Chɔɔchiaa 21:1-25
-
Kaale Bɛŋjamiŋ ndeŋ le sɔla pioŋɔɔ (1-25)
21 Mi puaa Isɔluɛi mɛnaŋ po o Misipa niŋ aa: “Wana o wana o naa tɛɛŋ nɔ mbo chua chua ndɔɔ, mbo ke po kɛ kɛ o yuŋgu Bɛŋjamiŋ ndo choo le mbo wa laa ndɔ le.”
2 Le hei, mi Isɔluɛiya kua Bɛtɛl, ma kɔ chal Mɛlɛka tonyaa lachi loŋ. Ma niilu koŋullo kpɛŋ.
3 Nduyɛ a wa dimioo aa: “Oo Chɛhowa, Mɛlɛka Isɔluɛiya, le yɛɛnɛ hei yɔŋnuŋ yɛ o Isɔluɛi niŋ? Le yɛɛnɛ mi kaaleŋ kpulukuu le lo hau nuaa pɛ o Isɔluɛi niŋ?”
4 Diimandɔɔ, mi waŋnda chaŋ idiiyo puŋ ma taŋgul bandoo loŋ, le ma soli sala luamaa a sala kɔl nyuloo lechoo.
5 Okoŋ mi waŋnda Isɔluɛi dimi aa: “O kaalaŋ Isɔluɛi tɛɛŋ kinɛi, kaale kuɛɛnɛ kɛɛ yɛ le hunɔɔ boondii naŋ chuuŋgiaŋ Chɛhowa lachi Misipa ve?” Kanifuule, ma mɛnaŋ po maa wana o wana hiŋ Chɛhowa lachi Misipa le, o nɔ mbo sɔla piɔmndo.
6 Mi nyiɛɛye bii waŋnda Isɔluɛi tau le nyɛ yɔŋnuŋ puaapiliaa ndaa o yuŋgu Bɛŋjamiŋ ndo choo wo. Ma dimi aa: “Kaaleŋ le pilɛ le faŋaŋ hau Isɔluɛiya tɛɛŋ.
7 Yɛɛnɛ naŋ cho yɛ tosa le mi puaa lo yoomu o yuŋgu Bɛŋjamiŋ ndo choo wa sɔla laanduaa? Kanifuule, ŋ chii niŋ mɛnaŋ o Chɛhowa lo maa, ŋ nɔ miŋ chua chuauwaa naa miŋ ke nda le ma wa laandaa ndaa le.”
8 Ma nyuna aa: “O kaalaŋ Isɔluɛi tɛɛŋ kinɛi, kaale kuɛɛnɛ kɛɛ yɛ le hunɔɔ Chɛhowa lachi Misipa?” Mi i yɔŋnuŋ maa wana o wana fula Chabɛsi-kiliaadi mbo kuɛ o dɔɔŋgɔ nda chuuŋgiaŋ ndo wo le.
9 Mɛɛ nda chɔm waŋnda, ma saaluŋ maa waŋnda Chabɛsi-kiliaadi ve loŋ te.
10 Okoŋ, ma viam puaa chɔuwaa kpaaya bɛnduaa 12,000. Ma dimul nda aa: “La kɔ, mi la kɔ diu diu waŋnda Chabɛsi-kiliaadi a muɛi faŋnde, wana lanɔ ni, chuaambɔ ni.
11 Nyɛ nya nɔ mi la tosa wo cho hoo ni: Wana lanɔ ni, wana pɔnɔ ni, la diu diu nda kpou. Mɛɛ wana lanɔ hiu wɔ wana pɔnɔ kɔɔli le wo mi la mɛi.”
12 Mɛɛ nda kuɛ Chabɛsi-kiliaadi, ma saaluŋ chuaa laanduaa 400, a ndaa hiu wɔ wana pɔnɔ kɔɔli le wa. Okoŋ ma kua a nda o dɔɔŋgɔɔ niŋ Silɔɔ, o lɛŋnde Kenaŋ ndeŋ niŋ.
13 Mi waŋnda Isɔluɛi yɔŋ diomndeŋ o yuŋgu Bɛŋjamiŋ ndo lo, naa nda wa o pou bɛndoo Luimɔŋ nda. Nduyɛ, ma dimul nda le mi kɔl nyuloo miiŋgu nda tɛɛŋ.
