Chɔɔchiaa 20:1-48
-
A chiŋalaŋ yuŋgu Bɛŋjamiŋ ndo a sɔŋgɔɔ (1-48)
20 Le hei, mi Isɔluɛiya kpou fula Daŋ haaa Biaa-siɛba, kɔ bii a lɛŋnde Kiliaadi leŋ, ma chuuŋgiaŋ naapilɛ Chɛhowa o hɔl Misipa.
2 Nduyɛ, laŋgbaa kalla o kaalaŋ Isɔluɛi tɛɛŋ kpou wa wanaa Mɛlɛkaa tɛɛŋ o chuuŋgiaŋ koŋ. Puaa chɔuwa wa 400,000, nduyɛ ndaa nɔ mɔɔŋ faŋndoŋ.
3 Mi yuŋgu Bɛŋjamiŋ ndo tuɛi maa puaa o Isɔluɛi niŋ kuɛ Misipa. Okoŋ mi puaa Isɔluɛi dimi aa: “La dimullɔ naa, vɛɛnɛ suɛi kɔl vesɛiye hei looku yɛ yɔŋnɔŋ?”
4 Okoŋ mi po Livainɔɔ, pɔnɔɔ chua nda diiyo muli aa: “Mɛɛ naŋ hiŋ Kibiya o Bɛŋjamiŋ niŋ naa laa nuu le miŋ lɔl loŋ,
5 mi waŋnda o Kibiya niŋ chaŋ ichɔl koŋ ma huŋ balu chiɛi ya wa wo silɔ. Ya ndaa hinul ni le diyɔɔ, kɛ ma kpuuwa laa nuu, okoŋ mbo wu.
6 Mi chua dialuŋ vilɛi muŋ mi kili kili. Mi yɔŋ buŋgɛi i pilɛ o tanda kɛ kɛ o Isɔluɛi niŋ. Kanifuule, suɛi lasiɔmbuei a suɛi kɔl vesɛi bɛnduei nda tosa o Isɔluɛi niŋ ni.
7 Lelaŋ, nya waŋnda Isɔluɛi kpou, yɛɛnɛ cho yɛ yiyaŋ nyaa a hei okɔɔ?”
8 Okoŋ, mi waŋnda Isɔluɛi kpou chaŋ ma dimi diompilɛ aa: “Wana o wana o naa tɛɛŋ cho miiŋgu o tɛndii ndɔɔ niŋ ɔɔ o ndu lo chiɛiniŋ te.
9 Nyɛ naŋ cho tosa a Kibiya wo cho hoo ni: Ŋ wuunuŋ kooŋ le miŋ sina wanaa cho lakɔ nda chiŋalaŋ nda.
10 O puaa 100 o kaalaŋ Isɔluɛi niŋ kpou, ŋ cho hɛli ŋwaŋ 10. O puaa 1,000 tɛɛŋ, ŋ cho hɛli 100. O puaa 10,000 tɛɛŋ, ŋ cho hɛli 1,000 le ma chuuŋgiaa nyɛm puaa chɔuwa hau niŋ ba woŋ. Okoŋ ma kɔ chiŋalaŋ waŋnda Kibiya o Bɛŋjamiŋ niŋ, le suɛi kɔl vesɛi bɛndu nda tosa hei o Isɔluɛi niŋ nde.”
11 Okoŋ, mi puaa o Isɔluɛi niŋ kpou chɛlaŋ le ma chuuŋgiaŋ naapilɛ, ma kɔ del chioo choo.
12 Mi kaalaŋ o Isɔluɛi niŋ soli puaa, ma viam nda o puaa cho o yuŋgu Bɛŋjamiŋ ndo niŋnda lo kpou, le ma nyuna nda aa: “Le yɛɛnɛ nya chɛllɛ mi suɛi wɔɔŋii waa nuaa yɔŋnuŋ nya tɛɛŋ?
