Chɔɔchiaa 5:1-31
5 O paale leŋ choo, mi Dɛbolua nda Baluaki, po Abinowam ndo soli chondei hei:
2 “La saŋgala Chɛhowa,Le mɛɛ puaa chɔuwa mal yiiŋii ndɛi wusiaa wusiaa yɛ,Le mɛɛ waŋnda o Isɔluɛi niŋ yɔŋguŋ yɛ.
3 La yaŋ nilaŋ, nya masaa waa! La yaŋ nilaŋ yekeŋ, nya chua chilaŋ nda!
I cho chondei soli le Chɛhowa.
I cho nyɛchaa lɔɔ le Chɛhowa, Mɛlɛka Isɔluɛiya saŋgalaa.
4 Chɛhowa, mɛɛ ŋ fula Sɛyaa,Mɛɛ ŋ fula o tanda Idɔm ndo niŋ,Mi lɛŋndeŋ le hiiluŋ, mi mɛŋndaŋ o choo choo niŋ ma huluŋ,Mi yumbu yumboo tusi mɛŋndaŋ.
5 Mi pembuŋ bɛndoŋ teŋga* Chɛhowa lachi.Pembii Sanai Ve bɛɛ, mi i teŋga Chɛhowa, Mɛlɛka Isɔluɛiya lachi.
6 O palɛi Siamika ve niŋ, po Anati wo,A o palɛi Chayɛɛ ve niŋ, waŋnda ndaa kei lɛ o nɛila bɛndulaŋ te.O nɛila yondolaŋ choo ndaa kei ni.
7 Wana ve lɛ o sɔndɔkɔltaŋ niŋ Isɔluɛi le.A ve lɛ kposoŋ te haaa mi ya Dɛbolua chaŋ,Mi simnuŋ kalaa o Isɔluɛi niŋ.
8 Ma hɛli mɛlɛkaa sɛnɛiya,Okoŋ mi chɔuwo del o diola kpakila ndalaŋ.
O puaa chɔuwa 40,000 tɛɛŋ o Isɔluɛi niŋ,Wana chi lɛ boo chɔu ɔɔ bal te.
9 Kɔl nuu cho latulu a wanaa cho puaa chɔuwa bolle o Isɔluɛi niŋ nda,A yɔŋguŋ wulee le kɔlaŋ chɔuwo a waŋnda latulu wa.
La saŋgala Chɛhowa!
10 Nya cho haa kɔlaŋ o suaa kɛndɛ kɛndiaa choo wa,Nya cho haa ichali o kolala kɛndɛ kɛndɛlaŋ choo wa,A nya cho haa kɔlaŋ o nɛila bɛndulaŋ choo wa,La yiyaŋ!
11 Diomnda wanaa piɔu mɛŋndaŋ nda, la wa fulaa o fondaŋnda mamɛŋndaŋ.Loŋ nda wa suɛi a sɔɔŋ kɛndɛŋ Chɛhowa tosa woŋ okɔɔ ni.Sɔɔŋ kɛndɛŋ wanaa nduaa o sɔndɔkɔltaŋ o Isɔluɛi niŋ tosa woŋ.
Okoŋ mi wanaa Chɛhowa wa kua o diola kpakilaŋ.
12 Oo Dɛbolua, tiondu!
Chɔŋ, tiondu, chɔŋ ma soli chondei!
Chɔŋ Baluaki, num po Abinowam ndo! Kɔ a wanaa num aa ŋ bii o chɔuwo wa!
13 Okoŋ mi wanaa lo wa kua o laŋgbaa kalla lo.Mi wanaa Chɛhowa wa huŋ naa ya chua, le wanaa kpaaya bɛnduaa chiŋalaŋndo.
14 O pulale Ifiluem ndeŋ choo nda fula ni, wanaa cho o lɛŋnde dɛŋgbɛleŋ niŋ nda.Oo Bɛŋjamiŋ, waŋnda o yuŋgu numndo niŋ cho num tolɔɔ kɔɔli.
O pulale Makaya leŋ choo waŋ banaa puaa chɔuwa fula ni.Nduyɛ, o pulale Sɛbulɔŋ ndeŋ choo wanaa bii tinda wana hɛli waŋndo wo* fula ni.
15 Waŋ banaa o yuŋgu Isaka wo choo wa latulu a Dɛbolua.Mɛɛ Isaka tosa yɛ, lende koni Baluaki bɛɛ tosa ni.
Ma dimul ndu le mbo tol o lɛŋnde dɛŋgbɛleŋ niŋ.
Waŋnda o yuŋgu Lubɛŋ ndo choo wa kiisaŋndo tau o kɔlta ndalaŋ niŋ.
16 Le yɛɛnɛ nya chalnuŋ yɛ mɛɛ visioo bɛwa nuaa o wolɔɔlaŋ bɛŋgu yɛ,Mi la yaŋ nda nilaŋ ma hɔŋ bululaŋ le chɔluaa ndaa?
Kanifuule, waŋnda o yuŋgu Lubɛŋ ndo choo wa kiisaŋndo tau o kɔlta ndalaŋ niŋ.
