Chɔɔsuaa 1:1-18
1 Mɛɛ Muuse buɛi Chɛhowa wo vi, mi Chɛhowa dimul Chɔɔsuaa* po Nuŋ ndo, wana malaa Muuse wo aa:
2 “Buɛi nuu Muuse vi. Lelaŋ, chɔŋ mi la taŋ Chɔɔdaŋ ndaŋ nya waŋnda Isɔluɛi kpou, mi la kuɛ o lɛŋnde ya cho nda kioo leŋ niŋ.
3 Fondaŋ o fondaŋ nya pila pelei pɛ, I cho nya ndu ke mɛɛ ya chuel Muuse buŋgɛi yɛ.
4 Lɛŋnde nyaleŋ le cho wa chɔŋ o pollo niŋ, mi le heelu Lebanɔŋ. Nduyɛ mi le chɛŋ o pee bɛndoo Yufiluaati mi le kuɛ o Pee Bɛndu Mɛŋma Ihɛllo* ba paaleŋ le del lo. Lɛŋnde Hitaitiiya kpou le cho wa leniŋ.
5 Haaa ma vi, wana o wana nɔla niŋ mbo simul num te. Mɛɛ ya wa latulu a Muuse yɛ, lende ya cho wa latulu a num ni. I mel num te, nduyɛ I feŋaŋ num kɔɔli le.
6 Nɔ kɔl simulaa, ma kendu ŋdial. Kanifuule, num cho tosa ni mi waŋnda haa sɔla lɛŋnde ya mɛnaŋ o finyaa ndaa mamaa lo le nda kioo leŋ.
7 “Num nɔ kɔl simulaa tuŋ, ma kendu ŋdial. Nduyɛ sawala buɛi nuu Muuse ke num ndaŋ, tosa nyɛ la dimi wo kpou. O pilɛ bɛɛ faŋaŋ lechoo ma sei o ba kɛndɔɔ ɔɔ o ba miallo choo le. Koŋ cho num mala ma tosa sɔɔŋ a taasi, ba o ba ŋ kɔ.
8 Nyɛ yau lasawaa hoo dimi wo nɔ mbo wa num o sondo teleŋ o teleŋ. Nduyɛ idii a ichɔl, a nɔ ma wa diomndaŋ veeloo leniŋ toolo toolo,* le ma tosa nyɛ o nyɛ cho o poonyiaa leniŋ. Koŋ cho tosa ma sɔla batiuwaa o nyɛ o nyɛ niŋ, nduyɛ ma tosa sɔɔŋ a taasi.
9 Ya dimul num ni maa nɔ kɔl simulaa, ma kendu ŋdial. Yɔŋ isiooŋ te, kanifuule ya Chɛhowa Mɛlɛka numndo, I cho wa latulu a num ba o ba ŋ kɔ.”
10 Okoŋ, mi Chɔɔsuaa dimul simlachiaa aa:
11 “La balu o dɔɔŋgɔɔ niŋ kpou mi la dimul waŋnda aa, ‘La bɛɛndiaa nyɛdiaa. Kanifuule, o palɛi i yaa bɛŋgu, la nɔ le pioo Chɔɔdaŋ taŋɔɔ mi la kɔ bii lɛŋnde Chɛhowa Mɛlɛka nyaa dimi le nya kioo leŋ.’”
12 Mi Chɔɔsuaa dimul kaale Lubɛŋ ndeŋ, kaale Kaadi leŋ, a kaale Manaasɛ leŋ tɛndaa tɛɛŋ aa:
13 “La loonuŋ maa mi Muuse buɛi Chɛhowa wo dimul nya aa: ‘Chɛhowa Mɛlɛka nyaa ke nya lɛŋndeŋ ndeŋ, nduyɛ mbo tosa mi la wa pɛŋgioo sɔlaa.
14 Laandaa nyaa, chuauwaa nyaa, a chɔluaa nyaa kpou cho wa o lɛŋnde Muuse ke nya o Chɔɔdaŋ ndaŋ leeloo* nanuŋ ndeŋ. Kɛ nya kuubaa dialuŋ kalaa haa kpou, la nɔ mi la wa a bɛɛndiaŋ le chɔuwo, mi la taŋ puaapiliaa nyaa lachi. La nɔ mi la lo nda malaa
15 haaa mi Chɛhowa tosa mi puaapiliaa nyaa sɔla pɛŋgioo, mɛɛ o tosa mi la sɔla pɛŋgioo yɛ. Nduyɛ, mi nda bɛɛ sɔla lɛŋnde Chɛhowa Mɛlɛka nyaa cho nda kioo leŋ. Okoŋ, mi la miiŋgu o lɛŋnde nda ke nya leŋ niŋ mi la chal loŋ, lɛŋnde Muuse buɛi Chɛhowa wo ke nya, o Chɔɔdaŋ ndaŋ ba paaleŋ le chaŋ ndo leŋ.’”
16 Ma mulul Chɔɔsuaa aa: “Ŋ cho tosa nyɛ o nyɛ ŋ dimul naa le tosaa. Nduyɛ ba o ba ŋ vem naa pɛ, ŋ cho lakɔ.
17 Mɛɛ naŋ tuei Muuse diom o nyɛ o nyɛ niŋ yɛ, lende koni naŋ cho num diom tueiyɔɔ ni. Maa Chɛhowa Mɛlɛka numndo wa a num latulu, mɛɛ o wa latulu a Muuse yɛ.
18 Wana o wana simul num pɛ nduyɛ mbo kɛɛ le nyɛ o nyɛ ŋ dimul ndu wo tosaa, o nɔ mbo sɔla piɔmndo. Num nɔ tuŋ kɔl simulaa, ma kendu ŋdial.”
Tɛɛsiaalaŋ
^ Ɔɔ “Chɛhosuaa.” Diolaŋ ndaŋ la sim, “Chɛhowa Cho Wana Piŋiaa Ni.”
^ Koŋ cho ni, pioo Mɛditalueniaa.
^ Ɔɔ “yiyaŋndo lechoo.”
^ Koŋ cho ni, ba paaleŋ le chaŋ ndo.