13 La huŋ a puaa kɔl vesɛiyaa cho kaŋ nanuŋ nda miŋ diu nda, le mi suɛi wɔɔŋnde pɛŋgi tosaŋndo o Isɔluɛi niŋ.” Kɛ yuŋgu Bɛŋjamiŋ ndo yeŋ chaaŋaa ndaa Isɔluɛiya nilaŋ te.
14 Le hei, mi yuŋgu Bɛŋjamiŋ ndo fula o chieeŋ cheleŋ niŋ ma chuuŋgiaŋ Kibiya, le ma kɔ chiŋalaŋ chaaŋaa ndaa Isɔluɛiya a sɔŋgɔɔ.
15 O paale leŋ choo, o fulawɔ o puaa 700 nda hɛli o Kibiya niŋnda kɔɔli, mi puaa 26,000 o yuŋgu Bɛŋjamiŋ ndo choo fula o chieeŋ bɛnduŋ cheleŋ niŋ a mɔɔŋ ndaŋ faŋndoŋ, ma huŋ.
16 O puaa chɔuwa haa tɛɛŋ, puaa 700 wa a ndaa nɔ mialle wa. O kɛ kɛ ndoo tiuba mbo chua pou faandaa mbo wuu le yiiŋndeŋ kendioo o lebol, ndoo bindu le.
17 O faŋaŋ ndɔ o yuŋgu Bɛŋjamiŋ ndo kɔɔli, mi puaa Isɔluɛi chuuŋgiaa puaa chɔuwaa ndaa nɔ mɔɔŋ faŋndoŋ nda 400,000. Nduyɛ, o kɛ kɛ ndoo chaa chɔuwo nyɛkɛndɛi.
18 Mi waŋnda Isɔluɛi chaŋ ma kua Bɛtɛl le ma nyuna Mɛlɛka. Okoŋ ma nyuna aa: “O nɛɛnɛ cho yɛ naa isisi lachi le kɔlaŋ Bɛŋjamiŋ chiŋalaŋndo a sɔŋgɔɔ?” Mi Chɛhowa muli aa: “Chuda cho isisi lachi ni.”
19 Okoŋ kɔɔli, mi Isɔluɛiya chaŋ idiiyo, ma kɔ kila dɔɔŋgɔɔ le waŋnda Kibiya chiŋalaŋndo a sɔŋgɔɔ.
20 Okoŋ, mi puaa chɔuwa Isɔluɛi bɛɛndiaŋ ma kua Kibiya le sɔŋgɔɔ a yuŋgu Bɛŋjamiŋ ndo.
21 Mi yuŋgu Bɛŋjamiŋ ndo fula o Kibiya niŋ, ma diu diu puaa Isɔluɛi 22,000 o paale leŋ choo.
22 Kɛ a koŋ kpou, mi puaa chɔuwa Isɔluɛi chɔm kɔl simulaa, nduyɛ ma bɛɛndiaŋ le kɔlaŋ chɔuwo o fondaŋ pilɛ koŋ kpe mɛɛ nda tosa o paale taseleŋ choo yɛ.
23 Okoŋ, mi Isɔluɛiya kua ma kɔ niilu chaŋndo Chɛhowa o hɔl kpɛŋ. Ma nyuna Chɛhowa aa: “Baa o bɛnda pa miŋ kuɛ vɛlɛ miŋ kɔ sɔŋga a puaapiliaa naa, yuŋgu Bɛŋjamiŋ ndo?” Mi Chɛhowa mulul nda aa: “Ei, la kɔ chiŋalaŋ nda.”
24 Okoŋ, mi Isɔluɛiya sɔɔŋguu yuŋgu Bɛŋjamiŋ ndo ikɛi, o paale diiŋ ndɔ leŋ choo.
25 O paaleleŋ choo mi yuŋgu Bɛŋjamiŋ ndo chaŋ Kibiya ma komal Isɔluɛiya, okoŋ ma diu nda 18,000, nduyɛ nda kpou ndaa nɔ mɔɔŋ faŋndoŋ.
