Chɔɔchiaa 9:1-57
9 A teleŋ pilɛ, mi Abimɛlɛki po Chɛlubaal wo mal mbo kua o bomii nduɛi Siɛkɛm. Mbo kɔ dimul bomaa nduaa a waŋnda o yuŋgu finya ndɔ mama wo niŋ kpou aa:
2 “A yandii, la nyuna wɔ waŋ banaa chieeya o Siɛkɛm niŋ aa, ‘Puaa 70 waa Chɛlubaal wa kpou waa nya choo masa, a wana pilɛ waa nya choo masa, o kuɛɛnɛ bɛnda yɛ le nya? Nduyɛ, la loonuŋ maa kooma piliaŋ kpe naŋ cho naa nyaa ni.’”
3 Okoŋ, mi bomaa nduaa kɔ dimul waŋ banaa chieeya o Siɛkɛm niŋ nyɛ o dimi wo. Ma kɛɛsiaŋ o kɔl le Abimɛlɛki tooloo. Ma dimi aa: “Po naa o cho ni.”
4 Okoŋ, ma chua kaniŋ humboŋ 70 o maaŋ Baal-bɛluiti wo niŋ, ma ke Abimɛlɛki. Mbo soliŋ kaniŋ muŋ kpeku mbo paawa* puaa kɔl vesɛiyaa bɛnduaa le ma liila ndu.
5 Okoŋ kɔɔli, mbo kua Ofiluaa o chiɛi finya ndɔ wo, mbo kɔ diu diu puaa Chɛlubaal finya ndɔ wa ŋwaŋ 70 o pouwo o pilɛ choo. Chotam kinɛi lo yoomu ni, Chɛlubaal lum ndɔɔ, kanifuule mbo kɔ vioŋnuŋ.
6 Okoŋ, mi waŋ banaa chieeya kpou Siɛkɛm a Bɛti-milo chuuŋgiaŋ naapilɛ o yɔm bɛndoo ikɛi, o suŋgbule wa Siɛkɛm ndeŋ. Ma siiŋguu Abimɛlɛki masaa.
7 Mɛɛ nda dimul Chotam a ndi okɔɔ, mbo kua sakpo mbo kɔ sim o Pembii Kɛluisim nde choo, okoŋ mbo yondal nda choo choo kpeleŋ aa: “Nya waŋ banaa chieeya o Siɛkɛm niŋ, la yaŋ ya nilaŋ nduyɛ mi Mɛlɛka bɛɛ yaŋ nya nilaŋ.
8 “Paale pilɛ, mi yɔmnde kua le masaa hɛlioo* le ndipila. Okoŋ, mi i dimul yɔm ɔlifiiyo aa, ‘Wa naa choo masa.’
9 Kɛ mi yɔm ɔlifiiyo dimul ndi aa, ‘La yeema ya mi pɛŋgi chuɛiyaŋ solioo, ma ke Mɛlɛka a waŋnda chieeya bɛɛleŋ ndaŋ, le mi kɔ wa yɔmii cheleŋnde hiilɔŋndo choo?’
10 Okoŋ, mi yɔmnde dimul yɔm mafikiiyo aa, ‘Huŋ ma wa naa choo masa.’
11 Kɛ mi yɔm mafikiiyo dimul ndi aa, ‘La yeema ya mi mal yeela nuu, nduyɛ mi pɛŋgi kɔmnde kɛndɛleŋ yɔŋgoo, le mi kɔ wa yɔmii cheleŋnde hiilɔŋndo choo?’
12 Okoŋ kɔɔli, mi yɔmnde dimul yɔm makilepiiyo aa, ‘Huŋ ma wa naa choo masa.’
13 Mi yɔm makilepiiyo dimul ndi aa, ‘La yeema ya mi mal muɛima ni ma sɛnɛiyaŋ solioo, ma nɛŋi Mɛlɛka a waŋnda chieeya kɔllo waŋ, le mi kɔ wa yɔmnde hiilɔŋndo choo?’
14 O mɛɛlulaŋ kpɔŋ, mi yɔmnde kpou dimul yɔm ŋyɔɔ aa, ‘Huŋ ma wa naa choo masa.’
15 Okoŋ, mi yɔm ŋyɔɔ dimul yɔmnde aa, ‘Te ya kpeekpei nya cho hɛlioo ni le mi wa nya choo masa, mɛɛ la huŋ vioŋnuŋ o wundule nileŋ bɛŋgu. Kɛ te huiyo nya cho ya ni, maa yiŋndeŋ le fula o yɔm ŋyɔɔ mi le lom yɔmii sida ve Lebanɔŋ.’
