Chɔɔchiaa 3:1-31
3 Mi Chɛhowa chɛl le mi waŋnda apum wa o lɛŋndeŋ niŋ, le Isɔluɛiyaa ndaa kue wɔ o chɔula tosaŋ o lɛŋnde Kenaŋndeŋ niŋ te wa tofaa.
2 (Hei yɔŋnuŋ le mi chuaa ndaa mamaa ndaa sina a chɔuwo okɔɔ, a ndaa sina wɔ a sɔɔŋ waa nuaa okɔɔ le wa.)
3 Wanaa lo kaŋ nda cho haa ni: Masaa ŋuɛɛnuaa Filitiaa, Kenanaitiiya kpou, waŋnda Saidɔŋ, a Hivaitiiyaa cho o Pembii Lebanɔŋ Nde wa, chɔŋ o Pembii Baal-hɛmɔŋ Nde haaa kɔ bii Lɛbo-hamaati.
4 Kaalaŋ ndaŋ Chɛhowa soliŋ kpeku ni le Isɔluɛiya tofaa, te a diikuŋ niŋ pɛ sawala o ke finyaa ndaa sanaa a Muuse laŋ.
5 Okoŋ, mi Isɔluɛiya chal Kenanaitiiya, Hitaitiiya, Amɔluaitiiya Pɛluɛsaitiiya, Hivaitiiya, a Chɛbusaitiiya tɛɛŋ.
6 Mi Isɔluɛiya chua laanduaa kaalaŋ ndaŋ tɛɛŋ, nduyɛ mi kaalaŋ ndaŋ bɛɛ la chua laanduaa Isɔluɛiya tɛɛŋ. Okoŋ ma kandu mɛlɛkaa ndaa sooluuwo.
7 Mi Isɔluɛiya tosa nyɛ bɛnda Chɛhowa o hɔl te wo. Okoŋ ma puɛɛnuŋ a Chɛhowa Mɛlɛka ndaa, ma muliŋ suŋgbuma Baal laŋ sooluuwo, a suŋgbuma iyɔmndaŋ.*
8 Le hei, mi Chɛhowa duaunuŋ tumbe o kala kala a waŋnda Isɔluɛi. Okoŋ, mbo pisi nda Kusiaŋ-luisiatim masaa le Mɛsopoteemiaa o ba.* Le wɔsilaŋ la ŋɔmaa, Isɔluɛiya wa Kusiaŋ-luisiatim o ba bɛŋgu.
9 Mɛɛ Isɔluɛiya muliŋ o Chɛhowa lo le malaa, mi Chɛhowa soli wana piŋiaa le Isɔluɛiya baŋaa. Ndu cho yɛ Otiniɛɛ ni, po Kinaasi wo, pɔmbɔɔ Kelɛbi.
10 Mi Chɛhowa ke ndu nyina ndɔ diandaa, okoŋ mbo simnuŋ wana kialaa ŋyamaa o Isɔluɛi niŋ. Mɛɛ o kuɛ o chɔuwo, mi Chɛhowa mal ndu Kusiaŋ-luisiatim masaa le Mɛsopoteemiaa* o ba. Okoŋ mbo yam Kusiaŋ-luisiatim.
11 Mɛɛ hei yɔŋnuŋ, le wɔsilaŋ 40 kɔl nyuloo wa o lɛŋndeŋ niŋ. Okoŋ kɔɔli, mi Otiniɛɛ, po Kinaasi wo wu.
12 Mi Isɔluɛiya kandu vɛlɛ nyɛ bɛnda Chɛhowa o hɔl te wo tosaa. Le hei, mi Chɛhowa tosa mi Ɛkilɔŋ, masaa Mowaabi tiu Isɔluɛiya ba, le mɛɛ nda tosa nyɛ bɛnda le wo Chɛhowa o hɔl lɛ.
13 Okoŋ kɔɔli, mi Ɛkilɔŋ huŋ a Amɔnaitiiya vɛlɛ a Amalɛkaitiiya, ma huŋ del Isɔluɛi choo a sɔŋgɔɔ, nduyɛ ma bii chiee bɛndu mawauwo.*
14 Le wɔsilaŋ 18, Isɔluɛiya wa Ɛkilɔŋ, masaa le Mowaabi o ba bɛŋgu.
15 Mɛɛ Isɔluɛiya muliŋ o Chɛhowa lo le malaa, mi Chɛhowa hɛli Ihudi po Kiluaa wo, fulaa o pulale Bɛŋjamiŋ ndeŋ choo le nda piŋioo. Nduyɛ, wana i miallo Ihudi wa ni. A teleŋ pilɛ, mi Isɔluɛiya viam ndu o Ɛkilɔŋ ndo, masaa le Mowaabi a paawa* lelɛŋndo.
