliaa nyɛdiaa. Okoŋ, ma pulu peloŋ, ma dia nyɛdiaa, ma kol muɛiyaŋ.
22 Mɛɛ nda wa ichali ma wa nyɛdiaa tueiyɔɔ yeela, mi puaa kɔl vesɛiya o chioo niŋ huŋ balu chiɛiyo, ma wa dioo lɔɔ. Nduyɛ a wa fal nɔ chiɛiyo wo dimullo aa: “Soli laŋunɔ hiŋ koŋ o numndo chiɛiniŋ ndo o bɛɛ nanuŋ, le miŋ hini a ndu.”
23 Okoŋ, mi wana chiɛiyo fula mbo dimul nda aa: “Sako puaapiliaa niaa, la tosa suɛi kɔl vesɛi waa nuaa le, mial ni poo hoo cho ni. A yandii, la tosa suɛi lasiɔmbuii waa nuaa le.
24 Chua ni yufuaanɔɔ cho naŋ a poo hoo laa ndɔ. I soli wɔ nda nanuŋ, mi la hini a nda mɛɛ nya yeema yɛ. Kɛ la tosa suɛi lasiɔmbuii waa nuaa a poo hoo le.”
25 Kɛ mi puaa haa kɛɛ le fallo nilaŋ yaŋɔɔ. Okoŋ, mi po Livainɔɔ saa laa ndɔ, mbo solul nda ndu o bɛɛ. Ma kpuuwa chuaa, nduyɛ ma lɔl hinilaŋ a ndu ichɔl koŋ haaa mi paaleŋ le sia. Mɛɛ paaleŋ le sɛ, ma mal ndu le mbo kuɛŋnuŋ.
26 Idiiyo puŋ, mi chuaa chaŋ mbo kua o chiɛi pɔnɔ ndɔ* wa o yiya wo, mbo kɔ del o dioo sondoo. Nduyɛ o lo ihini loŋ haaa mi nyɔɔ teŋga.
27 Mɛɛ pɔnɔ ndɔ* chɛŋ idiiyo mbo kuumbuu diolaŋ le kɔŋndaŋ, mbo cha laa ndɔ ihini o dioo sondoo, a balaŋ ndu la handaa o keedei choo.
28 Okoŋ, mi poo dimul ndu aa: “Chɔŋ le kɔlaŋ.” Kɛ kuŋndo bɛɛ chuaa kuŋ te. Mbo chua ndu, mbo handu ndu o sofɛlɛ ndɔɔ choo, ma bii kɔlaŋ o ndu lo.
29 Mɛɛ o fuuluu o ndu lo, mbo chua muɛi,* mbo kili kili laa ndɔ buŋgaŋ 12. Okoŋ, mbo yɔŋ buŋgɛi i pilɛ o tanda kɛ kɛ o Isɔluɛi niŋ.
30 Wana o wana che hei, mbo dimi aa: “Kani Isɔluɛiya fula o lɛŋnde Ichipi leŋ niŋ haaa a paale hauleŋ ndeŋ, ŋ tuiyɔ ɔɔ miŋ che mi suɛi waa nuaa yɔŋnuŋ o Isɔluɛi niŋ te. La yiyaŋndɔ a hei okɔɔ, mi la suukaŋ lechoo, okoŋ mi la dimul naa nyɛ naŋ nɔ miŋ tosa wo.”
Tɛɛsiaalaŋ
^ Ɔɔ naapum, o chiɛi Chɛhowa wo niŋ ya tosa wallo ni.
^ Hibuluiye, “Maa wa a kɔl nyulu fɔ!”
^ Hibuluiye, “masanɔ ndɔɔ.”
^ Hibuluiye, “masanɔ ndɔɔ.”
^ Muɛi ndaa soliŋ kpeku le visiaa diyɔɔ ve.