16 “Baa suɛi kɛndɛi pa nya tosa keŋ ni le Abimɛlɛki siiŋguuwo masaa? Baa suɛi kɛndɛi pa nya tosal hei Chɛlubaal nda yuŋgu ndɔɔ ni? Baa bɛɛle o nɔ le sɔlaa leŋ pa nya ke ndu leŋ ni?
17 Mɛɛ finya nuu chɔulaba le nya, mbo luei yoomu ndɔɔ o kpundɔɔ niŋ le nya piŋioo waŋnda Midiaŋ o ba.
18 Kɛ hau niŋ, la chɛŋ mi la simul yuŋgu finya nuu, nduyɛ mi la diu puaa nduaa ŋwaŋ 70 o pouwo o pilɛ choo. Okoŋ mi la chua Abimɛlɛki, po wana lanɔ chiɔɔ, mi la siiŋguu ndu masaa waŋ banaa chieeya Siɛkɛm choo le mɛɛ o cho po nyaa yɛ.
19 A tonya, te suɛi kɛndɛi kpeekpei nya cho hau tosaa le Chɛlubaal a yuŋgu ndɔɔ ni, mɛɛ la dɔɔnuŋ nyaale le Abimɛlɛki, nduyɛ mi ndu bɛɛ dɔɔnuŋ nyaale le nya.
20 Kɛ te o cho lende le, maa yiŋndeŋ le fula o Abimɛlɛki lo, mi le lom waŋ banaa chieeya Siɛkɛm a Bɛti-milo, nduyɛ maa yiŋndeŋ le fula o waŋ banaa chieeya Siɛkɛm lo a Bɛti-milo, mi le lom Abimɛlɛki.”
21 Okoŋ mi Chotam nyaanuŋ, mbo kɔ chalnuŋ Biaa, kanifuule siooŋnde wa ndu le Abimɛlɛki bɛ ndɔ.
22 Le wɔsilaŋ la yaa, Abimɛlɛki wa o masaleŋ choo Isɔluɛi.
23 Okoŋ, mi Mɛlɛka tosa mi yaamɔɔleŋ* le luɛi Abimɛlɛki tɛɛŋ nda waŋ banaa o Siɛkɛm niŋ. Nduyɛ, ma simul Abimɛlɛki simullo pila.
24 Hei yɔŋnuŋ, le mi Mɛlɛka miŋgul Abimɛlɛki a waŋ banaa chieeya Siɛkɛm maa, le mɛɛ Abimɛlɛki dii puaa 70 waa Chɛlubaal wa yɛ. Nduyɛ, waŋ banaa chieeya Siɛkɛm mala ndu nda diyɔɔ ni.
25 Okoŋ, mi waŋ banaa chieeya Siɛkɛm viŋi viŋi waŋnda o pembuŋ bɛndoŋ choo le ndu. Nduyɛ, wana o wana ndoo keeku pɛ o nɛi koŋ, a del ndu choo a poondiaa ndu nyɔɔŋ o ba. Mi Abimɛlɛki tuɛi a ndi okɔɔ.
26 Okoŋ, mi Keyaa po Ɛbɛdi wo a pɔmbuaa nduaa kua Siɛkɛm, nduyɛ mi waŋ banaa chieeya o Siɛkɛm niŋ duau laalaŋndo o ndu niŋ.
27 Mi waŋ banaa Siɛkɛm kua o kpelela ndalaŋ niŋ ma keenduu kilepiiyaŋ, ma waayiaa maŋ, nduyɛ ma tosa dunyɛi. Okoŋ kɔɔli, ma kua o maaŋ* mɛlɛka ndaa niŋ, ma dia nyɛdiaa, ma kol, nduyɛ ma mɛna Abimɛlɛki.
28 Okoŋ, mi Keyaa po Ɛbɛdi wo dimi aa: “Wana maavɛɛ Abimɛlɛki, po Chɛlubaal wo cho yɛ? Nduyɛ, wana maavɛɛ Sɛbu, wana o kɛsi hɔlte ndɔleŋ ndo cho yɛ? Wanaa maavɛɛ nda cho yɛ le miŋ wa nda o ba bɛŋgu? O bɛnda miŋ wa Hemɔɔ, finyaa Siɛkɛm o ba bɛŋgu. Le yɛɛnɛ miŋ wa Abimɛlɛki o ba bɛŋgu?