17 Kiliaadi loŋnuŋ Chɔɔdaŋ leeloo.Num Daŋ, le yɛɛnɛ ŋ chalnuŋ yɛ o dɛndɛla mamɛŋndaŋ ikɛi?
Asia chalnuŋ o pee mɛŋma ihɛllo kɔŋgɔ,Nduyɛ mbo waŋnuŋ naa dɛndɛlaŋ la huŋ simndaŋ nda.
18 Mi yuŋgu Sɛbulɔŋ ndo luei yoomula ndalaŋ o kpundɔɔ niŋ.Yuŋgu Nafitalii yo bɛɛ, ma luei yoomula ndalaŋ o kpundɔɔ niŋ o pemboŋ choo.
19 O Taanaki niŋ, o fondaŋ mamɛŋndo Mɛkidɔɔ ikɛi,Mi masaa huŋ ma sɔŋga.Mi masaa le Kenaŋ huŋ ma sɔŋga.
Kɛ a chue kaniŋ humboŋ ma kuɛŋnuŋ a muŋ te.
20 Looŋ lo o choo choo niŋ miŋ sɔŋga.Ŋ lo o fondaŋnda ndalaŋ miŋ chiŋalaŋ Sisɛlua a sɔŋgɔɔ.
21 Mi pioo Kisiɔŋ hiaunuŋ a nda,Pee masindɔɔ, pioo Kisiɔŋ.
Mi yam wanaa kpaayaa bɛnduaa.
22 Buukula suaa wa kɔlaŋ a lɛŋndeŋ wusuŋaa,Nduyɛ suaa nduaa kpaaya bɛnduaa wa kɔlaŋ a huuloo chuliaŋ chuliaŋ.
23 Maalikɛinɔ Chɛhowa wo dimi aa, ‘Sendioo cho Mɛlɔsi choo.A tonya, sendioo cho wanaa nduaa choo,Kanifuule, a hiŋ le Chɛhowa malaa le.A hiŋ le Chɛhowa malaa a wanaa kpaaya bɛnduaa latulu le.’
24 O waŋ laanduaa tɛɛŋ kpou, Chayɛɛ salaa hiou wa choo,Lanɔɔ Hɛba, Kenaitiinɔɔ.Salaa cho ndu choo mbo hiau waŋ laanduaa cho o tɛndiilaŋ niŋ nda kpou.
25 Mɛɛ Sisɛlua nyuna le mɛŋndaŋ, mbo ke ndu milikiiyaŋ.*
Mbo ke ndu milikiima hilihiliaŋ o hɛŋgɛi kɛndɛ kɛndɔɔ niŋ.
26 Mbo chua chiliŋii siombu siombu nda kindu tɛndiiyo ve a ba ndɔ miallo.A ba ndɔ kɛndɔɔ, mbo chua haamɛiyo* mbo baŋ ndi Sisɛlua o lebol.
Mbo buli ndu bolleŋ, nduyɛ mbo pial ndu kpokpoo wɔ wɔ.
27 Mi Sisɛlua chaŋ, mbo lau lau, okoŋ mbo del ndu o peloŋ bɛŋgu.Mbo del ndu o peloŋ bɛŋgu, mbo hini sakpo.Naa o hini kaŋ nda, loŋ o tiu ndu ba ni.
28 Mi wana lanɔɔ tofa o wundɛiyo,*Mi kalaa Sisɛlua tofa o wundɛiyo.Mbo nyuna aa, ‘Le yɛɛnɛ nyɛ ndɔ nyaanaŋ suaa naŋndo cho yɛ hau idɔŋgu dɔŋguei hei?
Le yɛɛnɛ I tuiyɔ hau buukula suaa nduaa diom te?’
29 Chuaa nduaa laanduaa nɔ taasioo ma hiau a tuaa wa cho ndu muli diom.A tonya, ndupila cho dimulɔŋ aa,
30 ‘Naapum nyɛm nda puŋga waŋnda o ba woŋ nda cho piɔuwaŋndo ni.Chua laandoo o pilɛ, chuaa laanduaa a ŋiɔɔŋ, le po chɔu kɛ kɛ.Kola yiŋaa o pilɛ le Sisɛlua, kola yiŋaa o pilɛ le ndu.Kola chukaa, kola yiŋaa, kolala yiŋaalaŋ la tiɔɔŋ,Le mi wanaa puŋga laŋ nda kafalaŋ o labolo.’
31 Oo Chɛhowa, maa yaamɔɔwaa numnda kpou sɔla tambei fɔ.Maa wanaa kaala numnda diondu mɛɛ paaleŋ le fula nuaa yɛ.”
Nduyɛ, le wɔsilaŋ 40 kɔl nyuloo wa o lɛŋndeŋ niŋ.
Tɛɛsiaalaŋ
^ Ɔɔ “nyiiya.”
^ Ɔɔ naapum, wanaa bii nyɛm waliŋ wana poonyiaa wo.
^ Ɔɔ “nɔnɔɔ.”
^ Ɔɔ “malatoo.”
^ Ɔɔ “finɛteloo .”