26 Okoŋ, mi puaa chɔuwa Isɔluɛi kpou kua Bɛtɛl, ma kɔ chal Chɛhowa chaŋndo lachi. Nduyɛ, ma bii sumndo paale leŋ kpɛŋ. Ma soli sala luamaa a sala kɔl nyuloo o Chɛhowa lo.
27 Okoŋ kɔɔli, mi puaa Isɔluɛi nyuna Chɛhowa, kanifuule kɔfu kpema Mɛlɛka tonyaa wa loŋ a boondii keŋ.
28 Nduyɛ a boondii keŋ, Finihaasi po Ɛlieesa wo wa wana soliaa lasalaa kɔfu kpemaa lachi ni. Ɛlieesa yɛ, po Elɔŋ ndo o wa ni. Ma nyuna aa: “Baa o bɛnda pa miŋ kuɛ vɛlɛ miŋ kɔ sɔŋga a puaapiliaa naa, yuŋgu Bɛŋjamiŋ ndo, ɔɔ ŋ kua lɛ le?” Mi Chɛhowa muli aa: “Ei, la kɔ. Kanifuule, I cho nda nya malɔɔ o ba siɔdii.”
29 Okoŋ, mi puaa Isɔluɛi kɔ viŋi viŋiŋ yondoo niŋ, Kibiya balɔɔ silɔ.
30 O paale yaa ndɔ leŋ choo, mi Isɔluɛiya bɛɛndiaŋ le chɔuwo. Okoŋ, ma kɔ chiŋalaŋ yuŋgu Bɛŋjamiŋ ndo o Kibiya niŋ a sɔŋgɔɔ, mɛɛ ndaa tosa paandu yɛ.
31 Mɛɛ yuŋgu Bɛŋjamiŋ ndo kuel puaa chɔuwaa Isɔluɛiya le sɔŋgɔɔ, mi Isɔluɛiya tosa mi yuŋgu Bɛŋjamiŋ ndo mal chioo. Nduyɛ maa paandu, ma chiŋalaŋ puaa Isɔluɛiya, nduyɛ ma kandu apum diuwo o nɛila bɛndulaŋ, nɛi kuɛi Bɛtɛl lo a o kuɛ Kibiya wo. Ma dii puaa Isɔluɛi le ŋwaŋ 30 loŋ.
32 Okoŋ, mi yuŋgu Bɛŋjamiŋ ndo dimi aa: “Ŋ cho nda lahau yomɔɔ maa paandu.” Kɛ Isɔluɛiya ndaa dimi niŋ aa: “Ŋ cho muliŋ miŋ nyaanuŋ, nduyɛ miŋ tosa ma mal chioo miŋ kuɛ a nda o nɛila bɛndulaŋ.”
33 Okoŋ, mi puaa chɔuwaa Isɔluɛiya kpou mal fondaŋnda ndalaŋ, ma kua Baal-tama ma kɔ bɛɛndiaŋ le chɔuwo. Mi Isɔluɛiyaa tuaa wa a viŋi viŋiaŋ Kibiya ikɛi ya koma fulal waŋnda Kibiya.
34 Mi puaa chɔuwaa 10,000 nda hɛli o Isɔluɛiya tɛɛŋ nda huŋ chiŋalaŋ Kibiya a sɔŋgɔɔ. Nduyɛ chɔuwo wa o tuu kpɛi. Kɛ yuŋgu Bɛŋjamiŋ ndo ndoo sina maa kpundɔɔ le wa nda komallo le.
35 O paale leŋ choo, mi Chɛhowa tosa mi Isɔluɛiya yam yuŋgu Bɛŋjamiŋ ndo. Ma dii nda 25,100, nduyɛ nda kpou ndaa nɔ mɔɔŋ faŋndoŋ.
36 Yuŋgu Bɛŋjamiŋ ndo ndoo yiyaŋ ko maa mɛɛ Isɔluɛiya nyaanuŋ nda yɛ, a cho nda yomɔɔ. Kɛ le sabu Isɔluɛiya ndaa nyaanuŋ ndo wa ni maa, ndaa tiindaŋ chaaŋaa ndaa wa a viŋi viŋiaŋ le Kibiya delɔɔ choo wa.