29 Te waŋnda haa ndaa wa pɛ o kpaaya nuu bɛŋgu, I wa Abimɛlɛki faŋa o masaleŋ choo.” Okoŋ, mbo dimul Abimɛlɛki aa: “Chɔɔlu puaa chɔuwa nuuviaa, ma komal la le sɔŋgɔɔ.”
30 Mɛɛ Sɛbu, wana wa chioo hɔlteŋ ndo tuei diomnda Keyaa po Ɛbɛdi wo dimi laŋ, mbo duaunuŋ tumbe o kala kala.
31 Okoŋ, mbo viam waŋnda sɔɔsɔɔ o Abimɛlɛki lo le ma dimul ndu aa: “Fallo, Keyaa po Ɛbɛdi wo a pɔmbuaa nduaa hiŋ Siɛkɛm, nduyɛ a cho waŋnda bolle kindioo le num simullo.
32 Lelaŋ, chua puaa numnda ma hiŋ a nyumndaŋ, ma huŋ chum yondoo niŋ.
33 Dimioo nuaa mi paaleŋ le sɛ, a pena chɔnɔŋ puŋ a chiŋalaŋ chioo a sɔŋgɔɔ. Nduyɛ te ndu a puaa nduaa fula pɛ le ma chiŋalaŋ num, tosa nyɛ o nyɛ ŋ tiuba le ma yem nda.”
34 Okoŋ, mi Abimɛlɛki nda puaa nduaa kpou chaŋ ichɔl koŋ ma piɔuwaŋ kundalaŋ la hiɔɔlu, ma kɔ vioŋnuŋ yondoo niŋ le Siɛkɛm chiŋalaŋndo a sɔŋgɔɔ.
35 Diimandɔɔ, mɛɛ Keyaa po Ɛbɛdi wo fula, mbo kɔ sim o dio kpaki chioo. Mi Abimɛlɛki a puaa nduaa fula naa nda wa a viŋi viŋiaŋnda wa.
36 Mɛɛ Keyaa che nda, mbo dimul Sɛbu aa: “Tofawɔ, waŋnda cho chɔnɔŋndo o pembuŋ bɛndoŋ choo ma wa hunɔɔ.” Kɛ mi Sɛbu dimul ndu aa: “Wunduma pembuŋ bɛndoŋ ŋ cho chɔɔ ni maa ŋwaŋnda chiee.”
37 Mi Keyaa dimi aa: “Tofawɔ! Waŋnda cho tolɔɔ o pembii cho lɛŋndeŋ tɛɛŋ nde choo, mi kundaa o pilɔɔ wa fulaa kumbuii yɔm bɛndoo Mɛwonɛnim cho ve.”
38 Mi Sɛbu dimul ndu aa: “A wa wɔ yoŋgaa kiolɔɔ ma dimi aa, ‘Wana maavɛɛ Abimɛlɛki cho yɛ le miŋ wa ndu o ba bɛŋgu?’ O cho waŋnda haa le ŋ wa pɛɛsaa le? Fula niko ma kɔ sɔŋga a nda.”
39 Okoŋ, mi Keyaa sim waŋ banaa Siɛkɛm lachi, ma sɔŋga a Abimɛlɛki.
40 Mi Abimɛlɛki tisa Keyaa kɔɔli, okoŋ mbo nyaanuŋ. Nduyɛ, ma lo wanaa bɔɔbɔɔ diuwo haaa ma fuuluu o dio kpaki chioo.
41 Mi Abimɛlɛki hiau lachi a challe Aluma. Okoŋ, mi Sɛbu soli Keyaa nda pɔmbuaa nduaa Siɛkɛm.
42 Diimandɔɔ, mi waŋnda kua yondolaŋ niŋ, nduyɛ mi Abimɛlɛki tuɛi a ndi okɔɔ.
43 Okoŋ, mbo chua waŋnda mbo piɔu nda kundalaŋ la yaa, ma kɔ vioŋnuŋ yondoo niŋ. Mɛɛ o che waŋnda fulaa o chioo niŋ, mbo kɔ del nda choo mbo diu diu nda.