14 A boondii keŋ, mi yuŋgu Bɛŋjamiŋ ndo miiŋgu pila o lɛŋnde ndaleŋ niŋ. Nduyɛ, mi Isɔluɛiya ke nda waŋ laanduaa nda bii Chabɛsi-kiliaadi wa. Kɛ waŋ laanduaa kaŋ tiu nda kpou le.
15 Mi nyiɛɛye bii waŋnda tau le nyɛ yɔŋnuŋ yuŋgu Bɛŋjamiŋ ndo wo, le mɛɛ Chɛhowa tosa mi piɔuwaŋndo luɛi kaalaŋ Isɔluɛi tɛɛŋ yɛ.
16 Mi waŋ banaa o Isɔluɛi niŋ dimi aa: “Mɛɛ waŋ laanduaa o yuŋgu Bɛŋjamiŋ ndo choo kpou chuu wu yɛ, yɛɛnɛ naŋ cho yɛ niko tosa le miŋ ke puaa tuaa lo haa wa laanduaa?”
17 Okoŋ mi apum muli aa: “Puaa lo haa yoomu o yuŋgu Bɛŋjamiŋ ndo choo wa nɔ ma sɔla nyɛm kiɔɔŋ, yɔŋii kaaleŋ le pilɛ o Isɔluɛi niŋ le faŋaŋ.
18 Kɛ ŋ nɔ miŋ chua chuauwaa naa miŋ ke nda le ma wa laandaa ndaa le, kanifuule waŋnda Isɔluɛi mɛnaŋ po aa: ‘Wana o wana chua pɛ chua ndɔɔ mbo ke waŋndo o yuŋgu Bɛŋjamiŋ ndo choo le mbo wa laa ndɔ, sendioo cho ndu choo.’”
19 Okoŋ ma dimi aa: “Ee woo, iwɔsi o wɔsi mi bɔŋaŋndo biinuŋ Silɔɔ le Chɛhowa. Nduyɛ Bɛtɛl a Lebona tɛɛŋ Silɔɔ cho ni. O nɛi bɛndu chɛŋ ba paaleŋ le chaŋ ndo mbo kua Bɛtɛl a Siɛkɛm ndo o cho ni.”
20 Okoŋ ma dimul puaa o yuŋgu Bɛŋjamiŋ ndo choo aa: “La kɔ, mi la kɔ viŋi viŋiŋ o kpelela makilepiilaŋ niŋ.
21 Te la che pɛ mi chuaa laanduaa Silɔɔ fula le yolaŋ,* wana o wana fula naa o cho o viaŋnaŋ nda mbo bii o pilɛ le mbo wa laa ndɔ. Okoŋ, mi la miiŋgu o lɛŋnde nyaleŋ niŋ.
22 Kɛ te finyaa ndaa ɔɔ yemaa ndaa huŋ bii pɛ seiyo o naa lo, ŋ cho nda dimul aa: ‘La yiyaŋ naa choo mi la tuiinuŋ nda inyiɛɛ. Kanifuule, waŋ laanduaa naŋ bii o chɔuwo le ma wa laandaa ndaa wa, a tiu nda le. Nduyɛ, nya bɛɛ nyaa nɔla mi la ke nda laanduaa, mi la kɛɛ buŋgɛi nya chua ve tɛɛmbuu le.’”
23 Nduyɛ, lende kinɛi puaa o yuŋgu Bɛŋjamiŋ ndo choo tosa ni. Mi o kɛ kɛ sɔla lanɔɔ o waŋ laanduaa wa yolaŋ nda tɛɛŋ. Okoŋ kɔɔli, ma miiŋguŋ o nyɛm ndaŋ kiɔɔŋ choo, nduyɛ ma kɔ taŋgul chieeŋ ndaŋ bɛndoŋ loŋ, ma chal leniŋ.
24 Okoŋ, mi Isɔluɛiya puusiaŋ o fondaŋ nda wa wo, mi o kɛ kɛ miiŋgu o kaale ndɔleŋ niŋ a o yuŋgu ndɔɔ lo. Nduyɛ, mi wana o wana miiŋguŋ o nyɛm kɛŋ ndɔŋ.
25 A teleŋ koŋ, masa o masa ve o Isɔluɛi niŋ te. Wana o wana wa nyɛ o hɛnaŋ ndo tosaa.
Tɛɛsiaalaŋ
^ Hibuluiye, “yola tiu tiu laŋ.”