37 Mi puaa wa a viŋi viŋiaŋnda wa fula chɔ chɔ, ma chiŋalaŋ Kibiya. Ma tiu ba o ba fee, nduyɛ ma diu wanaa wa o chiee koŋ niŋ nda kpou a muɛi faŋnde.
38 Nduyɛ, puaa chɔuwaa Isɔluɛiya ndaa kɛɛsiaa niŋ maa te wanaa wa a viŋi viŋiaŋnda wa hel pɛ chiee, a tosa mi kumnde hel le chɔmndo maa a bii chioo.
39 Mɛɛ Isɔluɛiya muliŋ le nyaanɔŋndo, mi yuŋgu Bɛŋjamiŋ ndo kɔ chiŋalaŋ nda a sɔŋgɔɔ, nduyɛ ma diu puaa chɔuwaa Isɔluɛiya le ŋwaŋ 30. Okoŋ ma dimi aa: “I cho kpendekele maa ŋ cho nda lahau yomɔɔ mɛɛ naŋ yem nda niŋ paandu yɛ.”
40 Kɛ ma cha kumnde helɔɔ tukpe tukpe le chɔmndo maa Isɔluɛiya bii chioo. Mɛɛ yuŋgu Bɛŋjamiŋ ndo tofaŋ kɔɔli, ma cha chioo kpou biyɔɔ wule wule.
41 Okoŋ, mi Isɔluɛiya mululaŋ yuŋgu Bɛŋjamiŋ ndo. Nduyɛ mi kɔndɔfillo bii nda, kanifuule ma cha maa kpundɔɔ komal nda.
42 Mi yuŋgu Bɛŋjamiŋ ndo nyaanuŋ Isɔluɛiya, ma kua ba pollo. Kɛ mi Isɔluɛiya tisa nda kɔɔli a chɔuwo. Mi puaa wa fulaa o chieeŋ bɛndoŋ niŋnda sɔɔŋguu le nda diu diuwo.
43 Ma duau yuŋgu Bɛŋjamiŋ ndo o piŋndo niŋ, nduyɛ ma tisa nda kɔɔli. A lo kɔlaŋ a nda diuwo haaa Kibiya ikɛi, ba paaleŋ le chaŋ ndo.
44 O mɛɛlulaŋ kpɔŋ, ma diu puaa chɔuwaa kpaaya bɛnduaa 18,000 o yuŋgu Bɛŋjamiŋ ndo choo.
45 Mi puaa o yuŋgu Bɛŋjamiŋ ndo choo muliŋ ma nyaanuŋ o pollo niŋ, ma kua o pou bɛndoo Luimɔŋ. Nduyɛ, mi Isɔluɛiya diu puaa ndaa 5,000 o nɛila bɛndulaŋ. A lo nda touwɔɔ haaa ma fuuluu vɛlɛ Kidɔm, nduyɛ ma diu vɛlɛ puaa ndaa 2,000.
46 O paale leŋ choo, wanaa nda dii o yuŋgu Bɛŋjamiŋ ndo choo wa kpou wa 25,000, nduyɛ nda kpou ndaa nɔ mɔɔŋ faŋndoŋ. Puaa chɔuwaa kpaaya bɛnduaa nda wa ni.
47 Kɛ mi puaa Bɛŋjamiŋ nda 600 hialuŋ, ma miiŋguŋ o pollo niŋ, o pou bɛndoo Luimɔŋ. Nduyɛ, le paŋgoŋ ŋhiɔɔlu a wa o pou koŋ.
48 Mi puaa chɔuwaa Isɔluɛiya miiŋgu pila o chieeŋ bɛnduŋ yuŋgu Bɛŋjamiŋ ndoŋ. Okoŋ, ma diu diu wana o wana vɛlɛ a chɔlu kɛ kɛ ndoo lo loŋ a muɛi faŋnde. Nduyɛ chieeŋ nda komal o nɛi yoŋ kpou, ma mɛli muŋ o yiŋ.