44 Mi Abimɛlɛki a wanaa wa a ndu latulu wa hiau lachi ma kɔ sim o dio kpaki chioo. Nduyɛ, mi kundala tiɔɔŋndaŋ la del wanaa wa o yondolaŋ niŋnda choo, okoŋ ma diu diu nda.
45 Mi Abimɛlɛki niilu sɔŋgɔɔ kpɛŋ a nda o paale leŋ choo, okoŋ mbo bii chioo. Mbo diu diu wanaa wa o chiee koŋ niŋnda, mbo tɛɛmbuu ndu, nduyɛ mbo chuchu hɛlle lɛŋ.
46 Mɛɛ waŋ banaa wa o bandu vilɛiyo Siɛkɛm nda tuei a hei okɔɔ, ma kua sakpo o naa ndaa viaŋnaŋnda o maaŋ* Ɛl-biluiti wo.
47 Dimioo nuaa mi Abimɛlɛki tuɛi maa waŋ banaa o bandu vilɛiyo Siɛkɛm kpou chuuŋgiaŋ naapilɛ,
48 mi Abimɛlɛki a puaa wa ndu kɔɔli wa kpou kua o Pembii Samɔŋ Nde choo. Mbo chua chuei, mbo kialu lɛuvii yɔmndo, mbo handuŋ ndi o choŋgu. Mbo dimul wanaa wa ndu kɔɔli wa aa: “Nyɛ nya che ya tosaa wo, nya bɛɛ la tosa ndu chɔ chɔ!”
49 Mi wanaa wa Abimɛlɛki kɔɔli wa kpou kili lɛuwoŋ, ma tual ndu kɔɔli. Okoŋ, ma kɔ mɛli lɛuwuŋ muŋ o fondaŋ nda viaŋnuŋndo, ma mal muŋ o yiŋ. Mi wanaa wa o bandu vilɛiyo Siɛkɛm nda bɛɛ kpou wu. Nduyɛ puaa a waŋ laanduaa vi wa ndaa wa le 1,000.
50 Okoŋ kɔɔli, mi Abimɛlɛki kua Tibɛɛsi mbo kɔ chiŋalaŋ ndu a sɔŋgɔɔ, mbo bii ndu.
51 Chiɛi choo choo kala kalaa wa o chioo tɛɛŋ. Mi waŋ piaanduaa, waŋ laanduaa, a waŋ banaa chieeya kpou nyaanuŋ ma kɔ vioŋnuŋ loŋ. Okoŋ ma kiindiaŋ diolaŋ kɔɔli, ma helnuŋ o chiɛi choo choo wo tullo.
52 Mi Abimɛlɛki kua o chiɛi choo choo koŋ le ndu tɛɛmbuuwo. Mɛɛ o kuɛ o dio le chiɛiyo malɔɔ o yiŋ,
53 mi wana lanɔ pilɛ mal ndu pou lusulɛiyo o lebol, mbo pial ndu kpokpoo.
54 Mbo veelu wana ndɔ biilul ndu wolɔɔla chɔulaŋ ndo chɔ chɔ. Mbo dimul ndu aa: “Soli muɛi num ii faŋnde ma dii ya. Yɔŋii nda dimi aa, ‘Wana lanɔɔ dii ndu ni.’” Okoŋ, mi wana ndɔ malaa koŋ chuku ndu mbo wu.
55 Mɛɛ puaa Isɔluɛi che maa Abimɛlɛki vi, mi nda kpou miiŋguŋ o la nda lo.
56 Mɛɛ nuaa Mɛlɛka looku Abimɛlɛki maa miŋgul ni, le dɛnɛ wɔɔŋ bɛndu o tosa mbo diu diu puaa 70 waa finya ndɔ wa wo.
57 Mi Mɛlɛka miŋgul vɛlɛ waŋnda Siɛkɛm maa le dɛnɛ wɔɔŋ kɛ kɛ nda tosa. Nduyɛ mi sendi Chotam, po Chɛlubaal wo handu nda choo wo bii nda.
Tɛɛsiaalaŋ
^ Ɔɔ “sala.”
^ Ɔɔ “pɔyaa.”
^ Hibuluiye, “yɔŋ nyina wɔɔŋndo.”
^ Hibuluiye, “chiɛiyo.”
^ Ɔɔ “chiɛi.”
