Chɔɔchiaa 2:1-23
2 Okoŋ, mi maalikɛinɔ Chɛhowa wo chaŋ Kikaa mbo kua Bɔkim, mbo dimi aa: “Ya soli nya Ichipi ni, mi huŋ a nya o lɛŋnde ya chuel finyaa nyaa mamaa buŋgɛi leŋ niŋ. Nduyɛ mi dimi aa, ‘Fɛɛŋ bɛɛ I tɛɛmbuu kpema ya yii a nya wo le.
2 Kɛ nya bɛɛ, la yii kpema a wanaa cho o lɛŋndeŋ ndeŋ niŋnda le. Nduyɛ, la nɔ mi la pesi pesi bandula ndala luamaa lasala laŋ.’ Kɛ la tui ya diom te. Le yɛɛnɛ nya tosa yɛ lende?
3 Le saboo hoo ya dimi ni aa, ‘I cho nda touwɔɔ nya lachi le. A cho simnɔŋ yaŋɔɔleŋ le nya, nduyɛ ma vɛɛlu nya le mɛlɛkaa ndaa sooluuwo.’”
4 Mɛɛ maalikɛinɔ Chɛhowa wo chii Isɔluɛiya kpou diomndaŋ ndaŋ dimul, ma koŋul choo choo kpeleŋ a chaŋndo.
5 Okoŋ, ma ke fonda koŋ diolaŋ aa Bɔkim.* Nduyɛ ma soli salalaŋ loŋ o Chɛhowa lo.
6 Mɛɛ Chɔɔsuaa mal Isɔluɛiya, mi wana o wana kɔ hiɔlu lɛŋnde nda ke ndu leŋ, nduyɛ mbo chal loŋ.
7 Boondii Chɔɔsuaa wa yoomu ve, a boondii waŋ banaa wa achal o piɔm ndɔɔ kɔɔli, nduyɛ ma cha sɔɔŋ kɔndɔfiliŋ bɛnduŋ Chɛhowa tosa le Isɔluɛiya woŋ kpou ve, waŋnda wa hiouwɔɔ lachi a Chɛhowa piɛiyo.
8 Okoŋ mi Chɔɔsuaa, po Nuŋ ndo, buɛi Chɛhowa wo o wu. O wa wɔsilaŋ 110.
9 Ma kumbu ndu o lɛŋnde ndɔleŋ niŋ Timinati-hɛluɛsi, o tanda ŋpemboo Ifiluem, Pembii Kaasi Ve ba luaŋ ndo.
10 Mi wanaa wa achal o teleŋ Chɔɔsuaa wo niŋnda kpou chuu wu. O nda kɔɔli, mi wanaa cheleŋ vialuŋ a ndaa sina Chɛhowa le wa, nduyɛ ndaa sina nyɛ ndoo tosa le Isɔluɛiya wo le.
11 Mi Isɔluɛiya tosa nyɛ bɛnda Chɛhowa o hɔl te wo, okoŋ ma muliŋ Baal sooluuwo.
12 Le hei, ma mal Chɛhowa, Mɛlɛka finyaa ndaa mamaa, o soli nda o lɛŋnde Ichipi leŋ niŋndo. Ma tual mɛlɛkaa cheleŋnda kɔɔli, mɛlɛkaa wanaa ndaa balu nda wa. Ma beŋ nda wulaŋ, nduyɛ ma tɛɛmbuu Chɛhowa kɔllo.
13 Ma mal Chɛhowa, okoŋ ma muliŋ suŋgbuma Baal a suŋgbuma Asitɔluɛɛ waŋ sooluuwo.
14 Le hei, mi Chɛhowa duaunuŋ tumbe o kala kala a waŋnda Isɔluɛi. Okoŋ, mbo mal nda waŋnda o ba, ma puŋga nyɛm ndaŋ. Mbo pisi nda yaamɔɔwaa ndaa balu nda wa o ba, nduyɛ ndaa nɔ lɛ kpaaya le yaamɔɔwaa ndaa simullo le.
15 Ba o ba ndaa kuɛ pɛ, ba Chɛhowa wo ve nda choo le. Dɛnɛ palaa ndoo komal nda ni, a mɛɛ Chɛhowa ndoo dimi yɛ. Nduyɛ a mɛɛ Chɛhowa ndoo mɛnaŋ yɛ, lende saŋga bɛndu bɛndoo wa nda choo ni.
16 Mi Chɛhowa ndoo hɛli wanaa kialaa ŋyamaa, le nda piŋioo wanaa ndaa puŋga nyɛm ndaŋ nda o ba.
17 Kɛ wanaa kialaa ŋyamaa haa bɛɛ, ma kɛɛ le nda nilaŋ yaŋɔɔ. Ma muliŋ suundaa a mɛlɛkaa cheleŋnda, nduyɛ ma beŋ nda wulaŋ. Haupa ma faŋaŋ o nɛi finyaa ndaa mamaa wa kɔlaŋ ndo choo, a ndaa diikuŋ sawala Chɛhowa laŋ nda. Ma kɛɛ le tosaa maa finyaa ndaa mamaa.
18 Teleŋ o teleŋ Chɛhowa ndoo hɛli pɛ wana kialaa ŋyamaa le nda, mi Chɛhowa ndoo wa a ndu latulu le nda piŋioo yaamɔɔwaa ndaa o ba, haaa a teleŋ wana kialaa ŋyama koŋ cho wa yoomu wo. Nduyɛ, te Chɛhowa ndoo tuei nda pɛ chaŋndo le dɛnɛ palaa nda wa nda tusioo choo wo, a biyɔɔ wɔɔŋ nda wa nda wo, mi mɔnɛi ndii bii ndu tau.
19 Kɛ dimioo nuaa mi wana kialaa ŋyama koŋ vi, a miiŋguŋ vɛlɛ kaala wɔɔŋndaŋ tosaa, le mɛlɛkaa cheleŋnda tolɔɔ kɔɔli a nda sooluuwo, hiouwɔɔ bɛɛ mɛɛ finyaa ndaa mamaa ndaa tosa yɛ. Ma kɛɛ le kaala ndala wɔɔŋndaŋ malɔɔ a bolle ndale kalaleŋ.
20 Le hei, mi Chɛhowa duaunuŋ tumbe o kala kala a Isɔluɛiya. Mbo dimi aa: “Le mɛɛ waŋnda haa tɛɛmbuu kpema ya yii a finyaa ndaa mamaa, nduyɛ ma kɛɛ le ya diikɔŋndo yɛ,
21 kaala Chɔɔsuaa mɛi le touwɔɔ tuupa mbo wu laŋ kinɛi, I feŋa nda laŋ lachi le.
22 Hei cho yɔŋnɔŋ le Isɔluɛiya tofaa, te a hiau niŋ pɛ lachi a kɔlaŋ o nɛi Chɛhowa wo choo, mɛɛ finyaa ndaa mamaa tosa yɛ.”
23 Mi Chɛhowa chɛl le mi waŋnda haa wa nda tɛɛŋ. O keleŋa nda touwɔɔ le, nduyɛ o mel nda Chɔɔsuaa o ba le mbo tou nda le.
Tɛɛsiaalaŋ
^ O sim “Wanaa Mɛli Yeelaŋ Nda.”