16 Mi Ihudi toosiaa muɛi sondola tiɔɔŋnde, bandei nɛiyo le pilɛ a tɛndaa tɛɛŋ. Mbo sɔɔŋa ndi o doma ndɔɔ bɛŋgu, o lɔlu ba kɛndɔɔ.
17 Okoŋ mbo kɔ ke Ɛkilɔŋ, masaa le Mowaabi paawa lelɛŋndo. Nduyɛ, chelullo pila Ɛkilɔŋ ndoo chelul ni.
18 Mɛɛ Ihudi chii paawa lelɛŋndo yɔŋgu, ma bii miiŋgoo nda wanaa liila ndu a paawaa wa.
19 Mɛɛ nda fuuluu Kikaa o fondaŋ nda sial piɔmnda wo, mi Ihudi miiŋgu pila, mbo kɔ dimi aa: “Fallo masaa, I nɔ yooŋgoo le num.” Okoŋ mi masaa dimi aa: “La meiyɔ!” Mɛɛ o dimi lende, mi buɛiyaa nduaa kpou fulaŋ.
20 Okoŋ mi Ihudi kua naa o wa ichali o chiɛi ndɔɔ niŋ o fondaŋ fɛfɛllo wa. Mi Ihudi dimul ndu aa: “Mɛlɛka ke ya yooŋgoo le num.” Mbo chaŋ nya o kpeŋgbei* ndɔ lemasaa choo.
21 Okoŋ mi Ihudi naŋ muɛi wa ndu o lɔlu ba kɛndɔɔ ve a ba ndɔ miallo yau, mbo sɔɔŋa ndi masaa o dembe.
22 Mi muɛi luɛinuŋ ndu o dembe a piauwo kpou, okoŋ mi puloŋ huluŋ. O soli ndu muɛi o dembe le, nduyɛ mi chuɛiyaŋ ma kumbu ndi kpu.
23 Mi Ihudi beŋi beŋi ndu diolaŋ kɔɔli, mbo fulaŋ a toŋgo pɔmbɔɔ mbo kuaŋnuŋ.
24 Mɛɛ Ihudi kuɛŋnuŋ, mi buɛiyaa masaa miiŋgu ma komal diolaŋ kpou le luɛiyɔɔ o fondaŋ fɛfɛllo la beŋi beŋiaa. Okoŋ ma dimi aa: “Naapum o chiɛi kɔɔli o kuɛ ni.”*
25 Mɛɛ nda chum tei ma cha maa masa ndaa kumbi wɔ diolaŋ te, ma kandu buulaŋndo. Okoŋ, ma chua kiiye ma kuumbuu diolaŋ nduyɛ ma cha masa ndaa ihini lɛŋ o vilɛiyo!
26 Buɛiyaa nduaa lo kɔllo keeliaa, mi Ihudi keeku o fondaŋ nda sial piɔmnda wo, mbo fuuluu Sɛiluaa, nyɛ o nyɛ yɔŋnuŋ ndu le.
27 Mɛɛ o fuuluu, mbo hɔŋ buloo o fondaŋ ŋpemboo o tanda Ifiluem ndo niŋ. Mi Isɔluɛiya tual o fondaŋ ŋpemboo, nduyɛ mbo sim nda lachi.
28 Okoŋ mi Ihudi dimul nda aa: “La tol la kɔɔli, kanifuule Chɛhowa mal nya Mowabaitiiya, yaamɔɔwaa nyaa o ba.” Ma tual ndu kɔɔli, ma kɔ bii fondaŋnda mɛŋma Chɔɔdaŋ ndaŋ ma wa tɛsɛ le Mowabaitiiya taŋɔɔ wo. Nduyɛ a chɛl mi wana o wana taŋ te.
29 A boondii keŋ, ma diu diu Mowabaitiiya le 10,000. Nda kpou puaa dialuŋ kalaa nda wa ni. Wana pilɛ bɛɛ heluŋ te.
30 O paale leŋ choo, mi Isɔluɛi yam waŋnda Mowaabi. Nduyɛ, le wɔsilaŋ 80 kɔl nyuloo wa o lɛŋndeŋ niŋ.
31 Mɛɛ Ihudi faŋaŋ, mi Siamika po Anati wo diu puaa Filitiaŋnda 600 a yɔm sɛɛmbiaa.* Mi ndu bɛɛ piŋi Isɔluɛiya.
Tɛɛsiaalaŋ
^ Tofa Tɛɛsiaa.
^ Hibuluiye, “Aluam-nahaluem.”
^ Hibuluiye, “Aluam.”
^ Koŋ cho ni, Chɛluiko.
^ Ɔɔ “mulu.”
^ Ɔɔ “kpɛŋɛ.”
^ Hibuluiye, “peluŋ ndɔŋ kumbɔɔ.”
^ Ɔɔ “yɔm sɛɛmbiaa nda soliŋ kpeku le nauwa kpeŋaa wo.”
